Pagbã sɩd tara yõod Wẽnnaam nifẽ bɩ?

“Yel-wẽnd sɩnga ne paga, la yaa yel-kãng yĩng me la tõnd fãa kiida.”—A SIRA BIIGA. B GƲLSA SEB-KÃNGÃ YƲƲM KOABG LA ZAK SẼN DENG A ZEZI ROGMÃ.

“Fo yaa Sʋɩtãanã tʋʋm-teoogo: fo n deng n dɩ tɩɩg ning sẽn gɩdgã: fo n yɩ pipi n kɩɩs Wẽnnaam noore. . . . Fo sãama rao sẽn yaa Wẽnnaam wẽnegã faag-faaga.”—SEBR A TERTULLIAN SẼN GƲLS YƲƲM KOABG LA ZAK A ZEZI ROGMÃ POORE.

GOM-KÃENSÃ pa yit Biiblã pʋgẽ ye. La hal daar zãra, rapã wae n tikda b zug n tagsdẽ tɩ b sã n nams paga, pa wẽng ye. Baa rũndã-rũndã, neb n ket n tikd tũudum sɛb goam n tagsdẽ tɩ pagbã namsg pa wẽnga, wall b yetẽ tɩ yaa pag sabaab la ninsaal sẽn namsdã. La rẽ yĩnga Wẽnnaam raab yaa rapã wẽgd pagbã la b namsdb bɩ? Bõe la Biiblã yet rẽ wɛɛngẽ? D bao sogsg kẽer leoore.

▪ Wẽnnaam kãaba pag wẽng bɩ?

Ayo. Yaa ‘wag-kʋdrã b sẽn boond tɩ Sʋɩtãanã’ la Wẽnnaam “kãab wẽnga.” (Wilgri 12:9; Sɩngre 3:14) Wẽnnaam sẽn yeel t’a Ãdem na n “sooga” a pagã, pa wilgd t’a ra ratame t’a Ãdem nams a pagã ye. (Sɩngre 3:16) Yaa yel-wẽndã biis la a reng n yã n togs-ba.

Rẽnd yaa yel-wẽndã n kɩt tɩ b namsd pagbã, pa Wẽnnaam daab la woto ye. Biiblã pa wilg tɩ Wẽnnaam datame tɩ rao nams paga, n sɩbg-a a kɩɩsgã yĩng ye.—Rom dãmba 5:12.

▪ Wẽnnaam nifẽ, rao yõod yɩɩda pag bɩ?

Ayo. Sɩngr 1:27 wã yeela woto: “Wẽnnaam naana ninsaal wa b meng wẽnego, Wẽnnaam naana yẽ wa bãmb wẽnego. Bãmb naana bãmb daoa, la paga.” Rẽnd hal naanegã wakate, Wẽnnaam nana rao ne pag fãa tɩ b tõe n dɩk a togs-n-taare. Baa bũmb kẽer sẽn da kɩt t’a Ãdem ne a Hawã pa ye wã, Naandã kõ-b-la tʋʋm-yɛnga. Sẽn paase, Wẽnnaam da geta b fãa yell tɩ welgr kaẽ ye.—Sɩngre 1:28-31.

Nand tɩ Wẽnnaam naan a Hawa, a yeela woto: ‘Mam na n maana sõngd sẽn zems ne yẽ [a Ãdem] n kõ-a.’ (Sɩngre 2:18) La pag sẽn yaa rao “sõngdã” rat n yeelame t’a pa ta rao bɩ? D rɩk makre: B sã n dat n maan wopeerasiõ sẽn pa nana, logtor n vʋdgd bãadã t’a yĩngã ki, tɩ logtor a to yaool n maan wopeerasiõ wã. Rẽ yĩnga logto-kãensã tʋʋmã yõod yɩɩda taab bɩ? Ayo. Baa sẽn maand-a  wopeerasiõ wã meng tʋʋmd yõod pa yɩɩd ye. Woto me, Wẽnnaam naana rao ne pag tɩ b sõngd taaba. B baa a ye yõod pa yɩɩd a to ye.—Sɩngre 2:24.

