3 Bao-y n bãng a Zezi sẽn sɩd yaa a soaba

“Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.”—Zã 3:16.

BÕE N KƖT TƖ PA NANA? Neb kẽer ratame tɩ yãmb tẽ t’a Zezi pa sɩd zĩnd ye. Sãnda tẽedame t’a sɩd zĩndame, la t’a yɩɩ wa neb a taabã bala, la a kii hal sẽn kaoose.

BÕE LA Y SEGD N MAANE? Maan-y wa a Natanayɛlle. * A zoa a Filip yeel-a lame tɩ yẽ yãa Mesi wã, sẽn yaa “Nazarɛt dao a Zezi sẽn yaa a Zozɛf biigã.” La a Natanayɛll pa reeg a Filip goamã zĩig pʋgẽ ye. A yeela woto: “Bõn-sõng tõe n yii Nazarɛt wɛ?” La baasgo, a Filip sẽn yeel-a tɩ “bɩ f wa ges wɛ” wã, a sakame. (Zã 1:43-51) Yãmb me tõe n bãnga a Zezi sẽn sɩd yaa a soabã. Wãn to la y tõe n maan dẽ?

Ges-y kibay sẽn wilgd t’a Zezi sɩd zĩndame. A Zozɛf la a Tasɩt yɩɩ kʋdem yɛl mitb sẽn vɩɩmd pipi kiris-nebã wakatẽ, la b pa yɩ kiris-neb ye. B wilgame t’a Zezi Kirist sɩd zĩndame. A Tasɩt wilgame tɩ Rom naab a Neerõ rõda kiris-nebã tɩ bãmb n yõog Rom tẽngã yʋʋmd 64. A yeela woto: “A Neerõ wilgame tɩ yaa sull ning b sẽn boond tɩ kiris-nebã sabaab yĩng la Rom tẽngã sẽn yõogã, n yik n nams-b wʋsgo. Rom nebã ra kisa nin-kãens b tũudmã yĩnga. Yaa Kiristã poorẽ dãmbã la b sẽn boond tɩ kiris-nebã. A Tɩbɛɛr naamã sasa, guvɛrneer a Põns Pɩlat kõo noor tɩ b kʋ Kiristã.”

Kibay nins kʋdem yɛl mitbã sẽn togs a Zezi la pipi kiris-nebã zugã wɛɛngẽ, sebr a ye (Encyclopædia Britannica, 2002) yeela woto: “Kibay neb nins sẽn pa kiris-nebã sẽn togsã wilgdame tɩ kiris-nebã bɛɛb meng pa kɩɩs t’a Zezi sɩd zĩndame ye. La yaa yʋʋmd 1800 wã tɛk n tar n watẽ bal la nebã yik n kɩɩsdẽ t’a Zezi pa sɩd zĩnd ye.” Yʋʋmd 2002 wã pʋgẽ, sebr a ye (The Wall Street Journal) yeela woto: “Wẽnd kae rãmb a wãn sẽn yãk b toogo, bãngdb wʋsg sak n deegame tɩ Nazarɛt rao a Zezi sɩd zĩndame.”

Ges-y kaset sẽn wilgd t’a Zezi vʋʋgame. Bɛɛbã sẽn wa n yõk a Zezi wã, a poorẽ dãmbã zoe n bas-a lame. A zoa a Pɩɛɛr meng zoeya rabeem n kɩɩs t’a pa mi-a ye. (Matɩe 26:55, 56, 69-75) B sẽn yõk a Zezi wã poore, a karen-biisã zoe n  sãeegame. (Matɩe 26:31) La rẽ poor bilfu, a karen-biisã sɩngame n kɩt kasetã ne yẽesem. Ne raoodo, a Pɩɛɛr ne a Zã kõo neb nins meng sẽn yɩ sabab tɩ b kʋ a Zezi wã kasetã. A Zezi karen-biisã paama raood la yẽesem wʋsgo, n moon a Zezi koɛɛgã Rom soolmã gill pʋgẽ. B pʋd n saka kũum b tẽebã yĩnga.

Bõe n kɩt tɩ b paam raood la yẽesem woto? Tʋm-tʋmd a Poll wilgame tɩ Wẽnnaam vʋʋga a Zezi, la tɩ “bãmb vẽnega b meng ne a Sefas [a Pɩɛɛr] n yaool n vẽneg b meng ne piig la a yiibã.” A paasame tɩ “dẽ poore, bãmb vẽnega b meng ne ba-biis sẽn yɩɩd kobs-nu.” A Poll sẽn wa n gʋlsd gom-kãensã wã tɩ neb nins sẽn maan kaset ne rẽ wã wʋsg ket n vɩɩme. (1 Korẽnt dãmba 15:3-7) Sã n da yaa nin-yend bɩ neb a yiib bal n maan kaset ne rẽ, kɩɩsdbã tõe n kɩɩsame. (Luk 24:1-11) La sẽn mik tɩ yaa neb sẽn yɩɩd kobs-nu n maan kasetã, wilgda vẽeneg t’a Zezi sɩd vʋʋgame, la ned baa a ye pa segd n kɩɩs ye.

A NAFRÃ YAA BÕE? Neb nins sẽn tẽed a Zezi la b sakd-a wã tõe n paama b yel-wẽnã sugri, la b kell n tall sũur kaset sẽn yaa sõma. (Mark 2:5-12; 1 Tɩmote 1:19; 1 Pɩɛɛr 3:16-22) B sã n ki, a Zezi kãabame t’a na n vʋʋg-b-la “yaoolem daare.”—Zã 6:40.

Y sã n dat kibay n paase, bɩ y ges Biiblã sɩd yetame tɩ bõe? * sebrã sak a 4 soabã: “A Zezi Kirist yaa ãnda?” la sak a 5 soabã: “Rondã yaa Wẽnnaam kũun sẽn ka to.”

[Tẽngr not rãmbã]

[Foto, seb-neng a 7]

Wala a Natanayɛlle, bao-y n bãng a Zezi sẽn yaa a soaba