A Zeezi tʋm-tʋmdbã tũu noor ning a sẽn kõ-bã, n moon koɛɛgã dũniyã gill zugu. Yʋʋmd 47 wã, saam-biisã sẽn be Ãntiyoosã tʋma a Poll ne a Barnabaas tɩ b na n gilg n moone. B yiibã moona koɛɛgã ne yẽesem Aazimineer soolmã fãa pʋgẽ, wala makre Dɛrbe, Listr la Ikoniyom.

A Poll ne a Barnabaas ra moonda ned buud fãa koɛɛgã, rakã-rãmb la naong rãmba, kom-bɩɩs la nin-kẽemba. Neb wʋsg sakame n lebg Kirist karen-biisi. A Poll ne a Barnabaas moona Sipr guvɛrneer a Serziyus Polus koɛɛgã. La rao a ye sẽn bʋgd bagr n mak n na n gɩdg-ba, t’a Poll yeel-a yaa: ‘A Zeova na n sɩbga foo.’ Zĩig pʋgẽ, bag-bʋgdã lebga zoanga. Guvɛrneer a Polus sẽn yã rẽ, a lebga kiris-neda.

A Poll ne a Barnabaas ra moonda zĩig fãa. Zagsẽ, raasẽ, soayã zutu la zʋɩf-rãmbã karen-dotẽ. Vugri, Listr tẽngã pʋgẽ, b sãooga rao sẽn da yaa põore. Neb wʋsg sẽn yã yel-solemdã, b tagsame t’a Poll ne a Barnabaas yaa wẽnnaam-dãmba, tɩ b bao n na n maan maand n kõ-ba. La a Poll ne a Barnabaas gɩdg-b lame n yeel yaa: ‘Yaa Wẽnnaam bal la yãmb segd n waooge. Tõnd yaa ninsaalb bala.’ La zʋɩf-rãmb kẽer n wa n belg nebã, tɩ b lob a Poll kuga, n tẽed t’a kiime, tɩ b vu-a n yiis tẽngã. La a ra pa ki ye. Saam-biisã waa n dɩk-a lame n kuili. Rẽ zugẽ, a Poll leba Ãntiyoos.

Yʋʋmd 49 wã, a Poll le gilgame n moon koɛɛgã. A leba Aazimineer n tɩ ges saam-biisã, la a sãag hal Erop n moon  koɛɛgã. Wala makre, a kẽnga Atɛn, Efɛɛz, Filip, Tesalonik la tẽns a taaba. A Sɩlaas, a Luk n paas bi-bɩɩg a ye yʋʋr sẽn boond t’a Tɩmote n tũ a Poll n gilgi. B naaga taab n tʋme, n lugl tigimsi, la b sõng tigimsã neb tɩ b tẽebã paam pãnga. A Poll paa Korẽnt yʋʋmd la pʋɩ-sʋka, n sõng saam-biisã. A moona koɛɛgã, n zãms nebã, la a gʋls lɛta n tool tigims wʋsgo. A ra maanda fu-rot me n koosdẽ. La a Poll wa n leba Ãntiyoos.

Yʋʋmd 52 wã, a Poll le gilga naoor a tãab-n-soab n moone. A sɩnga Aazimineer. A kẽnga hal Filip tẽngã, n lebg n sig Korẽnt. A paa Efɛɛz yʋʋm wʋsgo, n zãms neba, n sãoog bãad-rãmba, la a sõng tigingã neba. A ra sõsda karen-doog pʋgẽ daar fãa, tɩ nebã kelgdẽ. Neb wʋsg lebga kiris-neba. A Poll sẽn moon koɛɛgã tẽns wʋsgo, a lebg n waa Zerizalɛm.