1. Yʋʋmd 66 soabã pʋgẽ, bõe n maan Zeruzalɛm? (Ges-y fotã sẽn be yĩngrã.)

MAMS-Y wa yãmb sẽn da na n yaa kiris-ned n vɩ Zeruzalɛm yʋʋmd 66 soabã pʋgẽ. Yʋʋm-kãnga, bũmb wʋsg n maane. Rom guvɛrneer a Foloris maana pãng n deeg talã 17 wẽnd-doogã laog bĩngr zĩigẽ. Rẽ kɩtame tɩ zʋɩf-rãmbã sũy yiki, tɩ b kʋ Rom sodaas wʋsgo, la b yeel tɩ b pa le rat tɩ Rom nebã soog-b ye. La pa yã n kaoos la Rom dãmbã yik n na n zab n dok b sũur ye. Kiis a tãab poore, Rom guvɛrneer a Sɛstius Galus yii Siiri ne sodaas tus pis-tã, n wa gũbg Zeruzalɛm. Zʋɩf-rãmbã sodaas zoeeme n tɩ solg wẽnd-doogã zak pʋgẽ, tɩ Rom sodaasã sɩng wẽnd-doogã lalg poogre. Tẽngã nebã yɛɛsa wʋsgo. Yãmb sã n da get bõn-kãensã fãa, y manesem na n yɩɩ wãna?

2. Kiris-nebã sẽn wa n yã tɩ Rom sodaasã gũbg tẽngã, bõe la b ra segd n maane? Bõe n maan tɩ rẽ tõoge?

² Yʋʋm a wãn sẽn deng rẽ, a Zeezi yeela a karen-biisã tɩ yell a woto n wate. A yeelame: “Yãmb sã n wa n yãnd sodaas sẽn gũbg Zeruzalɛm, bɩ y bãng t’a sãoongã kolgame. Dẽ, bɩ neb nins sẽn na n be Zʋʋde wã zoe n dʋ tãmse, tɩ neb nins  sẽn be Zeruzalɛm tẽngã pʋgẽ wã zoe n yi, la tɩ neb nins sẽn na n be-b wetẽ da kẽ tẽngã pʋgẽ ye.” (Luk 21:20, 21) La a Zeezi karen-biisã ra na n maana wãn n zoe n yi tẽngã tɩ sodaas wʋsg yaool n gũbg-a? Bũmb n wa n maan tɩ ling nebã. Rom sodaasã wa n tiig n loogame. Yɩɩ wa a Zeezi sẽn da togsã. Zabrã ray sõor boogame. (Mat. 24:22) Sodaasã sẽn lebg n loogã, karen-biisã ra tõe n tũ a Zeezi saglgã, n zoe tao-tao n dʋʋg Zʋrdẽ kʋɩlgã n kẽng tãensẽ wã. * Yʋʋmd 70 soabã, Rom sodaas a taab n lebg n wa Zeruzalɛm. So-kãngã, b sãama tẽngã. La neb nins sẽn tũ a Zeezi saglgã põsame.

3. Bõe n na n maan ka la bilfu, la bõe yell la d na n gom sõs-kãngã pʋgẽ?

³ A Zeezi sẽn yeel bũmb ning Zeruzalɛm sãoongã wɛɛngẽ wã paka tõnd rũndã-rũndã me. Bala, ka la bilfu, yell sẽn wõnd rẽ n na n zĩndi. A Zeezi tika bũmb ning sẽn maan pipi kiris-nebã wakatẽ wã, n wilg yɛl kẽer sẽn na n maan ‘to-kãsengã’ sẽn na n tiig n sɩngã sasa. (Mat. 24:3, 21, 29) Kiris-neb nins sẽn tũ a Zeezi saglgã põsa Zeruzalɛm sãoongã. Woto me, neb sẽn yaa kʋʋn-kãseng n na n põs sãoong ning sẽn watã sasa. (Karm-y Vẽnegr 7:9, 13, 14.) Yɩta sõma tɩ d bao n wʋm Biiblã sẽn yet yel-kãens sẽn watã zugã võore. Bala, yaa yõor yelle. Bɩ d gom rẽ yelle, la d ges d sẽn segd n maanega.

