1, 2. a) A Zezi da reng n togsame tɩ tʋʋm-kãseng la b na n tʋme. Yaa tʋʋm-bʋgo? b) Rẽ wata ne sok-bʋg sẽn tar yõodo?

NAOOR wʋsgo, politikã taoor-dãmb sã n pʋlem bũmbu, b pa pidsd ye. Baa sẽn dat-b ne b sũy fãa n pids b pʋlemsã mi n pa tõogd ye. La a Zezi Kirist sẽn yaa Wẽnnaam Rĩungã Rĩmã pa maand wa politikã taoor-dãmb ye. A pidsda a sẽn pʋlem fãa. Rẽ nooma tõnd hal wʋsgo.

² A Zezi sẽn deeg naamã yʋʋmd 1914, a sɩngame n na n pids gomd a sẽn da togs na maan yʋʋm 1900. A kũumã sẽn da wa n kolgdẽ wã, a yeela woto: “Wẽnnaam soolem koe-no-kãngã na n moona dũniyã tɛk fãa.” (Mat. 24:14) Gom-kãensã pidsg ra na n naaga bãnd ning sẽn wilgd t’a sɩnga a naamã rɩɩbã. La sẽn mik tɩ yaoolem dayã, neb wʋsg ka na n tall nonglem, b pa na n tũ Wẽnnaam, b na n basame tɩ yaa b mensã yell bal n pak-bã, wãn to la Rĩmã na n tõog n paam neb sẽn na n sak ne yamleoog n moon koɛɛgã? (Mat. 24:12; 2 Tɩm. 3:1-5) Yaa tɩlae tɩ d bao n bãng sok-kãngã leoore, bala yaa tõnd sẽn yaa kiris-neb hakɩkã n moond koɛɛgã.

3. Bõe la a Zezi yeel tɩ wilg t’a kɩsa sɩd t’a gomdã na n pidsame, la bõe n kɩt t’a ra kɩs sɩd woto?

³ D tẽeg a Zezi sẽn da togs bũmb ningã. A yeelame tɩ “koe-no-kãngã na n moona dũniyã tɛk fãa.” A sẽn yeel tɩ ‘na n mooname’ wã wilgdame t’a kɩsa sɩd t’a gomdã na n pidsame. A ra kɩsa sɩd tɩ yaoolem dayã, neb n na n sak ne yamleoog n moon koɛɛgã. La bõe n kɩt t’a Zezi ra kɩs sɩd woto? A rɩka a Ba wã mak-sõngã. (Zã 12:45; 14:9) Nand t’a Zezi wa tẽngã zugu, a bãngame t’a Zeova kɩsa sɩd tɩ sẽn tũud-b yẽ wã na n sak n maana a raabã ne yamleoogo. Bõe la a Zeova maan n wilg t’a kɩsa a nebã sɩda?

4. Bõe la a Zeova yeel Israyɛll nebã tɩ b maane, la b manesem yɩɩ wãna?

⁴ Tẽeg-y sẽn yɩ to-to, a Zeova sẽn wa n yeel a Moiiz t’a tilg sɛk-roogã, sẽn da na n yɩ zĩig ning Israyɛll nebã sẽn na n wat n pʋʋsdẽ wã. A kɩtame t’a Moiiz yeel nebã tɩ b teel tʋʋmdã. Ad a sẽn yeele: “Bɩ ned ning fãa sũur sẽn  noom ne Zu-soabã wa ne kũun n wa kõ bãmba.” Nebã maana wãna? Kibarã pʋgẽ, b yeelame tɩ yibeoog fãa, nebã ra tallda kũunã n wat a Moiiz nengẽ ne yamleoogo. Kũunã wa n lebga wʋsgo, hal tɩ b ‘gɩdg nebã tɩ b ra le wa’ ne bũmb ye. (Yik. 35:5; 36:3, 6) Israyɛll nebã sɩd wilgame t’a Zeova sẽn da kɩs-b sɩdã, a ra tara bʋʋm.

