1. Bõe la neb wʋsg wae n yetẽ?

NEB wʋsg wae n yetame tɩ f sã n tar bũmb t’a wa sãam la f manegd n ne a yõodo. Yãmb zoe n tagsa woto bɩ? Ned sã n tõe n paam bũmb nana-nana hal a yãadmẽ, a tõeeme n pa getẽ tɩ bõn-kãng tara yõod wʋsg ye. Wala makre, ned sã n dog n mik t’a roagdbã yaa rakãag-rãmba, a tõeeme n pa nand bũmb nins a sẽn tarã ye. A buud tõe n paama kom-bɩɩsã. Bala, b minimã sẽn nan pa waoogã tõe n kɩtame tɩ b pa mi bũmb nins sẽn tar yõod n yɩɩdã ye.

2, 3. a) Bõe n pak dũniyã kom-bɩɩs wʋsgo, tɩ sẽn yaa-b kiris-nebã segd n gũus tɩ ra wa yɩ woto ne bãmba? b) Bõe n na n sõng-d tɩ d wilg tɩ d sũur nooma ne bũmb nins d sẽn zãms a Zeova zugã?

² Y sã n yaa bi-bɩɩga, bõe n tar yõod ne yãmb n yɩɩda? Sã n yaa ne dũniyã kom-bɩɩs wʋsgo, yaa paam tʋʋm-sõngo, ro-neer wall te-paal n pak-b n yɩɩda. La sã n yaa bõn-kãensã yell bal n pak tõndo, bũmb sẽn tar yõod wʋsg la d pa tara. D pa tar zood ne Wẽnnaam ye. Zu-bʋko, rũndã-rũndã neb milyõ-rãmb pa baood Wẽnnaam zood meng ye. La yãmb sã n yaa bi-bɩɩg tɩ y roagdbã yaa a Zeova  Kaset rãmba, y pa segd n yĩm tɩ b sõng-y lame tɩ y bãng Wẽnnaam, la tɩ rẽ tara yõod wʋsg ye. (Luk 11:28) Y sã n tũ bũmb nins b sẽn zãms-y-yã, y wilgdame tɩ y sũur nooma ne rẽ. Y sã n pa maan woto, tõe n waa ne zu-loees sẽn na n nams-y y yõor tɛka.

³ La y tõe n gila zu-loe-kãens buudã. Bõe n na n sõng-y tɩ y wilg tɩ y sũur nooma ne bũmb nins y sẽn zãms a Zeova zugã? D na n goma Biiblã kibay kẽer yelle, n bãng d sẽn segd n wilg tɩ d nanda bũmb nins d sẽn zãms a Zeova zugã võore. Pa kom-bɩɩsã bal la kiba-kãens na n sõng ye. Na n sõnga kãsembã me.

4. Bõe la 1 Sãmwɛll 8:1-5 yeel a Sãmwɛll kom-dibli wã zugu?

⁴ Biiblã tara kibay sẽn gomd kamb sẽn paam tɩ b roagdb zãms-b Wẽnnaam noyã yelle. La kẽer pa tũ bũmb ning b sẽn zãms-bã ye. Wala makre, no-rɛɛs a Sãmwɛll sɩnga a Zeova tũub hal a yãadmẽ, n kell n tũ-a ne pʋ-peelem a yõor tɛka. (1 Sãm. 12:1-5) A kõ a Zoɛll ne a Abiza sẽn yaa a kom-dibli wã mak-sõng b sẽn da segd n tũ. La b pa maan woto ye. Biiblã wilgame tɩ b ra ‘kaooda bʋʋd kɛga.’—Karm-y 1 Sãmwɛll 8:1-5.

5, 6. A Zozɩas kambã la a yagengã manesem yɩɩ wãna?

⁵ Rĩm a Zozɩas kambã me yɩɩ woto. A Zozɩas yɩɩ rĩm-sõng sẽn da nong a Zeova, la sẽn tũ-a ne a sũur fãa. B sẽn wa n yã Wẽnnaam tõogã sebr n tɩ karem t’a Zozɩas kelgã, a modgame n tũ a Zeova noyã. A yiisa bõn-naandsã la bagbã ne tɩɩm dãmbã fãa a soolmã pʋgẽ, la a sagl nin-buiidã tɩ b sak a Zeova. (2 Rĩm 22:8; 23:2, 3, 12-15, 24, 25) Ad a Zozɩas sɩd kõ a kambã mak-sõngo! La a kamb a tãab n paas a yageng a ye n wa n lebg rĩm-dãmba. B baa a ye pa rɩk a togs-n-taar ye.

