A Zezi yaa mak-sõng sẽn ka to

YÃMB rat n yɩɩ nin-sõngo, la y tall sũ-noog bɩ? Tʋm-tʋmd a Pɩɛɛr wilga d sẽn tõe n maan to-to rẽ wɛɛngẽ. A gʋlsa woto: “Kirist me namsa yãmb yĩnga, n bas mamsg ne yãmb tɩ y tũ bãmb nao wã.” (1 Pɩɛɛr 2:21) Sɩd-sɩda, a Zezi Kirist vɩɩmã sẽn yɩ sõma zãngã yĩnga, d tõe n dɩka a togs-n-taar yɛl wʋsg pʋsẽ. D sã n bao n bãng a Zezi la d rɩk a togs-n-taare, d na n sɩd yɩɩ nin-sõms la d tall sũ-noogo. Bɩ d ges zʋg-sõma kẽer nin-kãseng kãngã sẽn talle, la a mak-sõngã sẽn tõe n naf tõnd to-to.

A Zezi ra maanda yɛlã tɩ zemsdẽ. Baa ne a Zezi sẽn yeel t’a pa ‘tar zĩig n na n gãneg a zugã,’ a pa weoog a meng ye. A leb n pa sagl nebã tɩ b weoog b mens ye. (Matɩe 8:20) A kẽnga kibs rãmbẽ. (Luk 5:29) A pipi yel-solemd yɩɩ a sẽn dɩk koomã n maan tɩ lebg rãam kãadem kibs sasa wã. Woto wilgdame t’a ra pa ned sẽn pa nong neb a taabã zĩigẽ, bɩ ned sẽn nong n weoogd a meng zaalem ye. (Zã 2:1-11) A wilga bũmb ning sẽn tar yõod wʋsg ne yẽ n yɩɩdã vẽenega. A yeela woto: “Mam dɩɩb yaa m maan sẽn tʋm-a maamã ratem, la m maan bãmb tʋʋmã n sɛ.”

□ Yãmb tagsame n ges y sẽn na n maan to-to tɩ rɩɩbã, futã, la teed a taab baoob ra reeg tẽebã yɛl zĩig bɩ?

A Zezi pẽnegr ra yaa nana. Biiblã wilgdame t’a Zezi yɩɩ nin-sõngo, la a ra nonga neba. Nebã sã n da kolg-a n na n togs b zu-loeese, bɩ b sã n da sok-a sokr b sẽn tagsd t’a leoorã yaa toogo, a ra pa yikd a sũur ye. Daar a yembre, kʋʋng n da gũbg-a, tɩ pag a ye sẽn da tar bãag sẽn namsd-a hal yʋʋm 12 gãd a fuugã n tẽed t’a na n paama laafɩ. La baa ne nebã sẽn da tõe n tags t’a sẽn maanã yaa nif-sãagrã, a Zezi pa zab-a ye. A bʋka a koɛɛg n yeel-a yaa: “M biiga, fo tẽeb n maag foom.” (Mark 5:25-34) Kambã me ra nong-a a Zezi zĩigẽ, n pa zoet a na wa n dig-b ye. (Mark 10:13-16) A ra sõsda ne a karem-biisã wa ned ne a zo-rãmba. Woto kɩtame tɩ b ra pa zoet rabeem ne b na kolg-a ye.—Mark 6:30-32.

□ Rẽ yĩngã nebã tõe n pẽnega yãmb nana-nana bɩ?

A Zezi yɩɩ nimbãan-zoɛta. A Zezi ra ningda a meng nebã zĩigẽ, n kʋmd b nimbãaneg la a sõngd-ba. Tʋm-tʋmd a Zã yeelame t’a Zezi sẽn yã a Maari sẽn yãbd a ba-biig a Lazaar kaalmã yĩngã, ‘a wẽe sir-kãsenga, la a sũur sãamame’ t’a yãb menga. A Zezi sẽn yãb nebã sʋk n pa zoe yãndã, b yãa vẽeneg t’a nonga a Maari ne a zakã rãmb wʋsgo. La a sẽn vʋʋg a zoa a  Lazaarã, a wilgame t’a sɩd yaa nimbãan-zoɛta.—Zã 11:33-44.

