Yãmb sẽn sakd a Zeova wã noom-a lame
Yãmb sẽn sakd a Zeova wã noom-a lame
“M biiga, maan yam n kõ maam sũ-noogo, tɩ m paam n leok sẽn paoogd-a maamã.”—YEL. 27:11.
1, 2. a) A Sʋɩtãan rõd-bʋg yell la a Zoob sebrã gomda? b) Bõe n wilgd tɩ hal baa a Zoob kũumã poore, a Sʋɩtãan kell n baoa a Zeova noore?
A ZEOVA basame t’a Sʋɩtãan mak nin-tɩrg a Zoob tɩ b ges a sã n na n basa yẽ sakre. A Sʋɩtãan kɩtame t’a Zoob bõn a paoongã, t’a kambã ki, la a lobg a mengã bãaga. La a Sʋɩtãan yeela bũmb tɩ wilgdẽ tɩ ra pa a Zoob bal la a sẽn da rõtã ye. A yeela woto: “Gãong ned gãong yĩnga. Ned na n dɩka a sẽn tar fãa n kõ a vɩɩm yĩnga.” Hal baa a Zoob kũumã poore, rõd-kãngã ket n paka ãdem-biisã fãa.—Zoob 2:4.
2 Sẽn na maan yʋʋm 600 a Zoob namsgã poore, Wẽnnaam vẽnega a Salomo t’a gʋls woto: “M biiga, maan yam n kõ maam sũ-noogo, tɩ m paam n leok sẽn paoogd-a maamã.” (Yel. 27:11) Woto wilgda vẽeneg tɩ hal baa wakat kãnga, a Sʋɩtãan da ket n baooda a Zeova noore. Sẽn paase, tʋm-tʋmd a Zã sẽn paam vẽnegr ningã pʋgẽ, a yãa b sẽn dig a Sʋɩtãan n yiis saasẽ a Zezi sẽn deeg naam yʋʋmd 1914 soab pʋgẽ wã poore, la b bool-a tɩ sẽn dõt-a Wẽnnaam nin-buiidã. Hal ne rũndã-rũndã d sẽn be dũni kãngã yaoolem dayã baasgẽ wã, a Sʋɩtãan ket n dõta Wẽnnaam nin-buiidã.—Wil. 12:10.
3. Bõe la a Zoob sebrã wilgd tɩ tar yõod wʋsg ne-do?
3 Bɩ d gom yɛl a tãab a Zoob sebrã sẽn wilgd tɩ tar yõod wʋsg ne tõnd yelle. Pipi, a Zoob zu-loeesã sõngda tõnd tɩ d bãng tɩ ãdem-biisã bɛ meng-meng yaa a Sʋɩtãana, la tɩ yẽ n kɩtd tɩ nebã zabd ne Wẽnnaam nin-buiidã. Yiib-n-soaba, d bãngame tɩ d sã n nong Wẽnnaam ne d sũy fãa, toog buud fãa pʋgẽ d na n kell n sak-a lame. Tãab-n-soaba, d leb n bãngame tɩ zu-loees la makr toɛy-toɛyã pʋsẽ, Wẽnnaam na n sõnga tõnd wa a sẽn sõng a Zoobã. Rũndã-rũndã, a Zeova sõngd-d-la ne a Gomdã, a siglgã, la ne a vʋʋsem sõngã maasem.
Ra n tol-y n yĩm-y bɛ wã sẽn yaa a soab ye
4. Dũniyã yɛl sẽn keng woto wã yaa ãnd yelle?
4 Neb wʋsg pa tẽed t’a Sʋɩtãan sɩd beeme ye. Woto kɩtame tɩ baa b sẽn ne tɩ dũniyã yɛl tara kengr tɩ b pa wʋmd a võorã, b pa mi tɩ yaa a Sʋɩtãan n kɩt tɩ yaa woto ye. Yaa sɩd tɩ naoor wʋsgo, yaa ãdem-biisã meng n wat ne b zu-loeesã. Tõnd yaab a Ãdem ne a Hawa yãka yam n tõdg b naandã sakre, n na n soog b mense. Sẽn sɩng ne rẽ tɛk n tãag masã, ãdem-biisã tʋma tʋʋm-kɛg wʋsgo. La ket n yaa a Sʋɩtãan yelle. Bala, yaa yẽ n belg a Hawa t’a kɩɩs Wẽnnaam. Leb n yaa yẽ n kɩt tɩ ãdem-biisã sẽn yaa koangdb la kiidbã sigl dũni kãngã yɛlã tɩ zems ne a raabo, t’a so-a. Yaa a Sʋɩtãan la ‘dũni kãnga wẽnnaam,’ la woto kɩtame t’a nebã wõnd-a. B yaa wuk-m-mens rãmba, no-koeem-wẽedba, sũ-ki-neba, yão-be-neba, zãmb dãmb la kɩɩsdba. (2 Kor. 4:4; 1 Tɩm. 2:14; 3:6; karm-y Zak 3:14, 15.) Zʋg-kãensã fãa waa ne politikã la tũudmã poorẽ zaba, la kɩt tɩ kisg-taabã, wẽgbã, zãmbã la yaarã maneg n piuugi. Woto fãa kenga ãdem-biisã zu-loees n paase.
