Mam doga Moreyall galʋ-tẽngã sak a ye sẽn yaa naong rãmb sak pʋgẽ. Kiis a yoob mam dogmã poore, m ba wã maana kaalem, n bas m ma ne zakã. Mam da tara kẽem-dãmb a yopoe.

Mam sẽn wa n lebg bedr bilfu, m kẽe dorg yũubu, par n bao ligdi, nin-kɛglem tʋʋma, la m da tũud bi-beese. Wala makre, m sẽn wa n tar yʋʋm piiga, m da pʋgda pagb sẽn koosd b mense, la bi-bees sẽn pemsd neb ligdi, tɩ b sã n dat bũmb bɩ b tʋm maam. Mam da wae n yagda ziri, la m maand bũmb toor-toor n fibd nebã n dɩtẽ. M sã n da kaoos n pa paam ned n belge, m sũur pa noom ye.

Mam sẽn wa n na n ta yʋʋm 14 tɩ m bãnga nebã belgr sõma. Wala makre, n da tõe n daa monta, zũy la nugbĩns sẽn pɩnda, n maag m yĩng n gʋls b zut tɩ yaa neer wa masĩn n gʋlse. M da gʋlsdame tɩ maana ne sãnem halaale. Rẽ poore, m yekda sorã, wall m kẽng butik-bɛdã parkĩng-rãmbẽ n tɩ koose. Mam sẽn da maand woto n paamd ligd nana-nana wã noom-m lame. Vugri, m paama milyõ a naas la zak daar a ye.

B ra tɩ kẽesa maam lekoll tɩ yaa kamb nins sẽn pa wʋmd tʋbrã la b reegd be tɩ b gõe la karemdẽ. La m sẽn wa tar yʋʋm 15, b riga maam n yiisi, tɩ m pa le tar zĩig n gõe ye. M da gõee yɩnga, wall m mi n tũ m zoa ning n tɩ gãand a zakẽ.

Mam sẽn da tʋmd pʋ-lik tʋʋmã yĩnga, polɩɩs-rãmbã mi n yõka maam. La mam sẽn da pa koosd wagdem teedã kɩtame tɩ b zɩ n pag maam roog ye. La mam sẽn da fibd nebã, n paas m sẽn da koosd teed n yaool n pa tar sebrã, b mi n kɩtame tɩ mam yao amande. Mam sẽn da pa zoet nedã yĩnga, bi-bees nins sẽn pemsd neb ligdã mi n tʋma maam tɩ m tɩ sok b samde. Sam-soab ning ra tõe n maana maam yelle. Rẽ n so tɩ wakat ninga, m da zãada bug-raoogo. Mam tʋma ne bi-bees sul menga.

Yaa mam sẽn wa n tar yʋʋm 17 wã la m wʋm Biiblã koɛɛg pipi. Rẽ tɩ mam da tɩ  vɩɩ ne m pʋg-sad a ye, t’a wa sɩng Biiblã zãmsg ne a Zeova Kaset rãmbã. La mam da getame tɩ Biiblã noyã yaa dem-dem wʋsgo. Rẽ n so tɩ m bas pʋg-sad kãnga, n tɩ vɩ ne m pʋg-sad a to.

La pʋg-sad kãng me wa n sɩnga Biiblã zãmsg ne a Zeova Kaset rãmbã. A toeemame n lebg nin-bʋgsg la sũ-mar soaba, tɩ ra noom maama. B boola maam tɩ m wa kelg sõsg a Zeova Kaset rãmbã Rĩungã roogẽ, tɩ m sake. M sẽn ta wã, neb sẽn maneg b mens sõma n deeg-m neere. B ra yaa toor fasɩ ne neb nins mam sẽn da mi n be ne wã. Mam zɩ n tags tɩ m zakã rãmb nonga maam ye. Mam yãadmã tõre, m pa paam tɩ ned wilg t’a nonga maam ye. La m sẽn yã nonglem ning sẽn be a Zeova Kaset rãmbã sʋkã, m bãngame tɩ yaa bũmb ning m sẽn da ratã bal kɛpɩ. B sẽn kãab maam Biiblã zãmsgã, m yɩɩ tao-tao n sake.

