Kell-y n pa-y Wẽnnaam nonglmã pʋgẽ
Kell-y n pa-y Wẽnnaam nonglmã pʋgẽ
“Bɩ y tall yãmb mens Wẽnnaam nonglem pʋgẽ, yãmb sẽn gũud tõnd Zusoab a Zezi Kirist nimbãan-zoeerã sẽn na n yɩ vɩɩm sẽn ka sɛtã.”—ZIID 21.
1, 2. Bõe la a Zeova maan tɩ wilgdẽ t’a nonga tõndo, la bõe n kɩt tɩ d miẽ tɩ rẽ pa rat n yeel tɩ baa tõnd sẽn maand a soab fãa, a na n ket n nong-d lame?
TÕND Wẽnnaam a Zeova maana bũmb ka tɛk sẽn wilgd t’a nong-d-la wʋsgo. La bũmb ning a sẽn maan tɩ wilgd a nonglmã n yɩɩd tɩ no-koeemd kaẽ, yaa a sẽn kɩt tɩ tõnd paam rond d yel-wẽnã yĩngã. A nonga ãdem-biisã wʋsgo, hal tɩ kɩt t’a sak n tʋm a Bi-riblã a sẽn nong wʋsgã tẽng zug ka t’a wa ki tõnd yĩnga. (Zã 3:16) A Zeova sẽn maan woto wã, yaa a sẽn dat tɩ tõnd paam n vɩɩmd wakat sẽn kõn sa, la d paam t’a nong-d wakat fãa wã yĩnga.
2 La rẽ yĩnga, rat n yeelame tɩ baa tõnd sẽn maan a soab fãa, a Zeova na n ket n nong-d lame bɩ? Ayo. Bala Ziid sebrã verse 21 wã yeta woto: “Bɩ y tall yãmb mens Wẽnnaam nonglem pʋgẽ, yãmb sẽn gũud tõnd Zusoab a Zezi Kirist nimbãan-zoeerã sẽn na n yɩ vɩɩm sẽn ka sɛtã.” B sẽn yeel tɩ d ‘tall d mens Wẽnnaam nonglmã pʋgẽ wã,’ wilgdame tɩ bũmb la d segd n maane. La yaa bõe la tõnd sẽn segd n maan n tõog n pa Wẽnnaam nonglmã pʋgẽ wã?
Bõe la d segd n maan n tõog n pa Wẽnnaam nonglmã pʋgẽ?
3. A Zezi yeelame tɩ bõe la a segd n maan n tõog n pa a Ba wã nonglem pʋgẽ?
3 Bũmb ning a Zezi sẽn yeel a karen-biisã yʋng ning sẽn deng a kũumã sõngda tõnd tɩ d bãnge. A yeel-b-la woto: “Yãmb sã n sak mam tõodã, yãmb na n paa mam nonglmã pʋgẽ wa mam sẽn sak m Ba tõodã n paad bãmb nonglmã pʋgẽ wã.” (Zã 15:10) A sẽn yeelã wilgda vẽeneg t’a miime t’a sã n dat t’a Zeova ket n nong-a, yaa tɩlae t’a sakd a tõodã. La sã n mik tɩ Wẽnnaam biigã sẽn pa tar yel-wẽndã meng ra segd n saka Wẽnnaam noyã, tõnd me pa segd n maan woto sɩda?
4, 5. a) Pipi bũmb d sẽn segd n maan n wilg a Zeova tɩ d nong-a lame la bʋgo? b) Bõe yĩng tɩ d pa tar bʋʋm n na n tõdg a Zeova noyã sakre?
4 Pipi bũmb tõnd sẽn segd n maan n wilg a Zeova tɩ d nong-a lame yaa d sẽn na n sakd a noyã. Tʋm-tʋmd a Zã wilga rẽ n yeel woto: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” (1 Zã 5:3) Rũndã-rũndã, neb wʋsg yaool n pa nong noy sakr ye. La y sã n kelga neere, b yeela verse wã pʋgẽ tɩ Wẽnnaam ‘tõogã ka toog ye.’ A Zeova pa kot tõnd tɩ d maan bũmb d sẽn pa tõe ye.
