Yãmb kẽe Wẽnnaam vʋʋsg raarã pʋgẽ bɩ?
Yãmb kẽe Wẽnnaam vʋʋsg raarã pʋgẽ bɩ?
“Wẽnnaam [gomdã] vɩɩme la a tara pãnga.”—HEB. 4:12.
1. Bõe la d tõe n maan n paam n kẽ Wẽnnaam vʋʋsg daarã pʋgẽ rũndã-rũndã, la bõe yĩng tɩ rẽ maaneg tõe n yɩ toogo?
SÕSG ning sẽn loogã pʋgẽ, d yãame tɩ d sã n dat n kẽ Wẽnnaam a Zeova vʋʋsg daarã pʋgẽ rũndã-rũndã, d segd n sakd-a lame la d teend a siglgã. D sã n sakd a Zeova, wilgdame tɩ d ratame t’a raabã pidsi. La wakat ninga, sakr pa nana ye. Wala makre, d tõe n nonga bũmb ning maanego. La d sã n wa bãng t’a Zeova ratame tɩ d base, tõe n yɩɩ toog ne-d tɩ d sak tao-tao. A buudã sã n wa paam-do, rat n yeelame tɩ d segd n modgame n wa tõe n sakd nana-nana. (Zak 3:17) Yɛl toor-toor n be n kõt tõnd segb tɩ d tõe n wilg d sã n sɩd sakda nana-nana. Sõs-kãngã pʋgẽ, d na n goma yel-kãens kẽer yelle.
2, 3. D sã n dat n ket n tat a Zeova yam, bõe la d segd n maandẽ?
2 Y sã n wa yã bũmb Biiblã pʋgẽ sẽn wilgd tɩ y segd n toeema y manesem wall y tagsgo, y sakda nana-nana bɩ? Tẽeg-y tɩ Biiblã wilgame tɩ neb nins a Zeova sẽn tigimd a siglgã pʋgẽ wã yaa buudã fãa “bõn-neebã.” (Aze 2:7) Woto rat n yeelame t’a Zeova tũusda neb nins sẽn nong tɩrlmã, n get-b wa bõn-neeba. Yaa sɩd tɩ tõnd sʋkã, wʋsg sẽn wa n sɩng Biiblã zãmsgã tɩ b ra maanda yel-kɛga. La d sẽn nong Wẽnnaam la a Bi-riblã tɩ kɩt tɩ d rat n paam n ta Wẽnnaam yamã yĩnga, d sak n basa yɛl kẽer d sẽn da maande, la d toeem d tagsa wʋsgo. D pʋʋsa a Zeova n kos sõngre, tɩ kɩt tɩ d tõog n mao n toeem wa a sẽn datã. Woto kɩtame tɩ d wa tõog n deeg lisgu, tɩ kɩt tɩ d paam n ta a Zeova yam zãng-zãnga.—Karm-y Kolos rãmb 1:9, 10.
3 Baasgo, d ket n yaa koangdba. Rẽnd d segd n ket n toeemdame, la d maood ne d sũur fãa sẽn na yɩl n tõogd n maand sẽn yaa tɩrga. La a Zeova pʋlmame tɩ d sã n maand d sẽn tõe fãa, a na n sõng-d lame tɩ d tõog n ta a yam.
D tẽed-n-taag sã n wa kõt-d saglga
4. Ne manesem a tãab bʋs la a Zeova sagend tõndo?
4 Nand tɩ d maan toeengo, d segd n deng n bãnga bũmb ning d sẽn segd n toeemã. A Zeova sõngd-d-la ne manesem toor-toor tɩ d bãngd bõn-kãense. Wala makre, a tõe n tũnuga ne sõsg d sẽn kelg Rĩungã roogẽ, pa rẽ bɩ d sẽn karem tʋm-tʋmdã sɛb pʋsẽ. La wakat ninga, d tõe n kelga sõsg wall d karem bũmb sɛbã pʋsẽ, n baas n pa bãng tɩ toeeng la d segd n maan ye. Sã n yaa rẽ, a Zeova tõe n tũnuga ne saam-biig wall saam-bi-poaka, t’a maag a yĩng n sõng-do.—Karm-y Galat dãmb 6:1.
