Tall-y Kirist yam-sõngã buudu
Tall-y Kirist yam-sõngã buudu
‘Sak-y taab ne yam-sõma wa sẽn zems Kirist Zezi mamsgo.’—ROM 15:5.
1. Bõe yĩng tɩ d segd n dɩk Kirist togs-n-taare?
A ZEZI KIRIST yeela woto: “Bɩ y wa mam nengẽ,” la a paase: “Bɩ y rɩk mam naoã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba, la m yaa nin-nana, la yãmb na paam vʋʋsgo.” (Mat. 11:28, 29) A Zezi sẽn bool nebã woto wã, wilgdame t’a ra yaa ned sẽn nong nebã. Mak-sõng ning a sẽn kõ tõndã sɩd ka to ye. Baa ne a sẽn yaa Wẽnnaam biig n da tar tõog wʋsgã, a yɩɩ nimbãan-zoɛt la nin-bʋgsga. Sẽn yɩɩd fãa, ne neb nins sẽn da namsdã.
2. Bõe yell la d na n gome?
2 Sõs-kãngã la a yiibã sẽn na n pʋglã pʋgẽ, d na n goma d sẽn tõe n maan to-to n paam la d kell n tall a Zezi yam-sõngã buudu. (1 Kor. 2:16) D na n deng n goma a bʋgsmã ne a sik-m-mengã, a nin-sõmblmã, a wẽn-sakrã, a raoodã la a nonglmã yelle.
A Zezi bʋgsmã sẽn wilgd tõnd bũmb ninga
3. a) Bõe la a Zezi maan n zãms a karen-biisã sik-m-menga? b) A Zezi sẽn yeel a karen-biis tɩ b gũ la b ra gũs tɩ b pa tõogã, a manesem yɩɩ wãn ne-ba?
3 Wẽnnaam bi-ribl a Zezi sẽn pa tall yel-wẽndã saka ne yamleoog n wa tẽngã zugu, ninsaalbã sẽn yaa yel-wẽn-maandbã sʋka. Yaa nin-kãensã kẽer n da na n wa kʋ-a. La baasgo, a Zezi kell n talla a sũ-noogã la a tõog a menga. (1 Pɩɛ. 2:21-23) Woto yĩnga, d sã n get a Zezi, rat n yeel tɩ d sã n tagsd a mak-sõngã yell wakat fãa, na n sõng-d lame tɩ baa d taabã pãn-komsem la b tʋʋm-kɛg sã n wa sãamd d sũuri, bɩ d me tõog n kell n tall sũ-noog la d tõogd d mense. (Heb. 12:2) A Zezi yeela neb nins fãa sẽn na n tũ-a wã tɩ b ‘rɩk yẽ naoã n zãms bũmb nins a sẽn na n wilg-bã.’ (Mat. 11:29) Bõe la b ra na n zãmse? Bũmb a ye b sẽn da na n bãng yaa t’a Zezi yaa sũ-mar soab la nin-nana ne a karen-biisã, baa ne b sẽn da mi n maan tɩ yõsgã. Yʋng ning sẽn deng a kũumã, a maana bũmb n wilg a karen-biisã tɩ b segd n yɩɩ sik-m-mens rãmba, hal tɩ b pa na n tol n yĩm ye: A waasa b naoã. (Karm-y Zã 13:14-17.) Rẽ poore, a Zezi wa n yeela a Pɩɛɛr ne a Zak la a Zã tɩ b gũ la b ra gũsi, tɩ b pa tõog n gũ ye. La a bʋka a sũur ne-ba, n sok woto: “Sɩmo, fo gõeeme laa?” La a paas woto: “Bɩ yãmb gũ la y pʋʋs n da kẽ makrẽ ye. Sɩɩgã ratame, la yĩngã ka tar pãng ye.”—Mark 14:32-38.
4, 5. Wãn-wãn la a Zezi mak-sõngã sõngd tõnd tɩ d bʋkd d sũy ne d taabã, b pãn-komsmã yĩnga?