5 D pʋd n dɩk makre: Rẽ yĩnga, y na n sak n kosa y zo-nongr t’a tʋk zɩɩb y sẽn mi vẽeneg tɩ yɩɩda a pãng sɩda? Ayo. Y pa na n maan a buud ye! A Zeova sõmblmã yɩɩda tõnd hal zĩig sẽn zãra. A mii tõnd pãngã sẽn ta zĩig ningã me n yɩɩd tõnd mensã. Biiblã yeta tõnd t’a Zeova “tẽegdame tɩ tõnd yaa tẽng tom.” (Yɩɩl 103:14) A pa na n tol n kos-d tɩ d maan bũmb d sẽn pa tõe ye. Dẽnd d pa tar bʋʋm n na n tõdg a Zeova noyã sakr ye. D pʋd n nonga a noyã, bala b sakrã kɩtdame tɩ d wilgd a Zeova tɩ d nong-a lame, la tɩ d rat n kell n paa a nonglmã pʋgẽ.
Kũun a Zeova sẽn kõ-d tɩ sõngd-do
6, 7. a) Sũur kasetã yaa bõe? b) Rɩk-y makr n wilg sũur kasetã sẽn tõe n sõng tõnd to-to tɩ d pa Wẽnnaam nonglmã pʋgẽ.
6 Tõnd sẽn vɩ dũni sẽn pa nana pʋgẽ wã, d segd n maana yam yãkr toɛy-toɛya, tɩ d sã n pa gũus bɩ d yam-yãkr ning tõe n wa kɩt tɩ d kɩɩs a Zeova. La bõe n na n sõng-d tɩ d tõog tɩ d yam yãkr fãa zems ne a Zeova raabã? Bũmb la a Zeova kõ-d tɩ tõe n sõng-d wʋsg rẽ wɛɛngẽ. Yaa sũur kasetã. La sũur kasetã yaa bõe? Yaa tõog buud ned kam fãa sẽn tare, tɩ kɩtdẽ t’a tõe n fees a menga. A wõnda bʋ-kaooda. D sã n wa rat n maan bũmbu, a tõe n deng n wilg-d-la rẽ sã n segdame bɩ pa segde, sã n yaa sõma bɩ wẽnga. A tõe n wilg-d-la bũmb d sẽn zoe n maan me sã n zemsame bɩ pa zemse.—Karm-y Rom dãmb 2:14, 15.
7 Wãn-wãn la d sũur kasetã tõe n naf-do? D rɩk makre. Ned sã n kẽnd lik pʋgẽ, bõe la a segd n paam sẽn na yɩl n da wa lak n lʋɩ, bɩ sẽn na yɩl tɩ bũmb ra wa maan-a? Dẽnda a paam tors tɩ vẽneg a sorã. Woto me, ned sã n pa tar sũur kaseto, a sã n wa rat n maan bũmbu, a pa na n tõog n bãng n maan sẽn yaa sõma ye.
8, 9. a) Bõe yĩng tɩ d pa segd n yĩm tɩ pa wakat fãa la d tõe n teeg d sũur kasetã? b) Bõe la d tõe n maan tɩ kɩt tɩ d sũur kasetã tõog n sɩd sõng-do?
8 La wa d sẽn pa tõe n teeg tors wakat fãa wã, pa wakat fãa me la d tõe n teeg d sũur kasetã ye. Tors pil sã n wa rat n ki, a pa tõe n vẽneg ned t’a yã a sor sõma ye. Woto me, d sũur-kasetã tõeeme n wa pa tʋmd sõma ye. Wala makre, d sã n bas tɩ d sũurã kɩtdẽ tɩ d maand sẽn noom tõnd bala, bõe n na n maane? D sẽn nong sẽn noom tõndã yĩng tõe n kɩtame tɩ d sũurã kaset sak tɩ d maan sẽn pa segde. Biiblã keoogda tõnd woto: “Ninsaal sũur tara ziri n yɩɩd bũmb fãa, la a yaa wẽng wʋsgo.” (Zer. 17:9; Yel. 4:23) Woto kɩtame tɩ sã n pa d teega Wẽnnaam Gomdã noyã sẽn pa toeemdã, d sũur kasetã pa na n tall yõod ne-d ye. (Yɩɩl 119:105) Zu-bʋko, rũndã-rũndã, neb wʋsg tagsdame tɩ yaa b sũurã sẽn yet-b bũmb ninsã bal la b segd n maane, tɩ kɩt tɩ b toog kae ne Wẽnnaam noyã sẽn be Biiblã pʋgẽ wã, wall b tũud-b wa b sẽn date. (Karm-y Efɛɛz rãmb 4:17-19.) Rẽ n kɩt tɩ baa ne b sẽn tar sũur kasetã, neb wʋsg ket n tʋmda tʋʋm wẽnse.—1 Tɩm. 4:2.