4. To-kãsengã na n sɩnga ne bõe?

⁴ To-kãsengã na n sɩnga ne bõe? Vẽnegr sebrã yeela bũmb sẽn leokd sok-kãngã. A bilga “Babilond kãsengã” sẽn yaa ziri tũudmã fãa wã sãoong sẽn na n yɩ to-to wã. (Vẽn. 17:5-7) Biiblã pʋgẽ, b maka ziri tũudmã fãa ne pʋg-yoodre. Rẽ zemsame. Bala, b taoor-dãmbã koosa b mens ne dũni-kãngã nanambsã. B sẽn dat naam dũni-kãngã pʋgẽ wã kɩtame tɩ b bas a Zeezi ne a Rĩungã teelgo, n teend ninsaalbã nanambsã, la b sakd n maand yɛl sẽn pa zems ne Biiblã sẽn yetã. B manesmã yaa toor fasɩ ne sẽn paam-b vʋʋsem sõng zaeebã sẽn tũud Wẽnnaam ne pʋ-peelem tɩ b mak-b ne pʋg-sad sẽn ka sãamã. (2 Kor. 11:2; Zak 1:27; Vẽn. 14:4) La ãnda n na n sãam ziri tũudmã b sẽn mak ne pʋg-yoodrã? Wẽnnaam a Zeova na n kɩtame tɩ “rũng sẽn yaa miuug masɩ” wã “yɩɩl piigã” sãam-a. “Rũng sẽn yaa miuug masɩ” wã makda Nasiõzĩni wã, tɩ “yɩɩl piigã” makd politik pãn-soaadb nins fãa sẽn teend-a wã.—Karm-y Vẽnegr 17:3, 16-18.

5, 6. Bõe n kɩt tɩ d tagsdẽ tɩ Babilond kãsengã sãoongã pa na n yɩ sẽn be-b ziri tũudmã pʋgẽ wã fãa sãoongo?

⁵ Babilond kãsengã sãoongã na n yɩɩ sẽn be-b ziri tũudmã pʋgẽ wã fãa sãoong bɩ? Wõnda pa na n yɩ woto ye. A Zeova vẽnega no-rɛɛs a Zakari t’a gom bũmb sẽn na n maan wakat kãngã yelle. A yeelame tɩ ned sẽn da be ziri tũudmã pʋgẽ na n yeela woto: “‘Mam ka no-rɛɛs ye, mam yaa ka-koaada. Hal mam bi-bɩɩlem wakate, mam tʋmd n kõta ned ning sẽn da-a maamã.’ Dẽ, b na n sok-a lame yaa: ‘Yaa bõe poglg la sẽn be fo yãoogẽ wã?’ La a na n leokame yaa: ‘Mam kẽnga neb nins sẽn nong maamã zakẽ tɩ b pogl-ma.’” (Zaka. 13:4-6) Rẽnd wõnda tũudum taoor dãmb  meng n na n bas b tʋʋmdã, la b yeel tɩ bãmb pa b tũudmã neb ye.

⁶ La Wẽnnaam nin-buiidã yɛl na n yɩɩ wãn wakat kãnga? A Zeezi yeelame: ‘Da-kãens sõorã sã n dag n ka boogẽ, ned baa a yembr dag n kõn põsẽ ye. La b booga da-kãens sõor nin-tũusdsã yĩnga.’ (Mat. 24:22) Wa d sẽn zoe n yã wã, yʋʋmd 66, zabrã day boogame, tɩ “nin-tũusdsã” sẽn yaa kiris-neb nins sẽn paam vʋʋsem sõng zaeebã tõog n zoe n yi Zeruzalɛm la a tẽn-kɩremsã. Woto me, to-kãsengã pipi babgã day sõor na n booga nin-tũusdsã yĩnga. Wẽnnaam pa na n bas tɩ “yɩɩl piigã” sẽn makd politik pãn-soaadbã sãam a nin-buiidã ye. Ziri tũudmã fãa sãoong poore, bãan n na n zĩndi. La na n yɩɩ wakat bilf bala.

7, 8. Ziri tũudmã sãoong poore, bõe la Wẽnnaam nin-buiidã na n paam weer n maane? Bõe n na n kɩt tɩ Wẽnnaam nin-buiidã yɩ toor wakat kãnga?

