SAK 53
Yãkd-y reem sẽn tat a Zeova yam
A Zeova yaa “Wẽnnaam sẽn yaa sũ-noog soabã.” (1 Tɩmote 1:11) A ratame tɩ d tar sũ-noogo, tɩ d vɩɩmã me noom-do. A sũur noomame, d sã n mi n yãk wakat n na n vʋʋse, la d kok pemsem. Sag-kãngã pʋgẽ, d na n yãa d sẽn tõe n maan to-to tɩ wakat nins d sẽn yãkd vʋʋsg bɩ pemsem kokr yĩngã yɩ sũ-noog wakate, la ta a Zeova yam me.
1. Bõe yell la d segd n tẽege, d sã n wa na n yãk d sẽn na n maan n kok pemsem bɩ n deeme?
Y sã n wa na n kok pemsem, bõe la y nong n maandẽ? Neb kẽer nong n paada zakẽ n karem sebre, n kelg miziki, n ges filim wall n kẽ ẽntɛrnetã pʋgẽ. Sãnda me nong n naagda b zo-rãmb tɩ b yi n gilgi, n deem koom, wall b tão ze. Sẽn yaa bũmb ning fãa la d yãk yam n na n maan n kok pemsem bɩ n deeme, d segd n modgdame tɩ yɩ bũmb sẽn ‘tat Zu-soabã yam.’ (Efɛɛz rãmbã 5:10) Segdame tɩ d wʋm rẽ võor sõma, bala bũmb nins nebã sẽn nong n getẽ wã, n kelgdẽ, wall n maandẽ wã naaga ne yɛl a Zeova sẽn kisi. Wala makre, nen-kɛglem, yoobo, pa rẽ bɩ zĩn-dãmb yɛla. (Karm-y Yɩɩn-sõamyã 11:5.) Bõe n na n sõng-do, tɩ d bãngd n yãkd reem?
D sã n bao zo-rãmb sẽn nong a Zeova, na n naf-d-la wʋsgo. B leb n tõe n sõnga tõnd sõma reemã yãkr wɛɛngẽ. Wa d sẽn yã sak ning sẽn loogã pʋgẽ wã, “ned sã n tũud yam soaba, a paamda yam.” La d sã n nong n be ne neb sẽn pa nong a Zeova noyã, ‘yɛl n na n paam-do.’—Yel-bũnã 13:20.
2. Bõe yĩng tɩ d segd n gũusd ne sẽk ning d sẽn kẽesd reemã pʋgẽ wã?
Baa reem ning d sẽn yãkã sã n yaa sõma, yaa tɩlɛ tɩ d maan gũusgu, tɩ ra wa rɩ sẽk wʋsg ye. Sã n pa rẽ, d pa na n paam sẽk tʋʋm nins sẽn tar yõod n tɩ yɩɩdã yĩng ye. Biiblã pʋgẽ, b sagenda tõnd tɩ d ‘ra sãam d sẽkã ye.’—Karm-y Efɛɛz rãmb 5:15, 16.
D BAO N BÃNG N PAASE
D ges d sẽn tõe n bãng n yãk bũmb nins d sẽn na n maan n deem bɩ n kok pemsmã to-to.
3. Zãag-y y mens ne reem-yoodã
Bõe yĩng tɩ d segd n maan gũusg reem nins d sẽn yãkdã wɛɛngẽ? Ges-y VIDEO wã, tɩ rẽ poor bɩ y leok sogsgã.
-
Bõe n wilgd tɩ rũndã-rũndã reem kẽer wõnda reem nins b sẽn da reemd pĩnd wẽndẽ Rom soolmẽ wã?
-
Video wã pʋgẽ, bõe la a Dani bãng reemã wɛɛngẽ?
Karm-y Rom dãmb 12:9, tɩ rẽ poor bɩ y leok sokrã:
-
Wãn to la vɛrse-kãngã segd n sõng yãmb tɩ y bãng n yãk reem sẽn yaa sõma?
Bũmb kẽer a Zeova sẽn kis la bʋse? Karm-y Yel-bũn 6:16, 17 la Galat-rãmb 5:19-21. Vɛrse fãa kareng poor bɩ y leok sokrã:
-
Bũmb nins b sẽn sodgã sʋka, bʋs n wae n be rũndã-rũndã reemã pʋsẽ?