5. B sã n wa kõ-d sagla, manesem bʋs la d pa segd n talle, la bõe yĩng tɩ kãsem dãmbã segd n ket n kõt-d saglse?
5 Nebã fãa sẽn yaa koangdbã yĩnga kɩtame tɩ d to sã n wa kõ-d saglga, baa a sã n maaga a yĩng n sagl-do, tõe n yɩɩ toog ne-d tɩ d sake. La a Zeova yaool n kõo kasem dãmbã noor tɩ b ‘sagend tõnd ne sũ-maasem tɩ d yɩ tɩrse.’ (Gal. 6:1) D sã n sakd b saglsã, d na n maneg n yɩɩ sõma a Zeova nifẽ, t’a get-d wa “bõn-neeba.” Yaa sɩd tɩ d sã n wa pʋʋsd a Zeova, d mi n yetame tɩ d yaa koangdba, la tɩ d tudgda naoor wʋsgo. La sã n yaa kãsem soab n yaool n yeel tõnd tɩ d maana bũmb sẽn pa zemse, d pa wae n dat n sak n deeg ye. D wae n baooda pademse, wall d baood n na n wilg tɩ d sẽn maanã pa maneg n yaa wẽng woto ye. Tõe tɩ d tagsdame tɩ d sagendã pa nand-do, wall t’a sẽn gom ne tõnd to-to wã pa wilgd nonglem ye. (2 Rĩm 5:11) Sã n mik tɩ kãsem dãmbã sẽn yeel-dã yaa bũmb d sẽn pʋd n pa rat n wʋme, d sũur tõe n yikame menga. Wala makre, b tõe n wa yeel-d lame tɩ d zakã ned n maand bũmb sẽn pa zemse, pa rẽ bɩ b yeel-d tɩ d sẽn manegd d mengã to-to wã pa zems ye. B tõe n wa yeel-d lame me tɩ d segd n modga yɩlemdã wɛɛngẽ n paase, wall tɩ bũmb tõnd sẽn maand n noogd d yõor n pa zems ne a Zeova raabã. Wakat kãnga, d sũurã sẽn yikã yĩnga, d tõe n wa leokame tɩ yõsge. Woto tõe n wẽneg n sãama d sũuri, la sãam d saam-biigã sẽn dat n sõng-dã me sũuri. La d sũurã sã n wa sigi, d mikdame tɩ saglgã yaa d neer yĩnga.
6. Bõe yĩng tɩ d yetẽ tɩ Wẽnnaam Gomdã yaa “sũur tagsg la [a] ratem bʋ-kaooda”?
6 Hebre dãmb 4:12 wã sẽn yaa sõs-kãngã vɛrse yẽgrã wilgame tɩ Wẽnnaam Gomdã “tara pãnga.” Woto rat n yeelame tɩ Biiblã sẽn yaa Wẽnnaam Gomd a sẽn kɩt tɩ b gʋlsã tõe n sõnga ned t’a toeeme. Biiblã sõnga tõnd tɩ d bãng bũmb nins d sẽn da segd n toeem n yaool n tõog n deeg lisgã. La d lisgã poor me, a sõngd-d lame tɩ d ket n toeemdẽ. A Poll yeelame me tɩ Wẽnnaam Gomdã “yaa sũur tagsg la [a] ratem bʋ-kaooda.” (Heb. 4:12) Woto rat n yeelame tɩ d sã n wa bãng Wẽnnaam sẽn dat tɩ d maan bũmb ningã vẽenega, d manesem sẽn na n yɩ to-to wã wilgda d sẽn sɩd yaa ned ning buudã. (Karm-y Matɩe 23:27, 28.) Masã, d na n goma yɛl toor-toor d sẽn tõe n seg yelle. D sã n wa maand rẽ, bɩ y tagsd n get yãmb manesem sẽn na n yɩ to-to yel-kãens taoore.
D kẽn na-yakemd a ye ne a Zeova siglgã
7, 8. a) Tõe tɩ yaa bõe n kɩt tɩ kiris-neb nins sẽn yaa zʋɩf rãmbã kẽer ra ket n dat n tũ a Moiiz tõogã yel-maandɩ kẽere? b) Bõe yĩng tɩ d tõe n yeel tɩ woto ra yaa a Zeova raabã kɩɩsgo?
7 Tõnd sʋkã neb wʋsg mii Yelbũn 4:18 goamã ne zugu. Be, b yeela woto: “Nin-sõng sor yaa wa sõ-pukri, n paasd vẽenem hal tɩ ta sõ-bɩɩmde.” Woto rat n yeelame tɩ d manesmã na n lebgda sõma n paasdẽ, tɩ d sẽn wʋmd Wẽnnaam raabã võor to-to wã me paasdẽ.