9 D segd n maana d sẽn tõe fãa n da tol n wõneg nin-kãensã ye! D pʋd n modg n ket n sakdẽ tɩ Wẽnnaam Gomdã kibind d sũur kasetã la a wilgd-a sẽn segde, tɩ rẽ la a na n tall yõod ne-do. Sẽn paase, d segd n kelgda d sũur kasetã, n da basdẽ tɩ d tʋls-wẽnsã soogd-d ye. D leb n segd n maoa me n da wa maan bũmb sẽn na n nams d tẽed-n-taag sũur kaset ye. D modgda d pãng tɛk n pa rat n wa kɩt tɩ b baa a ye tẽeb komse, bala d miime tɩ d sũur kasetã tõe n kõt-d-la sor tɩ d maan bũmbu, tɩ d saam-biig ning getẽ t’a pa tõe n maan dẽ ye.—1 Kor. 8:12; 2 Kor. 4:2; 1 Pɩɛ. 3:16.
10. Yel-bʋs yell la d na n gome?
10 Masã bɩ d ges yɛl a tãab pʋsẽ d sẽn tõe n yɩ sakdba, tɩ wilg tɩ d nonga a Zeova. Yaa vẽeneg tɩ b tãabã fãa pʋgẽ, d sũur kasetã segd n sõng-d lame, la wa d sẽn zoe n yeelã, sẽn na yɩl t’a sõngrã yɩ sõma, segd n zemsa ne Biiblã noyã. Yɛl a tãabã la woto: 1) D nong neb nins a Zeova sẽn nongã. 2) D sakd d taoor lʋɩtbã. 3) D yɩ neb sẽn yaa yɩlma.
Nong-y-yã a Zeova sẽn nong-b rãmbã
11. Bõe yĩng tɩ d segd n nong neb nins a Zeova sẽn nongã?
11 Pipi, d segd n nonga neb nins a Zeova sẽn nongã. Tũud-n-taarã wɛɛngẽ, d tõe n yeelame tɩ ned ne a zoa yaa wa lamd ne koom. B sã n los lamd koomẽ, a pa tõe n pa fõog koomã ye. D Naandã mii tũud-n-taar sẽn tõe n wa ne zu-loees nins n kõ ninsaal sẽn yaa koangdã, la a mi tũud-n-taar sẽn tõe n naf-a to-to wã me. Rẽ n so t’a sagend-d woto: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.” (Yel. 13:20; 1 Kor. 15:33) La yaa vẽeneg tɩ tõnd ned baa a ye pa rat n ‘paam toog’ ye. D ned kam fãa ratame n ‘lebg yam soaba.’ A Zeova yamã buud sẽn ka to wã yĩnga, ned kae n tõe n paas a yam, wall a tõog n kɩt t’a maan sẽn pa segd ye. La baa ne rẽ, a Zeova pa yãkd a zo-rãmbã yaar ye. La a sẽn maand woto wã yaa mak-sõng n kõ tõndo. Yãmb tagsdame tɩ yaa nin-bʋs buud la a Zeova yãkd tɩ yɩ a zo-rãmba?
12. Nin-bʋs buud la a Zeova yãkd tɩ yɩ a zo-rãmba?
12 Wala makre, a Zeova ra goma a Abrahaam yelle, n bool-a t’a “zoa a Abrahaam.” (Ezai 41:8) Nin-kãngã ra yaa wẽn-zoeta, nin-tɩrg la wẽn-sakda, rat n yeel tɩ ned sẽn da wilgd ne a sũur fãa t’a tẽeda Wẽnnaam. (Zak 2:21-23) Yaa neb a woto buud la a Zeova yãkd tɩ yɩ a zo-rãmba. Rũndã-rũndã me, ket n yaa nin-kãensã buud n tõe n paam a Zeova zoodo. La sã n mik tɩ yaa neb a woto la a Zeova yãkd tɩ yɩ a zo-rãmba, rẽ yĩnga, tõnd me ned kam fãa pa segd n gũus a zo-rãmbã yãkr pʋgẽ, n tõog n tũ yam dãmb n wa paam n lebg yam soab sɩda?
