SAK 15
A Zeezi yaa ãnda?
Hal pĩnd n tãag masã, a Zeezi naaga neb nins yʋy sẽn yi wʋsgã sʋka. Neb wʋsg mii a yʋʋrã, la b pa mi bũmb wʋsg a zug ye. A sẽn sɩd yaa ned ningã wɛɛngẽ me, b tagsgã yaa toor-toore. La Biiblã pʋgẽ, bõe la b yet a Zeezi zugu?
1. A Zeezi yaa ãnda?
A Zeezi yaa malɛk sẽn tar pãn-kãsenga. A bee saasẽ. Yẽ la a Zeova reng n naane, n yaool n na n naan bũmb a taabã. Yaa rẽ yĩng la b sẽn boond-a tɩ “bõn-naandsã fãa pipi soabã.” (Kolos rãmbã 1:15) Biiblã pʋgẽ, b boonda a Zeezi tɩ Wẽnnaam “Bi-ribl sẽn-ka-to wã,” bala yaa yẽ la a Zeova reng n naan a toore. (Zã 3:16) A Zeezi naaga a Ba a Zeova n tʋme, n sõng-a tɩ b naan bũmb a taabã fãa. (Karm-y Yel-bũn 8:30.) Hal ne rũndã, a ket n tara zood sẽn yaa sõma ne a Zeova. A leb n yaa “Gomdã,” rat n yeel tɩ Wẽnnaam koe-taasda, n taasd malɛgsã la ninsaalbã Wẽnnaam koees la a noy.—Zã 1:14.
2. Bõe yĩng t’a Zeezi wa tẽngã zugu?
Na maan yʋʋm 2 000 woto, a Zeova maana yel-solemde. A tũnuga ne a vʋʋsem sõngã, n dɩk a bi-riblã vɩɩm n ning pag yʋʋr sẽn boond t’a Maari pʋgẽ. Yaa pag sẽn da pa mi raoa. Rẽ kɩtame t’a Zeezi rog tẽngã zugu, n yaa ninsaala. (Karm-y Luk 1:34, 35.) A Zeezi waa tẽngã zug n na n yɩ Mesi wã bɩ Kiristã b sẽn da pʋlem t’a na n wa fãaga ãdem-biisã. a Biiblã bãngr-goam nins fãa sẽn gomd Mesi wã yellã pidsa a Zeezi zugu, tɩ rẽ sõng nebã tɩ b bãng tɩ yẽ la “Kiristã, Wẽnnaam ning sẽn vɩ wã Biigã.”—Matiye 16:16.
3. A Zeezi bee yɛ masã?
A Zeezi kũumã poore, Wẽnnaam vʋʋg-a lame t’a lebg malɛka, n leb saasẽ. Be, Wẽnnaam kõ-a-la “yʋʋr sẽn yɩɩd yʋy a taabã fãa.” (Filip rãmbã 2:9) Rũndã-rũndã, a Zeezi yaa malɛk sẽn tar pãn-kãseng meng-menga. A Zeova loogr poore, yẽ n pʋgda.
D BAO N BÃNG N PAASE
D ges a Zeezi sẽn sɩd yaa ned ningã n paase, la bõe yĩng tɩ tar yõod wʋsg tɩ d bao n bãng-a wã.
4. Pa a Zeezi la Wẽnnaam Sẽn-tõe-a-fãa wã ye
Biiblã pʋgẽ, b yetame tɩ baa a Zeezi sẽn yaa malɛk sẽn tar pãn-kãseng n be saasẽ wã, a sulgd n sakda a Zeova sẽn yaa a Wẽnnaam la a Ba wã. Bõe yĩng tɩ d tõe n yeel woto? Ges-y VIDEO wã. Y na n yãa Biiblã sẽn wilgd welgr ning sẽn be a Zeezi la Wẽnnaam Sẽn-tõe-a-fãa wã sʋka.
Vɛrse nins sẽn pʋgdã sõngda tõnd tɩ d bãng welgr ning sẽn be a Zeova ne a Zeezi sʋkã. Karm-y vɛrse fãa, tɩ rẽ poor bɩ y leok sogsgã.
Karm-y Luk 1:30-32.
-
Wãn to la malɛkã goamã wilgd welgr ning sẽn be a Zeezi ne Wẽnnaam a Zeova sẽn yaa “Sẽn ka-a to wã” sʋka?
Karm-y Matiye 3:16, 17.
-
A Zeezi lisgã wakate, bõe la koɛɛg ning sẽn yi saasẽ wã yeel-yã?
-
Yãmb tagsdame tɩ ra yaa ãnda koɛɛga?
Karm-y Zã 14:28.
-
Biig ne a ba sʋka, ãnda n yɩɩda? Yaa ba wã bɩ, bɩ yaa biigã?