Daar a to me, rao a yembr wãood sẽn da tar tɩ kɩt t’a pa tõe n kẽng nebã sʋk kosa a Zezi t’a maag a wãoodã. A yeela a Zezi woto: “Zusoaba, yãmb sã n data, yãmb tõe n maaga maam tɩ m yɩ yɩlemde.” A Zezi sẽn maan bũmb ningã sõng-a-la wʋsgo. A tẽega a nug n sɩɩs-a n yeele: ‘Mam datame, bɩ f paam f menga.’ (Matɩe 8:2, 3) A Zezi ra pa maagd nebã bãasã sẽn na yɩl n pids bãngr-goam bal ye. A ra ratame n yols nebã. A ra maanda bũmb fãa tɩ zemsd ne gomd a ye a sẽn da togs tɩ neb wʋsg tẽrẽ. Gom-kãng la woto: “Bũmb ninga yãmb sẽn dat tɩ nebã maan yãmbã, bɩ yãmb me maan bãmb woto.”—Luk 6:31.

□ Yel-manesem ning yãmb sẽn tar ne nebã wilgdame tɩ y zoeta b nimbãaneg bɩ?

A Zezi ra yaa wʋmda. Baa ne a Zezi sẽn pa kong baa bilfã, a pa bao tɩ nebã zems zãngã, bɩ n maand wa yẽ yɩɩda neb a taabã ye. A ra wʋmda nebã yɛlã võor me. Daar a yembre, pag ‘nebã fãa sẽn da mi t’a yaa yel-wẽn soab’ wa n madga a Zezi nao ne a nintãm, n yẽes n wilg t’a tẽed-a lame, la t’a waoogd-a lame. A Zezi basame t’a maan dẽ, la linga a gãag soabã sẽn da tagsd tɩ pagã yaa nin-yaalgã. A Zezi sẽn yã tɩ pagã yaa pʋ-peelem soabã, a pa ning-a taal a yel-wẽnã yĩng ye. A yeel-a-la woto: “Fo tẽeb n fãag foom. Kẽng ne laafɩ.” Tõe tɩ yaa a Zezi sẽn bʋk a koɛɛg n gom ne pagã yĩng n kɩt t’a bas a sẽn da maand bũmb ningã.—Luk 7:37-50.

□ Yãmb yɩta tao-tao n pẽgd nebã, la y pa yãgd b taal ningr bɩ?

A Zezi ra waoogda nebã, la a ra pa tũusd neb ye. Tõe tɩ yaa rogem sẽn da be tʋm-tʋmd a Zã ne a Zezi sʋkã, n paas a Zã zʋgã sẽn da ta a Zezi yamã yĩng n kɩt t’a ra nong-a wʋsgã. * La baa ne rẽ, a ra pa nong yẽ a yen, bɩ n maand-a yel-sõmd n yɩɩd a karen-biis a taabã ye. (Zã 13:23) A Zã ne a ba-biig a Zak sẽn tɩ kos a Zezi t’a kɩt tɩ b zĩnd a rɩtg la a goabg Wẽnnaam Rĩungã pʋgẽ wã, a yeel-b-la woto: “Zĩnd mam dɩtg walla mam goabga, a ka be ne maam tɩ kõ yãmb ye.”—Mark 10:35-40.

