Kãsem-dãmbã sẽn sõngd saam-biisã to-to tɩ b minimã paasdẽ
“Bũmb ning mam sẽn da zãms foom kaset-dãmb wʋsg sʋkã, bɩ f zãms bãmb neb nins sẽn tũud sɩda.”—2 TƖM. 2:2.
1. a) Bõe la neb nins sẽn tũud Wẽnnaamã sɩng n miẽ, la bõe yĩng tɩ d rat zãmsg rũndã-rũndã? b) Bõe yell la d na n gom sõs-kãngã pʋgẽ?
NEB nins sẽn tũud Wẽnnaamã sɩng n miime tɩ sẽn na yɩl n tõog n maan bũmb tɩ yɩ sõma, b segd n paama zãmsgo. Wala makre, b sẽn wa n yõk a Lotã, a Abram peega a tʋm-tʋmdb ‘sẽn zãms n mi zabr sõma’ tɩ b tɩ fãag-a. (Sɩng. 14:14-16, MN) Rĩm a Davɩɩd wakatẽ wã, yɩɩn-yɩɩndbã ra yaa neb sẽn ‘zãms n bãng Zu-soabã waoogr yɩɩlã,’ n yɩɩnd n pẽgd-a. (1 Kib. 25:7) Rũndã-rũndã, tõnd zabda ne a Sʋɩtãan la a poorẽ dãmbã. (Ef. 6:11-13) Sẽn paase, d pẽgda a Zeova, bala d moondame n wilgd nebã a yʋʋrã. (Heb. 13:15, 16) Rẽnd tõnd me segd n paama zãmsg wa pĩnd wẽndẽ wẽn-sakdbã. Tigingã pʋgẽ, a Zeova wilgame tɩ yaa kãsem-dãmbã n segd n zãms b tẽed-n-taasã. (2 Tɩm. 2:2) Wãn to la kãsem-dãmbã zãmsd saam-biisã sẽn na yɩl tɩ b minimã paase, tɩ b tõog n sõng n ges tigingã neb yelle? Sõs-kãngã na n leoka sok-kãngã.
SÕNG-Y SAAM-BIIGÃ TƖ YẼ NE A ZEOVA ZOODÃ PÃNG PAASE
2. Nand tɩ kãsem-soab zãms saam-biig bũmbu, bõe la a segd n maane, la bõe yĩnga?
2 Kãsem-soab yaa wa ka-koaada. Nand tɩ ka-koaad bʋd koodo, a tõe n ninga pʋʋgã birga, sẽn na yɩl tɩ koodã bɩ sõma. Woto me, nand tɩ kãsem-soab zãms saam-biig bũmbu, a tõe n tika Biiblã sagls kẽer zug n sõs ne-a, sẽn na yɩl n sõng-a t’a sak n tũ bũmb ning a sẽn na n zãms-a wã.—1 Tɩm. 4:6.
3. a) Y sã n dat n sõng saam-biig t’a minimã paase, wãn to la y tõe n tik a Zezi goam nins sẽn be Mark 12:29, 30 n sõs ne-a? b) Kãsem-soab sã n naag saam-biig n pʋʋse, wãn to la tõe n sõng saam-biigã?
3 Yɩta sõma tɩ y bãng Biiblã goam sẽn toeem saam-biigã to-to. Sẽn na yɩl n bãng rẽ, y tõe n sok-a-la woto: ‘Wãn to la fo sẽn dɩk f meng n kõ a Zeova wã toeem f vɩɩmã?’ Sok-kãngã tõe n paka sor tɩ y sõs ne taaba, n gom ned sẽn tõe n wilg to-to t’a tʋmda Wẽnnaam tʋʋmdã ne a sũur fãa yelle. (Karm-y Mark 12:29, 30.) Sõsgã poore, y tõe n zẽka y koɛɛg n pʋʋs saam-biigã yĩnga, n kos a Zeova t’a kõ-a a vʋʋsem sõngã sẽn na yɩl t’a tõog n paas a minimã. Y sã n pʋʋs n gom woto tɩ saam-biigã kelge, yaa vẽeneg tɩ na n kenga a raoodo.