5. Bõe la tõnd segd n maan ne bãngr ning d sẽn tar tɩ nafd-dã?
5 Tõnd a Zeova Kaset rãmbã sẽn mi woto fãa wã, sɩd nafd-d lame! D mii sẽn kɩt-a tɩ dũniyã yɛl tar sãoong n debdã. Woto kɩtame tɩ d segd n modg n moon koɛɛgã n sõng nebã tɩ b bãng sẽn yaa a soab n wat ne yɛlã. Sẽn paase, d sũy nooma wʋsgo, d sẽn be a Zeova sẽn yaa Wẽnnaam sɩd-sɩdã poorẽ wã. D sẽn wilgd nebã a sẽn na n maan to-to n sãam a Sʋɩtãan la a menes yel-beed nins fãa sẽn namsd ãdem-biisã me noom-d lame.
6, 7. a) Yaa ãnd n kɩtd tɩ b namsd Wẽnnaam nin-buiidã? b) Wãn to la d tõe n dɩk a Elihu makrã?
6 A Sʋɩtãan n wat ne zu-loees wʋsg sẽn be dũniyã zugã. La pa rẽ bal ye, yaa yẽ n kɩtd me tɩ b namsd Wẽnnaam nin-buiidã. A rata ne a sũur fãa n kɩt tɩ d bas Wẽnnaam. A Zezi Kirist sɩd ra yeela tʋm-tʋmd a Pɩɛɛr woto: “Sɩmo, Sɩmo, Sʋɩtãanã kosame n dat n paam yãmb n yelg wa ki.” (Luk 22:31) Rũndã-rũndã, tõnd me sẽn dat n tũ a Zezi naoã, a Sʋɩtãan na n namsa tõnd ned kam fãa. A Pɩɛɛr yeelame t’a Sʋɩtãan “gõoda wa gɩgemd sẽn kelemda, n baood a sẽn tõe n paam a soab n sãame.” A Poll me yeelame tɩ “neb nins fãa sẽn dat n tũ Kirist Zezi ne pʋ-peelmã na n paama namsgo.”—1 Pɩɛ. 5:8; 2 Tɩm. 3:12.
7 Yel-beed sã n wa paam d tẽed-n-taaga, wãn-wãn la d tõe n wilg tɩ d miime tɩ bɛ wã yaa a Sʋɩtãanã? Wakat kãnga, wall tɩ d zãag d meng ne d tẽed-n-taagã, d na n maana wa a Elihu sẽn maan to-to a Zoob toogã sasa wã. A sõsa ne Zoobe, n wilg-a a goamã pʋgẽ t’a yaa a zoa meng-menga. D na n sõnga d tẽed-n-taagã n mao ne a Sʋɩtãan sẽn yaa d fãa bɛ wã. (Yel. 3:27; 1 Tes. 5:25) Tõnd sẽn datã yaa d sõng d tẽed-n-taagã tɩ sẽn wa n yaa to-to fãa bɩ a kell n sak a Zeova tɩ kɩt t’a sũur yɩ noogo.
8. Bõe yĩng t’a Sʋɩtãan pa tõog n kɩt t’a Zoob pa kell n waoog a Zeova?
8 A Sʋɩtãan sẽn wa n na n sɩng a Zoob namsgã, a reng n kɩtame t’a bõn a rũmsã fãa. Rũm-kãensã ra yaa a Zoob paoongo, bala wõnda rẽ la a ra teeg n vɩ. A leb n da yãkda rũmsã n kʋʋd maand n kõt a Zeova. Sɩd me, b yeelame t’a Zoob kambã sã n da maan kibsa, a ra mi n kɩtame tɩ b maneg b mense, t’a yik “yibeoog pĩnd n maan maand sẽn zems bãmb fãa sõore. Tɩ bõe, yẽ tagsame tɩ daar ninga, a kambã sẽn maand woto wã, b kongdame n beegd Wẽnnaam,” la b paas tɩ “yaa woto la a Zoob ra mi n maand wakat fãa.” (Zoob 1:4, 5) Woto wilgdame t’a Zoob ra tara wakat a sẽn kõt a Zeova maando. La a Sʋɩtãan sẽn wa n kɩt t’a bõn a rũmsã poore, a ra pa le tõe n kʋ maand ye. A Zoob ra pa le tar “paoong” a sẽn tõe n yãk n waoog a Zeova yɛs ye. (Yel. 3:9) La a Zoob ra ket n tõe n waooga a Zeova! A ra ket n pẽgd-a-la ne a no-goamã!