⁶ A Zozɩas biig a Zoakaaz sẽn wa n lebg rĩmã, a maana bũmb wʋsg n “beeg Zu-soabã.” A rɩɩ naam kiis a tãabo, tɩ Ezipt Faraõ wã yõk-a n tɩ pag bãens roogo, t’a pa be n tãag a kũum. (2 Rĩm 23:31-34) Rẽ poore, a ba-biig a Zozakim n deeg naamã n dɩ yʋʋm 11. Yẽ me pa rɩk a ba wã togs-n-taar ye. A ra maanda wẽng wʋsgo, hal t’a Zeremi togs bãngr-gomd n yeel t’a “kũum na n yɩɩ wa bõang kũum bala.” (Zer. 22:17-19) A Zozɩas biig a Sedesias ne a yageng a Zozakin me sẽn wa n lebg rĩm-dãmba, b pa rɩk a naoor ye.—2 Rĩm 24:8, 9, 18, 19.

7, 8. a) Bõe n wilgd t’a Salomo pa tũ a ba wã sẽn zãms-a bũmb ningã sõma? b) Neb nins yell d sẽn gomã pa rɩk b roagdbã togs-n-taar ye. Yam bʋg la d tõe n dɩk b kibayã pʋgẽ?

⁷ Rĩm a Salomo me paamame t’a ba a Davɩɩd zãmsa a sẽn segd n tũ a Zeova to-to. Sɩngrẽ wã, a Salomo ra tũuda a Zeova. La Biiblã wilgame t’a sẽn wa n kʋʋle, ‘a pagbã wẽnemda a yam t’a tũ buud a taab wẽnnaam-dãmba, t’a yam ka le be ne Zu-soabã wa a ba a Davɩɩd ye.’ (1 Rĩm 11:4) Woto kɩtame t’a Salomo kong a Zeova lohormã.

⁸ Nin-kãensã fãa ra paam n tõe n bãnga a Zeova la b maan sẽn yaa tɩrga. Zu-bʋko, b pa rɩk b roagdbã togs-n-taar ye. La pa kamb nins fãa sẽn paam tɩ b roagdb zãms-b Wẽnnaam noyã n pa tũ rẽ ye. D na n goma kẽer sẽn sak b roagdb yelle. B kõo rũndã-rũndã kom-bɩɩsã mak-sõngo.

9. Mak-sõng bʋg la a Nowe kom-dibli wã kõ kom-bɩɩsã? (Ges-y sõsgã sɩngrẽ fotã.)

⁹ A Nowe kambã kõo mak-sõngo. Wẽnnaam yeela b ba wã t’a ka koom-koglg tɩ yẽ ne a zakã rãmb kẽ. Yaa vẽeneg t’a Nowe kambã ra miime tɩ b segd n maana a Zeova raabã. B sõnga b ba wã n ka koglgã, la b sak n kẽ a pʋgẽ. (Sɩng. 7:1, 7) Bõe yĩng tɩ b maan woto? Sɩngr 7:3 wilgame tɩ b kẽesa rũmsã koglgã pʋgẽ, sẽn na yɩl tɩ rũmsã buud toor-toorã “kell n zĩnd dũniyã zugu.” Ninsaalbã me põsame. A Nowe kambã sẽn tũ bũmb nins b ba wã sẽn zãms-bã, b tõog n yɩɩ sabab tɩ ninsaalbã pa menem dũniyã zug ye. Sa-kãsengã poore, yaa tũudum hakɩkã bal n da be, tɩ rẽ me yaa bãmb maasem yĩnga.—Sɩng. 8:20; 9:18, 19.