13. Zo-rãmbã baoob wɛɛngẽ, bõe n tõe n sõng tõnd tɩ d bãng n yãk zo-sõma?
13 La bõe n tõe n sõng tõnd tɩ d tõog n bãng n yãk zo-sõma? D sã n maag d yĩng n karem Biiblã kibay sẽn gomd neb sẽn kõ mak-sõng zo-rãmbã yãkr wɛɛngẽ, na n sõng-d lame. Wala makre, a Naomi ne a bi-pag a Rut, a Davɩɩd ne a Zonatã, n paas a Tɩmote ne a Poll me zoodã. (Rut 1:16, 17; 1 Sãm. 23:16-18; Fil. 2:19-22) Yaa bũmb a ye n kɩt tɩ nin-kãensã zoodã sɩd yɩ zood hakɩka, b fãa ra sɩd nonga a Zeova wʋsgo. La rẽ yĩnga, y tõe n paama zo-rãmb sẽn nong a Zeova wʋsg wa yãmb bɩ? Bãng-y tɩ kiris-neb tigingã pida ne neb a woto buudu, tɩ y tõe n paama zo-rãmb b sʋka. Nin-kãensã pa na n tol n wa kɩt tɩ zood ning y sẽn tar ne a Zeova wã sãam ye. B pʋd na n sõng-y lame tɩ y maneg n sak a Zeova hal tɩ y tẽebã pãng paase, n kɩt tɩ y tũud vʋʋsem sõngã raabo. (Karm-y Galat dãmb 6:7, 8.) B na n sõng-y lame tɩ y kell n pa Wẽnnaam nonglmã pʋgẽ.
D sakd d taoor lʋɩtbã
14. Bõe n kɩt tɩ taoor lʋɩtbã sakr mi n pa nana?
14 Bũmb a yiib-n-soab d sẽn segd n maan n wilg tɩ d nonga a Zeova yaa d sẽn na n sakd d taoor lʋɩtbã. Bõe yĩng tɩ d taoor lʋɩtbã sakr mi n yaa toog ne-do? Yaa tɩ neb nins sẽn lʋɩt tõnd taoorã yaa koangdba. Sẽn paase, tõnd me yaa koangdba. Tõnd sẽn dog ne yel-wẽndã yĩng kɩtame tɩ d yaa neb sẽn pa wae n sakd nana ye.
15, 16. a) Bõe yĩng tɩ d segd n sak neb nins a Zeova sẽn yãk n lʋɩɩs a nin-buiidã taoorã? b) A Zeova sẽn yeel bũmb ning a nin-buiidã sẽn wa n yẽgem ne a Moiizã wilgda tõnd bõe?
15 La tõe tɩ y sokd y mens woto: “Bõe yĩng tɩ taoor lʋɩtbã sakr yaa toogo, tɩ d yaool n segd n sak-ba?” A Sʋɩtãan sẽn kɩɩs t’a Zeova pa segd n yɩ yĩngr la tẽng naabã yĩnga, tõnd ned kam fãa segd n wilga a sẽn yeelã sã n yaa sɩd bɩ ziri. Woto yĩnga, ãnda la yãmb dat t’a yɩ y naaba? Sã n mik tɩ d sakame tɩ yaa a Zeova n segd n yɩ yĩngr la tẽng naaba, rẽnd d segd n sakame t’a yɩ d zu-soaba. Sã n pa rẽ, d pa tõe n yeel tɩ yẽ n yaa d naab ye. La a Zeova naamã rɩɩb pʋgẽ, nong n yaa neb sẽn yaa koangdb wa d fãa, la a yãkd tɩ b lʋɩt a nin-buiidã taoor n get b yelle. D sã n kɩɩsd nin-kãensã, wãn to la a Zeova get rẽ?—Karm-y 1 Tesalonik rãmb 5:12, 13.
16 Wala makre, Israɛll nin-buiidã sẽn wa n yẽgem ne a Moiiz n tõdg a zu-sobendã, a Zeova yeelame tɩ yaa yẽ mengã la b sẽn zãgsã. (Sõd. 14:26, 27) Wẽnnaam yaool n pa toeemd ye. Dẽnd d sã n kɩɩsd neb nins a sẽn yãk n lʋɩɩs d taoorã, yaa Wẽnnaam la d kɩɩsda!