4. a) Y sã n dat n sõng saam-biig t’a minimã paase, Biiblã kiba-bʋs la y tõe n karem ne-a tɩ naf-a? b) Kãsem-soab sã n wa sõngd ned sẽn na yɩl t’a minimã paase, bõe la a rata?
4 Y sã n dat n sõng saam-biig t’a minimã paase, yɩta sõma tɩ y reng n karem Biiblã kibay kẽere, n sõng-a t’a bãng t’a segd n yɩɩ ned sẽn sakd tʋʋm ne yamleoogo, sɩd soaba, la sik-m-meng soaba. (1 Rĩm 19:19-21; Neh. 7:2; 13:13; Tʋʋ. 18:24-26) Zʋg-sõma kãensã tõe n nafa saam-biigã wa birg b sẽn ning pʋʋg pʋgẽ sẽn nafd koodã. Na n sõng-a lame t’a tẽebã bɩ tao-tao. A Jean-Claude yaa kãsem-soab n be Fãrense. A yeelame tɩ yẽ sã n wa sõngd saam-biig sẽn na n yɩl t’a minimã paase, a sẽn dat yaa sõng-a t’a sã n na n yãk yam n maan bũmb bɩ a tik Biiblã saglse. A paasame tɩ yẽ baooda weer sẽn na yɩl n karem vɛrse ne saam-biigã, n ‘puk a nin’ t’a yã bõn-sõma nins sẽn be Wẽnnaam Gomdã pʋgẽ wã. (Yɩɩl 119:18) Bõe me la y tõe n maan n sõng saam-biiga?
SÕNG-Y SAAM-BIIGÃ T’A BÃNG A SẼN TÕE N YÃK N MAANE
5. a) Y sã n dat n sõng saam-biig t’a minimã paase, bõe yĩng tɩ yaa sõma tɩ y sok-a n ges a sã n yãka bũmb n dat n wa maan a Zeova tʋʋmdã pʋgẽ? b) Bõe yĩng tɩ kãsem-dãmbã segd n sɩng sãam-biisã sõngr tɩ b ket n yaa bõonese? (Ges-y tẽngr vẽnegrã.)
5 Y tõe n soka saam-biigã woto: ‘Bõe la fo yãk n dat n wa maan a Zeova tʋʋmdã pʋgẽ?’ A sã n pa yãk bũmb takɩ, y tõe n sõng-a lame t’a bãng bũmb sẽn pa yɩɩd a pãng a sẽn tõe n yãk yam n wa maane. Wilg-y-yã bũmb y sẽn da yãk n dat n maane, la y togs-a y sẽn tõog n maan dẽ wã sẽn yɩ-y noog to-to. Y sã n maan woto, tõe n nafa saam-biigã wʋsgo. A Victor sẽn yaa kãsem-soab la so-pakd n be Afirikã yeela woto: “Mam sẽn wa n yaa bilfã, kãsem-soab n sok maam sogsg a wãna, n dat n bãng mam sẽn yãk yam n dat n wa maan bũmb ninga. A sẽn sok maam sogs-kãensã tɛka, mam sɩngame n tagsd m sẽn tʋmd a Zeova tʋʋmdã to-to wã zugu.” Kãsem-dãmb sẽn tar n minim n wilg tɩ yɩta sõma tɩ b sɩng sãam-biisã sõngr b sẽn wat n yaa bõonese. Y tõe n geta b yʋʋmã n kõt-b tʋʋm b sẽn tõe n tʋm tigingã pʋgẽ. B sã n sɩng woto maaneg tɩ b ket n yaa bõonese, baa b sã n wa lebg kom-bɩɩs tɩ bũmb wʋsg tõe n tiis-ba, b na n ket n tagsda bũmb nins b sẽn tõe n maan a Zeova tʋʋmdã pʋgẽ wã yelle.—Karm-y Yɩɩl Sõamyã 71:5, 17. *
Y SÃ N KÕ TƲƲMDE, BƖ Y WILG TƲƲMDÃ YÕODO
Y sã n kõ ned tʋʋmd bɩ y wilg-a tʋʋmdã yõodo, t’a sã n tʋm n sa bɩ y pẽg-a (Ges-y sull a 5-8)
