A Zozuwe lʋɩɩ Israyɛll nebã taoor n sõng-b yʋʋm wʋsgo. A sẽn wa n tar yʋʋm koabg la piiga, a kiime. A vɩɩmã tõre, Israyɛll nebã tũu a Zeova. La a kũumã poore, b sɩngame n pʋʋsd bõn-naands wa Kanaã nebã sẽn da maandã. B sẽn da pa le tũud a Zeova wã, a basame tɩ Kanaã naab yʋʋr sẽn boond t’a Yabin nams-ba. B kosa a Zeova sõngre, t’a Zeova yãk rao yʋʋr sẽn boond t’a Barak t’a na n lʋɩ taoor n sõng-ba, tɩ b le sɩng a tũubu.

No-rɛɛs poak a ye b sẽn boond t’a Deboora tʋmame tɩ b tɩ bool a Barak. A Zeova yeel-a lame t’a togs a Barak yaa: ‘Yãk rap tus-piig tɩ y kẽng Kison kʋɩlgã noor n tɩ zab ne a Yabin tãb-biisã. Be, yãmb na n tõoga a Sisera sẽn yaa a Yabin tãb-biisã naabã.’ La a Barak yeela a Deboora yaa: ‘Fo sã n pa tũ maam, mam pa na n kẽng ye.’ T’a Deboora yeel-a yaa: ‘M na n tũu foo. La bãng tɩ pa foo n na n kʋ a Sisera ye. A Zeova yeelame tɩ yaa pag n na n kʋ-a.’

A Deboora tũu a Barak ne a tãb-biisã n kẽng Taboor tãngã zugu, tɩ b na n segl b mens zabrã yĩnga. Tao-tao bala, a Sisera  tigma a tãb-biisã la a saar-dãmbã, tɩ b kẽng Kison kʋɩlgã noore. A Deboora yeela a Barak yaa: ‘Yaa rũndã la a Zeova na n kɩt tɩ f tõog bɛɛbã.’ A Barak ne a tãb-biisã tus-piigã kẽngame n na n tɩ zab ne a Sisera tãb-biisã sẽn tar pãng wʋsgã.

A Zeova kɩtame tɩ Kison kʋɩlgã pid n puugi, t’a Sisera saar-dãmbã sũd bẽgdẽ wã. A sigame n wudgi. A Barak ne a tãb-biisã tõoga a Sisera tãb-biisã, la a Sisera mengã pa ki ye. A zoeeme n tɩ solg pag a ye fu-roogẽ. Pagã yʋʋr la a Zayɛlle. A Zayɛll kõ-a-la bĩisim t’a yũ, la a pil-a ne fu-goabga. A Sisera sẽn da yɛ wã, a gũsame. La a Zayɛll rɩka fu-roog baaf n soos n kõs-a zugã t’a ki.

A Barak ra gẽesda a Sisera. A Zayɛll yii a fu-roogã pʋgẽ, n yeel a Barak yaa: ‘Wa kẽ tɩ m wilg-f rao ning fo sẽn gẽesdã.’ A Barak kẽeme n mik t’a Sisera kiime. A Barak ne a Deboora yɩɩlame n pẽg a Zeova, a sẽn sõng Israyɛll nebã tɩ b tõog b bɛɛbã. Yʋʋm 40 sẽn pʋglã, Israyɛll nebã zĩnda ne bãane.