10. Wãn to la kom-bɩɩs a naas sẽn yaa hebre-rãmb wilg tɩ b pa yĩm bũmb nins b roagdbã sẽn zãms-bã?

¹⁰ Yʋʋm kobs poore, kom-bɩɩs a naas sẽn yaa hebre-rãmb n wilg tɩ b mii bũmb ning sẽn tar yõod n yɩɩdã. Yʋʋmd 617 sẽn deng a Zezi rogmã, b yõka a Hanania la a Misaɛll ne a Azaria n paas a Daniɛll n kẽng yembd Babilon. B sẽn da yaa rasãmb la b tar yam ne bãngrã, b ra tõe n lebga wa Babilon neb nana-nana. La b pa maan woto ye. B pa yĩm bũmb nins b roagdbã sẽn zãms-bã ye. Woto kɩtame t’a Zeova ning-b bark wʋsgo.—Karm-y Daniɛll 1:8, 11-15, 20.

11. Bõe la a Zezi maan t’a sẽn zãms bũmb ning a Ba wã nengẽ wã naf neb a taaba?

¹¹ Tũ bũmb ning b sẽn zãms-fã wɛɛngẽ, a Zezi n kõ mak-sõng sẽn ka to. A sũur da nooma ne bũmb nins a Ba wã sẽn zãms-a wã. A sẽn yeel bũmb ningã wilgda rẽ. A yeelame: “Yaa m Ba sẽn zãms maam bũmb ningã bal la m gomda.” (Zã 8:28) A ra ratame tɩ neb a taabã rɩ bũmb nins a sẽn zãmsã nafa. Rẽ n so t’a yeel kʋʋngã woto: “Yaa tɩlae tɩ mam moon Wẽnnaam soolem koe-noog tẽns a taab me, tɩ bõe, b tʋma maam bõn-kãng yĩnga.” (Luk 4:18, 43) A sõnga a kɛlgdbã tɩ b bãng tɩ b pa segd n yɩ “dũniyã rẽnda,” bala dũniyã neb pa get tɩ bao n bãng Wẽnnaam tara yõod ye.—Zã 15:19.

12. a) Bõe yĩng tɩ d tõe n yeel tɩ 2 Tɩmote 3:14-17 sẽn yet bũmb ningã zemsa ne kom-bɩɩs wʋsg rũndã-rũndã? b) Sogs-bʋs la kom-bɩɩs nins sẽn yaa kiris-nebã segd n sok b mense?

¹² Tõe tɩ yãmb me paamame tɩ roagdb sẽn nong a Zeova wub-y-yã. Sã n yaa woto, y yaa wa Tɩmote ning yell b sẽn gomd Biiblã pʋgẽ wã. (Karm-y 2 Tɩmote 3:14-17.) Yãmb roagdbã zãmsa yãmb bũmb wʋsg a Zeova zugu, la y sẽn tõe n maan to-to n ta a yam. Tõe tɩ b sɩngame tɩ y ket n yaa yãaga. Rẽ sõnga yãmb tɩ y ‘bãng Gʋlsg Sõamyã sẽn tõe n vẽneg yãmb tɩ y paam fãagre, y sẽn tẽed Kirist Zezi wã yĩnga.’ Leb n sõng-y lame tɩ y tẽebã bɩ, tɩ y tõe n tũ a Zeova sõma. La sokr n kete: Yãmb sũur nooma ne bũmb nins b sẽn zãms-y-yã bɩ? Sẽn na yɩl n leok sok-kãngã, yɩta sõma tɩ y fees y menga. Sok-y y meng woto: ‘Mam sã n tags pĩnd wẽndẽ neb nins sẽn tũ a Zeova ne pʋ-peelmã yelle, m sũur noomame bɩ? Mam sũur nooma ne m sẽn paam n yaa a Zeova Kaset soab wa bãmbã bɩ? Mam sẽn mi tɩ neb nins sẽn yaa a Zeova zo-rãmb rũndã-rũndã wã pa waooge, tɩ mam yaool n paam n be b sʋkã noom-m lame bɩ? Mam kɩsa  sɩd tɩ m sẽn paam n mi sɩdã Wẽnnaam zugã yaa zu-zẽkr sẽn pa tõe n bãng n bilg bɩ?’

13, 14. Bõe la kom-bɩɩs kẽer roagdb sẽn yaa kiris-neb tõe n dat n maane, la bõe yĩng tɩ rẽ maaneg yaa yalemdo? Rɩk-y makre.