5, 6. Wa Yɩɩl Sõamyã 110:1-3 sẽn wilgdã, a Zeova ne a Zezi ratame tɩ kiris-neb hakɩkã tʋm tʋʋmdã wãn-wãna?

⁵ La rẽ yĩnga, yaoolem dayã sasa, a Zeova ra na n paamame tɩ neb nins sẽn tũud yẽ wã sak ne yamleoog n tʋm a tʋʋmdã bɩ? N-ye! Yʋʋm 1000 sẽn deng a Zezi rogmã, a Zeova vẽnega a Davɩɩd t’a gom bũmb ning sẽn na n maane, Mesi wã sã n wa sɩng a naamã rɩɩbo. (Karm-y Yɩɩl Sõamyã 110:1-3.) A wilgame t’a Zezi sã n wa reeg a naamã paalem, bɛɛb n da na n kɩɩs-a, la neb wʋsg me n da na n teel-a tɩ pa tũ ne modgr ye. Baa kom-bɩɩsã ra na n dɩka b mens n kõ ne yamleoogo. B sõorã ra na n paasdame, hal n lebg wʋsg wa meenem sẽn yit yibeoogo. *

⁶ A Zezi ra miime tɩ yaa yẽ yell la b sẽn gom Yɩɩl Sõamyã 110 pʋgẽ wã. (Mat. 22:42-45) Dẽnd a ra tõe n kɩsa sɩd t’a ra na n wa paama neb sẽn na n sak ne yamleoogo, n moon koe-noogã dũniyã gill zugu. Sɩd yɩɩ woto bɩ? Yaoolem dayã, Rĩmã paama neb sẽn sak ne yamleoog n moond koɛɛgã bɩ?

7. A Zezi sẽn deeg naamã poore, bõe la a maan n sõng a nin-buiidã tɩ b segl b mens tʋʋmd ning b sẽn da na n wa tʋmã yĩnga?

⁷ A Zezi sẽn deeg a naamã bala, a sɩngame n na n sõng a nin-buiidã tɩ b segl b mens n moon koɛɛgã. Wa d sẽn yã sak a 2 pʋgẽ wã, yʋʋmd 1914 n tãag yʋʋmd 1919 wã sɩngrẽ, a Zezi wa n gesa sẽn paam-b zaeebã, n yɩlg-b tũudmã wɛɛngẽ. (Mal. 3:1-4) D yãame me tɩ yaa yʋʋmd  1919 wã pʋgẽ la a yãk ‘tʋm-tʋmdã,’ sẽn na n ges a tẽedbã yellã. (Mat. 24:45) Rẽ tɛka, tʋm-tʋmdã tũnugda ne tigis-kãsemsã la sɛbã b sẽn yiisdã, n sõngd kiris-nebã tɩ b wʋmd Biiblã goamã võore, la a tẽegd-b n yɩlemdẽ tɩ kiris-ned fãa tog n kẽesa a meng koɛɛgã mooneg pʋgẽ.

8-10. Wãn to la tigis-kãsems sõng tɩ koɛɛgã mooneg paam pãnga? Kõ-y makre. (Ges-y zĩ-gũbrã sẽn yet tɩ “ Tigis-kãsems sẽn sõng tɩ koɛɛgã mooneg paam pãnga.”)

⁸ Tigis-kãseng sõssa: Biiblã Zãmsdbã ra ratame tɩ Wẽnnaam wilg-b sore. Rẽ n so tɩ b tigim taab yʋʋmd 1919, bõn-bɩʋʋng kiuug pipi daarã n tãag rasem a nii wã, Sedaar Põent, Ohio, sẽn be Etazĩni wã. Yɩɩ pipi tigis-kãseng dũni gill pipi zabrã poore. Rasem a yiib-n-soabã, saam-biig a Rutherford sõsg a ye pʋgẽ, a yeela kɛlgdbã woto: “Kiris-ned fãa tʋʋmd tẽngã zug . . . yaa Zu-soabã rĩungã koɛɛg moonego.”