6. Bõe la a Zezi ra maand tɩ kãsem-dãmbã segd n dɩk a togs-n-taare?
6 Y sã n dat tɩ saam-biig tʋmd tigingã tʋʋm ne yamleoogo, y pa na n wilgd-a bũmb ning a sẽn segd n maanã bal ye. Y sã n kõ-a tʋʋmde, y na n wilg-a-la tʋʋmdã yõod me. Y sã n maan woto, y rɩka a Zezi sẽn yaa Karen-saam-kãsengã togs-n-taare. Nand t’a yeel a tʋm-tʋmdbã tɩ b moon koɛɛgã, a wilga bũmb ning sẽn kɩt tɩ b segd n sak yẽ noorã. A yeelame: “B kõo maam pãng fãa sẽn be [“saasẽ,” MN] la sẽn be dũniyã.” Rẽ poore, a paasame: “Bɩ y kẽng n maan nebã buud fãa tɩ b yɩ mam karen-biisi.” (Mat. 28:18, 19) Wãn to la y tõe n dɩk a Zezi togs-n-taare?
7, 8. a) Wãn to la kãsem-dãmbã tõe n dɩk a Zezi togs-n-taare? b) Y sã n kõ saam-biig saglg t’a tũu, bõe yĩng tɩ y segd n pẽg-a? d) Sagl-bʋs la kãsem-dãmbã tõe n tũ n sõng saam-biisã tɩ b minimã paase? (Ges-y zĩ-gũbr ning gom-zug sẽn yaa: “ Y sẽn tõe n sõng saam-biig to-to.”)
7 Y sã n kõ saam-biig tʋʋmde, yɩta sõma tɩ y togs-a Biiblã goam sẽn wilgd tɩ tʋʋmdã tara yõodo. Y sã n maand woto, sõngd-a lame t’a bãng tɩ tʋʋmd fãa taoore, a segd n tagsa Biiblã sagls yelle, la a ra tags tɩ yaa tʋʋmd a sẽn segd n tʋm bal ye. Wala makre, y sã n kõs saam-biig t’a ges tɩ nebã sẽn tũud zĩig ning n kẽed Rĩungã roogẽ wã yɩ yɩlemde, tɩ bũmb sẽn tõe n pogl ned me ra zĩnd be, y tõe n wilg-a-la Tɩt 2:10 sẽn yet bũmb ningã. Rẽ, a na n bãngame tɩ Rĩungã roog sã n yaa yɩlemde, kɩtdame tɩ ‘Wẽnnaam sẽn yaa tõnd Fãagdã kareng paam waoogre.’ Y leb n tõe n yeela saam-biigã t’a tags a tẽed-n-taas nins sẽn kʋʋlã yelle, la tʋʋmdã sẽn na n naf-b to-to wã. Y sã n sõs ne saam-biigã woto, tõe n sõng-a lame t’a tagsd nebã yell n yɩɩd noy nins b sẽn kõ-a wã yelle. A sã n neẽ tɩ bũmb ning a sẽn maandã nafda tigingã nebã, a sũur na n yɩɩ noogo.
8 Sẽn paase, a sã n tũ saglsã bɩ y tẽeg n pẽg-a. Bõe yĩng tɩ rẽ tar yõodo? Y sã n pẽg saam-biiga, na n naf-a-la wa koom sẽn nafd tɩɩg to-to wã. Na n kɩtame t’a rat n tʋm a Zeova tʋʋmdã ne a sũur fãa.—Ges-y Matɩe 3:17.
ZU-LOƐƐG SẼN KƖT TƖ PA NANA
9. a) Zu-loe-bʋg la kãsem-dãmb nins sẽn be tẽns nins sẽn yidg laogã wɛɛngẽ wã kẽer segda? b) Bõe yĩng tɩ pa Wẽnnaam tʋʋmdã yell n pak kom-bɩɩs kẽere?