¹³ Kom-bɩɩs kẽer roagdb sẽn yaa kiris-neb tõeeme n pa neẽ tɩ Wẽnnaam nin-buiidã bee vẽenem pʋgẽ, t’a Sʋɩtãan dũniyã be lik bida pʋgẽ ye. Sãnda mi n dat n lemba dũniyã vɩɩm n gese. La y sã n ne mobill sẽn wate, y na sak n wudg n lʋɩ a taoorã, y sẽn dat n bãng rẽ sã n na n pogl-y lame bɩ na n kʋ-y lame sɩda? Yaa vẽeneg tɩ y pa na n saag n maan a buud ye. Woto me, d pa segd n naag dũniyã neb n tʋm tʋʋm-wẽnse, sẽn na yɩl n bãng rẽ sẽn tõe n wa ne zu-loees ninsã ye.—1 Pɩɛ. 4:4.

¹⁴ A Gener yaa Aazi bi-bɩɩg t’a roagdbã yaa kiris-neba. A reega lisg t’a tar yʋʋm 12. La pa yã n kaoos la a yamã kẽ dũniyã ye. A ra tagsdame t’a sã n vɩ wa dũniyã nebã la a na n paam lohorem. A ra maanda wa a yaa a Zeova Kaset soaba, n yaool n soosd n maand yel-kɛga. A sẽn wa n tar yʋʋm 15 wã t’a manesmã lebga wa a tũud-n-taasã. Wala makre, a ra yũuda rãam n suuda, la a nong gom-põaasa. Yẽ ne a tũud-n-taasã ra mi n naaga taab n kẽ ẽntɛrnetã pʋgẽ, n tão ze-video-rãmb sẽn wilgd nen-kɛglem yɛl hal tɩ zĩigã zʋʋge, t’a yaool n kuli. A wa n bãngame tɩ bũmb nins yẽ sẽn maandã pa kõt-a sũ-noog ye. A bãngame tɩ vɩɩm a woto ka bark ye. Rũndã-rũndã, a maneg n tũuda a Zeova sõma. A yeelame tɩ wakat ninga, a yamã mi n le bee dũniyã yɛla, la t’a getame tɩ yẽ ne a Zeova zoodã yõod n yɩɩda.

15. Baa kom-bɩɩs nins roagdb sẽn pa kiris-nebã segd n tagsa bõe yelle?

¹⁵ La kom-bɩɩs kẽer n be tigingã pʋgẽ tɩ b roagdbã pa kiris-neb ye. Sã n yaa woto ne yãmba, bɩ y tẽeg tɩ y sẽn paam n mi d Naandã la y maand a raabã yaa zu-zẽkre. Neb milyaar-dãmb n be tẽngã zugu. La yãmb paam n bee neb nins a Zeova sẽn boole, la a sõng tɩ b bãng sɩdã sʋka. Woto pa bark tɛkẽ sɩda? (Zã 6:44, 45) Yaa d roagdbã n sõng-d tɩ d bãng sɩdã tɩ pa woto me, d tõe n kɩdma sũ-noog d sẽn mi sɩdã yĩnga. (Karm-y 1 Korẽnt dãmb 2:12.) A Gener yeela woto: “Mam  sã n tẽeg tɩ m tũuda Wẽnnaam sẽn vɩyã, m zu-gãndã kẽndame. Maam la ãnda t’a Zeova sẽn so yĩngr la tẽngã mi-ma?” (Yɩɩl 8:5) Saam-bi-poak a ye yeelame: “Inivɛrsite wã karen-biisã sã n paam tɩ b karen-saamb mi-ba, b sũur noomame. D sẽn paam t’a Zeova sẽn yaa Karen-saam-kãsengã mi-dã pa noom-d n yɩɩd sɩda?”

16. Kom-bɩɩs nins sẽn yaa kiris-nebã segd n yãka yam n maan bõe?

¹⁶ B sẽn sõng-y tɩ y bãng a Zeova la a raabã, y pa segd n yãk yam n tũ-a ne pʋ-peelem sɩda? Rɩk-y neb nins sẽn tũ Wẽnnaam pĩnd wẽndẽ wã togs-n-taare. Ra yɩ-y wa dũniyã kom-bɩɩs sẽn mum b nin n tũud sor ning sẽn dabd sãoong zĩigẽ wã ye.—2 Kor. 4:3, 4.