⁹ Tigis-kãsengã rasem a nu wã daare, saam-biig a Rutherford sõsg a ye gom-zug n yɩ “Sõsg d tʋmd-n-taasã yĩnga.” Sõsgã kenga kɛlgdbã raoodo. B lebg n dɩka saam-biigã goamã Gũusg Gasgã sõsg a ye pʋgẽ. Sõs-kãng gom-zug yɩɩ “Moon-y Rĩungã.” B yeela be woto: “Toog sasa, kiris-ned sokda a meng bõe yĩng t’a be tẽngã zugu. La ad a sẽn tog n leoke: ‘Zu-soabã maana maam lohorem, n kɩt tɩ m yaa a tʋm-tʋmda, n moond koɛɛgã sẽn na yɩl tɩ nebã lebg n zems ne Wẽnnaam. Koɛɛgã mooneg yaa zu-zẽkre, leb n yaa tɩlae.’”

¹⁰ Saam-biig a Rutherford sõsgã pʋgẽ, a yeelame tɩ seb-paall la b na n yiisi, t’a gom-zug yaa L’Âge d’Or. (B boond-a lame masã tɩ Réveillez-vous !) A wilgame tɩ yaa sẽn na n sõng nebã tɩ b bãng tɩ Rĩungã bal la b segd n teege, n paam b yɛlã fãa tɩɩm. Rẽ poore, a sokame n ges ãnd dãmb n dat n sõng n pʋɩ sebrã. Sebr a yembr n gom tigis-kãsengã yelle, n yeel woto: “Kɛlgdb 6000 fãa yikame n yalse, n wilg tɩ b saka ne yamleoog n na n sõng n pʋɩ sebrã. Sɩd yɩɩ lingr menga.” * Dẽnd Rĩmã paama neb sẽn sak ne yamleoog n na n moon Rĩungã koɛɛgã ne b sũy fãa.

11, 12. Yʋʋmd 1920 wã, bõe la Gũusg Gasgã yeel-yã, n wilg wakat ning tʋʋmdã sẽn na n tʋmã?

¹¹ Sɛb b sẽn yiisi: Bilf-bilfu, Gũusg Gasgã sõnga kiris-nebã tɩ b bãng a Zezi sẽn yeel tɩ b moon Rĩungã koe-noogã sẽn dat n yɛɛlgã sõma n paase. Bɩ d ges sẽn yɩ to-to yʋʋmd 1920 wã tɛkã.

¹² Koe-bʋg la b ra tog n moon tɩ pids Matɩe 24:14 goamã? Wakat bʋg la b ra segd n moon koɛɛgã? Yʋʋmd 1920 sẽoog kiuug pipi daar Gũusg Gasgã pʋgẽ, sõsg a ye gom-zug n yɩ “Rĩungã evãnzillã.” Be, b wilga sẽn yaa koɛɛg ningã, n yeel woto: “Koe-noog ning yell b sẽn gom vɛrse wã pʋgẽ wã yaa b sẽn na n sãam a Sʋɩtãan dũni-wẽngã, la b sẽn na n lugl Mesi wã Rĩungã.” B wilga sẽn yaa wakat  ning la b tog n moon koɛɛgã, n yeele: “Yaa dũni gill pipi zabrã poore, n tãag ‘to-kãsengã’ la b segd n moon koɛɛgã.” B paasame tɩ: “Masã, wakat taame . . . tɩ d na n moon koe-no-kãng dũniyã gill zugu, kiris-neb ne yʋʋrã sʋka.”