9 Tẽns nins sẽn yidg laogã wɛɛngẽ wã pʋsẽ, kãsem-dãmbã tõe n neeme tɩ kom-bɩɩs nins sẽn deeg lisgã pa rat n bao tʋʋm tigingã pʋgẽ, tɩ yɩl n sõng-b tɩ b toeem yam me yaa toogo. B soka kãsem-dãmb sẽn be na maan tẽns 20 pʋsẽ woto: ‘Yãmb tẽedame tɩ yaa bõe n kɩt tɩ kom-bɩɩs kẽer pa baood tʋʋm tigingã pʋgẽ?’ B wʋsgã yeelame tɩ saam-biis kẽer sẽn wa n yaa bõonego, b roagdbã pa sagl-b tɩ b bao bũmb b sẽn tõe n wa maan a Zeova tʋʋmdã pʋgẽ ye. Sẽn paase, kom-bɩɩs kẽer sã n dat n tʋm a Zeova tʋʋmdã wʋsgo, b roagdbã sagend-b lame tɩ b modg n karem n zãage, wall tɩ b bao tʋʋm-sõngo. Woto kɩtame tɩ pa Wẽnnaam tʋʋmdã yell n pak-b ye.—Mat. 10:24.
10, 11. a) Saam-biig yam sã n pa be tigingã tʋʋma, bõe la kãsem-soab tõe n maan n sõng-a t’a toeem yam? b) Vɛrse bʋs la kãsem-soab tõe n karem n sõng saam-biigã, la bõe yĩnga? (Ges-y tẽngr vẽnegrã.)
10 Saam-biig yam sã n pa be tigingã tʋʋma, yɩl t’a toeem yam baooda modgr la sũ-mare. La y tõe n sõng-a lame t’a toeeme. Tɩɩg sã n bɩtẽ n pa tão tɩrga, tɩɩgã soab tara a sẽn tõe n maaneg t’a tees tɩrga. Woto me, y tõe n sõnga saam-biig bilf-bilf t’a bãng tɩ segdame t’a toeem yam, n sak tɩ b kõ-a tʋʋm tigingã pʋgẽ. La wãn to la y tõe n maan dẽ?
11 Mi-y n bao-y weer tɩ yãmb ne saam-biigã sõs ne taab sẽn na yɩl n minim taaba. Sõng-y-yã-a t’a bãng t’a tara yõod tigingã pʋgẽ. Y sã n wa minim taab bilfu, y tõe n karma vɛrse-rãmb kẽer n sõng-a t’a tags a sẽn dɩk a meng n kõ a Zeova wã sẽn dat n yɛɛlga. (Koɛ. 5:3; Ezai 6:8; Mat. 6:24, 33; Luk 9:57-62; 1 Kor. 15:58; 2 Kor. 5:15; 13:5) Y tõe n sok-a-la woto: ‘Bõe la fo pʋlem a Zeova n dɩk f meng n kõ-a? Fo tagsdame t’a Zeova manesem yɩɩ wãn fo lisgã daare?’ (Yel. 27:11) ‘A Sʋɩtãan yẽ manesem yɩɩ wãna?’ (1 Pɩɛ. 5:8) Y sã n karem vɛrse-rãmb n sõs ne saam-biig woto, tõe n kẽ-a-la sõma.—Karm-y Hebre dãmb 4:12. *
YÃMB ME SEGD N YƖƖ SƖD RÃMBA
12, 13. a) A Eliize manesem yɩ wãn ne no-rɛɛs a Eli? b) A Eliize sẽn kell n pa ne a Eli wã, a Zeova kɩtame t’a yã bõe?
12 Kom-bɩɩse, bãng-y tɩ y tar yõod tigingã pʋgẽ. Bõe n na n sõng-y tɩ y paam minim a Zeova tʋʋmdã pʋgẽ? Sẽn na yɩl n leok sok-kãnga, d na n goma pĩnd wẽndẽ ned sẽn paam tɩ b sõng-a t’a minim paas yelle.