▪ Bõe n wilgd tɩ pagbã tara yõod Wẽnnaam nifẽ?

Wẽnnaam deng n yãa yel-wẽndã sẽn na n wa ne zu-loees nins n kõ pagbã, n maan bũmb n wilg t’a rat n kogl-b lame. Yʋʋmd 1513 sẽn deng a Zezi rogmã, a tũnuga ne a Moiiz n kõ Israyɛll nebã tõogã. Seb-gʋlsd a Laure Aynard goma tõ-kãng yell a sebr (La Bible au féminin) pʋgẽ, n yeel woto: “Tõogã pʋgẽ, b gomda pag yell wʋsgo. La wakat fãa la bala, a sẽn yetã yaa pagbã koglg yĩnga.”

Wala makre, tõogã wilgame tɩ biig segd n waooga a ba la a ma. (Yikri 20:12; 21:15, 17) A wilgame me tɩ pag sã n tar pʋga, b segd n talla manesem sẽn zems ne-a. (Yikri 21:22) Baa rũndã-rũndã tẽns wʋsg laloa wẽgda pagbã, tɩ yaa toor fasɩ ne noy nins Wẽnnaam sẽn da kõ tɩ kogend pagbã sõma wã. La tõogã goam a taab me n wilgd tɩ pagbã tara yõod Wẽnnaam nifẽ.

Tõogã wilgame tɩ pagbã tara yõod Wẽnnaam nifẽ

Tõogã Wẽnnaam a Zeova sẽn kõ Israyɛll nebã ra sõngda rapã la pagbã fãa tɩ b paamd bark wʋsgo. Wala makre, tõogã tũub ra kogenda b laafɩ wã, ra kɩtdame tɩ b yaa yɩlem Wẽnnaam nifẽ, la b tat a yam. B sã n da sakd Wẽnnaam noyã, a zẽkda b buudã n “yɩɩg buud a taabã fãa.” (Tõodo 28:1, 2) La wãn to la tõogã ra kogend pagbã? Ad makr a wãna:

1. B ra tara lohorem. Pĩnd wẽndẽ Israyɛllã pʋgẽ, pagbã ra tara lohorem. Pa wa rũndã-rũndã tẽns wʋgs pʋsẽ b sẽn weoogd-bã ye. Wala makre, baa sẽn da yaa rao la zakã soabã, rao ra tõe n teega a paga. Bala pag ra tõe n daa pʋʋgo. A ra tõe n ‘sela viyn tɩɩse.’ A sã n da mi lamd wĩib la fut wʋgbo, a tõe n yɩɩ lɛɛba. (Yelbũna 31:11, 16-19) Vẽenega, a Moiiz  tõogã tũub wakate, b ra pa get pagbã wa neb yõod sẽn pa waoog ye.

Pagbã ra tõe n baoa Wẽnnaam zood me. Biiblã wilgame t’a Ann pʋʋsa Wẽnnaam n pʋlem bũmbu. (1 Sãmwɛll 1:11, 24-28) Sunem tẽngã pag a ye n da nong n kẽnd n kelgd no-rɛɛs a Eliize vʋʋsg-rayã sasa. (2 Rĩm dãmba 4:22-25) Wẽnnaam yãka pagb tɩ b ra yaa a no-rɛɛsdba. Makre, a Debora ne a Hulda. Israyɛll nin-kãsems la maan-kʋʋdb meng ra kẽnda b nengẽ n kelgd Wẽnnaam koeese.—Bʋkaoodba 4:4-8; 2 Rĩm dãmba 22:14-16, 20.

2. B ra paamda zãmsgo. Pagbã ra naaga tõogã kaool pʋgẽ. Rẽ n so tɩ b sã n da na n karem tõogã bɩ pagbã me ra segd n kẽng n tɩ kelge, n paam bãngre. (Tõodo 31:12; Nehemi 8:2, 8) B ra tõe n paama zãmsg sẽn na yɩl n tõog n tʋm tʋʋm kẽer tũudmã wɛɛngẽ. Wala makre, pagb n da “tʋmd sɛk-roogẽ” wã, tɩ kẽer da reesd yɩɩla.—Yikri 38:8; 1 Kibaya 25:5, 6.

