Yɩ-y sakdb la y tall raood wa Kiristã

“Bɩ y keng y sũyã, tɩ mam tõoga dũni wã.”—ZÃ 16:33, Kãab-paalgã Koe-noogo.

1. Bõe yĩng tɩ d tõe n yeel t’a Zezi saka Wẽnnaam zãng-zãnga?

A ZEZI KIRIST maana Wẽnnaam daabã wakat fãa. A pa tol n tʋlg n na n kɩɩs a saasẽ Ba wã baa vugr ye. (Zã 4:34; Heb. 7:26) La a vɩɩmã sẽn yɩ to-to tẽng zug ka wã kɩtame tɩ Wẽnnaam sakr pa yɩ nana ne-a wakat fãa ye. A Zezi koe-moonegã sɩngrẽ bala, a bɛɛbã n paas a Sʋɩtãan sẽn yaa a bɛ-kãsengã mengã makame n na n kɩt t’a kɩɩs Wẽnnaam. (Mat. 4:1-11; Luk 20:20-25) B nams-a-la vẽeneg-vẽenega, b rõd-a lame la b yaal-a, n mak n na n koms a raoodo. B wa n baas n kʋ-a-la kũum da-luk zugu. (Mat. 26:37, 38; Luk 22:44; Zã 19:1, 17, 18) La baa ne rẽ fãa sẽn nams a Zezi wʋsgã, a kell n saka Wẽnnaam hal n tãag kũum.—Karm-y Filip dãmb 2:8.

2, 3. A Zezi sẽn kell n sak Wẽnnaam baa ne namsgã wilgda tõnd bõe?

² A Zezi sẽn wa tẽng zug ka wã, a zãmsa Wẽnnaam sakr n paase, bala a sega zu-loees a sẽn da zɩ n paame. (Heb. 5:8) La d tõe n tagsame t’a Zezi ra pa le baood n zãms bũmb a Zeova raabã maaneg wɛɛngẽ ye. Sɩd me, a reng a zĩnda ne a Zeova saasẽ n kaoos yʋʋm wʋsgo, hali meng n tʋm a sɛɛgẽ “wa tʋʋm  mita,” ãndũniyã naaneg sasa. (Yel. 8:30) La baasgo, a sẽn wa tẽngã zug n kell n tõog toog baa ne namsgã, wilgame t’a sakrã sɩd yaa ne a sũur fãa. Woto kɩtame tɩ Wẽnnaam bi-ribl a Zezi ne a ba wã zood pãng paase. Yam bʋs la d tõnd tõe n dɩk a mak-sõngã pʋgẽ?

³ Baa a Zezi sẽn da pa koangdã, a pa tags t’a tõe n kell n saka Wẽnnaam tɩ pa tũ ne a sõngr ye. A pʋʋsa Wẽnnaam n kos-a t’a sõng-a t’a tõog n kell n yɩ sakda. (Karm-y Hebre rãmb 5:7.) Sẽn na yɩl n kell n yɩ sakdba, tõnd me segd n sika d mense, n sak n pʋʋs Wẽnnaam n kos a sõngre. Rẽ n so tɩ tʋm-tʋmd a Poll sagl kiris-nebã woto: ‘Bɩ y paam yam ninga Kirist Zezi sẽn da tarã. . . . A sika a meng n sak n ki, hali n ki kũum da-lukã zugu.’ (Fil. 2:5-8) A Zezi sẽn tõog n kell n sak Wẽnnaam tẽngã zug ka wã wilgdame tɩ baa dũni-wẽn-kãngã pʋgẽ, ninsaal tõe n saka Wẽnnaam wakat fãa. Yaa sɩd t’a Zezi yɩɩ ned sẽn zems zãnga. La rẽ yĩnga neb sẽn yaa koangdb wa tõnd tõe n dɩka a makrã bɩ?