13 Sẽn na maan yʋʋm 3000, no-rɛɛs a Eli yãk a Eliize sẽn da yaa bi-bɩɩg wakat kãngã t’a yɩ a sõngda. A Eliize saka zĩig pʋgẽ, n lebg a Eli sẽn da kʋʋlã tʋm-tʋmda. (2 Rĩm 3:11) A zĩnda ne-a n maan yʋʋm a yoobe, t’a sõng-a t’a bãng bũmb wʋsgo. Rẽ poore, a Eli sẽn wa n bãng t’a pa na n le yɩ no-rɛɛs Israyɛll soolmẽ wã, a yeela a Eliize t’a tõe n basa yẽ pʋgbo. La naoor a tãab tõre, a Eliize yeelame t’a ka na n lebg n bas-a ye. A ra rat n kell n paa ne a karen-saambã n kaoos wa a sẽn tõe tɛka. Rẽ n so t’a Zeova kɩt t’a tõog n yã a Eli wakat ning yẽ sẽn maan yel-solemd n zẽk-a n loogã.—2 Rĩm 2:1-12.
14. a) Wãn to la saam-biisã tõe n dɩk a Eliize togs-n-taare? b) Bõe yĩng tɩ b sã n kõ saam-biig tʋʋmd bɩ a segd n tʋm ne a sũur fãa?
14 Wãn to la saam-biisã tõe n dɩk a Eliize togs-n-taare? B sã n wa kõ-y tʋʋmde, baa yaa tʋʋmd neb kẽer sẽn pa nand bɩ y yɩ tao-tao n sake. Ra yĩm-y tɩ kãsem-soab sã n sõngd-y sẽn na yɩl tɩ y minimã paase, yaa y neer la a rata. Kɩt-y t’a bãng tɩ rẽ noom-y lame, la tɩ y ratame t’a ket n sõngd-y-yã. Sẽn yɩɩd fãa, b sã n kõ y tʋʋmd bɩ y tʋm ne y sũur fãa. Bõe yĩng tɩ rẽ tar yõodo? Bala, y sã n wilgdẽ tɩ y yaa sɩd soab la ned b sẽn tõe n teege, kãsem-dãmbã na n kɩsa sɩd t’a Zeova ratame tɩ b kõ-y tʋʋm n paas tigingã pʋgẽ.—Yɩɩl 101:6; karm-y 2 Tɩmote 2:2.
WILG-Y TƖ Y NANDA KÃSEM-DÃMBÃ
15, 16. a) Bõe la a Eliize maan tɩ wilg t’a nanda a karen-saambã? (Ges-y sõsgã sɩngrẽ fotã.) b) Bõe yĩng tɩ no-rɛɛsdb a taabã kɩs sɩd ne a Eliize?
15 A Eliize kibarã leb n wilgda saam-biisã sẽn tõe n maan to-to n wilg tɩ b nanda sẽn sɩng n ya-b kãsem-dãmbã. A Eli ne a Eliize tɩ kaaga no-rɛɛsdb sẽn be Zeriko. Rẽ poore, b tũu taab n kẽng Zʋrdẽ kʋɩlgã noore. B sẽn ta be, “a Eli rɩka a fuug n wẽn n wẽ koomã tɩ koomã welg tɩ tẽngã lebg koɛɛnga,” tɩ b yiibã fãa pɩʋʋge, n ‘ket n kẽnd la b sõsda.’ Vẽenega, a Eliize ra pa tagsd t’a miime tɩ sek ye. A kell n kelga a Eli sẽn yaa a karen-saambã, n tãag wakat ning a Zeova sẽn maan yel-solemd n dɩk-a ne sɩlmand n loogã. A Eliize lebg n waa Zʋrdẽ kʋɩlgã noore, n dɩk a Eli fuugã, n wẽ koomã n yeel woto: “A Eli Zu-soab a Wẽnnaam bee yɛ?” Kʋɩlgã koom le welgame.—2 Rĩm 2:8-14.