Pagb wʋsg ra tara minim la bãngr n tõe n leeb n paam yõodo. (Yelbũna 31:24) Israyɛll tẽn-yagsã pʋsẽ, kom-dibli wã zãmsg ra yaa rapã tʋʋmde. La Israyɛlle, pagbã ra sõngda b sɩdbã n wubd b kom-dibli wã hal tɩ b wa lebg rapa. (Yelbũna 31:1) Rẽnd yaa vẽeneg tɩ pĩnd wẽndẽ Israyɛllã pʋgẽ, pagbã ra paamda zãmsgo.

3. B ra paamda waoogre. Tõod piigã tõog a ye n yeel woto: “Waoog f ba ne f ma.” (Yikri 20:12) Rĩm a Salomo yel-bũnã sebr pʋgẽ, a yeela woto: “M biiga, reeg f ba zãmsgo, la ra bas bũmb nins f ma sẽn wilg foomã ye.”—Yelbũna 1:8.

Tõogã wilga sẽn pa kẽ-b kãadmã sẽn segd n tall manesem ning ne taabã. La a sẽn gom rẽ yell to-to wã waooga pagbã. (Maankʋʋre 18:6, 9; Tõodo 22:25, 26) Tõogã wilgame me tɩ rao segd n gesa a pag yell neere, n ning a yamẽ tɩ yɛl kẽer wɛɛngẽ, pag ne rao pa yembr ye.—Maankʋʋre 18:19.

4. B ra paamda koglgo. A Zeova wilga a Gomda pʋgẽ tɩ yẽ yaa “kɩɩbs ba la pʋg-kõap sõngda.” Rat n yeelame t’a kogenda neb nins sẽn pa tar ba wall sɩd tɩ sõngd- bã. (Yɩɩl Sõamyã 68:6; Tõodo 10:17, 18) Rẽ n so tɩ no-rɛɛs sẽn wa n maan kaalem n bas a pag t’a sam-soab yik n namsd-a, a Zeova maana yel-solemd n sõng pagã t’a pa yã yãnd ye.—2 Rĩm dãmba 4:1-7.

Israyɛll nebã sẽn wa n kolg kãabg tẽngã kõomã, zak-soab a ye yʋʋr sẽn boond t’a Zelofehad n maan kaalem n pa bas bi-ribl ye. A ra tara kom-pugli a nu. Kom-pugli wã tɩ yã a Moiiz n kos tɩ b kõ bãmb “zĩig” kãabg tẽngã pʋgẽ. A Zeova sẽn maan bũmb ningã zʋʋga b sẽn da kotã. A yeela a Moiiz woto: “Kõ bãmb zĩig b ba wã ba-biisã sʋk tɩ b sooge. Bɩ f rɩk zĩig ning b ba wã sẽn da na n paamã n kõ bãmba.” A kɩtame tɩ rẽ tɛka, Israyɛll pag tõe n deega zĩig a ba sẽn ki n base, tɩ yẽ me kũum poor bɩ a kambã sooge.—Sõdbo 27:1-8.

Ninsaalbã tõodã kɩtame tɩ b pa le nand pagbã ye

A Moiiz tõogã tũub wakate, pagbã ra paamda waoogre. B ra tara sor n tõe n maan bũmb wʋsgo. La yʋʋm kobs-tã la zak sẽn deng a Zezi rogmã, gɛrk-rãmbã minimdã sɩnga Zidayiismã kẽebo. Gɛrk-rãmbã yaool n da tagsdame tɩ pag yõod pa ta rao ye.—Ges-y zĩ-gũbr ning gom-zug sẽn yaa: “Pĩnd wẽndẽ neb sẽn gʋls n paoog pagbã.”