D tõe n yɩɩ sakdb baa d sẽn yaa koangdbã

4. Bõe la Wẽnnaam sẽn naan tõnd tɩ d tõe n yãk d toorẽ yamã rat n yeele?

⁴ Wẽnnaam naana a Ãdem ne a Hawa tɩ b ra tar yam, n tõe n tags n yãk b toorẽ yam n maan sõma wall wẽnga. Tõnd sẽn yaa b yagensã, d me tara tõog kãnga. Woto rat n yeelame tɩ bõe? Rat n yeelame tɩ tõnd me tõe n yãka yam n maan sõma bɩ wẽnga. Dẽnd Wẽnnaam basa tõnd ned kam fãa t’a wilg a sã n dat n saka yẽ wall a kɩɩs-a. La pa rat n yeel tɩ d sẽn yãk yam n maan a soab fãa, yell kae ye. Sɩd me, d sã n yãk yam n sak Wẽnnaam, d na n paama vɩɩm, la d sã n yãk yam n kɩɩs-a, yaa kũum. Tõnd sẽn yãkd yam n maand bũmb ninsã me tõe n manega d taabã wall sãam-ba.

5. Bõe maaneg n yaa tɩlae ne-d fãa, la bõe n tõe n sõng-d tɩ d tõoge?

⁵ Tõnd sẽn yaa koangdbã yĩnga, sakrã pa nana ne-d ye. Rẽ kɩtame tɩ Wẽnnaam sakr me pa nana ne-d wakat fãa ye. Tʋm-tʋmd a Poll ra wilgame tɩ sẽn na yɩl n tõog n kell n sak Wẽnnaam, yaa tɩlae ne-a t’a mao. A yeela woto: “Mam yãta tõog a to mam yĩngã wilã pʋgẽ sẽn maood ne mam pʋ-tẽer tõogo, la sẽn kẽesd maam yel-wẽnã tõog yembd pʋgẽ, sẽn be mam yĩngã wilã pʋse.” (Rom 7:23) Yaa vẽeneg tɩ noor sakr sã n noom-do, bɩ a pa baoodẽ tɩ d mong d meng bũmb wall d namse, yaa nana ne-do. La tõnd ‘mensã bɩ d nina ratem’ sã n wa kɩt tɩ d rat n maan bũmbu, tɩ d yaool n miẽ tɩ bõn-kãng gɩdgame, d manesem yaa wãna? Tʋls-wẽns a woto tara pãnga. La yaa tõnd sẽn yaa pãn-komsem dãmbã, la d vɩ neb sẽn pa maand Wẽnnaam daabã sʋkã yĩng n kɩt tɩ d mi n tar tʋls-kãensã. (1 Zã 2:16; 1 Kor. 2:12) Sẽn na yɩl n tõog-ba, nand tɩ zu-loees wall makr paam-do, d segd n deng n yãka yam n na n kell n sak Wẽnnaam baa sẽn na n yɩ a soaba, la d mao n da yɩ “yam a yiib” rãmb ye. (Yɩɩl 78:8) Biiblã tara kibay wʋsg sẽn wilgd neb sẽn tõog n yɩ sakdba, b sẽn da yãk yam n na n kell n yɩ sakdb yĩnga.—Ɛs. 7:10; Dan. 1:8.

6, 7. Rɩk-y makr n wilg Biiblã zãmsg sẽn tõe n sõng-d to-to tɩ d bãng n maan sẽn segde.

⁶ Bũmb a yembr d sẽn tõe n maan n tõog n ‘yãk yam’ n kell n sak Wẽnnaam wakat fãa, yaa d sẽn na n zãmsd Biiblã la siglgã sɛb a taabã. D rɩk makre. Tags-y n ges-y wala sẽn na n yaa yãmb zaabr Biibl zãmsgã raare. Y zãmsa Biiblã la y pʋʋsa a Zeova n kos t’a kõ-y a vʋʋsem sõngã tɩ y tũ y sẽn zãms bũmb ning a Gomdã pʋgẽ wã. La mikame tɩ yãmb da yãka yam n na n ges filim vẽkembeoogã zaabre. Y wʋma neb sẽn pẽgd filim kãnga, la y yaool n miime t’a pʋgẽ wã, yoob la nen-kɛglem yɛl n be be.