⁷ Bõe n na n maan ziri tũudmã sãoong poore? Na n yɩɩ makr wakate, sẽn na yɩl tɩ d wilg bũmb ning sẽn be d sũurẽ wã. Ninsaalbã fãa la bal na n baoo koglg dũniyã sigls pʋsẽ. Yaa rẽ la Biiblã sẽn yeel tɩ b na n tɩ soonda ‘tãms pĩis sʋkã.’ (Vẽn. 6:15-17) La a Zeova nin-buiidã na n baoo koglg a nengẽ. Pipi kiris-nebã wakatẽ, Rom sodaasã sẽn lebg n loogã pa sẽn na yɩl tɩ zʋɩf-rãmbã wʋsg paam n tuub n lebg kiris-neb ye. Ra yaa sẽn na yɩl tɩ sẽn zoe n ya-b kiris-nebã tõog n tũ a Zeezi saglgã, n zoe n yi tẽngã. Woto me, d pa segd n tẽ tɩ to-kãsengã pipi babgã ray sõor sã n wa booge, neb wʋsg na n tiig n tuubame n lebg kiris-neb ye. Na n kõo kiris-neb hakɩɩkã weer tɩ b wilg tɩ b nonga a Zeova, la b teel Kiris ba-biisã.—Mat. 25:34-40.

⁸ D pa mi yɛlã sẽn na n yɩ to-to wakat kãngã vẽeneg ye. La d miime tɩ na n yɩɩ toog wakate, la tɩ na n yɩɩ tɩlae tɩ d sak n bõn bũmb kẽere. Pipi kiris-nebã wakatẽ, sẽn zoe n yi-b Zeruzalɛmã basa b zags la b teedo, n tɩ vɩɩmd zĩig vɩɩmã sẽn pa nana n tõog n põse. (Mark 13:15-18) Rẽnd d ned kam fãa segd n soka a meng woto: ‘Mam na n sak n bõna m paoong bɩ? Mam na n sak n maana bũmb fãa a Zeova noyã sakr yĩng bɩ?’ Yãmb we n mams n gese! Wakat kãnga, na n yɩɩ tõnd bal n na n dɩk no-rɛɛs a Dãniyɛll togs-n-taare, n tũud a Zeova baa sẽn na n yɩ a soaba.—Dãn. 6:11, 12.

9, 10. a) To-kãsengã sasa, koe-bʋg la Wẽnnaam nin-buiidã na n moone? b) Wẽnnaam nin-buiidã bɛɛb manesem na n yɩɩ wãna?

⁹ To-kãsengã sasa pa na n yɩ ‘Wẽnnaam soolmã koe-noog’ mooneg sasa ye. Wakat kãng tɩ koe-noogã mooneg wakat loogame. Bala, rẽ tɩ ‘sɛɛbã’ taame. (Mat. 24:14) Sãmbg sẽn kae, Wẽnnaam nin-buiidã na n moona bʋ-kaoor koɛɛg sẽn na n zab nebã wʋsgo. Tõe tɩ koe-kãng na n yɩɩ b sẽn na n yetẽ t’a Sʋɩtãan dũniyã sãoong zãng-zãngã wakat taame wã. Biiblã maka koe-kãens ne sapɩlma, n yeel woto: “Sapɩlem zɩslem sẽn kolg kɩlo pis-naas yii yĩngr n dʋʋg ninsaalbã zutu. La sapɩlmã toog yĩnga, nebã paooga Wẽnnaam. Bala to-kãng talla pãng tɩ looge.”—Vẽn. 16:21.