Modg-y n nong-y-yã a Zeova ne y sũur fãa
9. Bõe la tõnd tar t’a yõodã ka to?
9 D tara paoong tɩ d pa tare, d yaa bi-bɩɩg tɩ d yaa nin-kẽemã wall d yaa nin-kɛgeng bɩ d laafɩ wã paoodame me, d sẽn yaa a soab fãa, d tõe n bao zood sõma ne a Zeova. A Zeova sã n yaa d zoa tɩ d sɩd nong-a ne d sũur fãa, toog buud fãa pʋgẽ, d na n tõog n kell n sak-a lame tɩ noog a sũuri. Baa neb sẽn pa mi Wẽnnaam la a raabã sõma meng talla raood n tõog n kell n sak-a toog pʋgẽ.
10, 11. a) Tõnd saam-bi-poak a yembr b sẽn nams wʋsg talla manesem bʋg a toogã pʋgẽ? b) A sẽn maana wilgda bõe a Sʋɩtãan sẽn yeelã wɛɛngẽ?
10 Ges-y d saam-bi-poak a Valentina Garnovskaya sẽn yit Risi wã makre. A naaga Risi saam-biis nins sẽn paam nams-toos la b baas n kell n sak a Zeova wa a Zoobã sʋka. Yɩɩ yʋʋmd 1945 soabã pʋgẽ la saam-biig a ye moon a Valentina koɛɛgã. Rẽ t’a tara yʋʋm 20 la bala. Saam-biigã lebg n tɩ sõsa ne-a Biiblã zug naoor a yiibu, la rẽ poore, a Valentina pa le yã-a ye. La baa ne rẽ, a sɩnga koɛɛgã mooneg a yagsã. Woto kɩtame tɩ b yõk-a n kẽes roog yʋʋm a nii. B yiis-a-la yʋʋmd 1953 soabã pʋgẽ, la tao-tao bala, a lebs n sɩnga koɛɛgã moonego. B ye wa n yõk-a lame n kẽes roogo, tɩ so-kãngã, a segd n zĩnd be yʋʋm piiga. A Valentina maana yʋʋm a wãn roogã pʋgẽ, tɩ b wa yiis-a n toeem doogo. B sẽn tɩ kẽes-a roog ningã pʋgẽ, saam-bi-pogs n da be be n tar Biible. Daar a yembre, b nin-yɛng n wilg a Valentina b Biiblã. Tags-y n ges-y-yã a sũ-noogã! A sẽn da yã Biiblã ne saam-biigã yʋʋmd 1945 soabã pʋgẽ wã tɛka, sã n pa woto, a pa tol n le yã Biibl ye.
11 Yʋʋmd 1967 soabã pʋgẽ, b yiisa a Valentina bãensã roogẽ t’a yaool n na n tõog n deeg lisg n wilg t’a rɩk a meng n kõ a Zeova. A sẽn paam a mengã poore, a moona koɛɛgã ne yẽesem wʋsg n tãag yʋʋmd 1969 soabã. La yʋʋmd kãng pʋgẽ bala, b ye yõk-a lame n pak roogo, t’a segd n maan yʋʋm a tã. La ne rẽ fãa, a Valentina pa bas koɛɛgã mooneg ye. A maana kaalem yʋʋmd 2001 soabã pʋgẽ, la rẽ t’a paam n sõnga neb 44 tɩ b bãng a Zeova. Yʋʋm nins a sẽn zĩnd roogã sõor zãng yaa 21. Sẽn na yɩl n kell n sak Wẽnnaam, a sak n bõna bũmba fãa la a sak bãens rot kõom menga. A Valentina kʋʋlem zugẽ, a yeela woto: “Mam zɩ n tall m toorẽ zak ye. Mam da tara valiiz-yɛng bal n ningd m teedã. La baasgo, m da tũuda a Zeova tɩ m sũur noome.” Ad a Valentina sɩd wilga vẽeneg t’a Sʋɩtãan sẽn yeel tɩ toog pʋgẽ ãdem-biig fãa na n basa Wẽnnaam sakrã, yaa ziri fasɩ! (Zoob 1:9-11) D tõe n kɩsa sɩd t’a Valentina sɩd nooga a Zeova sũuri. D kɩsa sɩd me t’a Zeova gũuda wakat ning a sẽn na n vʋʋg a Valentina la neb a taab me sẽn kell n yɩ sakdb n tãag b kũumã ne a sũur fãa.—Zoob 14:15.