17. D manesem segd n yɩ wãn ne neb nins sẽn lʋɩt tõnd taoor tigingã pʋgẽ wã?
17 Tʋm-tʋmd a Poll wilga kiris-nebã manesem sẽn segd n yɩ to-to ne neb nins sẽn lʋɩt taoor tigingã pʋgẽ wã. A yeela woto: “Bɩ y sak yãmb taoor dãmbã la y reeg bãmb goamã, tɩ bõe, bãmb gũuda yãmb sɩɩse, bãmb sẽn na n wilg yɛla fãa Wẽnnaam taoorã yĩnga. Bɩ a yɩ woto tɩ b maan ne sũ-noogo, la ka ne sũ-sãoong sẽn ka na n yɩ yãmb nafr ye.” (Heb. 13:17) Yaa vẽeneg tɩ yɩl n tõog n sak nin-kãensã wa Wẽnnaam sẽn datã, baooda modgre. La tẽeg-y tɩ d sẽn modgdã yaa d sẽn dat n kell n pa Wẽnnaam nonglmã pʋgẽ wã. Rẽ yĩnga, woto sɩd pa sek modgr sɩda?
Yɩ-y neb sẽn yaa yɩlma
18. Bõe yĩng t’a Zeova rat tɩ d yɩ yɩlma?
18 Bũmb a tãab-n-soab tõnd sẽn segd n maan n wilg a Zeova tɩ d nong-a lame yaa d modg n yɩ neb sẽn yaa yɩlem a nifẽ. Roagdbã nong n modgda wʋsg n manegd b kambã, b sẽn dat tɩ b yɩ yɩlmã yĩnga. Bõe yĩnga? Bʋʋm a ye yaa tɩ b miime tɩ biig sã n yaa yɩlemde, kogenda a laafɩ wã. Sẽn paase, waoogda a roagdbã, la wilgdẽ tɩ b nong-a lame. Yaa woto yĩng me n kɩt t’a Zeova rat tɩ d yɩ yɩlmã. A miime tɩ tõnd sã n yaa yɩlmã, nafd-d lame. A leb n miime me tɩ d sã n yaa yɩlmã, waoogda yẽ sẽn yaa d saasẽ Ba wã. Sɩd tara yõod wʋsg tɩ d modg n yɩ yɩlma. Bala neb a taabã sã n neẽ tɩ d yaa toor ne dũni kãngã nebã, tõe n kɩtame tɩ b tʋlg n bao n bãng a Zeova.
19. Bõe n kɩt tɩ d miẽ tɩ d segd n modgdame tɩ d yĩnsã la d teedã fãa yaa yɩlmã?
19 La yaa zĩ-bʋs wɛɛngẽ la d segd n yɩ yɩlma? Yaa bũmb fãa pʋgẽ. Pĩnd wẽndẽ, a Zeova ra wilga Israɛll nebã sẽn da yaa a nin-buiidã tɩ b ned kam fãa yĩng segd n yɩɩ yɩlemde. (Maan. 15:31) Wala makre, a Moiiz tõogã pʋgẽ, b kõo noy we-kɛɛngã maanego, laasã la rʋgdã yɩlemd wɛɛngẽ. Sẽn paase, tõogã ra wilgdame tɩ b segd n pɛgda b nusã, b futã, la b waasd b naoã. (Yik. 30:17-21; Maan. 11:32; Sõd. 19:17-20; Tõo. 23:13, 14) B ra tẽegd-b lame tɩ b Wẽnnaam a Zeova yaa yɩlemde, sẽn dat n yeel t’a pa tar dẽgd baa bilfu, la t’a yaa sõngo. Wẽnnaam sẽn pa tar rẽgdã yĩnga, a nin-buiidã me segd n yɩɩ neb sẽn pa tar dẽgdo.—Karm-y Maankʋʋr 11:44, 45.
20. Zĩ-bʋs wɛɛngẽ la d segd n yɩ yɩlma?
20 Dẽnd d segd n modgame tɩ d sũyã, d yĩnsã la d fu-yerdɩ wã yɩ yɩlma. D segd n modgame tɩ d tagsa wã me yaa tags sõma. Baa yoobã sẽn tar piuugrã, tõnd ket n wɩngda ne a Zeova noyã sakre. Sẽn yɩɩde, d maooda d pãng tɛk n dat t’a Zeova tũudmã kell n yɩ yɩlemde. Rat n yet tɩ d maoodame tɩ d sẽn tũud-a to-to wã zemsd ne Biiblã noyã, n pa tol n dat n maan bũmb baa a yembr ziri tũudum toɛy-toɛyã sẽn maandã ye. D pa yĩmd keoogr ning b sẽn kõ-d Ezai 52:11 pʋgẽ wã ye. Be b yeta woto: “Loog-y-yã! Ra sɩɩs-y bõn-dẽgd ye. Yi-y-yã a pʋgẽ n maneg y mense.” Rũndã-rũndã, Wẽnnaam tũubã wɛɛngẽ, d yaa yɩlma, n pa sɩɩsd bũmb baa a yembr meng d saasẽ Ba wã sẽn get tɩ yaa rẽgd ye. Rẽ n so tɩ makre, d pa naagd nebã n maand ziri tũudmã kibs rãmbã sẽn piuug rũndã wã ye. Vẽenega, dũni-kãngã sẽn tar dẽgeng n debdã, yɩl n tõog n kell n yɩ yɩlemd yaa toogo. La a Zeova nin-buiidã maoodame n yaa yɩlma, bala rẽ n sõngd-b tɩ b paad Wẽnnaam nonglmã pʋgẽ.