¹⁰ Tõnd bɛɛbã na n wʋma koe-kãens tɩ b sũyã yik wʋsgo. Wẽnnaam tũnuga ne no-rɛɛs a Ezekɩyɛll n wilg Goog sẽn yit Magoogã sẽn na n maan bũmb ninga. Goog sẽn yit Magoogã yaa tẽns toor-toor sẽn na n naag taaba. A Zeova goma a yelle, n yeel woto:  “Ade, maam a Zu-soab a Sẽn-Ka-Saab yetame: ‘Badaare, tags-wẽns n na n wa f sũurẽ, la fo na n saaga saag-wẽnga.’ Fo na n yeelame: ‘Mam na n kẽng n tɩ zaba ne tẽng sẽn yaa vɩʋʋgo, mam na n zaba ne neb sẽn vɩ ne yam-gãnega, n zĩ ne bãane, tɩ b fãa be tẽms sẽn ka tar lals pʋse, tẽms sẽn ka tar rignoy tɩ b sokd kʋɩlen-kuy ye. Mam na n zɛɛ teedo, mam na n fãame. Fo na n tẽega f nug n zab ne neb sẽn lebs n me rabood n kẽ, neb sẽn yi buud toay-toay sʋk n lebg n wa, n tar rũmsi, ne arzegse, n be dũniyã tẽn-sʋka.’” (Eze. 38:10-12) Wẽnnaam nin-buiidã na n yɩɩ toor fasɩ, tɩ yaa wa b welgame n tɩ “be dũniyã tẽn-sʋka.” Rẽ na n kɩtame tɩ dũniyã pãn-soaadbã sũy puug wʋsgo. B na n yikame n dat n zab ne neb nins a Zeova sẽn zae ne a vʋʋsem sõngã, la ne b tũud-n-taasã.

11. a) Yɛlã sẽn na n pʋg taab to-to wã wɛɛngẽ, bõe la d pa segd n yĩmi? b) Ninsaalbã sã n wa yã bãnã sẽn na n puk saasẽ wã, b manesem na n yɩɩ wãna?

¹¹ Yel-kãensã loogr poore, bõe n na n maane? Biiblã pa wilg yɛlã sẽn na n pʋg taab to-to wã takɩ ye. La tõe tɩ yɛl kẽer na n sɩngame tɩ sãnda nan pa sa ye. A Zeezi sẽn wa n togsd a bãngr-gomd ning sẽn gomd sɛɛbã yellã, a yeela woto: “Bãn na n zĩnda wĩndgẽ, la kiuugẽ, la ãdsẽ, la tẽngã zugu, ko-kãsengã bʋrgã, la a ko-pɛmã na n yɛɛsa buud toay-toayã tɩ b ka mi b sẽn na n maan bũmb ning ye. Rabeem na n kʋʋ ninsaalba, bãmb sẽn gũud bũmb ning sẽn na n wa dũni zugã yĩngã. Bala, yĩngr pãens na n digimdame. Dẽ, b na n yãnda Ninsaal Bi-riblã sẽn zao sawadg n wat ne pãnga, la ne ziiri.” (Luk 21:25-27; karm-y Mark 13:24-26.) Gom-kãensã wilgdame tɩ bãn sɩd-sɩd na n zĩnda saasẽ bɩ? Wakatã sã n wa ta, d na bãnge. La sẽn yaa a soab me, bãnã na n kẽesa Wẽnnaam bɛɛbã rabeem, tɩ b pa mi b sẽn maandg ye.

12, 13. a) A Zeezi sã n wa wa “ne pãnga, la ne ziiri,” bõe la a na n maane? b) Wakat kãnga, Wẽnnaam nin-buiidã manesem na n yɩɩ wãna?

¹² A Zeezi sã n wa wa “ne pãnga, la ne ziiri,” bõe la a na n maane? A na n keoa sẽn sakd-b Wẽnnaamã, la a sɩbg wẽn-kɩɩsdbã. (Mat. 24:46, 47, 50, 51; 25:19, 28-30) A wẽe yel-bũnd n wilg rẽ sẽn na n yɩ to-to wã. A yeelame: “Ninsaal Bi-riblã sã n wa ne b ziirã, la ne b malegsã fãa, b na n zaoonda b ziir geerã zugu. Soolem toay-toayã fãa nebã na n tigma bãmb taoore. Bãmb na n welga nebã ne taab wa rũm-kɩɩm sẽn welgd piis ne bʋʋsã. Bãmb na n ninga piisã b rɩtgo, la b ning bʋʋsã b goabga.” (Mat. 25:31-33) Bõe la neb nins b sẽn mak ne piisã segd ne, la bõe la b rãmb nins b sẽn mak ne bʋʋsã me segd ne? A Zeezi wilga rẽ a yel-bũndã baasgẽ. A yeela woto: “La nin-kãens [b sẽn mak-b rãmb ne bʋʋsã] na n kẽe sɩbgr sẽn kõn sa pʋgẽ, la nin-tɩrsã na n kẽe vɩɩm sẽn kõn sa wã pʋgẽ.”—Mat. 25:46.