4 D tẽed-n-taag sã n nong tak-tɩ-m-take, wall a sũur ka zaeed yikri, pa rẽ bɩ a yaa ned sẽn pa nana, wala makre, a sã n pa sakd tigingã kãsem dãmb bɩ “tʋm-tʋmd sẽn tũud sɩd la sẽn tar yamã noy tao-tao,” d manesem ne-a yaa wãna? (Mat. 24:45-47) Sã n yaa dũniyã ned n tar zʋg-kãensã, d tõe n basa taal faag-faaga. La sã n wẽneg n yaa d tẽed-n-taaga, tõe n sãama d sũur wʋsgo. D tẽed-n-taasã pãn-komsem sã n wae n sãamd d sũuri, d segd n soka d meng woto: ‘Wãn to la mam tõe n maneg n wilg tɩ m sɩd tara “Kirist yamã buudu”?’ Tẽegd-y tɩ baa a Zezi karen-biisã sã n da wa maan bũmb tɩ wilg tɩ b pa tar a “yamã buud” fasɩ, a pa yikd a sũur ne-b ye.
5 Wala makre, tẽeg-y bũmb a ye tʋm-tʋmd a Pɩɛɛr sẽn da maane. A Zezi sẽn da wa n kẽnd koom zug t’a Pɩɛɛr kos n na n kẽn wa yẽ n seg-a t’a yeel-a t’a yi koglgã pʋgẽ n wa wã, a Pɩɛɛr sɩd yiime n kẽnd koomã zugu n segd-a. La a wa n yãame tɩ sobgã yaa wʋsgo, tɩ rabeem yõk-a t’a sɩng bõrbo. Rẽ yĩnga a Zezi sũur yika ne a Pɩɛɛr t’a yeel-a tɩ rat bɩ tall-a tɩ rẽ la a bãngd yam bɩ? Abada! Kibarã wilgame tɩ “tao-tao bala, a Zezi tẽega a nug n gãd yẽnda n yeel-a: ‘Tẽeb bilf soaba, yaa bõe tɩ fo yam yoaada?’ ” (Mat. 14:28-31) Tõnd me sã n wa yã d tẽed-n-taag sẽn maan bũmb tɩ wilgdẽ t’a tẽebã paoodame, d tõe n bʋka d sũur n sõng-a tɩ keng a tẽebã wa a Zezi sẽn maan to-to wã bɩ? A Zezi manesem sẽn yɩ to-to ne a Pɩɛɛrã wilgdame tɩ tõnd ned kam fãa sɩd segd n maanda woto.
6. A Zezi karen-biisã sẽn da wa n baood n yɩ b taabã taoor dãmbã, bõe la a yeel-ba?
6 Tʋm-tʋmdbã sẽn da wa n wẽed no-koɛɛm n dat n bãng b ned ning sẽn yaa a kãseng n yɩɩdã, a Pɩɛɛr me ra naagame. A Zak ne a Zã me ra kosa a Zezi t’a yãk bãmb tɩ b zĩnd a koabg la a rɩtg a Rĩungã pʋgẽ. A Pɩɛɛr ne tʋm-tʋmdb a taabã sẽn wa n wʋm dẽ wã, b sũy sãama wʋsg ne-ba. A Zezi ra miime tɩ tõe n yaa b wakatẽ nebã sẽn da nong taoorã yĩng n kɩt tɩ b ra tar yam-kãngã. La a bool-b lame n yeel-b woto: “Yãmb mi tɩ soolem toɛy-toɛyã nanambs maanda bãmb pãnga, la tɩ nin-kãsems soo bãmba. A kõn yɩ woto yãmb sʋk ye. La ned ninga fãa sẽn dat n yɩ yãmb nin-kãsenga, bɩ a yɩ yãmb sõngda. La ned ninga fãa sẽn dat n yɩ yãmb kãsma bɩ yẽ yɩ yãmb yamba.” Dẽ poore, a wilgame tɩ b rɩk yẽ mengã makre, n yeel-b woto: “Yaa woto yĩng la Ninsaal Biiga wayã. Bãmb ka wa tɩ neb sõng bãmb ye, b waame n na n sõng nebã, la kõ b vɩɩm tɩ yao neb wʋsg yĩnga.” (Mat. 20:20-28)