21. D sã n maand bõe la d tõe n kɩs sɩd tɩ d na n kell n paa Wẽnnaam nonglmã pʋgẽ?
21 A Zeova ratame tɩ d kell n pa a nonglmã pʋgẽ wakat fãa yĩnga. La yaa tõnd ned kam fãa n segd n wilg t’a maanda a sẽn tõe fãa sẽn na yɩl n pa Wẽnnaam nonglmã pʋgẽ. D sã n dat n maan woto, d segd n dɩka a Zezi makre, la d sakd a Zeova noyã n wilg-a tɩ d sɩd nong-a lame. D sã n maand woto, d tõe n kɩsa sɩd tɩ bũmb “kõn tõog n welg tõnd ne Wẽnnaam nonglem sẽn be tõnd Zusoaba Kirist Zezi pʋgẽ wã ye.”—Rom 8:38, 39.
Y tẽrame bɩ?
• Wãn to la d sũur kasetã tõe n sõng-d tɩ d pa Wẽnnaam nonglmã pʋgẽ?
• Bõe yĩng tɩ d segd n nong a Zeova sẽn nong-b rãmbã?
• Bõe yĩng tɩ d segd n sakd sẽn lʋɩt-b tõnd taoorã?
• Bõe yĩng tɩ Wẽnnaam nin-buiidã segd n yɩ yɩlma?
[Zãmsgã sogsgã]
[Zĩ-gũbri/Foto, seb-neng 28]
SEBR SẼN SÕNGD NED T’A BÃNG N ZÃ A MENG SÕMA
Yʋʋmd 2008 rasem a tãab tigis-kãsengẽ wã, d paama seb-paal sẽn tar seb-nens 224, t’a gom-zugã yaa: “ Gardez-vous dans l’amour de Dieu ” Bõe yĩng tɩ b yiis seb-kãngã? Yaa sẽn na yɩl n sõng kiris-nebã tɩ b bãng a Zeova noyã la b nong-ba. A gomda kiris-nebã sẽn segd n zã b mens to-to wã yell n yɩɩda. D sã n maag n yĩng n zãms “ Gardez-vous dans l’amour de Dieu ” sebrã sõma, na n kɩtame tɩ d maneg n kɩs sɩd tɩ yaa d sẽn na n tũud a Zeova noyã la d vɩɩmã na n yɩ sõma, la tɩ rẽ n na n kɩt me tɩ d wa paam vɩɩm sẽn pa satã.
B yiisa seb-kãngã n na n sõng-d tɩ d bãng me t’a Zeova noyã sakr pa toog ye. Pʋd n yaa sẽn na yɩl tɩ d bãng tɩ b tũubã kɩtdame tɩ d paam n wilg a Zeova d nonglem. Sẽn paase, sebrã na n kɩtame tɩ d fees d mens n ges bõe n kɩt tɩ d sakd a Zeova noyã.
Neb kẽer sẽn mi n wa maan b mens n bõn a Zeova nonglmã, pa wae n yaa bũmb nins d sẽn tẽedã la b kɩɩsd ye. Nong n yaa b sẽn zãad b mensã to-to wã n pa zemse. Dẽnd sɩd tara yõod wʋsg tɩ d nong a Zeova noyã ne d sũy fãa, n sakd-b wakat fãa! D kɩsa sɩd tɩ seb-kãngã na n sõnga a Zeova nin-buiidã sẽn be dũniyã gill zugã tɩ b tõog n ket n tũud a noyã neere. Rẽ, b na n tõog n wilgame t’a Sʋɩtãan yaa ziri yagda. La sẽn yɩɩd fãa, b na n kell n paa Wẽnnaam nonglmã pʋgẽ!—Ziid 21.