A Bɛlsazaar n wa n lebg Babilon rĩma. Daar a ye yʋngo, a boola tẽngã nin-kãsems bãmb tusri, tɩ b wa kibsa. A kɩtame t’a tʋm-tʋmdbã tall teed b sẽn maan ne sãnem n wa. Yaa teed nins a Nebukadnezaar sẽn da wʋk a Zeova roogẽ wã. A Bɛlsazaar ne a nebã talla te-kãens n yũ rãam, la b kils b wẽnnaam-dãmbã. La zĩig pʋgẽ, ninsaal nug n puk n gʋlsd lalgã zugu, tɩ sẽn da be-b be wã pa tõe n wʋm gʋlsmã võor ye.

A Bɛlsazaar yɛɛsa wʋsgo. A boola a bag-bʋgdbã, n yeel-b yaa: ‘Ned ning sẽn na n tõog n wilg gʋlsmã võore, m na n kõ-a-la naam, t’a lebg rĩm a tãab-n-soab Babilon tẽngã pʋgẽ.’ Bag-bʋgdbã makame, la b baa a ye pa tõog ye. Na-pagã wa n yeela rĩmã yaa: ‘Rao n be tɩ b boond-a t’a Dãniyɛlle. A ra sõnga a Nebukadnezaar t’a wʋm yɛl sẽn yaa toog võore. A tõe n wilga foo gʋlsmã võore.’

B sɩd talla a Dãniyɛll n wa rĩmã nengẽ. A Bɛlsazaar yeel-a lame: ‘Fo sã n tõog n karem gʋlsmã la f wilg b võore, m na n kõo foo yubl sɛnn b sẽn maan ne sãnem, la m kõ-f naam tɩ f lebg rĩm a tãab-n-soab Babilon tẽngã pʋgẽ.’ La a Dãniyɛll yeelame yaa: ‘Mam pa rat f kũun ye. La m na n wilga foo gʋlsmã võore. Fo ba a Nebukadnezaar ra yaa wuk-m-meng soaba, t’a Zeova kɩt t’a lebg sik-m-meng soaba. Fo mii bũmb ning fãa sẽn paam-a wã, la fo pa waoog a Zeova ye. Bala fo rɩka a roogã laas b sẽn maan ne sãnemã n yũ rãam. Rẽ n so tɩ Wẽnnaam gʋls gom-kãensã: Mene, Mene, Tekɛl, la Parsin. Rat n yeelame tɩ Meed-rãmbã ne Pɛrs-rãmbã na n wa reega Babilon, la fo pa na n le yɩ rĩm ye.’

Wakat kãnga, ra wõnda tẽng baa a ye ra pa tõe n zab n deeg Babilon ye. Bala Babilon tẽngã ra tara lals sẽn yaa bɛda, tɩ kʋɩlg gũbg tẽngã. La yʋn-kãng bala,  Meed-rãmbã ne Pɛrs-rãmbã waame. Pɛrs rĩm a Sirus tuu ko-sor tɩ kʋɩlgã koom tũ n looge, tɩ sodaasã tõog n ta tẽngã lalse. B sẽn ta wã, b mikame tɩ kʋɩlensã pakame. Sodaasã kẽ n deega tẽngã, la b kʋ rĩmã. Rẽ poore, a Sirus lebga Babilon rĩma.

Yʋʋm-kãnga, a Sirus yeelame: ‘A Zeova yeela maam tɩ m lebg n me Zerizalɛm wẽnd-doogã. Israyɛll ned ning fãa sẽn date, a tara sor n na n tɩ sõng n me.’ Dẽnd wa a Zeova sẽn da yeelã, yʋʋm 70 Zerizalɛm sãoongã poore, zʋɩf-rãmb wʋsg lebg n kuila Zerizalɛm. A Sirus wʋka sãnemã ne wanzuri wã laas a Nebukadnezaar sẽn da wʋkã n kɩs tɩ b le tall n kẽng Zerizalɛm. Fo yãa a Zeova sẽn tũnug ne a Sirus to-to n sõng a nebã bɩ?