Nebã wʋma a Zeezi sẽn maan bũmb ninsã kibare, baa sẽn be-b zĩ-zãrsẽ wã. Wʋsg babs-a-la hal tẽn-kɩremsẽ wã n na n kelg a goamã, la b ges a yel-soalmã. Rasem a wãn poore, a leba Kapɛrnawom sẽn be Galɩle mogrã noorã. Yaa be la a zĩnd n yɩɩda. Tao-tao bal tɩ nebã wʋmame t’a lebg n waame, tɩ neb kʋʋng wa pid roog ning a sẽn da beẽ wã. Sãnda ra yaa Fariizẽ-rãmb la tõogã karen-saam-dãmb sẽn yi Galɩle, Zʋʋde, la baa Zeruzalɛm.

“Nebã tigma taab hal wʋsgo, tɩ weer ka be baa rig-noorẽ wã ye. La a Zeezi moona bãmb Wẽnnaam koɛɛga.” (Mark 2:2) Masã wã, bũmb la a Zeezi na n maane. Yaa yel-solemd sẽn wilgd t’a tara tõog n na n kɩt tɩ namsg buud fãa sa, tɩ neb nins sẽn tẽed yẽ wã paam laafɩ.

Roogã sẽn da pid ne neb t’a Zeezi gomd tɩ b kelgdẽ wã, rap a naas n tʋk rao ne a gãag n wa. Raoã kii bogre. B ratame t’a Zeezi sãoog raoã sẽn yaa b zoa wã. La b “ka tõe n tall-a n ta a Zeezi nengẽ,” bala nebã ra waoogame. (Mark 2:4) Tags-y n ges-y rẽ sẽn sãamd sũur to-to. B kong n dʋʋ roogã zug n kɩbg võore, n tũ be n sik b zoa wã roogã pʋga.

B sẽn maan woto n tiis a Zeezi sõsgã, a sũurã yikame bɩ? Ayo. B sẽn wilg tɩ b tara tẽebã pʋd n yɩ-a-la noogo, hal t’a yeel sẽn ki-a bogrã yaa: “Fo paama f yel-wẽnã sugri.” (Matye 9:2) La rẽ yĩnga, a Zeezi tara sor n kõ ned a yel-wẽn sugr bɩ? Karen-saam-dãmbã ne Fariizẽ-rãmbã ra sokda b mens woto: “Yaa a wãn tɩ rao-kãngã gomd a woto? Bãmb paoogda Wẽnnaam. Ãnda n tõe n kõ yel-wẽn sugr tɩ ka Wẽnnaam b yembr tãa?”—Mark 2:7.

A Zeezi sẽn mi bũmb nins b sẽn tagsd b sũurẽ wã, a sok-b lame: “Yaa bõe tɩ yãmb tar tags wẽns y sũyã pʋse? Bʋg yeelg n yaa naana n yɩɩda: ‘Fo paama f yel-wẽnã sugr bɩ, bɩ yik n kẽne?’ ” (Matye 9:4, 5) A Zeezi kũumã sẽn na n yɩ maoongã yĩnga, a ra tõe n tika rẽ n kõ raoã a yel-wẽnã sugri.

A Zeezi wilga kʋʋngã ne sẽn da wɩt-b yẽ wã t’a tara sor n kõt yel-wẽn sugri. A wẽnemd n yeela ki-bogr soabã yaa: “Mam yeta foom tɩ f yik n dɩk f gãagã n kuili.” Tao-tao bala, raoã yikame n dɩk a gãagã n loog nebã nifẽ. Nebã fãa yɛɛsame! B pẽga Wẽnnaam n yeele: “Tõnd nan ka yã bũmb a woto nand ye”!—Mark 2:11, 12.

A Zeezi goamã wilgdame tɩ yaa yel-wẽnã n wa ne bãasã, la tɩ ned sã n paam a yel-wẽnã sugr zãng-zãnga, a paamda yĩns laafɩ hakɩɩka. Biiblã wilgame tɩ d yaab a Ãdem n beeg Wẽnnaam, tɩ yel-wẽnã bẽeg ninsaalbã fãa, tɩ rẽ kɩt tɩ b bẽedẽ la b kiidẽ. La a Zeezi sẽn yaa Wẽnnaam Rĩungã Rĩmã sã n wa rɩt naam tẽngã gill zugu, a na n kõo neb nins fãa sẽn nong Wẽnnaam la b tũud-a wã b yel-wẽnã fãa sugri. Wakat kãnga, ned baa a ye ka na n le lʋɩ bãag ye.—Rom-dãmbã 5:12, 18, 19.