8 Wa d sẽn yã sõsg ning sẽn loogã pʋgẽ wã, a Zezi kũumã poore, ra yaa toog ne zʋɩf rãmb nins sẽn lebg kiris-nebã tɩ b bas a Moiiz tõogã tũubu. (Tʋʋ. 21:20) A Poll wilga vẽeneg t’a Moiiz tõogã tũub pa tɩlae ne kiris-nebã ye. La ne rẽ fãa, kẽer n da baas n pa rat n sak a Zeova sẽn dat tɩ b tũ-a to-to masã wã ye. (Kol. 2:13-15) Tõe tɩ b ra tagsdame tɩ b sã n maand a Moiiz tõogã yel-maandɩ kẽere, na n kɩtame tɩ zʋɩf rãmbã tũudmã neb ra nams-b ye. La a Poll wilga kiris-nin-kãensã tɩ b sã n ket n maand woto n kɩɩsd Wẽnnaam raabã, b pa na n paam n kẽ Wẽnnaam vʋʋsg daarã pʋgẽ ye. * (Heb. 4:1, 2, 6; karm-y Hebre dãmb 4:11.) Sẽn na yɩl n paam n ta a Zeova yam, ra yaa tɩlae tɩ b sak n deeg t’a sẽn dat t’a nin-buiidã tũ-a to-to wã toeemame.
9. Tʋm-tʋmd sẽn tũud sɩd la sẽn tar yamã sã n wa toeem tõnd sẽn da wʋmd Biiblã gomd ning võor to-to, d manesem segd n yɩɩ wãna?
9 Rũndã-rũnda, tʋm-tʋmd sẽn tũud sɩd la sẽn tar yamã mi n wa sõng-d lame tɩ d wʋm Biiblã gomd ning võore, tɩ yaa toor ne d sẽn da wʋmd a võorã to-to wã. D sũy segd n yɩɩ noog ne rẽ, bala, wilgdame t’a Zeova tũnugda ne nin-kãensã n wilgd tõnd sɩdã. Siglgã taoor lʋɩtb Sull sẽn gomd tʋm-tʋmdã yʋʋr yĩngã mi n lebg n vaeesa d sẽn wʋmd Biiblã goam võor to-to wã. Saam-bi-kãensã sã n yã tɩ bũmb b sẽn da bilg pĩndã la b segd n toeeme, b pa yɛɛsd ne rẽ toeengo, wall b maneg n bilg-a tɩ yɩ vẽeneg ye. B miime tɩ neb kẽer na n wɩd-b-la toeen-kãens yĩnga, la pa rẽ n pak-b n yɩɩd ye. Sẽn pak-b n yɩɩdã yaa b we n tõog n teel Wẽnnaam daabã. Tʋm-tʋmd sẽn tũud sɩd la sẽn tar yamã sã n mi n wa toeem d sẽn da wʋmd Biiblã gomd ning võor to-to wã, yãmb tagsg yaa wãna?—Karm-y Luk 5:39.
10, 11. B sẽn wa n yeel Biiblã Zãmsdb tɩ b segd n moona koɛɛgã ne manesem a taab me wã, kẽer maana wãna, la woto wilgda tõnd bõe?
10 D gom bũmb a to me yelle. Sẽn na maan yʋʋm koabg woto, Biiblã Zãmsdbã sʋkã, kẽer sẽn da tõe sõsg sõma ra tagsdame tɩ yaa ne zãma taoor sõssã maasem bal la bãmb tõe n moon koɛɛgã sõma n yɩɩda. B ra nonga yaas zãma taoor n sõssã. B kẽer da nonga nebã sẽn da pẽgd-b b sõssã yĩngã. La a Zeova nin-buiidã wa n bãnga vẽeneg t’a Zeova pa rat tɩ moonegã tek zãma wã taoor sõsg bal ye. A ra ratame tɩ b moon koɛɛgã zak ne zaka, la ne manesem a taab me. La sẽn da tõe-b zãma taoor sõsgã sõma wã kẽer tõdga rẽ maanego. B sẽn da sõsd to-to wã kɩtame tɩ nebã ra tẽed tɩ b nonga a Zeova la b sakd-a, la manesem ning b sẽn tallã wilgame tɩ pa woto ye. D miime t’a Zeova sũur pa yɩ noog ne nin-kãensã ye. Bala b wa n basa a siglgã.—Mat. 10:1-6; Tʋʋ. 5:42; 20:20.