⁷ Yãmb zĩnd n bʋgsa a Poll saglg ning sẽn be Efɛɛz rãmb 5:3 wã zugu. Be, a sagla woto: “La yoobo ne dẽgd fãa la zoe-bõne, bɩ y ra sak n pʋd bõn-kãens yãmb sʋk ye, a wa sẽn zems Wẽnnaam neba.” Y tẽega a saglg ning me sẽn be Filip rãmb 4:8 wã. (Karm-y.) Yãmb sẽn bʋgs sagl-kãensã zutã poore, y soka a meng woto:  “Mam sã n kell n ges filmã n dẽgem m sũurã ne m yamã ne yel-kãensã, rẽ yĩnga m tõe n yeelame tɩ m sakda Wẽnnaam wakat fãa wa a Zezi sɩda?” Woto wã, y maanda wãna? Y na n baas n gesa y filmã bɩ?

8. Bõe yĩng tɩ d segd n kell n sakd Wẽnnaam noyã wakat fãa?

⁸ D sã n maan yaal-yaal ne Wẽnnaam noyã sakre, n tẽ tɩ d bãngrã sẽn ta zĩig ningã kɩtame tɩ bũmb pa tõe n maan-do, d belgda d mense. Wala makre, nina tõe n wa tagsdame tɩ baa a tar tũud-n-ta-wẽns wall a get filim dãmb sẽn wilgd nen-kɛglem la yoob yɛla, bũmb pa na n maan-a ye. Ka-koaadbã maanda b sẽn tõe fãa sẽn na yɩl n bĩng b bõn-buudã tɩ ra sãam ye. Wala makre, b sã n dat n bĩng beng-buudu, b ningda tɩɩm wall b pugl ne tompɛglem sẽn na yɩl tɩ ra wa kẽ biis ye. La tõnd yẽ? Rẽ yĩnga d segd n maana yaal-yaal n pa kogl d mens ne a Sʋɩtãan sɩlmã sẽn tõe n sãam-dã sɩda?—Ef. 6:11.

9. Bõe yĩng tɩ d segd n tũud a Zeova noyã daar fãa?

⁹ Daar fãa d yãkda yam n maand yɛl wʋsgo, la d yam yãkr fãa pʋgẽ, bee ne tõnd tɩ d wilgd d sã n na n saka a Zeova. D sã n dat tɩ Wẽnnaam wa fãag-do, yaa tɩlae tɩ d tũud a noyã sẽn yaa tɩrsã daar fãa. D sã n yaa sakdb wa a Zezi sẽn yɩ sakd hal n tãag kũumã, d wilgdame tɩ d tara tẽeb hakɩka. La a Zeova na n wa keo-d lame. A Zezi ra yeela woto: “Ned ninga sẽn na n tall a tẽeb hal tɩ wakat ta, a na n paama fãagre.” (Mat. 24:13) Vẽenega, woto baoodame tɩ d sɩd tall raood wa a Zezi.—Yɩɩl 31:25.

A Zezi kõo mak-sõng sẽn ka to raoodã tallg wɛɛngẽ

10. Zu-loe-bʋs la d tõe n sege, la d manesem segd n yɩɩ wãna?

¹⁰ Dũni kãngã nebã no-goam la b manesem sẽn pa lebd be wã yĩnga, d sã n pa rat n wa wõneg-ba, rẽnda d tall raoodo. Kiris-nebã maooda ne zu-loees toor-toor sẽn tõe n wa kɩt tɩ b kɩɩs a Zeova noyã. Wala makre, b maoodame n dat n gil dũniyã neb vɩɩm manesem yookã, laogã wɛɛngẽ zu-loeese, ziri tũudmã sẽn wat ne zu-loees ninsã, n paas yɛl a taaba. Sãnda roagdb kis-b-la b tũudmã yĩnga. Lekoll dãmbẽ wã, b pẽgdame n dat tɩ karen-biisã tẽ tɩ yaa rũms n tall toeeng n wa lebg ninsaalbã, tɩ sẽn tẽed-b tɩ Wẽnd kaeyã me sõor tar paasgo. Woto fãa yĩnga, d pa tõe n mum d nin n maan wa yell kae ye. Sẽn na yɩl n kogl d mens n da wa yɩ wa nin-kãensã, rẽnda d maan bũmbu. A Zezi mak-sõngã wilgda tõnd d sẽn tõe n maan dẽ to-to.