7. Wãn to la tõnd ned kam fãa tõe n sõng n kɩt tɩ zems-n-taar zĩnd tigingã pʋgẽ?
7 D sã n tagsd a Zezi sik-m-mengã zugu, na n sõngd-d lame tɩ d get d meng wa ned sẽn “yaa bilfu,” d tẽed-n-taasã sʋka. (Luk 9:46-48) D sã n maand woto, kɩtdame tɩ zems-n-taar zĩnd tigingã pʋgẽ. A Zeova yaa wa zag-kãseng ba sẽn dat t’a tẽng zug kambã zemsd taab tɩ b zĩid-n-taarã yaa noogo. (Yɩɩl 133:1) A Zezi pʋʋsa a Ba wã n kos-a t’a kɩt tɩ kiris-neb hakɩkã zems taab noor a yembre, sẽn na yɩl tɩ ‘dũniyã bãng t’a Ba wã n tʋm-a, la t’a Ba nonga yẽ karen-biisã wa a sẽn nong yẽ wã.’ (Zã 17:23) D sã n zemsd taaba, kɩtdame tɩ nebã bãngdẽ tɩ d yaa a Zezi karen-biisi. La d sã n dat zems-n-taar a woto, d segd n modgame tɩ d sẽn tagsd to-to d taabã pãn-komsem zugã wõneg a Zezi tagsgo. A Zezi ra yaa sugr soaba, la a wilgame tɩ yaa tõnd sẽn na n sakd n kõtd d taabã sugr la Wẽnnaam na n kõ tõnd me sugri.—Karm-y Matɩe 6:14, 15.
8. Wãn to la neb nins sẽn sɩng n tũud Wẽnnaam hal yʋʋm wʋsgã mak-sõng tõe n naf-do?
8 D tõe n dɩkda neb nins sẽn sɩng n tũud a Zezi mak-sõngã hal yʋʋm wʋsgã me makre, tɩ naf-do. Naoor wʋsgo, nin-kãensã sã n yã b taabã pãn-komsem, b wilgdame tɩ b yaa wʋmdb wa a Zezi sẽn da yaa to-to wã. B bãngame tɩ b sã n yaa nimbãan-zoɛtb wa Kiristã, sõngd-b lame tɩ b “zɩ neb nins sẽn ka pãngã zɩɩbo,” la wat ne zems-n-taar tigingã pʋgẽ me. Sẽn paase, kɩtdame tɩ tigingã neb fãa baood Kirist yamã buudu. Nin-kãensã me ratame tɩ b tẽed-n-taasã maan wa a Poll sẽn da yeel Rom kiris-nebã tɩ maan to-to taab neer yĩngã. A Poll yeela Rom kiris-nebã woto: “Bɩ Wẽnnaam sẽn yaa sũ-mar la belsg soabã sõng yãmb tɩ y sak taab ne yam-sõma wa sẽn zems Kirist Zezi mamsgo. Bɩ yãmb fãa lagem taab ne noor a yembre n waoog Wẽnnaam sẽn yaa tõnd Zusoab a Zezi Kirist Ba wã.” (Rom 15:1, 5, 6) D sã n sɩd lagem taab noor a yembre, pẽgda a Zeova.
9. Bõe yĩng tɩ sẽn na yɩl n tõog n dɩk a Zezi makre, yaa tɩlae tɩ d paam vʋʋsem sõngã?
9 A Zezi wilgame tɩ sik-m-mengã la sũ-bʋgsmã fãa sẽn be Wẽnnaam vʋʋsem sõngã bil pʋgẽ wã tũuda taaba. Woto yĩnga, d segd n baood n bãngda Zezi sõma, la sẽn na yɩl n tõog n tũ a makrã neere, yaa tɩlae tɩ d paam a Zeova a vʋʋsem sõngã. D segd n pʋʋsda Wẽnnaam n kot a vʋʋsem sõngã la d mao n bao zʋg-sõma nins a sẽn kõtã, rat n yeel tɩ d bao “nonglem la sũ-noogo, laafɩ la sũ-mare, maan neer la sũ-maasem, la tẽebo, la sũ-bʋgsem la yõk-m-menga.” (Gal. 5:22, 23) D sã n maand woto n dɩkd a Zezi sik-m-mengã la a sũ-bʋgsmã makre, d na n nooga d saasẽ Ba a Zeova sũuri.