13. Bõe la b yeel yʋʋmd 1921 Gũusg Gasg a ye pʋgẽ, tɩ sẽn paam-b zaeebã sak n tʋm tʋʋmdã ne yamleoogo?

¹³ La rẽ yĩnga, b ra na n modga Wẽnnaam nin-buiidã tɩ b tʋm tʋʋmd ning a Zezi sẽn kõ-bã bɩ? Ayo! Yʋʋmd 1921, tʋʋlg kiuug rasem 15 Gũusg Gasgã sõsg a ye gom-zug ra yetame tɩ “Tall-y raoodo.” Sõsgã kenga sẽn paam-b zaeebã raood wʋsgo. B sagla ned fãa t’a sok a meng woto: “Mam getame tɩ yaa tɩlae tɩ m moon koɛɛgã, la tɩ yaa zu-zẽkr bɩ?” Sebrã paasame: “D kɩsa sɩd tɩ y sã n sak n deeg tɩ koɛɛgã mooneg yaa zu-zẽkre, wa a Zeremi, Zu-soabã goam ‘na n lebga wa bugum yãmb sũurã pʋgẽ, n be yãmb kõbã pʋsẽ,’ tɩ y pa tõe n sĩnd n pa gom a yell ye.” (Zer. 20:9) Gom-kãensã sẽn kengd daoodã wilga vẽeneg t’a Zeova ne a Zezi kɩsa neb nins sẽn teend Rĩungã sɩda.

14, 15. Yʋʋmd 1922 wã, bõe la Gũusg Gasgã yeel sẽn paam-b zaeebã tɩ b maane, koɛɛgã mooneg wɛɛngẽ?

¹⁴ La kiris-neb hakɩkã ra na n maana wãn tɩ koɛɛgã ta neb a taabã? Yʋʋmd 1922, sa-sik kiuug rasem 15 Gũusg Gasgã gom-zug sẽn da yet tɩ “Koɛɛgã mooneg yaa tɩlae” wã pʋgẽ, b sagla kiris-neb nins sẽn paam vʋʋsem sõngã zaeebã tɩ b kẽes b mens koɛɛgã mooneg pʋgẽ, “n taas nebã bũmb ning Biiblã sẽn yetã, n moon zagsã pʋsẽ n kɩs kaset tɩ saasẽ Rĩungã waoong ta n saame.”

¹⁵ Yʋʋmd 1919 wã tɛka, Kiristã tũnugda ne tʋm-tʋmd sẽn tũud sɩd la sẽn tar yamã, n togsd n yɩlemdẽ tɩ kiris-ned fãa tʋʋmd tẽngã zug yaa Rĩungã koɛɛg moonego, la tɩ yaa zu-zẽkre. Biiblã Zãmsdbã manesem yɩɩ wãna, b sẽn sagl-b tɩ b kẽes b meng koɛɛgã mooneg pʋgẽ wã?

16. B sẽn yeel tɩ nebã fãa tog n moona koɛɛgã, kãsem-dãmb kẽer manesem yɩɩ wãna?

¹⁶ Yʋʋmd 1920 wã poor n tãag 1940 sẽn wa n kolgdẽ wã, kẽer pa sak n deeg tɩ sẽn paam-b zaeebã fãa tog n moona koɛɛgã ye. Yʋʋmd 1927 sɩpaolg kiuug pipi daar Gũusg Gasgã bilga yɛlã sẽn da yaa to-to wã, n yeele: “Neb n be tigimsã pʋsẽ rũndã-rũndã n yaa kãsem-dãmba . . . n zãgs fasɩ tɩ b kõn sagl b saam-biisã tɩ b moon koɛɛgã, la b zãgs me tɩ bãmb mensã kõn moon koɛɛgã ye. . . . B maanda b toog kae ne b sẽn da sagl-b tɩ b kẽng zak-zak n moon Wẽnnaam koɛɛgã, n gom Rĩmã la Rĩungã yellã.” B paasa woto: “Wakat taame tɩ wẽn-sakdbã tog n bao n bãng nin-kãensã, n lak b mens fasɩ ne-ba, la b wilg-b tɩ b pa le rat tɩ b lʋɩ taoor tigissã sasa ye.” *

17, 18. a) Tigimsã neb wʋsg manesem ra yaa wãn ne tʋm-tʋmdã sẽn yetã? b) Sẽn yɩɩd yʋʋm koabga, bõe la neb milyõ rãmb sak n maandẽ?