11. D sã n bʋgsd a Zezi mak-sõngã zugu, wãn to la na n paas-d raoodo?

¹¹ Kiristã yeela a karen-biisã woto: “Yãmb na n paama namsg dũni pʋgẽ. La bɩ y keng y sũyã, tɩ mam tõoga dũni wã.” (Zã 16:33, Kãab-paalgã Koe-noogo) A Zezi pa tol n sak n wõneg dũniyã neb baa bilf ye. A pa bas tɩ nebã no-goam wall b manesem kɩt t’a bas koɛɛgã moonego, wall a bas n pa tũ Wẽnnaam noyã kẽer sẽn na n yɩl n noog b sũy ye. Tõnd me segd n maana woto. A Zezi pʋʋsa Wẽnnaam a karen-biisã yĩng n yeel woto: “Bãmb ka  dũniyã rẽnd wa mam sẽn ka dũniyã rẽndã.” (Zã 17:16) D sã n karemd kibay nins sẽn gomd a Zezi raoodã yellã la d bʋgsd rẽ zugu, na n sõng-d lame tɩ d me tall raood n tõog n da yɩ dũniyã rẽnd ye.

Rɩk-y-yã a Zezi makr daoodã tallg wɛɛngẽ

12-14. Sõdg-y yɛl a Zezi sẽn maan tɩ wilgdẽ t’a tara raoodo.

¹² A Zezi sẽn wa n be tẽng zug ka n moond koɛɛgã, a talla raood wʋsgo. Sɩd me, daar a yembre, a sẽn yaa Wẽnnaam biigã yĩnga, a kẽe wẽnd-doogẽ wã ‘n dig neb nins sẽn koosd la b raad Wẽnnaam doogẽ wã. La a lub ligd tekdbã taabl dãmba, la a lub neb nins sẽn koosd wala goeels me.’ (Mat. 21:12) Yʋng ning sodaasã sẽn wa n na n yõk-a wã, a wilga raoodo. Bala, sẽn na yɩl n kogl a karen-biisã, a yalsa sodaasã taoor n yeel woto: “Yãmb sã n baood maam, bɩ y bas nin-kãensã tɩ b looge.” (Zã 18:8) Rẽ poor bilfu, a wa n yeela a Pɩɛɛr t’a suy a sʋʋgã a wʋʋgẽ. Woto wilgdame t’a Zezi ra teega a Zeova lakae, pa zab-teed ye.—Zã 18:11.

¹³ A Zezi wilga raoodo, n puk a wakatẽ tũudmã taoor dãmb bãongo, n wilg tɩ b pa nong nin-buiidã la tɩ b zãmsd-b-la yɛl sẽn pa sɩda. A yeela woto: ‘Gʋlsdbã ne Fariziẽ dãmbã, zãmb dãmba, yãmb na paam toogo. Tɩ bõe, yãmb pagda saasẽ soolem tɩ neb ra kẽ ye. . . . yãmb basda bũmb nins sẽn yaa neer n yɩɩd tõog pʋgẽ sẽn yaa tɩrlem la nimbãan-zoeer la sɩda. . . . yãmb nedgda wamd la lengr poore, la bãmb pʋsã pida ne fãab la yĩng ratem sakre.’ (Mat. 23:13, 23, 25) A Zezi karen-biisã me ra segd n talla raood a woto buudu, bala ziri tũudmã taoor dãmb ra na n wa nams-b lame la b kʋ b kẽere.—Mat. 23:34; 24:9.

