Neb wʋsg pa rat n gom kũum yell ye. Bala yaa sũ-sãang yelle. La baa kaoosda, wat n yaa tɩlae. Kũumã zabda wʋsgo. A yaa toog sẽn pa tõe n bãng n bilg ne kiidã nebã.

Bũmb kae n tõe tɩ ned sũur da tol n sãam a roagda, a pag bɩ a sɩd wall a biig kaalem yĩng ye. Kũum tõe n linga neda, wall a soabã namsdẽ tɩ d mi t’a na n wa kiime. Sẽn yaa a soab fãa, bũmb kae d sẽn tõe n maan tɩ ned kaalem pa nams-d ye. Sũ-sãangã tõe n waa ne yell menga.

A Antonio baaba maana agsidã n ki. Ad a Antonio sẽn yeele: “Yaa wa ned n wa n pag yãmb doogã, n feoog kʋɩlen-biigã n looge. Yãmb pa le tõe n lɩk y roogẽ wã, tɩ b pa sokd kõom ye. Sẽn ket bal yaa bũmb ning sẽn be yãmb pʋ-tẽerẽ wã. Lebga tɩlae tɩ y sak n deege. Baa yãmb yamẽ wõnda pa zemse, tɩ y yetẽ tɩ pa sɩda, sẽn maand le kae ye.”

A Dorothy sẽn wa n tar yʋʋm 47, a sɩdã maana kaalem. A yãka yam n na n bao sogsg kẽer leoor kũumã wɛɛngẽ. Hat daar fãa, a ra karemda kambã b egiliizẽ wã. A Dorothy ra tẽedame tɩ ninsaal sã n ki pa sa ye. La a ra pa mi bũmb ning sẽn maand ned kũum poor ye. Rẽ n so t’a tɩ sok b egiliizã taoor soaba, la a leok-a-la woto: “Sɩd-sɩdã, ned baa a ye pa mi ye. Yaa d gũ bal n gese.”

Rẽ yĩnga, sɩd yaa d “gũ bal n ges” bɩ? Bũmb n be d sẽn tõe n maan n bãng ned sã n ki saame bɩ pa sa bɩ?