Mam sẽn bãng bũmb ning Biiblã pʋgẽ wã fãaga maam. Maam ne m bi-be-taas a yi n da magd n na n tɩ zu zĩig a ye d sẽn tõe n paam ligd wʋsgo. Mam da tara milyõ 23 la zak samde, n da tagsdẽ tɩ d sã n tɩ zu, m na n tõog n yaoome. La mam basame n pa kẽng ye. Rẽ yɩ-m-la noog wʋsgo. Bala, neb a yiibã kẽngame, tɩ b kʋ a yembr la b paam a to wã n yõke.

Mam sẽn kell n kẽng taoor ne Biiblã zãmsgã, m wa n bãngame tɩ m segd n toeema bũmb wʋsgo. Wala makre, mam bãnga 1 Korẽnt dãmb 6:10 sẽn yet bũmb ningã. Be, b yeelame tɩ “wagda ne zoe-bõn dãmbã, la rã-yũudbã, la nin-tʋʋdbã ne fãadbã ka na n paam Wẽnnaam soolem ye.” Mam sẽn wa n karem vɛrse kãngã wã, m sũurã sãama wʋsg ne m menga, tɩ m daag nintãm. Mam bãngame tɩ m segd n toeema vɩɩm. (Rom dãmba 12:2) Mam da yaa nin-kɛglem soab sẽn nong zaba, la pʋ-lik soaba.

La Biiblã zãmsg sõnga maam tɩ m bãng me t’a Zeova yaa nimbãan-zoɛt la sugr kõata. (Ezai 1:18) Mam pelga m pʋg n pʋʋs a Zeova, n kos-a t’a sõng-m tɩ m bas m tʋʋm-wẽnsã. A Zeova sɩd sõnga maam tɩ m toeem zʋg bilf-bilfu. Bõn-kãseng a ye m sẽn maan yɩɩ m sẽn kẽ kãadem ne pag ning m sẽn da vɩ ne wã.

Mam sẽn wa n na n kẽ kãadmã tɩ m tara yʋʋm 24, la kamb a tã. Sẽn da ket yaa m modg n paam tʋʋmde. La mam da pa karem n zãag ye. Sẽn paase, m da pa tar ned sẽn na n sak n gom n teel maam tʋʋmd taoor soab taoor ye. M le pelga m pʋg n pʋʋs a Zeova n kos sõngre, la m sɩng tʋʋm baoobo. Mam da yeta tʋʋmd taoor dãmbã tɩ m dat n toeema vɩɩm, n tʋm ne pʋ-peelem. M mi n yet-b lame tɩ m zãmsda Biiblã, la tɩ m dat n lebga nin-tɩrga. La wʋsg yeela vẽeneg tɩ b pa na n dɩk-m tʋʋm ye. La mam le wa n pelga m pʋg n togs tʋʋmd taoor soab a ye m sẽn da vɩ to-to wã, t’a yeel maam woto: “Bũmb kae m sẽn tõe n tik n dɩk-f tʋʋm ye. La m tagsdame tɩ m segd n maana woto.” Mam tẽedame tɩ yɩ a Zeova n leok m pʋʋsgo. Kaoosg zugẽ, maam ne m pagã wa n deega lisg n lebg a Zeova Kaset rãmba.

Yaa mam sẽn lebg kiris-ned n tũud Biiblã saglsã yĩng la m sẽn ket n vɩ rũndã-rũndã wã. Mam zakã rãmb zĩid-n-taarã yaa noogo. M kɩsa sɩd t’a Zeova kõ-m-la sugri, tɩ m sũur-kasetã pa le ningd-m taal ye.

Yʋʋm 14 la woto mam sẽn yaa wakat fãa so-pakda, n wilgd m taabã Biiblã sẽn yetã. Sẽn nan pa kaoose, mam pagã me lebga wakat fãa so-pakda. Yʋʋm 30 pʋgẽ, mam sõnga m tʋmd-n-taas 22 tɩ b lebg a Zeova Kaset rãmba. M ket n kẽnda butik-bɛdã pʋsẽ, la pa sẽn na n tɩ fib neb n dɩ wa m sẽn da maand pĩndã ye. Masã, mam sã n kẽnge, m mi n wilgda nebã m sẽn tẽed bũmb ninsã. M yet-b lame tɩ b tõe n wa paam n vɩɩmda dũni-paalg pʋgẽ, tɩ pʋ-lik soab ka le beẽ ye.—Yɩɩl Sõamyã 37:10, 11.