11 La koɛɛgã mooneg zak ne zakã pa yɩ nana ne Biiblã Zãmsdb a taabã me ye. Sẽn yɩɩd fãa, sɩngrẽ wã. Baasgo, b kell n sakame, n paa a Zeova siglgã pʋgẽ. La wakat bilf poore, b wa n tõe n moona zak ne zakã nana-nana. A Zeova ning-b-la bark wʋsgo. Tʋm-tʋmd sẽn tũud sɩd la sẽn tar yamã sã n wa yeel tɩ d moon koɛɛgã ne manesem y sẽn da nan zɩ n mamse, yãmb manesem yaa wãna? Baa sã n mik tɩ koɛɛgã mooneg ne manesem kãnga wõnda a yaa toog ne yãmba, rẽ yĩnga y sakdame bɩ?
B sã n wa yiis ned d sẽn kĩ ne tigingã pʋgẽ
12, 13. a) Bõe yĩng t’a Zeova yeel-d tɩ d “yiis nin-wẽng” buudã fãa tõnd sʋka? b) Zu-loe-bʋg la kiris-neb nins sẽn yaa roagdbã kẽer segda, la bõe yĩng tɩ sɩd yaa toog ne-ba?
12 Yaa vẽeneg tɩ d fãa sak n deegame tɩ sẽn na yɩl n ta a Zeova yam, d segd n yɩɩ yɩlem d vɩɩmã nens fãa pʋgẽ wa a sẽn datã. (Karm-y Tɩt 2:14.) La yɛl kẽer pʋsẽ, no-kãngã tũub tõe n yɩɩ toog ne-do. Ad makr sẽn wilgd rẽ. Tags-y n ges-y wa kiris-neb sẽn na n tar biig a ye, t’a wa bas a Zeova tũubu. A yãka “sũ-noog ning yel-wẽnã sẽn kõt wakat bilf pʋgẽ wã,” n sak n sãam zood ning a sẽn da tar ne a Zeova wã, la ne a roagdbã. A sẽn maan woto wã, b pa tõe n bas-a Wẽnnaam nin-buiidã sʋk ye. Kɩtame tɩ b yiis-a tigingã pʋgẽ.—Heb. 11:25.
13 Yellã sãama a roagdbã sũy wʋsgo! B miime tɩ Biiblã yeta vẽeneg tɩ d ‘ra maan tũud-n-taar ne ned sẽn boond a meng tɩ ba-biig n yaool n yaa nin-yoaada, wall zoe-bõn soaba, wall bõn-naands pʋʋsda, wall nin-tʋʋsa, wall rã-yũuda, wall fãada,’ la ‘tɩ tõnd da sak n dɩ ne ned a woto ye.’ A roagdbã miime me tɩ Biiblã paasa woto: “Bɩ y yiis nin-wẽng kãng yãmb sʋka.” (1 Kor. 5:11, 13) B sak n deegame tɩ Biiblã sẽn yeel tɩ ‘nedã,’ rat n yeelame tɩ yaa ned buud fãa. Rẽnd b sẽn kĩ ne neb nins tɩ b yaool n pa vɩ ne-b zak a ye pʋgẽ wã me naagame. La b sẽn nong b biigã wʋsgã yĩnga, tõe tɩ b wa yet b mens woto: “Tõnd segd n sõsda ne d biigã wa d sẽn tõe tɛka. D sã n pa maand woto, d pa na n tõog n sõng-a t’a lebs n sɩng a Zeova sakr ye.” *
14, 15. Roagdb sã n wa baood n na n bãng b sã n segd n goma ne b biig b sẽn yiis tigingã pʋgẽ, bõe la b pa segd n yĩmi?
14 D kʋmda roagdb nins sẽn tar zu-loe-kãngã wã. B biigã ra tõe n yãka yam n bas wẽng ning a sẽn maandã. La a gesame tɩ rẽ n noom-a n yɩɩd a roagdbã la tigingã neb nonglmã. B rata ne b sũur fãa n sõng b biigã, la b pa tõe n modg-a t’a maan a sẽn pa rat ye. Rẽnd b sũy sẽn sãam woto fãa wã pa ling-d ye.