12. Bõe n kɩt tɩ d baood a Zeova zoodo, la d segd n nong-a ne d sũy fãa?
12 Yaa tõnd sẽn nong a Zeova wã yĩng n kɩt tɩ d baood a zoodã. A sẽn yaa Wẽnnaam ning buudã noom-d-la wʋsgo, tɩ kɩt tɩ d maand d sẽn tõe fãa n tũud a raabã. Yaa ne yamleoog la tõnd nong a Zeova, pa b sẽn modgd tõnd wall d sẽn dat bũmb yĩng wa a Sʋɩtãan sẽn yeelã ye. D sẽn nong-a ne d sũy fãa woto wã kengda d raoodo, tɩ d tõe n kell n sak-a toog pʋgẽ. La a Zeova me “gũuda neb nins sẽn nong bãmbã.”—Yel. 2:8; Yɩɩl 97:10.
13. Bõe n noom a Zeova bũmb nins d sẽn maand a yʋʋr yĩngã pʋgẽ?
13 Baa d yɛlã sẽn yaa to-to fãa, d sẽn nong a Zeova wã yĩng kɩtame tɩ d modgd n waoogd a yʋʋrã. D sã n tʋll n maan bũmb n noog a sũur la d yaool n pa tõe, a neeme, la a pa ningd-d taal ye. Bala pa d sẽn maand a yʋʋr yĩngã bal n noom-a ye. Bʋʋm ning sẽn kɩt tɩ d maand rẽ wã me noom-a lame. Baa ne a Zoob zu-loeesã sẽn wa n sãag-a t’a sũur sãam hal wʋsgã, a wilga a zo-rãmbã sẽn da rõt-a wã t’a nonga a Zeova noyã. (Karm-y Zoob 10:12; 28:28.) Zoob sebrã yaoolem sakã pʋgẽ, a Zeova yeelame t’a sũur yika ne a Elifaaz ne a Bildaad la a Zofaare, bala b pa togs sɩd ye. La a wilgame t’a nonga a Zoob n bool-a t’a ‘tʋm-tʋmda,’ la a yeel-a t’a kos yẽ sugr a zo-rãmbã yĩnga. (Zoob 42:7-9) Bɩ d fãa me modgd n maand bũmb nins sẽn na n kɩtdẽ t’a Zeova nong tõndã.
A Zeova sõngda neb nins sẽn nong-a wã
14. Wãn-wãn la a Zeova sõng a Zoob t’a rems a tagsgã?
14 Baa a Zoob sẽn da yaa koangd wa ãdem-biig buud fãa wã, a tõog n kell n saka Wẽnnaam. La baasgo, a toogã sẽn wa n sãag-a wã, a ra mi n tagsda tags-kɛga. Wala makre, a yeela a Zeova woto: “Mam boolame tɩ y wa sõng-ma, la y ka sak ye. . . . Yãmb namsda maam ne pãn-kãsenga.” Sẽn paase, a Zoob baoa naoor wʋsg a goamã pʋgẽ n na n wilg t’a pa tar taal baa bilf ye. A yeela woto: “Mam ka maan wẽng ye. Mam pʋʋsda Wẽnnaam ne pʋ-peelem.” (Zoob 10:7; 16:17; 30:20, 21) La ne rẽ fãa, a Zeova maaga a yĩng n sõng a Zoobe. A sok-a-la sogsg toor-toor n kɩt t’a bas a mengã yell tagsgo, tɩ sõng-a t’a bãng vẽeneg tɩ ninsaal paooda hal wʋsg Wẽnnaam taoore. A Zoob saka sõng-kãngã, n dems a tagsgã.—Karm-y Zoob 40:8; 42:2, 6.
15, 16. Wãn-wãn la a Zeova sõngd a nin-buiidã rũndã-rũndã?