¹⁷ Tigimsã pʋsẽ, neb wʋsg ra sakda tʋm-tʋmdã sẽn yetã ne sũ-noogo. B ra getame tɩ b sẽn paam n na n moon Rĩungã  koɛɛgã sɩd yaa zu-zẽkre. Yʋʋmd 1926, tʋʋlg kiuug rasem 15 Gũusg Gasgã ra goma rẽ yell n yeel woto: “Wẽn-sakdbã na n kõo b mens ne yamleoogo . . . n moon koe-kãngã.” Wẽn-sakdb kãensã sẽn tall manesem ningã wõnda b sẽn da reng n togs tɩ be Yɩɩl Sõamyã 110:3 pʋgẽ wã. B wilgame tɩ b saka ne yamleoog n na n teel Mesi wã naam.

¹⁸ Sẽn yɩɩd yʋʋm 100, neb milyõ rãmb n sakd ne yamleoog n moond Rĩungã koɛɛgã. Sags nins sẽn pʋgdã pʋgẽ, d na n bao n bãnga b sẽn maan to-to n moon koɛɛgã, b sẽn tũnug ne tʋʋm-teed ninsã, la tʋʋmdã sẽn wom biis ninsã. La nananda, bɩ d ges bũmb ning sẽn kɩt tɩ neb milyõ rãmb moond Rĩungã koɛɛgã ne yamleoogo, tɩ neb wʋsg yaool n yaa bãmb mensã yell bal n pak-ba. D sã n wa gomd rẽ yelle, bɩ ned fãa sok a meng woto: ‘Bõe yĩng tɩ m naag neb a taabã n moond koɛɛgã?’

19. Bõe yĩng tɩ d tũud a Zezi saglgã, n lʋɩɩsd Rĩungã yɛl taoore?

¹⁹ A Zezi yeela a karen-biisã tɩ b “reng n bao Wẽnnaam soolem.” (Mat. 6:33) Bõe yĩng tɩ d tũud sagl-kãngã? Sẽn yɩɩd fãa, yaa d sẽn mi tɩ yaa ne Rĩungã maasem la Wẽnnaam raabã na n pidsã. Wa d sẽn yã sak ning sẽn loogã pʋgã, vʋʋsem sõngã sõnga kiris-nebã bilf-bilf tɩ b bãng bũmb wʋsg Rĩungã zugu. D sẽn bãng bũmb nins Rĩungã zugã sã n kẽ d sũurã sõma, na n kɩtame tɩ d reng n bao Rĩungã.

20. A Zezi yel-bũndã wilgda kiris-nebã manesem sẽn da na n yɩ to-to, a sẽn sagl-b tɩ b reng n bao Rĩungã. Bõe yĩng tɩ d tõe n yeel woto?

²⁰ A Zezi sẽn sagl kiris-nebã tɩ b reng n bao Wẽnnaam Rĩungã, a ra mii b manesem sẽn na n yɩ to-to. A wilga rẽ a yel-bũnd ning pʋgẽ a sẽn gom bõn-sõma sẽn solg pʋʋg pʋgẽ yellã. (Karm-y Matɩe 13:44.) A Zezi yeelame tɩ ka-koaad n da be pʋʋgẽ n tʋmdẽ, n wa yã bõn-sõng sẽn solge. Tao-tao bala, a bãngame t’a yõodã yaa wʋsgo. Bõe la a maan-yã? A Zezi yeelame t’a “sũur sẽn yaa noog bõn-kãng yĩnga, a kẽngame n koos a sẽn tarã fãa n da pʋʋgã.” Yam bʋg la d tõe n dɩke? D sã n bãng sɩdã Rĩungã zugu, n sɩd yã t’a yõodã yaa wʋsgo, d sakda ne yamleoog n maan d sẽn tõe fãa n lʋɩɩs Rĩungã yɛl taoore. *

21, 22. Bõe la sẽn teend-b Rĩungã maanda, n wilgdẽ tɩ b lʋɩɩsda Rĩungã yɛl taoore? Kõ-y makre.