-
A Zeezi boola a Zeova t’a Ba. Bõe la rẽ sõngd tõnd tɩ d bãnge?
Karm-y Zã 12:49.
-
A Zeezi tagsdame tɩ yẽ ne a Ba wã yaa yembr bɩ? La yãmb yẽ tagsdame tɩ bõe?
5. Bũmb nins sẽn wilgd t’a Zeezi la Mesi wã
Bãngr-goam wʋsg n be Biiblã pʋgẽ n gomd Mesi wã yelle, soab ning sẽn da na n wa fãag ãdem-biisã. Rẽ sõnga nebã tɩ b bãng ned ning sẽn yaa Mesi wã. Ges-y VIDEO wã, n bãng bãngr-goam kẽer a Zeezi sẽn pidsi, a sẽn wa n be tẽngã zugã.
Karm-y Biiblã bãngr-gom-kãense, tɩ rẽ poor bɩ y leok sogsgã:
Karm-y Miise 5:1 n bãng zĩig ning Mesi wã sẽn da na n dogã. b
-
A Zeezi sẽn dog zĩig ningã pidsa bãngr-gom-kãnga bɩ?—Matiye 2:1.
Karm-y Yɩɩn-sõamyã 34:21 la Zakari 12:10, n ges bũmb kẽer b sẽn da pĩnd n togs Mesi wã kũumã wɛɛngẽ.
-
Bãngr-gom-kãensã pidsame bɩ?—Zã 19:33-37.
-
Yãmb tagsdame t’a Zeezi mengã ra tõe n wẽna yɛlã tɩ gom-kãensã pids bɩ?
-
Bõe la rẽ wilgd a Zeezi wɛɛngẽ?
6. D sã n bao n bãng a Zeezi, nafda tõndo
Biiblã pʋgẽ, b wilgdame tɩ tara yõod tɩ d bao n bãng a Zeezi, la tʋʋmd ning Wẽnnaam sẽn kõ-a wã. Karm-y Zã 14:6 la 17:3, tɩ rẽ poor bɩ y leok sokrã:
-
Bõe yĩng tɩ d segd n bao n bãng a Zeezi?
A Zeezi paka sor tɩ d tõe n paam n yɩ Wẽnnaam zo-rãmba. A zãmsa nebã sɩdã a Zeova zugu, la ne yẽ maasem d tõe n wa paama vɩɩm sẽn kõn sa
NEB KẼER SẼN YETE: “A Zeova Kaset rãmbã pa tẽed a Zeezi ye.”
-
Yãmb yẽ yetame tɩ bõe?
KƲMSGO
A Zeezi yaa malɛk sẽn tar pãn-kãsenga. A yaa Wẽnnaam Bi-ribla, la Mesi wã.
Lebg-n-gese
-
Bõe yĩng tɩ b boond a Zeezi tɩ bõn-naandsã fãa pipi soaba?
-
Nand t’a Zeezi wa tẽngã zugu, bõe la a maan-yã?
-
Bõe n kɩt tɩ d miẽ t’a Zeezi la Mesi wã?
BŨMB A TAABA
Bũmb a taab sẽn wilgd t’a Zeezi la Mesi wã.
“Bũmb nins fãa b sẽn da reng n togs Mesi wã zugã wilgdame t’a Zeezi n yaa Mesi wã bɩ?” (Bee jw.org)
Biiblã sẽn sõngd tõnd to-to tɩ d bãng b sẽn boond a Zeezi tɩ Wẽnnaam bi-ribla võore.
“Bõe yĩng tɩ b boond a Zeezi tɩ Wẽnnaam Bi-ribla?” (Bee jw.org)
Biiblã pʋgẽ, b pa yet tɩ Wẽnnaam yaa mens a tãab ye. Ges-y bũmb nins sẽn wilgd rẽ.
“A Zeezi yaa Wẽnnaam bɩ? ” (Yʋʋmd 2009 tʋʋl-nif kiuug pipi daar Gũusg Gasgã)
Pag a ye vɩɩm sẽn toeem to-to, a sẽn bao n bãng bũmb ning b sẽn yet a Zeezi zug Biiblã pʋgẽ wã.
a Sak 26 ne 27 wã pʋgẽ, d na n yãa bõe yĩng tɩ ninsaalbã rat fãagre, la bõe la a Zeezi maan n na n fãag tõndo.
b Ges-y Vẽnegr a 2 soaba. Be, y na n yãa bãngr-gomd sẽn wilgd wakat ningã takɩ a Zeezi sẽn lebg Mesi wã.
Découvrez aussi…
Sogsg nebã sẽn wae n sokdẽ
Zãms ned Biiblã rat n yeelame tɩ bõe?
Bao-y n bãng-y sogsg kẽer leoor nebã sẽn sokd tõnd sẽn zãmsd nebã Biiblã to-to wã zugu.