15 La bõe la a roagdbã tõe n maane? Rẽ yĩnga b na n saka noy nins a Zeova sẽn kõ yel-kãng wɛɛngẽ wã bɩ? Yaa sɩd tɩ baa pa wakat fãa me, sasa ninga, na n yɩɩ tɩlae ne-b tɩ b gom ne biigã b zakã yɛl kẽer wɛɛngẽ. La rẽ yĩnga b segd n tagsame tɩ b tara sor n tõe n gomd ne biigã bʋʋm fãa yĩng bɩ? Yell ning taoore, yɩta sõma tɩ b tẽeg a Zeova sẽn datã. B segd n tẽegame t’a Zeova ratame t’a nin-buiidã kell n yɩ yɩlemde. Yaa rẽ n kɩt t’a yeel tɩ b “yiis nin-wẽng” buud fãa tigingã pʋgẽ wã. La a tʋll n sõnga bɛɛgdã me t’a toeem yam n bas wẽng ning a sẽn maandã, n tõog n lebg n wa tigingã pʋgẽ. Wãn to la roagdbã tõe n wilg tɩ bãmb me rata woto?
16, 17. Bũmb ning sẽn paam a Aarõ wã kõta tõnd sagl-bʋgo?
16 A Moiiz kẽem a Aarõ ra namsa wʋsg a kamb a yiib poorẽ. Yɩɩ a Nadaab ne a Abihu. B ra yõoga wisd a Zeova taoore, n pa maan dẽ tɩ zems ne noy nins a Zeova sẽn da kõ wã ye. Woto kɩtame t’a kʋ-ba. Tags-y n ges-y yellã sẽn sãam a Aarõ sũur to-to wã. Yaa sɩd t’a Aarõ kom-kãens sẽn ki wã, a ra pa le tõe n gom ne-b ye. La bũmb a to n kɩt tɩ yellã pa yɩ nana ne a Aarõ la ne a zakã rãmb ye. A Moiiz yeela a Aarõ ne a kamb a taabã t’a Zeova pa rat tɩ b wilg tɩ b sũy sãamame ye. A yeel-b-la woto: “Da bas-y y zoobd tɩ zũndg ye, la y ra kẽes y fut me n wa ki ye, la tɩ Zusoabã sũur da wa puug ne nebã fãa ye.” (Maan. 10:1-6) A gomdã võor yaa vẽenega. Wilgdame tɩ d sẽn nonga a Zeova to-to wã segd n yɩɩga d sẽn nong d zakã neb nins sẽn bas a Zeova wã.
17 Rũndã-rũndã, a Zeova pa sãamd neb nins sẽn kɩɩsd a noyã zĩig pʋgẽ ye. A pʋd n wilgdame t’a ket n nonga bɛɛgdbã, n sõngd-b sẽn na yɩl tɩ b toeeme. La roagdbã sã n kɩɩsd a Zeova noyã, n tagsdẽ tɩ bʋʋm toor-toor yĩng n kɩt tɩ b segd n gomd ne biigã b sẽn yiisã, a Zeova tagsg yaa wãna?
18, 19. B sã n yiis ned tigingã pʋgẽ t’a zakã neb kell n sak noy nins a Zeova sẽn gãneg rẽ wɛɛngẽ wã, tõe n baasa wãna?
18 Neb wʋsg b sẽn da yiis tigingã pʋgẽ yeelame tɩ yaa b zo-rãmba, n paas b zakã neb sẽn kell n sak a Zeova n da pa gomd ne-bã yĩng n kɩt tɩ b lebg n wa. Wala makre, pʋg-bɩɩg a yembr yeela kãsem dãmbã tɩ bũmb a ye sẽn kɩt t’a toeeme, yaa a kẽem soabã sẽn zã a meng to-to ne yẽ wã. A kẽemã kell n saka a Zeova, n tũ noy nins a sẽn gãneg yiisgã wɛɛngẽ wã. Woto kɩtame tɩ pʋg-bɩɩgã modg n lebg n wa.
19 Woto wã, d na n baas n yeelame tɩ bõe? Vẽenega, d segd n sakda a Zeova yell buud fãa taoore. D sẽn yaa koangdbã yĩng kɩtame tɩ woto maaneg mi n yaa toogo. La d segd n kɩsa sɩd ne d sũur fãa t’a Zeova sẽn sagend-d tɩ d maan bũmb ninsã fãa yaa d neer yĩnga.