¹⁴ A Zezi talla raood n dig zĩn-dãmb menga. Daar a yembre, a sega rao zĩn-dãmb sẽn da tare, hal tɩ b pa tõe n sẽba ne bãens ye. La a Zezi pa zoe zĩn-dãmbã ye. A rig-b lame tɩ b yi n bas raoã. (Mark 5:1-13) Rũndã-rũndã, Wẽnnaam pa kõ kiris-nebã tõog tɩ b tõe n maan yel-soalem a woto buud ye. Baasgo, tõnd koe-moonegã la karen-biisã maaneg sasa, d me segd n zaba ne a Sʋɩtãan sẽn ‘lud neb nins sẽn ka tẽebã yamã.’ (2 Kor. 4:4) Wala a Zezi, tõnd me zab-teedã “ka ninsaal dẽnd ye, la b tara pãng Wẽnnaam maasem yĩnga tɩ sik pãens rãmba,” rat n yeel tɩ n dems yɛl toɛy-toɛy b sẽn zãms nebã Wẽnnaam zug tɩ b tẽed ne b sũy fãa tɩ yaool n yaa ziri wã. (2 Kor. 10:4) A Zezi kõo tõnd mak-sõng zab-te-kãensã Wẽnnaam sẽn kõ tõndã tall n zabã wɛɛngẽ.

15. Bõe n kɩt t’a Zezi ra tar raoodo?

¹⁵ A Zezi sẽn wilg raood woto wã yaa a sẽn da tar tẽeb ne Wẽnnaamã, pa sẽn na yɩl tɩ nebã yã n pẽg-a t’a yaa raood soab ye. Yaa tõnd me tẽebã n segd n kɩt tɩ d tall raoodo. (Mark 4:40) La bõe la d na n maan n paam tẽeb hakɩka? Zĩ-kãng me a Zezi makrã sõngd-d lame. A tʋʋmã fãa ra wilgdame t’a ra mii Wẽnnaam Gomdã sõma, la a ra kɩsa sɩd ne a sũur fãa tɩ yaa sɩda. A Zezi zab-teoog ra pa sʋʋg sɩd-sɩd ye. Ra yaa Wẽnnaam Gomdã b sẽn mak ne sʋʋg vʋʋsem sõngã sẽn kõtã. A sã n da zãmsd nebã, a ra nong n sõdgda goam sẽn be Wẽnnaam Gomdã pʋgẽ n wilgdẽ t’a sẽn yetã yaa sɩda. Naoor wʋsgo, a sã n wa gomda, a mi n yeelame tɩ: “A gʋlsame,” rat n yeel tɩ Wẽnnaam gomdã pʋgẽ. *

16. Bõe la d na n maan n paam tẽeb sẽn tar pãnga?

¹⁶ Sẽn na yɩl n tall tẽeb sẽn tar pãnga, n tõogd tood buud toor-toorã sẽn na n paam-d d sẽn yaa a Zezi karen-biisã yĩnga, rẽndame tɩ d  me karemd Biiblã daar fãa la d zãmsd-a, la d kẽnd tigissã, n kɩt tɩ d tẽebã sẽn tik bũmb nins zutã bee d yamẽ. (Rom 10:17) D segdame me n bʋgsd bũmb nins d sẽn zãmsdã zug sõma, sẽn na yɩl tɩ paa d sũurẽ wã. Yaa d tẽebã sẽn na n tar pãnga, la d na n tõogd n tʋmd ne raoodo. (Zak 2:17) Sẽn paase, d segd n pʋʋs n kosa vʋʋsem sõngã, bala tẽebã naaga zʋg sõma nins a sẽn kõtã.—Gal. 5:22.

17, 18. Wãn to la saam-bi-poak sẽn yaa bi-bɩɩg tall raood a lekollẽ?