A Zezi ra waoogda nebã wakat fãa. La  baa ne nebã sẽn da sãbsd taabã, a pa toll n maan wa bãmb ye. Wala makre, b ra pa nand pagbã ye. La a Zezi yẽ ra waoogda pagbã wa sẽn segde. Yaa Samari pag la a Zezi reng n wilg pipi tɩ yẽ la Mesi wã. La Zʋɩf rãmbã yaool n da pa nand Samari nebã, la b ra pa pʋʋsd-b meng ye. (Zã 4:7-26) Leb n yaa pagb la a Zezi reng n kɩt tɩ b paam zu-noog n maan kaset tɩ yẽ vʋʋgame.—Matɩe 28:9, 10.

□ Yãmb nonga nebã fãa, b sẽn yitẽ zĩig ninga, la b sẽn yaa buud ning n pa tũusdẽ bɩ?

A Zezi ra tʋmda sõma. Wõnda a Zezi ba-wubdg a Zozɛf maana kaalem t’a Zezi ket n yaa bi-bɩɩga. La tõe t’a Zezi yɩɩ ra-wãad sẽn na yɩl n paam ligd n ges a ma wã la a yaopã yelle. (Mark 6:3) A sẽn wa n na n ki wã, a yeela a karen-biig a Zã t’a ges a ma wã yelle.—Zã 19:26, 27.

□ Yãmb me tõe n tũu a Zezi mak-sõngã n ges y zakã rãmb yelle.

A Zezi ra yaa zoa hakɩka. A Zezi ra yaa zoa sẽn ka to. Baa a zo-rãmbã sẽn da kongd la b maand rẽ n yɩlemdẽ wã, a pa bas-b ye. Pa wakat fãa la a karen-biisã ra maand bũmb ning a sẽn da rat tɩ b maanã ye. La a wilgame tɩ yẽ yaa b zoa, n get b zʋg-sõma wã bala. (Mark 9:33-35; Luk 22:24-27) A ra pa modgd-b tɩ b tũ yẽ tagsg tɩlae ye. A ra basdame tɩ bãmb me wilgd b tagsgo.—Matɩe 16:13-15.

Sẽn yɩɩd fãa, a Zezi ra nonga a zo-rãmbã. (Zã 13:1) La a nonglmã ra taa zĩ-bʋgo? A meng yeela woto: “Nonglem ka be sẽn yɩɩd woto ye, tɩ ned sak kũum a zo-rãmb yĩnga.” (Zã 15:13) Rẽ yĩnga ned tõe n kõo a zo-rãmb bũmb sẽn tar yõod n yɩɩd a meng vɩɩm sɩda?

□ Yãmb zoa sã n beeg-y bɩ n maan tɩ y sũurã yiki, y raagd-a lame n bas bɩ?

A Zezi ra yaa rao tɛkẽ! D sã n get nebã sẽn bilgd a Zezi foto rãmbã zut to-to wã, yaa wa a pa tar pãng ye. La b sẽn gomd a Zezi yell to-to Evãnzill dãmbã pʋsẽ wã wilgdame t’a yɩɩ rao tɛkẽ, la ned sẽn da tar pãnga. Naoor a yiib la a rig koosdbã ne b teedã, la raadbã fãa wẽn-doogẽ wã. (Mark 11:15-17; Zã 2:14-17) Kʋʋngã sẽn wa n na n yõk “Nazarɛt dao a Zezi” wã, a yika ne raood n vẽneg a meng sẽn na yɩl tɩ b ra maan a karen-biisã bũmbu, n yeel woto vẽenega: “Yaa maam. Woto yĩnga, yãmb sã n baood maam, bɩ y bas [nin-kãens] tɩ b looge.” (Zã 18:4-9) A Pɩlat sẽn yã a Zezi sẽn tall raood b sẽn wa n yõk-a la b namsd-a wã, a yeela woto: “Ad dao wã!” La d sẽn yã bũmb ning tɩ loogã kɩtame tɩ pa lingr ne tõnd ye.—Zã 19:4, 5.

□ Y sã n ne bũmb y sẽn segd n maan ne raoodo, y sɩd maand-a-la ne raood bɩ?