“Wẽnnaam goamã vɩɩme”
20. Võor wʋmb a yiib bʋs la Hebre dãmb 4:12 wã tara? (Ges-y vẽnegrã sẽn be tẽngrã me.)
20 A Poll sẽn da wa n yeel tɩ “Wẽnnaam goamã vɩɩme” wã, ra pa Biiblã yell takɩ la a sẽn da gomdã ye. * (Heb. 4:12) Hebre dãmb sak a 4 soabã vɛrse rãmb a taabã wilgdame tɩ yaa Wẽnnaam pʋlemsã yell la a sẽn da gomdã. A Poll gomdã rat n yeelame tɩ Wẽnnaam pʋleng fãa pidsdame. A Zeova meng goma a pʋlemsã yell n yeel woto: “Gomd ning sẽn yit mam noorẽ wã ka na n le wa mam nengẽ zaalem ye. . . . A na n tõoga bũmb ning mam sẽn tʋm-a t’a tɩ maanã.” (Ezai 55:11) Rẽnd a Zeova sã n pa pids a pʋlemsã tɩ zems wakat ning tõnd sẽn dat t’a pids-bã, d pa segd n sãam d sũur ye. D tõe n kɩsa sɩd t’a Zeova ket n tʋmda a raabã pidsg yĩnga.—Zã 5:17.
21. Wãn to la Hebre dãmb 4:12 goamã tõe n sõng sẽn kʋʋl-bã tɩ b tõog n ket n maand a Zeova raabã?
21 Kʋʋn-kãsengã neb nins sẽn kʋʋlã kẽer sɩng n tũuda a Zeova hal na maan yʋʋma. (Wil. 7:9) B ra pa tẽed tɩ b na n kʋʋlame n mik tɩ dũni-kãngã ketẽ ye. La ne rẽ fãa, b ket n maanda a Zeova raabã wa b sẽn tõe tɛka. (Yɩɩl 92:15) B miime tɩ “Wẽnnaam goamã vɩɩme,” la t’a pʋlemsã fãa na n pidsame. (Heb. 4:12) B miime me t’a tʋmda sẽn na yɩl n pids raab ning a sẽn tar ne ninsaalbã la ne tẽngã. Wẽnnaam raabã sẽn tar yõod wʋsg ne-a wã yĩnga, a sẽn neẽ tɩ d wilgdame tɩ raab-kãng tara yõod wʋsg tõnd me nifẽ, noogda a sũuri. Baa fʋɩ pa tõe n kɩt t’a Zeova pa pids a raabã a rasem a yopoe soab daarã vʋʋsgã sasa ye. Sẽn paase, a miime t’a nin-buiidã na n kell n teela a raabã. La yãmb yẽ? Yãmb kẽe Wẽnnaam vʋʋsg daarã pʋgẽ bɩ?
[Tẽngr not rãmbã]
^ sull 8 Zʋɩf rãmbã tũudmã taoor dãmb wʋsg ra tũuda a Moiiz tõogã ne b sũur fãa. La a Zezi sẽn wa n wa tẽngã zugã, b pa sak n tẽ tɩ yaa yẽ la Mesi wã ye. B manesmã wilgame tɩ b kɩɩsa Wẽnnaam raabã.
^ sull 13 Ges-y Kell-y n pa-y “Wẽnnaam nonglmã pʋgẽ” sebrã neng 207-209.
^ sull 20 Rũndã-rũndã, Wẽnnaam tũnugda ne Biiblã n gomd ne tõndo. Biiblã sẽn yaa a Gomdã tara pãnga, n tõe n kɩt tɩ ned toeeme. Rẽnd d tõe n yeelame t’a Poll sẽn yeel bũmb ning Hebre rãmb 4:12 wã gomda Biiblã yell me.
Y tẽrame bɩ?
• Rũndã-rũndã, bõe la d segd n maan n paam n kẽ Wẽnnaam vʋʋsg daarã pʋgẽ?
• D sã n wa yã bũmb Biiblã pʋgẽ n bãng Wẽnnaam sẽn dat tɩ d maane, wãn to la d tõe n wilg tɩ d rat n taa a yam?
• Yel-bʋs taoor la tõe n yɩ toog tɩ d sak bũmb Wẽnnaam sẽn dat tɩ d maane, la bõe yĩng tɩ d segd n kell n sake?
• Võor wʋmb a yiib bʋs la Hebre dãmb 4:12 wã tara?
[Zãmsgã sogsgã]
[Foto, seb-neng 31]
Roagdbã sũy sãama wʋsgo!