²¹ Neb nins sẽn teend Rĩungã pa yet ne noor bal tɩ b rengd n baooda Rĩungã ye. B wilgda rẽ ne b tʋʋmã. B maanda bũmb fãa Rĩungã yĩnga, n dɩkd b bãngrã, b minimã la b tarmã n sõngd ne koɛɛgã moonego. Neb wʋsg monga b mens bũmb wʋsgo, sẽn na yɩl n lebg so-pakdba. B sẽn maan woto ne yamleoogã, b sɩd yãame t’a Zeova ningda sẽn lʋɩɩsd-b Rĩungã yɛl taoorã barka. D ges makr sẽn wilgd rẽ.

 ²² Yʋʋmd 1930 wã sẽn wa n kolgdẽ wã, a Avery Bristow ne a pag a Lovenia ra yaa so-pakdb n be Etazĩni. Yʋʋm wʋsg poore, a Lovenia yeela woto: “Maam ne a Avery sẽn yaa so-pakdbã tɛkã, d paama sũ-noogo. Naoor wʋsgo, d ra pa mi d sẽn na n paam ligd zĩig ning n da rɩɩb bɩ esãens ye. La a Zeova maana bũmb toor-toor n sõng-do. D pa tol n bas so-pakrã ye. D ra paamda bũmb nins sẽn yaa tɩlae ne-dã.” A Lovenia tẽega bũmb sẽn maane, b sẽn da wa n be Pẽnsakola sẽn yaa Floriid tẽng a ye wã. Daar a ye, b ra pa le tar ligdi, tɩ b rɩɩbã me sa. B sẽn moon n sa n lebg n wa yiri, b mika yond a yiib sẽn dɩg ne rɩɩbo, n paas sebre. Sebrã zugu, b gʋlsa woto: “Pẽnsakola tigingã neb fãa kũuni. D nong-y-la wʋsgo.” A Lovenia tagsa b sẽn yɩ so-pakdb yʋʋm wʋsgã yell n yeele: “A Zeova pa tol n bas tõnd ye. D zɩ n maan d bãngẽ, d sẽn teeg-a wã ye.”

23. Bõe yĩng tɩ y sẽn paam n bãng bũmb wʋsg Rĩungã zugã noom yãmba, la bõe la y yãk yam n na n maane?

²³ D fãa sẽn dɩkd sẽk ning n moond koɛɛgã pa yembr ye. D yɛlã pa taab ye. La tõnd ned kam fãa tog n gesame t’a sẽn paam n moond koɛɛgã yaa zu-zẽkre. (Kol. 3:23) D sẽn mi tɩ d sẽn bãng sɩdã Rĩungã zugã tara yõod wʋsgã, d sakda ne d sũy fãa n mongd d mens bũmb wʋsgo, sẽn na yɩl n moon koɛɛgã wa d sẽn tõe fãa. Pa woto la yãmb maand sɩda?

24. Yaoolem dayã, bõe la b tõog n maan Rĩungã maasem yĩnga, tɩ yaa bõn-kãsenga?

²⁴ Yʋʋm koabgã sẽn loogã, Rĩmã sɩd pidsda a goam nins a sẽn deng n togs tɩ be Matɩe 24:14. La a pa modgd a karen-biisã tɩ b moon koɛɛgã ye. B sẽn pa le yaa rat-m-yembr dãmb wa dũni-kãngã nebã yĩnga, b sakda ne yamleoog n moond koɛɛgã. B sẽn moond koe-noogã dũniyã gill zugã naaga bũmb nins sẽn na n yɩ bãnd n wilg t’a Zezi rɩta naamã. Leb n yaa bõn-kãseng a ye b sẽn maand yaoolem wakatã, Rĩungã maasem yĩnga.