A Zezi ra maanda nebã neere
10. Wãn-wãn la a Zezi ra maand nebã neere?
10 Maan-neerã me naaga vʋʋsem sõngã bil pʋgẽ. A Zezi ra maanda nebã neer wakat fãa. Neb nins sẽn da gẽesd a Zezi ne b sũy fãa wã yã-a lame, la a sak n deeg-b-la ne nonglem. (Karm-y Luk 9:11.) A Zezi sẽn maan nebã neer woto wã wilgda tõnd bõe? Maan-neer soab yaa ned sẽn nong neba, nimbãan-zoɛta, la wʋmda. A Zezi ra yaa woto bal kɛpɩ. Kʋʋngã nimbãaneg ra tar-a lame, bala b ra “yaa wa piis sẽn ka tar kɩɩm ye.”—Mat. 9:35, 36.
11, 12. a) Togs-y kibar sẽn wilgd a Zezi sẽn kʋm ned nimbãaneg to-to. b) Makr ning yell d sẽn gom sullã pʋgẽ wã wilgda tõnd bõe?
11 A Zezi ra pa zoet nebã nimbãaneg bal ye. A ra maanda a sẽn da tõe fãa n sõng-b me. D tẽeg kibar a ye sẽn wilgd rẽ. Pag a ye n da tar bãag t’a zɩɩm yita, la a bãagã kaoosa hal yʋʋm piig la a yiibu. Pagã ra miime t’a Moiiz Tõogã wilga vẽeneg tɩ ned sẽn bẽed bãag a woto yaa rẽgdo, n pa segd n kẽng neb sʋk wall a maan tũudmã yɛl kẽere, la tɩ ned ning a sẽn sɩɩs fãa lebgda rẽgd wa yẽ. (Maan. 15:25-27) La baasgo, a sẽn da mi t’a Zezi yaa nin-sõng n maand nebã neerã kɩtame t’a kɩs sɩd t’a tõe n maaga a bãagã, la t’a na n sak n sõng-a lame. A yeela a meng woto: “Mam sã n tõog n sɩɩs bãmb fuugã bala, mam na n paama maagre.” A kʋ a sũur n sɩd maan woto, la zĩig pʋgẽ bala, a paama a menga.
12 La a Zezi bãngame tɩ ned n sɩɩs-a, n wẽnemd n baood a soaba. Pagã sẽn mi t’a sẽn maan woto wã, a kɩɩsa Tõogã yĩnga, rabeem yõk-a lame t’a sɩng rigbu, n wa yĩgimd a Zezi taoor n peelg a pʋg n togs-a sɩda. Rẽ yĩnga a Zezi zaba pʋg-kãngã sẽn da ka laafɩ wã bɩ? Abada! A kenga pagã pɛlg n yeel-a yaa: “M biiga, fo tẽeb n maag foom. Kẽng ne laafɩ.” (Mark 5:25-34) Ad a Zezi sẽn yeel-a woto wã, sɩd kenga a raoodo!
13. a) Bõe n kɩt t’a Zezi ra yaa toor fasɩ ne fariziẽ rãmbã? b) A Zezi manesem ne kambã ra yaa wãn-wãna?
