Yʋʋmd 2020 rasem a tãab tigis-kãsengã gom-zug yaa: “Kɩdm-y sũ-noog wakat fãa!” Sẽoog kiuug la sa-sik kiuugã pʋgẽ, d tẽed-n-taasã sẽn be dũniyã gill zugã fãa na n kelga tigis-kãsen-kãngã sõssã. A buud ra zɩ n zĩnd ye. Sẽn na yɩl tɩ rẽ tõoge, yɩɩ tɩlɛ tɩ b lebg sõssã b sẽn ãnrezistrã buud-goam kobs-nu la zak pʋgẽ. Tʋʋm-kẽeng a woto ra segd n dɩka yʋʋmd bɩ sẽn yɩɩd rẽ. La sẽn mik tɩ yaa koronavirisã yĩng la sẽn yɩ tɩlɛ tɩ b maan woto wã, sẽn lebgd-b sɛbã ra segd n lebga tigis-kãsengã sõssã fãa kiis a tã la rasem a wãn bal pʋgẽ.

A Zeova Kaset rãmbã biru-kãsengẽ wã, sẽn tʋmd-b sɛbã lebgr zĩigẽ wã ne sẽn get-b teedã raab yellã tʋma wʋsg tʋʋm-kãngã yĩnga. Sẽn tʋmd-b sɛbã lebgr zĩigẽ wã mikame tɩ yɩl n tʋm tʋʋmdã sõma, yaa tɩlɛ tɩ b paam tʋʋm-teed n paase, wala makre, mikoro-rãmb sẽn yaa sõma. Sẽn get-b teedã raab yellã maana b sẽn tõe fãa n paam mikoro-rãmb bãmb tusr n da, n tool na maan zĩis kobs-yi.

Sẽn na yɩl n kẽgs ligdi, b raa mikoro-rãmb zembala, n tool tẽn-yɛnga, tɩ bãmb deeg masã n pʋɩ, n tool tẽns a taabã. B sẽn da zembalã yĩnga, mikoro fãa ligd zemsa dolaarã ligdã koabg la pis-yopoe, toolgã ligd me sẽn naage. Kɩtame tɩ b paam n kẽgs wakɩr pisi, koabg zugu.

Sull ning sẽn get teedã raab yellã ra segd n daa rẽ fãa, n tool tʋʋl-nif la sig-noy kiuugã pʋgẽ bala. Wakat kãng tɩ bãn-longdgã yĩnga, te-koaasdbã wʋsg ra pa le wae n koosdẽ ye. Baa ne rẽ, sig-noy kiuugã ne a na n sa wã tɩ sɛbã lebgr biru-rãmbã fãa la bala, la Betɛll-dãmbã ne sɛbã lɛbgdb sull a taabã zoe n paama tʋʋmã teed b sẽn datã.

Ad a Jay Swinney sẽn yaa sẽn get-b teedã raab yellã yel-gɛtã sẽn yeele: “Betɛllã tʋm-tʋmdbã la neb nins sẽn da segd n tall teedã n wa wã zemsa taab sõma n tʋm sasa kãng fãa. Yɩɩ ne a Zeova vʋʋsem sõngã sõngr la d sẽn tõog n maan woto fãa tao-tao, n baas n kell n kẽgs ligdã d tẽed-n-taasã sẽn kõtã.”

A Nicholas Ahladis sẽn tʋmd sɛbã lebgr zĩigẽ wã yeelame: “Sɛbã lɛbgdb ra bee b rotẽ wã n pa tõe n yi bãagã yĩnga, la b sẽn paam tʋʋm-teedã kenga b raood wʋsgo. Baa ne b sẽn da pa tõe n paam n be ne b tʋmd-n-taasã, b tõog n tʋma ne taab sõma, n lebg sõss la video-wogd ne yɩɩla, buud-goam kobs-nu la zak pʋgẽ, n ãnrezistre.”

La tʋʋm a taab me la b ra segd n modg n tʋm tɩ sa, yʋʋmd 2020 rasem a tãab tigis-kãsengã yĩnga. Ligdã yãmb sẽn kõt ne donate.jw.org maasmã, la y kũun a taabã kɩtame tɩ d tõog n da mikoro-rãmb la tʋʋm-teed a taaba.