¹³ B sẽn mak-b rãmb ne bʋʋsã sã n wa bãng tɩ “sɩbgr sẽn kõn sa” n gũud-ba, b manesem na n yɩɩ wãna? B sũy na n sãama wʋsg hal tɩ b wiisi. (Mat. 24:30) La Kiris ba-biisã ne b tũud-n-taasã sẽn teend-bã yẽ? B na n maana wa a Zeezi sẽn yeelã. A yeela woto: “Bõn-kãens sã n sɩng n watẽ, bɩ y roog la y nak n gese, bala, yãmb fãagrã kolgame.” (Luk 21:28) D sẽn kɩs sɩd t’a Zeova la a Zeezi Kiris na n fãag-d lame wã na n kɩtame tɩ d yam gãnd bãane.

14, 15. Goog sẽn yit Magoogã sã n wa sɩng zabr ne Wẽnnaam nin-buiidã, ãnd dãmb la b na n tigsi, la wãn to la b na n maan dẽ?

¹⁴ Goog sẽn yit Magoogã sã n wa na n zab ne Wẽnnaam nin-buiidã, bõe n na n maane? Biiblã yeela woto: “[Ninsaal Bi-riblã] na n tʋma b malegsã, n tigs b nin-tũusdsã sẽn be dũni kɩrems a naasã, hal dũni tɛk tɩ ta yĩngr tɛka.” (Mark 13:27; Mat. 24:31) Nin-tũusdsã tigsgã pa neb nins sẽn paam vʋʋsem sõng zaeebã yãkrã ye. Leb n pa sẽn paam-b vʋʋsem sõng zaeeb n ket tẽngã zugã sẽn na n paam yaoolem bãndã ye. (Mat. 13:37, 38) B na n paama yaoolem bãndã nand tɩ to-kãsengã sɩnge. (Vẽn. 7:1-4) Woto wã, tigsg ning yell a Zeezi sẽn gomã yaa bõe? Yaa sẽn paam-b vʋʋsem sõng zaeeb n ket tẽngã zugã saasẽ wã kẽngre. (1 Tes. 4:15-17; Vẽn. 14:1) B loogrã na n yɩɩ Goog sẽn yit Magoogã sã n wa sɩng zabr ne Wẽnnaam nin-buiidã poor bilfu. (Eze. 38:11) Rẽ poore, a Zeezi sẽn yeel bũmb ningã na n pidsame. A yeela woto: ‘Dẽ, nin-tɩrsã na n yãga wa wĩndg bãmb ba soolem pʋgẽ.’—Mat. 13:43. *

¹⁵ Neb kẽer sẽn yet tɩ b yaa kiris-neb tẽedame tɩ b na n zẽkame n kẽng saasẽ. B leb n tẽedame t’a Zeezi na n lebg n waame tɩ nebã fãa yã-a. La Biiblã wilga vẽeneg t’a Zeezi waoongã pa bũmb d sẽn na n yã ne nif ye. Wala makre, a yeelame tɩ ‘Ninsaal Bi-riblã bãnd na n puka saasẽ,’ la t’a na n zaoonda sawat n wa. (Mat. 24:30) Biiblã leb n yeelame tɩ  “ninsaal yĩng ne zɩɩm ka tõe n paam Wẽnnaam soolmã ye.” Rẽ n so tɩ neb nins sẽn na n kẽng saasẽ wã segd n ‘paam tedgr wakat a yembre, nif kamsg pʋgẽ, yaoolem baorg peebgã wakate.’ * (Karm-y 1 Korẽnt-rãmb 15:50-53.) Rẽnd b na n tigma sẽn paam-b vʋʋsem sõngã zaeeb n ket tẽngã zugã zĩig pʋgẽ tɩ b kẽng saasẽ.

16, 17. Bõe n na n deng n maan nand tɩ Pe-bilã yi-kãadmã kibs sɩnge?