13 A Zezi pa tol n yɩ nin-toaag wa fariziẽ rãmbã sẽn da tũnugd ne b zu-sobendã n weoogd nin-buiidã ye. (Mat. 23:4) A pʋd n da maagda a yĩng n wilgd nebã a Zeova raabã ne nonglem. A Zezi tũud-n-taar da nooma a karen-biisã, bala a ra yaa nin-sõngo, a ra nong-a lame, n sɩd ra yaa zoa hakɩka. (Yel. 17:17; Zã 15:11-15) Baa kambã mengã ra nonga a Zezi zĩigẽ, la yaa vẽeneg tɩ yẽ me ra nong b zĩigẽ. A ra pa get t’a tʋʋmã waoogame tɩ sẽk kae n get biig yell ye. Daar a yembre, neb n da rat n wa ne b kamb a Zezi nengẽ t’a sɩɩs-ba. La a karen-biisã sẽn da ket n tẽed wa b wakatẽ tũudmã taoor dãmb tɩ bãmb yaa nin-kãsemsã yĩnga, b ra rat n gɩdg-b lame. B manesmã pa yɩ a Zezi noog ye. A yeela a karen-biisã woto: “Bas-y kom-bõonegã tɩ b wa mam nengẽ n da gɩdg bãmb ye, tɩ bõe, Wẽnnaam soolem yaa neb nins sẽn wẽnd wa bãmba yĩnga.” Rẽ poore, a bẽda ne kambã n wilg a karen-biisã bũmb sẽn tar yõod wʋsgo. A yeel-b-la woto: “Mam yeta yãmb sɩda, tɩ ned ninga fãa sẽn kõn deeg Wẽnnaam soolem wa bi-bilfu, a kõn kẽ be ye.”—Mark 10:13-15.
14. Kom-bõonegã sã n paamdẽ tɩ d get b yell ne nonglem, wãn to la nafd-ba?
14 Bʋgs-y n ges-y kom-kãensã tagsg sẽn yɩ a soab b bɩʋʋngã zugẽ, b sẽn wa n tẽegdẽ t’a Zezi ra ‘rɩka bãmb a nugẽ n tik-b ne a nusi, n ning b zut barkã.’ (Mark 10:16) Tigingã kom-bõoneg me sã n paamdẽ tɩ kãsem dãmbã la tigingã neb a taabã nong n get b yell woto, b bɩʋʋng zugẽ, b na n wa tẽegdame. Sẽn yɩɩd fãa, kom-kãensã na n zoe n bãngame t’a Zeova vʋʋsem sõngã be a nin-buiidã sʋka, tɩ b nan paoodẽ.
Yɩ-y maan-neer dãmba, baa neb wʋsg sẽn pa maan-neer dãmbã
15. Bõe yĩng tɩ rũndã-rũndã neb wʋsg pa maand b taabã neere?
15 Rũndã-rũndã, neb wʋsg tagsdame tɩ b sã n maan ned neere, b sãama b sẽka. Woto kɩtame tɩ daar fãa, a Zeova Kaset rãmba segd neb sẽn pa maand-b neere, b lekoll dãmbẽ, b tʋʋm zĩisẽ, b sẽn wat n togd soaya, la b koe-moonegã sasa. Nebã sã n pa maand-d neere, tõe n sãama d sũuri, la pa segd n ling-d ye. Bala a Zeova vẽnega a Poll t’a ra pĩnd n gʋls n wilg tɩ “yaoolem wakatã,” kiris-nebã na n vɩɩmda “beed dãmb . . . la neb sẽn ka tar nimbãan-zoeer” sʋka.—2 Tɩm. 3:1-3.
16. Tigingã pʋgẽ, wãn-wãn la d tõe n wilg tɩ d yaa maan-neer dãmb wa Kiristã?
16 La kiris-neb hakɩkã sʋk yẽ bee yamleoogo, bala b maanda taab neere, tɩ kɩt tɩ b zĩid-n-taarã yaa toor fasɩ ne dũniyã neb ne taab zĩid-n-taare. Tõnd ned kam fãa sã n dɩkd a Zezi mak-sõngã, sõngdame tɩ tigingã pʋg zĩndg kell n tall yamleoogo. Wãn to? Bala, rẽ maaneg baoodame tɩ d reng n sõng tigingã neb nins sẽn maood ne laafɩ zu-loees la yɛl a taabã, la d keng b raoodo. “Yaoolem wakat” kãensã pʋgẽ, yɛlã sõor sã n paasdame me, d tẽeg tɩ b buud zĩnda pĩnda. Pipi kiris-nebã kẽer talla zu-loe-kãensã buudu. La b sõnga sẽn da rat-b sõngr wakat kãngã, tɩ d segd n sõng rũndã-rũndã rãmbã me woto. Wala makre, a Poll sagla kiris-nebã tɩ b ‘bels sũ-sãoong rãmbã, la b sõng ka pãng rãmbã, la b maan sũ-mar ne nebã fãa.’ (1 Tes. 5:14) Woto fãa maaneg baoome tɩ kiris-nebã wilg vẽeneg ne b tʋʋm tɩ b sɩd yaa maan-neer dãmb wa Kiristã.
