MAMS-Y tɩ yãmb moonda koɛɛgã zak-zaka, n yi zak pʋgẽ n dabd yakã zakẽ. Yãmb tool n nee polɩɩs rãmb mobill sẽn wate. Y wẽe zakã noor t’a soabã pak tɩ y sɩng sõsga. Mobillã taa yãmb sẽn beẽ wã, n yalse, tɩ yãmb tũud-n-taagã wẽnemd n getẽ. Polɩɩs a ye n sig n kolg n sok yãmb woto: “Yaa yãmb y yiibã la sẽn kẽed zak-zak n gomd Biiblã yellã bɩ? Nebã yeela tõnd tɩ yãmb sẽn maandã pa noom-b ye!” Y maaga y yĩng n leok polɩɩsã ne waoogre, n yeel-a tɩ y yaa a Zeova Kaset rãmba. Na n baasa wãna?

Yel-kãngã sẽn na n baas to-to wã bee ne yãmb sẽn be tẽng ningã. Yʋʋma noorã, yãmb tẽngã goosneemã manesem yɩɩ wãn ne a Zeova Kaset rãmbã? Rẽ yĩnga, ned fãa tara sor n tũud a tũudum bɩ? Yãmb nengẽ sã n yaa woto, bɩ y bãng tɩ tõe tɩ yaa y saam-biis la y saam-bi-pogs n deng n mao b pãng tɛka, n tõog n paam sor bʋ-kaoodbã taoore, tɩ y tõe n moon koe-noogã tɩ gɩdgr kaẽ ye. (Fil. 1:7) Y sẽn beẽ fãa, y sã n bʋgs a Zeova Kaset rãmbã sẽn mao to-to n tõog n paam sor bʋ-kaoodbã taoorã, na n kenga y tẽebã hal sõma. Sags a tãabã sẽn pʋgdã pʋgẽ, d na n goma yɛl kẽer d sẽn tall n kẽng bʋ-kaoodbã taoor n paam bʋʋm. D sẽn paam tõogr ninsã wilgda vẽeneg tɩ Rĩungã sɩd beeme. Sã n da yaa ne d meng pãnga, d ra pa na n tõog ye.