¹⁶ Neb 144000 sẽn paam vʋʋsem sõng zaeebã fãa sã n wa be saasẽ, pe-bilã yi-kãadmã tõe n sɩngame. (Vẽn. 19:9) La bũmb n segd n deng n maane. Tẽeg-y tɩ yaa Goog sã n wa sɩng zabr ne Wẽnnaam nin-buiidã poor bilf la sẽn paam-b vʋʋsem sõng zaeeb n ket teng zugã na n kẽng saasẽ. (Eze. 38:16) Wẽnnaam nin-buiidã manesem na n yɩɩ wãn zabrã sasa? Na n wõnda wẽn-tũudb nins sẽn ket tẽngã zugã pa tar koglg zĩig ye. La b na n tũu saglg ning b sẽn da kõ Israyɛll nebã rĩm a Zozafat wakatẽ wã. B yeel-b-la woto: “Bãng-y tɩ ka zabr la y na n zab ye. Kẽng-y be n tɩ yalse, yals-y yĩngr bal n ges fãagr ning Sẽn-Ka-Saab sẽn na n fãag Zʋʋda ne Zeruzalɛm nebã. Da zoe-y rabeem, la ra yɛɛs-y ye!” (2 Kib. 20:17) La pa na n yɩ woto ne sẽn be-b saasẽ wã ye. Vẽnegr 17:14 goma Wẽnnaam nin-buiidã bɛɛb sẽn na n maan bũmb ning wakat kãngã yelle, n yeel woto: ‘Bãmb na n zaba ne pe-bilã. La pe-bilã na n tõog-b lame, tɩ bõe bãmb yaa zu-soben-dãmb Zu-soabã la rĩm-dãmbã Dĩmã. La neb nins b sẽn boolã, neb nins b sẽn tũusã, ne neb nins sẽn maand sɩdã, n be ne pe-bilã na n tõog-b lame me.’ Rẽnd a Zeezi ne a na-rɩt-n-taas 144000 sẽn be saasẽ wã na n yikame n sõng Wẽnnaam nin-buiidã tẽngã zugu.

¹⁷ Rẽ n na n wa ne Armagedõ zabrã sẽn na n kɩt tɩ Wẽnnaam yʋʋrã paam waoogrã. (Vẽn. 16:16) Wakat kanga, neb nins b sẽn mak ne bʋʋsã na n paama “sɩbgr sẽn kõn sa,” tɩ tẽngã ya n paam a meng ne wẽnemã. Sẽn paase, kʋʋn-kãsengã na n põsa Armagedõ zabrã sasa. Rẽ masã la pe-bilã yi-kãadem ning yell Vẽnegr sebrã sẽn gomdã na n sɩnge. (Vẽn. 21:1-4) * Sẽn na n vɩɩmd-b tẽngã zugã na n paama Wẽnnaam lohorem. Sẽn paase, Wẽnnaam na n maana bũmb wʋsg n wilg t’a nong-b lame. Ad pe-bilã yi-kãadmã kibs sɩd na n waa ne barka! Y pa gũud rẽ ne y sũur fãa sɩda?—Karm-y 2 Pɩyɛɛr 3:13.

18. D sẽn mi tɩ bõn-sõma n na n wa ka la bilfã, bõe la d segd n modg n maane?

¹⁸ D sẽn gũud bõn-sõma kãensã sẽn na n wa ka la bilfã, bõe la d ned kam fãa segd n maane? A Zeova kɩtame tɩ tʋm-tʋmd a Pɩyɛɛr yeel woto: “Rẽ wã yĩnga, bõn-kãensã fãa sẽn na n wa n yẽnegã yĩnga, ges-y tɩ yãmb yel-manesmã ne y Wẽnnaamã tũub yɩ sõama! Gũus-y-yã, la y modg n kɩt tɩ Wẽnnaam daarã wa tao-tao. . . . Mam zo-nongdse, gũudum-kãngã pʋgẽ, modg-y tɩ bãmb na mik tɩ yãmb ka tar rẽgdo, la tɩ y ka tar bũmb sẽn ka zemse, la tɩ y bee laafɩ pʋga.” (2 Pɩy. 3:11, 12, 14) Bɩ d maan d sẽn tõe fãa n kell n zãag d meng ne ziri tũudmã, la d teel laafɩ Rĩm a Zeezi Kiris naamã.