Zʋg-sõma kãensã la a taabã a Zezi sẽn tallã kɩtame t’a yaa mak-sõng sẽn zems zãng d sẽn segd n tũ. D sã n modg n dɩk a togs-n-taare, d na n yɩɩ nin-sõmse, la d tall sũ-noogo. Rẽ n so tɩ tʋm-tʋmd a Pɩɛɛr sagend kiris-nebã tɩ b tũ a Zezi naoã. Rẽ yĩnga yãmb maanda y sẽn tõe fãa n na n tũ a Zezi nao bɩ?

A Zezi yɩɩda mak-sõng tõnd sẽn segd n tũ

A Zezi yɩɩda mak-sõng tõnd sẽn segd n tũ. A yeela woto: “Mam yaa sore la sɩda la vɩɩm. Ned ka tõe n ta m Ba nengẽ a sã n ka mam maasem yĩng ye.” (Zã 14:6) A Zezi kɩtame tɩ tõnd bãng Wẽnnaam sẽn yaa a soaba, n pak sor tɩ d tõe n kolg Wẽnnaam. A leb n kɩtame tɩ wẽn-sakdbã tõe n wa paam vɩɩm sẽn kõn sa.—Zã 3:16.

Sẽn mik tɩ yaa woto yĩng n kɩt t’a Zezi wa tẽngã zugã, a yeela woto: “Yaa woto yĩng la  Ninsaal Biigã wayã. Bãmb ka wa tɩ neb sõng bãmb ye, b waame n na n sõng nebã, la b kõ vɩɩm tɩ yao neb wʋsg yĩnga.” (Matɩe 20:28) A Zezi sẽn sak n ki ninsaalbã yĩngã, a paka sor tɩ b tõe n wa paam vɩɩm sẽn kõn sa. Bõe la tõnd ned kam fãa segd n maan sẽn na yɩl n dɩ a Zezi sẽn maan bũmb ningã nafa? A Zezi wilga tõnd sẽn segd n maan bũmb ninga. A yeela woto: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.”—Zã 17:3.

Hakɩka, d sã n dat n wa paam vɩɩm sẽn kõn sa wã, yaa tɩlae tɩ d bao n bãng a Zezi, n dɩk a togs-n-taare, la d tẽ t’a sẽn ki wã, yɩɩ maoong tõnd yĩngã. D sagend-y lame tɩ y rɩk sẽk n zãms Biiblã sẽn tõe n sõng yãmb tɩ y bãng yɛl nins d sẽn sõdgã fãa wã, la y modg n tũ bũmb nins a sẽn yetã wa a Zezi sẽn maanã. *

A Zezi vɩɩmã sẽn yɩ to-to wã wilgda tõnd d sẽn segd n yɩ neb nins buudu. A kũumã sẽn yɩ maoongã kɩtame tɩ d tõe n paam d mens ne yel-wẽnã la kũumã. (Rom dãmba 6:23) Ad sã n da pa a Zezi Kirist yĩnga, sɩd na n yɩẽ-la kaeto ne-do! D ra tol n bas tɩ d tʋʋmã, la zu-loeesã pak tõnd wʋsg tɩ d pa bao n bãng a Zezi Kirist sẽn yaa nin-kãseng sẽn ka to wã, la d rɩk a togs-n-taar ye.

[Tẽngr not rãmbã]

[Zĩ-gũbri/Foto, seb-​neng a 7]

▪ A Zezi ra waoogda nebã, la a ra pa tũusd neb ye

▪ A yɩɩ zoa hakɩk n tãag a kũum

▪ A ra tara raoodo

Yãmb maoodame n na n tũ a Zezi mak-sõngã wa y sẽn tõe tɛk bɩ?

[Foto rãmba, seb-neng a 5]

A Zezi ra maanda yɛlã tɩ zemsdẽ

A pẽnegr ra yaa nana

A yɩɩ nimbãan-zoɛta