16 A Eliize pipi yel-solemdã wõnda a Eli yaoolem yel-solemdã bal kɛpɩ. Woto wilgda bõe? Wõnda a Eliize pa tags tɩ yẽ sẽn lebg Wẽnnaam no-rɛɛs masã wã, a segd n toeema a Eli sẽn da maand yɛlã to-to wã ye. A sẽn kell n maan wa a Eli wã, a wilgame t’a nanda a karen-saambã, la sõng no-rɛɛsdb a taabã me tɩ b kɩs sɩd ne-a. (2 Rĩm 2:15) A Eliize yɩɩ no-rɛɛs n maan yʋʋm 60, t’a Zeova sõng-a t’a maan yel-soalem n yɩɩg a Eli sẽn maanã. Yam bʋg la saam-biisã tõe n dɩk a Eliize kibarã pʋgẽ?
17. a) Wãn to la saam-biisã tõe n dɩk a Eliize togs-n-taare? b) Kaoosg zugẽ, bõe la a Zeova tõe n sõng saam-biis nins sẽn kelgd saglsã tɩ b maane?
17 B sã n wa yãk-y tɩ y lebg kãsem-soab bɩ y ra tags tɩ masã, y segd n toeema b sẽn da maan yɛlã to-to wã ye. Tẽeg-y tɩ yaa tigingã neb yɛl sẽn yaa to-to wã n tõe n kɩt tɩ b toeem b sẽn da maand yɛl kẽer to-to. Tõe n yɩ a Zeova siglgã me n yeel tɩ b toeeme. Y pa segd n toeem y sẽn dat n toeem yĩng bal ye. A Eliize sẽn kell n maan yɛlã wa a Eli wã, kɩtame tɩ no-rɛɛsdb a taabã kɩs sɩd ne-a. Leb n wilgame t’a nanda a karen-saambã. Yãmb me sã n kell n maan yɛlã wa sẽn sɩng n ya-b kãsem-dãmbã sẽn tũud Biiblã sagls n maandẽ wã, y tẽed-n-taasã na n kɩs-y-la sɩda. Na n wilgame me tɩ y nanda kãsem-dãmb nins sẽn tar minimã. (Karm-y 1 Korẽnt dãmb 4:17.) La y minimã sã n wa paasdẽ, y na n tõog n tũ a Zeova siglgã sagls n toeem yɛl kẽere, n sõng tigingã neb tɩ b kell n kẽn na-yakemd a ye ne a Zeova siglgã. Kaoosg zugẽ, a Zeova tõe n wa sõnga yãmb tɩ y tʋm n yɩɩg sẽn sõng-b yãmb tɩ y minimã paasã, wa a Eliize sẽn maan yel-soalem n yɩɩg a Eli wã.—Zã 14:12.
18. Bõe n kɩt tɩ kãsem-dãmbã segd n sõngd neb a taabã tɩ b minimã paasdẽ?
18 D sẽn dat yaa sagls nins sẽn be sõs-kãngã la sẽn loog-a wã pʋgẽ wã sẽn na n sõng kãsem-dãmbã tɩ b baood sẽka, n sõngd saam-biisã tɩ b minimã paasdẽ. Bɩ saam-biisã me sak tɩ b sõng-b tɩ b minimã paase, tɩ b tõog n sõng n ges a Zeova nin-buiidã yelle. Woto na n nafa tigimsã sẽn be dũniyã gill zugã, la sõng tõnd ned kam fãa t’a kell n sak Wẽnnaam to-kãsengã sẽn watã sasa.
^ sull 5 Tigingã bi-bɩɩg manesem sã n wilgdẽ t’a tẽebã bɩɩme, a sã n yaa sik-m-meng soab la a tar zʋg-sõma a taabã Biiblã sẽn wilg tɩ kãsem-sõngd segd n tallame wã, baa a sã n pa ta yʋʋm 20, kãsem-dãmbã tõe n kosame tɩ b yãk-a t’a lebg kãsem-sõngda.—1 Tɩm. 3:8-10, 12, ges-y yʋʋmd 1989 sẽoog kiuug pipi daar Gũusg Gasgã neng 29.
^ sull 11 Ges-y yʋʋmd 2012 tʋʋl-nif kiuug pipi daar Gũusg Gasgã seb-neng 20-22 sull a 8-13, la Kell-y n pa-y “Wẽnnaam nonglmã pʋgẽ” sebrã sak 16, sull a 1-3.