17, 18. Bõe ne bõe la d tõe n maan n yɩ maan-neer dãmb wa a Zezi?
17 B kõo kiris-nebã noor tɩ b “sõnge,” bɩ tɩ b reeg b saam-biisã ne nonglem n ges b sẽn mi b rãmb la b sẽn zɩ n yã b rãmbã fãa yelle, wa a Zezi sẽn da na n gesẽ b yell to-to wã. (3 Zã 5-8) D get taab yell wakat buud fãa ne yamleoog n yolsd taaba, wa a Zezi sẽn da maandã.—Ezai 32:2; Mat. 11:28-30.
18 Tõnd ned kam fãa tara a sẽn tõe n maan a taabã neer yĩnga, n wilg tɩ b yell pak-a lame. D bao soay la d ges d sẽn tõe n maan dẽ to-to! Tʋm-tʋmd a Poll sagla kiris-nebã tɩ b “nong taab wʋsg ne ba-biis nonglem,” la a paas tɩ b yɩt pipi n ‘waoogd taaba.’ (Rom 12:10) Woto rat n yeelame tɩ b rɩkd a Zezi mak-sõngã, n nong taab la b maand taab neere, rat n yeel tɩ b tall “nonglem sẽn ka naag ne zãmbo.” (2 Kor. 6:6, Kãab-paalga Koe-noogo.) A Poll bilga nonglem ning kiris-nebã sẽn segd n tallã sẽn yaa to-to n yeel woto: “Nonglem maanda sũ-mare, la a pida ne neerlem. Nonglem ka maand sũ-kiir ye. Nonglem ka pẽgd a meng ye, la a ka wukd a meng ye.” (1 Kor. 13:4) D tẽed-n-taag sã n beeg-do, wall tɩ d tug beem ne-a, d segd n tũu sagl-kãngã. B sagl-d-la woto: “Bɩ yãmb maan taab neere, la paam sũ-bʋgsem, la kõ taab sugri wa Wẽnnaam sẽn kõ yãmb sugr Kirist yĩngã.”—Ef. 4:32.
19. D sã n dɩkd Kiristã togs-n-taar n maand taab neere, wãn to la nafd-do?
19 D sã n maood n dɩkd Kiristã togs-n-taar n maand taab neer wakat fãa la yell buud fãa pʋgẽ, na n naf-d lame. A Zeova vʋʋsem sõngã na n tõog n zĩnda tigingã pʋgẽ, tɩ kɩt tɩ d ned kam fãa paam zʋg-sõma nins a sẽn kõtã. Sẽn paase, d sã n tũud a Zezi makrã la d sõngd d taabã tɩ b me maand woto, d na n naagda taab n maand Wẽnnaam daabã tɩ noogd a sũuri. Woto yĩng bɩ d ket n modgd n dɩkd a Zezi mak-sõngã n bʋkd d sũy ne taaba, la d maand taab neere.
Y tõe n wilgame bɩ?
• Wãn-wãn la a Zezi wilg t’a yaa “sũ-mar” la sik-m-meng soaba?
• Wãn-wãn la a Zezi wilg t’a yaa maan-neer soaba?
• Bõe ne bõe la d tõe n maan n wilg tɩ d yaa sũ-bʋgsem dãmb la maan-neer dãmb wa Kiristã, baa neb wʋsg sẽn pa maan-neer dãmbã?
[Zãmsgã sogsgã]
[Foto, seb-neng 11]
D tõe n bʋka d sũur n sõng d tẽed-n-taag tẽeb sẽn paood wa a Zezi sẽn sõng a Pɩɛɛrã bɩ?
[Foto, seb-neng 13]
Bõe la y tõe n maan n sõng tɩ tigingã yɩ sũ-noog zĩiga?