17-19. Bõe yĩng tɩ d segd n yɩ toor ne dũniyã nebã?

¹⁷ Yaa sɩd tɩ pa wakat fãa la yɩ toor ne dũniyã nebã yaa nana ye. La y sã n tagse, y bãngdame tɩ y sẽn yɩt toor n são. D rɩk makr ne ned sẽn dat n zoe ze olẽmpik rãmbã sasa. Sãmbg kae tɩ yaa a sẽn na n yɩ toor ne a taabã n na n kɩt t’a tõoge. A na n basa bũmb wʋsg sẽn tõe n sãam a sẽkã, wall sẽn tõe n tiis-a t’a pa tõog n segl a meng sõma. A na n sak n yɩɩ toor sẽn na yɩl n segl a meng sõma n tɩ zoe ze olẽmpik rãmbã sasa.

¹⁸ Dũniyã nebã fãa la bal pa tagsd b tʋʋm-wẽnsã sẽn tõe n wa ne zu-loees ninsã yell ye. La a Zeova Kaset rãmbã pa woto ye. D sã n yaa toor ne dũniyã nebã, n lakd d mens ne yoob la pʋ-lik tʋʋmã sẽn tõe n sãam tõnd ne a Zeova zoodã, d wilgdame tɩ d rat n wa ‘paama vɩɩm sẽn yaa sɩdã.’ (1 Tɩm. 6:19) Saam-bi-poak ning yell d sẽn gom sull 15 pʋgẽ wã paasa woto: ‘F sã n tõog n wilg tɩ f tũuda f sẽn tẽed bũmb ningã, f sũur yaa noog wʋsgo. F talla raood n pa maan wa a Sʋɩtãan dũniyã neb ye. Yaa wa f sẽn ne a Zeova sẽn get-f ne sũ-noogo, f sẽn tat a yamã yĩnga. Yaa rẽ n kɩt tɩ f sũur yaa noog f sẽn yaa toorã.’

¹⁹ Sã n yaa bũmb nins y sẽn tõe n paam masã wã yell bal n pak-y-yã, y vɩɩmã pa na n tall bark ye. (Koɛ. 9:2, 10) La y mii Wẽnnaam daabã ne ninsaalbã sẽn yaa a soaba. Y miime me tɩ y tõe n wa paama vɩɩm sẽn ka sɛtã. Y sã n tagsd rẽ yelle, na n sõng-y lame tɩ y ra “kẽn wa neb sẽn ka pʋʋsd Wẽnnaam” sẽn kẽnd to-to wã ye. Woto la y vɩɩmã na n tall barka.—Ef. 4:17; Mal. 3:18.

20, 21. D sã n modg tɩ d yam-yãkr fãa tat a Zeova yam, bõe la d na n paame? Bõe la a Zeova rat tɩ d maane?

²⁰ D sã n modg tɩ d yam-yãkr fãa tat a Zeova yam, d na n paama sũ-noog masã, la vɩɩm sẽn ka sɛt dũni-paalgã pʋgẽ. A Zeova na n ning-d-la bark tɩ yɩɩg d sẽn tagsdã. (Mat. 5:5; 19:29; 25:34) La a pa ningd d bark woto bal ye. A ratame tɩ d sak-a. (Karm-y 1 Zã 5:3, 4.) La d zoe n nee d sẽn modgd n tũud a Zeova wã yõodo.

²¹ A Zeova zoe n sõng-d-la wʋsgo. A sõng-d lame tɩ d wʋmd a Gomdã võore, n mi sɩdã yẽ mengã la a raabã zugu. D sẽn paam n yaa a Zeova Kaset rãmb n gomd a yʋʋr yĩngã yaa zu-zẽkre. A pʋlmame t’a na n zĩnda ne-d n sõng-do. (Yɩɩl 118:7) Bɩ kom-bɩɩsã la kãsembã fãa wilg tɩ b sẽn paam n mi a Zeova wã noom-b lame, la tɩ b rat n kɩtame t’a yʋʋrã ‘paam waoogr wakat sẽn ka sɛta.’—Rom 11:33-36; Yɩɩl 33:12.