Gɛrɛs seb-gʋlsd a Hesiod sẽn zĩnd yʋʋm kobs-yopoe la zak sẽn deng a Zezi rogmã ra yetame tɩ yaa pagbã n wat ne ninsaalbã zu-loees fãa. Sẽn wa n zems yʋʋm kobs-yi sẽn deng a Zezi rogmã, zʋɩf-rãmbã me sɩnga woto tẽebo. Talmuudã b sẽn sɩng gʋlsg wakat kãngã sagla zʋɩf-rãmbã woto: “Ra wae-y n sõsd-y ne pagb ye. Bala tõe n wa kɩtame tɩ y yo.”

Goam a woto wa n kɩtame tɩ zʋɩf-pogsã pa le tõe n maan yɛl kẽer ye. A Zezi sẽn wa n be tẽngã zugã tɩ b ra zoe n yãka zĩig wẽnd-doogẽ wã tɩ yaa be bal la pagbã tõe n kẽnge. Ra yaa rapã bal la b zãmsd tũudmã yɛla. Sẽn paase, b karen-dotẽ wã, pagbã ne rapã ra pa zĩ ne taab ye. Talmuudã pʋgẽ, rabẽ a ye n yeel tɩ ned sã n zãms a bi-pugl Toora wã, rat n yeel tɩ tõogã, yaa wẽnga. Zʋɩf-rãmbã tũudmã taoor dãmb sẽn bas Wẽnnaam Gomdã sẽn yet pagbã wɛɛngẽ wã tũubã, kɩtame tɩ rap wʋsg kisg pagbã.

A Zezi yãa zʋɩf-rãmbã sẽn da tik b minimdã zug n kis pagbã. (Matɩe 15:6, 9; 26:7-11) La rẽ yĩnga, a rɩka b togs-n-taar bɩ? Yam bʋg la d tõe n dɩk a Zezi sẽn tall manesem ning ne pagbã pʋgẽ? Bũmb ning a sẽn zãms nebã nafa pagbã bɩ? Sõsg ning sẽn pʋgdã na n leoka sogs-kãensã.

[Zĩ-gũbri seb-neng a 7]

Pĩnd wẽndẽ neb sẽn gʋls n paoog pagbã

Pipi kiris-nebã wakat tɛka, seb-gʋlsdb n tik gɛrk-rãmbã filozofi wã n na n bilg Sɩngr sebrã kibar ning sẽn gomd tɩɩgã bil yellã. Wala makre, Alɛgsãndri rao a Filõ ra yetame tɩ yaa pag ne rao lagengã wɛɛngẽ la a Hawa sẽn beegã, la tɩ yaa rẽ yĩng la Wẽnnaam sɩbg-a, n “yeel t’a pa na n le tall lohorem, la tɩ raoã sẽn yaa a tũud-n-taagã na n soog-a lame.” Bilf-bilfu, Zidayiismã taoor dãmba, la egiliizã taoor dãmb me wa n yeta woto b sɛbẽ wã.

Yʋʋm koabg la zak a Zezi rogmã poore, zʋɩf-rãmbã sebr a ye (Midrash Rabba) pʋgẽ, rabẽ n wilg bũmb ning sẽn kɩt tɩ yẽ tagsdẽ tɩ pag segd n pila a zug peendã, n yeel woto: “Pag segd n yaa wa ned sẽn maan wẽng tɩ yãnd tar-a.” Wakat kãng tɩ neb wʋsg ra nonga tũudum yɛl vaeesd a Tertullian sɛbã. A Tertullian yaool n da yetame tɩ pag segd n kẽnda ne “sũ-sãang wa a Hawa.” Goam a woto kɩtame tɩ nebã maneg n kisg pagbã. Wʋsg tudgame n tagsdẽ tɩ yaa Biiblã n yet woto.

[Foto seb-neng a 5]

Wẽnnaam naana a Hawa t’a yɩ a Ãdem sõngda

[Foto seb-neng a 6]

Pĩnd wẽndẽ Israyɛllã pagb ra tõe n leebame