Segdame tɩ b gom Wẽnnaam yell ne kambã bɩ?

Seb-gʋlsd a ye yeela woto: “Tõnd tara tũudum ka tɛk sẽn tõe n kɩt tɩ d kisg taaba, la d pa tar tũudum wʋsg sẽn tõe n kɩt tɩ d nong taab ye.”—A JONATHAN SWIFT

YAA hal yʋʋmd 1700 soabã sẽnes la a Jonathan Swift togs gom-kãngã, la rũndã-rũndã menga, wʋsg na n sak n deegame t’a gomdã yaa sɩda. Kẽer yetame meng tɩ b pa segd n bas tɩ roagdbã zãms b kambã bũmb Wẽnnaam zug ye. B tagsdame tɩ kamb nins b sẽn wubd wẽn-tũudb zakẽ wã pa nafd ye.

Yãmb tagsg yaa wãna? Goam nins sẽn pʋgdã sʋka, bʋg n wõnd sakda reegre?

● B pa segd n bas roagdbã tɩ b zãms b kambã bũmb Wẽnnaam zug ye.

● Roagdbã segd n basame tɩ b kambã bɩ tɩ b yaool n sɩng tũudmã yɛl zug sõsg ne-ba.

● Kambã yãadmẽ, b roagdbã segd n sõng-b lame tɩ b bãng bũmb nins bãmb mensã sẽn tẽed Wẽnnaam zugã. La b sã n wa bɩtẽ, b roagdbã segd n sõngd-b lame tɩ b tagsd bõn-kãens zug n baood n bãngd sã n sɩd yaa sɩda.

● Kambã segd n sak n tẽe bũmb nins b roagdbã sẽn tẽedã woto bal n pa bao n wʋm b võor ye.

Tũudmã sãamda kambã bɩ?

Roagd sẽn nong a biig pa na n sak n maan-a wẽng ye. La rẽ yĩnga yɛlã sẽn yaa to-to wa kõta neb nins sẽn pa rat tɩ roagdbã gom ne b kambã Wẽnnaam yellã bʋʋm bɩ? Hal na maan yʋʋma, bãngdbã baoome n na n bãng roagdbã tẽeb sẽn tõe n maan b kambã bũmb ninsã. Bõe la b bãng-yã?

Vaeesdbã mikame tɩ tũudum pa sãamd biiga, la tɩ pʋd n tõe n naf-a-la a bɩʋʋngã sasa. Yʋʋmd 2008 soabã pʋgẽ, vaeesg a ye poore, b wilga bũmb ning b sẽn bãngã zʋrnall a ye (Social Science Research) pʋgẽ. * B yeela woto: “Yaa vẽeneg tɩ tũudmã kɩtdame tɩ zems-n-taar be kambã ne b roagdbã sʋka.” B paasa woto: “Wõnda tũudmã la Wẽnnaam zood baoobã tara yõod kambã wʋsg vɩɩm pʋgẽ, la zagsã neb ne taab zĩid-n-taarã pʋgẽ me.” Gom-kãensã wõnda a Zezi sẽn da yeel bũmb ningã. A ra yeela woto: “Neb nins sẽn wʋmd Wẽnnaam goamã n sakdẽ wã, bark bee bãmb zut n yɩɩda.”—Luk 11:28.

La kẽer sẽn yet tɩ b segd n basame tɩ kambã bɩ tɩ b yaool n gom ne-b Wẽnnaam la tũudmã yɛl zugã yẽ? Sẽn yet-b rẽ wã yĩmame tɩ biig yam yaa wa peoog sẽn yaa vɩʋʋg tɩ yaa tɩlae tɩ b pids-a ne bũmbu. A roagdbã sã n pa pids a yamã ne noy la tẽeb sẽn yaa sõma, na n kõo sor tɩ yam toor-toor nins yɩng rãmbã sẽn tarã pid a yamã.

Yellã tɩɩm yaa bõe?

Hal pĩnd wẽndẽ n tãag masã, ninsaalbã yɛl sẽn yaa to-to wã wilgdame tɩ tũudmã tõe n kɩtame tɩ neb maan taab wẽng la b kisg taaba. Woto wã, bõe la roagdbã tõe n maan tɩ bũmb ning a Jonathan Swift sẽn wilgã ra wa paam b kambã? Wãn to la b tõe n wub b kambã tɩ b tall tẽeb sẽn na n sõng-b tɩ b nong b taabã?

A tɩɩmã yaa b sẽn na n bao n bãng sogs-kãensã leoore: 1) Bõe la kambã segd n bãnge? 2) Ãnd dãmb n segd n zãms kambã? 3) Bõe la roagdbã tõe n maan tɩ zãmsgã yɩ sõma?

[Tẽngr note]