¹⁷ Bi-pugl a ye yʋʋr sẽn boond t’a Kitty n yaa tõnd saam-bi-poak kibar n sɩd wilgd tɩ tẽeb hakɩk kõta raoodo. Hal a yãadmẽ, a ra miime t’a pa segd n ‘zoe yãnd ne koe-noogã’ mooneg a lekollẽ wã ye. A ra rata ne a sũur fãa n taas a karen-bi-taasã koe-noogã. (Rom 1:16) Yʋʋmd fãa, a makdame n na n taas a karen-bi-taasã koɛɛgã, la wakat fãa, a kongda raoodo. Kaoosg zugẽ a wa n toeema lekolle. A yeela a meng woto: “So-kãngã wã, m na n maana m sẽn na n maaneg n moon m karen-bi-taasã, la m da bas tɩ yɩ wa pĩndã ye.” A Kitty pʋʋsa a Zeova n kos t’a kõ-a a Zezi raoodã buud la yam, la a sõng-a t’a paam segbo.

¹⁸ Yʋʋmd kãngã, lekollã yikr daare, b yeela karen-biisã tɩ b ned kam fãa yik n togs a yʋʋre. Karen-biis wʋsg togsa b sẽn dog tũudum ning pʋgẽ wã menga, la b yeel tɩ bãmb mensã pa tolg n tũudẽ ye. A Kitty bãngame tɩ yaa yẽ sẽn da pʋʋs n kos Wẽnnaam t’a kõ-a segb ningã la woto. Sẽn wa n ta yẽ, a paama raood n yell woto: “Mam yaa a Zeova kaset soaba, yaa Biiblã sẽn yet bũmb ningã n sõngd maam tɩ m bãngd m sẽn segd n tũ Wẽnnaam to-to la m sẽn segd n zã m meng to-to me.” A sẽn wa n ket n gomdã, karen-biis kẽer da wẽgsda b nin n yaand-a. La sãnda yẽ ra maaga b yĩns n kelgdẽ. La rẽ poore, sãnda wa n baoa a zĩig n sok-a sogsgo. Karen-saamba pẽga a Kitty n yeel t’a yaa bi-bɩɩg sẽn teend a tũudmã sõma. A Kitty sũur yaa noogo a sẽn tõog n tall raood wa a Zezi wã.

Tall-y tẽeb la raood wa a Zezi

19. a) Tall tẽeb hakɩk rat n yeelame tɩ bõe? b) Wãn to la d tõe n noog a Zeova sũuri?

¹⁹ A Zezi tʋm-tʋmdbã me bãngame tɩ b ra segd n talla tẽebo, bala rẽ n da na n kɩt tɩ paam raoodo. B kosa a Zezi woto: “Bɩ y paas tõnd tẽebo.” (Karm-y Luk 17:5, 6.) Pa ned sẽn tẽed tɩ Wẽnnaam beeme yĩng bal la b tõe n yeel t’a tara tẽeb hakɩk ye. Rẽndame t’a soab tar zood sõma ne a Zeova la a teegd-a, wala bi-bilf sẽn nong a ba la a teegd-a to-to wã. Wẽnnaam da kɩtame tɩ rĩm a Salomo gʋls woto: “M biiga, fo sã n yaa yam soaba, na n kõo maam sũ-noogo. Fo noor goam sã n yaa sõma, mam na n kɩdmame.” (Yel. 23:15, 16) Dẽnd tõnd sẽn pẽdgd ne raood n maand sẽn yaa sõma wã, nooma a Zeova sũuri, la d sẽn mi rẽ wã paasda d raoodo. Woto yĩng bɩ d ket n dɩkd a Zezi mak-sõngã, n maand sẽn yaa sõma bɩ tɩrg wakat fãa ne raoodo!

[Tẽngr note]

Y tõe n wilgame bɩ?

• Bõe n na n sõng-d tɩ d kell n sak Wẽnnaam baa d sẽn yaa pãn-komsem dãmbã?

• Tẽeb hakɩk tika bõe zugu, la tẽeb-kãng buud paamda wãn-wãna?

• D sã n yaa wẽn-sakd la d tar daood wa Kiristã, rẽ yõod yaa bõe?

[Zãmsgã sogsgã]

[Foto, seb-neng 16]

Yãmb maanda sẽn tõe n sõng-y tɩ y ‘yãk yam’ n kell n sak Wẽnnaam bɩ?

[Foto, seb-neng 18]

D tõe n talla tẽeb sẽn na n kõ-d raood wa a Zezi