Y sẽn tõe n bãng n yãk reem to-to
Sok-y y menga:
-
Bõe? Yaa reem sẽn naag ne bũmb a Zeova sẽn kis bɩ?
-
Wakat bʋgo? Na n kɩtame tɩ m pa paam sẽk tʋʋm nins sẽn tar yõod n yɩɩdã yĩng bɩ?
-
Ãnda? Na n kɩtame tɩ m wae n be ne neb sẽn pa nong a Zeova bɩ?
Sẽn na yɩl n kogl d meng ne yelle, d segd n zãaga d meng wa d sẽn tõe fãa. Rẽ n so tɩ d segd n zãagd d meng ne reem buud fãa d sẽn tagsd tɩ pa na n naf-d ye
4. Ra sãam-y y sẽkã ye
Ges-y VIDEO wã, tɩ rẽ poor bɩ y leok sokrã.
-
Video wã pʋgẽ, baa ne saam-biigã sẽn da pa get bũmb sẽn pa sõma wã, bõe n wa n lebg zu-loɛɛg ne-a?
Karm-y Filip rãmb 1:10, tɩ rẽ poor bɩ y leok sokrã:
-
Wãn to la vɛrse-kãngã tõe n sõng tõnd tɩ d bãng n yãk sẽk ning d sẽn kẽesd reemã pʋgẽ wã?
5. Yãkd-y reem sẽn yaa sõma
Baa ne reem kẽer sẽn pa tat a Zeova yamã, bũmb wʋsg n be n tat a Zeova yam, tɩ d tõe n maan n deem bɩ n kok pemsem. Karm-y Koɛɛg soab 8:15 la Filip rãmb 4:8, tɩ rẽ poor bɩ y leok sokrã:
-
Reem-bʋg sẽn yaa sõma la yãmb nonge?
Bũmb toor-toor sẽn yaa sõma n be y sẽn tõe n maan n deem bɩ n kok pemsem
NEB KẼER SẼN YETE: “Reem nins sẽn naag nen-kɛglem, yoobo, pa rẽ bɩ zĩn-dãmb yɛlã pa wẽnga, sã n mik tɩ pa fo mengã n maand bõn-kãens ye.”
-
Y na n leokame tɩ bõe?
KƲMSGO
A Zeova ratame tɩ d yãk reem sẽn yaa sõma, tɩ kõ-d sũ-noogo.
Lebg-n-gese
-
Kiris-nebã segd n zãaga b mens ne reem-bʋs buudu?
-
Bõe yĩng tɩ d segd n maan gũusgu, sẽk ning d sẽn kẽesd reemã pʋgẽ wã wɛɛngẽ?
-
Bõe yĩng tɩ yãmb dat n yãkd reem sẽn tat a Zeova yam?
BŨMB A TAABA
Ãnd n segd n yãk bũmb nins d sẽn maand n deemdẽ bɩ n kokd pemsmã?
Bõe n na n sõng-y tɩ y bãng n yãk bũmb nins y sẽn na n maan n deem bɩ n kok pemsmã?
“Bũmb nins y sẽn maand n deemdẽ wã nafd-y lame bɩ?” (Yʋʋmd 2011 zĩ-likr kiuug pipi daar Gũusg Gasgã)
Sõsg ning gom-zug sẽn yaa ‘Mam pʋd n tõog n basa neb kisgrã’ pʋgẽ, ges-y bũmb ning sẽn kɩt tɩ rao a yembr toeem bũmb nins a sẽn da maand n deemdẽ bɩ n kokd pemsmã.
“Biiblã toeemda neba” (Yʋʋmd 2010 tʋʋlg kiuug pipi daar Gũusg Gasgã)
Pag a ye manesem sẽn yaa to-to b sã n wa yiisd filim sẽn naag ne zĩn-dãmb yɛl teleẽ wã.
D zãag d mens ne reem nins sẽn naag ne zĩn-dãmb yɛlã (2:02)
Découvrez aussi…
Sogsg nebã sẽn wae n sokdẽ
Zãms ned Biiblã rat n yeelame tɩ bõe?
Bao-y n bãng-y sogsg kẽer leoor nebã sẽn sokd tõnd sẽn zãmsd nebã Biiblã to-to wã zugu.