15 Rũndã-rũndã, a Zeova wilgda a nin-buiidã b sẽn segd n maanã vẽenega, la a kõt-b sagl-sõma. Sẽn paase, d paamda bark a taaba. Wala makre, a Zezi Kirist maoongã sẽn yɩ rondã yĩng kɩtame tɩ d miẽ tɩ d sã n dat d yel-wẽnã sugri, d segd n tẽe maoong kãnga. Leb n kɩtame tɩ d tõe n paam a Zeova zoodo, baa ne d sẽn yaa koangdbã. (Zak 4:8; 1 Zã 2:1) D sã n wa be toog pʋgẽ me, d tõe n pʋʋsa Wẽnnaam n kos a vʋʋsem sõngã sõngre. Sẽn paase d tara Biiblã tõre, tɩ d sã n karemd-a la d bʋgsd a goamã zugu, bɩ sõngd-d tɩ b mi d sẽn segd n zã d mens to-to toog wakate. Biiblã zãmsg kɩtame tɩ d bãng t’a Sʋɩtãan kɩɩsame t’a Zeova pa segd n yɩ yĩngr la tẽng naaba, la t’a yeelame tɩ ãdem-biisã me pa sakd a Zeova nonglem yĩng bal ye.
16 Tõnd paam n naaga a Zeova nin-buiidã sẽn be dũniyã gill zugã me, t’a sõngd-d ne a “tʋm-tʋmd sẽn tũud sɩd la sẽn tar yamã” maasem tɩ d bãngd-a, la d bãngd a raabã. (Mat. 24:45-47) A Zeova Kaset rãmbã tigimda taab b tigimsã sõor na maan 100 000 pʋsẽ, n paamd zãmsg la sagls sẽn kengd b raood makr toɛy-toɛyã yĩnga. Tõnd saam-bi-poak a Sheila sẽn yit Alemayn t’a yʋʋm zems 15 wã makrã wilgda rẽ.
17. Wãn-wãn la bi-pugl a ye kibar wilgd tigissã kẽnd wakat fãa wã yõodo?
17 Daar a yembre, Sheila ne a karen-bi-taas bal n da wa n be karen-doogẽ wã tɩ karen-saamb pa be ne-b ye. Karen-biisã yãka yam n na n deem reem a yembr b sẽn boond tɩ oui-ja. La a Sheila yika zĩig pʋgẽ n yi. A sẽn wa n wʋm bũmb ning sẽn yõd n maan karen-doogẽ wã, a sũur yɩɩ noog wʋsg a sẽn yik n yi wã yĩnga. Reem ning karen-biisã sẽn deemã kɩtame tɩ b kẽer wʋm zĩn dãmb rãamde, hal tɩ b yɛɛs n yik n zoe. La yaa bõe n sõng a Sheila t’a bãng yam n yik n yi tao-tao? A yeela woto: “Bilf sẽn deng baraare, Rĩungã roogẽ, b goma oui-ja wã sẽn wat ne yɛl ninsã yell tigisg sasa, woto kɩtame tɩ mam da mi m sẽn segd n maanega.” A paasa woto: “Mam tʋlg n na n nooga a Zeova sũur wala Yelbũn 27:11 sẽn sagend-dã.” Ad a Sheila sẽn zĩnd tigisgẽ wã la a maag a yĩng n kelg sõssã, sɩd sõng-a-la wʋsgo!
18. Bõe la yãmb yãk yam n na n maane?
18 Bɩ tõnd ned kam fãa yãk yam n ket n tũud sagls nins Wẽnnaam siglgã sẽn kõt-dã. D sã n pa vaand tigissã kẽnde, d sã n karemd Biiblã la sɛb nins siglgã sẽn yiisdã, n pʋʋsdẽ la d baood kiris-neb nins sẽn tar minimã tũud-n-taare, d paamda sor-wilgr la teelg ning d sẽn datã. A Zeova ratame tɩ tõnd ned kam fãa kell n sak-a, la a kɩsa sɩd me tɩ d na n ket n sakd-a lame. Ad tõnd sẽn paam n tõe n pẽg a Zeova yʋʋrã la d tõe n kell n sak-a la d noog a sũurã sɩd yaa zu-zẽkr tɛkẽ n kõ-do!
Y tẽrame bɩ?
• Namsg la zu-loe-bʋs la a Sʋɩtãan wat ne rũndã-rũndã?
• Bõe la tõnd tar t’a yõodã ka to?
• Bõe n kɩt tɩ d baood a Zeova zoodo?
• Bõe ne bõe la a Zeova maand n sõngd tõnd rũndã-rũndã?
[Zãmsgã sogsgã]
[Foto, seb-neng 15]
D tõe n sõngda d saam-biisã tɩ b ket n sakd Wẽnnaam