Yãmb tõe n tara zoa n pa mi a yʋʋrã sɩda? A buudã yaa toogo. A Irina sẽn yaa pag sẽn yit Bilgaari wã yeelame tɩ “ned sã n pa mi Wẽnnaam yʋʋre, a pa tõe n lebg a zoa ye.” Zu-noogo, wa b sẽn wilg sõsg ning sẽn loogã pʋgẽ wã, Wẽnnaam datame tɩ y yɩ a zoa. Rẽ n so t’a wilg a yʋʋrã Biiblã pʋgẽ. A yeelame yaa: “Mam yaa a Zeova. Mam yʋʋr la woto.”—Ezai 42:8, MN.

La rẽ yĩnga tara yõod a Zeova nifẽ tɩ y bãng a yʋʋrã la y pʋt-a bɩ? Wẽnnaam yʋʋrã b sẽn gʋls ne hebre goamã gʋls-biis a naas tɩ b boondẽ tɩ tetragrammã bee Biiblã babg ning b sẽn da gʋls ne hebre wã pʋgẽ, na maan naoor 7000. Yʋʋr a to pa be Biiblã pʋgẽ b sẽn gʋls t’a sõorã ta woto ye. Dẽnd yaa vẽeneg t’a Zeova ratame tɩ d bãng a yʋʋrã, la d pʋt-a. *

La kẽer tõe n tagsdame tɩ Wẽnnaam sẽn yaa sõngo, n le yaa kãsengã, pa zems tɩ b pʋt a yʋʋrã ye. Yaa sɩd tɩ wa d sẽn pa na n sak n pʋt d zoa yʋʋr yaarã, pa zems me tɩ d pʋt Wẽnnaam yʋʋrã yaar ye. La a Zeova ratame tɩ neb nins sẽn nong yẽ wã waoog a yʋʋrã, la b kɩt tɩ nebã bãng-a. (Yɩɩl Sõamyã 69:31, 32; 96:2, 8) Tẽeg-y-yã a Zezi sẽn zãms a karen-biisã pʋʋsg ningã. A yeel-b lame tɩ b sã n na n pʋʋs bɩ b yeele: “Tõnd Ba sẽn be saasẽ, bɩ yãmb yʋʋr yɩ ne waoogre.”—Matɩe 6:9, MN.

Biiblã pʋgẽ, b wilgame tɩ Wẽnnaam gũusdame n get ‘neb nins sẽn waoogd a yʋʋrã.’ (Malaki 3:16) A pʋlma ned ning fãa sẽn waoogd a yʋʋrã woto: “Mam na n zẽka yẽnda, tɩ bõe, yẽ mii mam yʋʋre. Yẽ na n boola maam la mam na n leoka yẽnda. Mam na n zĩnda ne yẽnda toog pʋgẽ.” (Yɩɩl Sõamyã 91:14, 15) D sã n dat n tall zood sõma ne a Zeova, segdame tɩ d bãng a yʋʋrã la d pʋt-a.