Zã-y y mens ne waoogre, a Zeova ziirã yĩnga
Zã-y y mens ne waoogre, a Zeova ziirã yĩnga
“[A Zeova] tʋʋmã tara waoogr ne naam.”—YƖƖL 111:3.
1, 2. a) Ziir yaa bõe? b) Sogs-bʋs la d na n leok sõs-kãngã pʋgẽ?
B RA soka yʋʋm piig bi-pugl yʋʋr sẽn boond t’a Madison tɩ sã n yaa ne yẽ, ned sẽn tar ziir yaa wãn-wãna. Zĩig pʋgẽ bala, a leokame tɩ yaa ned sẽn yeelg fu-sõma. La tõeeme tɩ biigã ra pa mi meng tɩ Biiblã yeelame tɩ Wẽnnaam ‘yeelga naam ne ziir’ ye. (Yɩɩl 104:1) Sã n yaa ne ãdem-biisã, f sã n tar ziiri, f segd n sɩd ningda fut sẽn waoogd-fo. Wala makre, tʋm-tʋmd a Poll da wilgame t’a ratame tɩ pagb nins sẽn yaa kiris-nebã ‘maneg b mens n pil fut sẽn zemse, ne yõk-m-meng la gũus-m-menga, la b ra wẽ pʋg-sadr ne zut pãneng ne sãnem la kĩndi ne nagem fut ye.’ (1 Tɩm. 2:9) La b sẽn yeel tɩ d zã d mens ne waoogr a Zeova naamã la a ziirã yĩngã, pa tek d sẽn na n manegd d mens sõma bal ye.—Yɩɩl 111:3.
2 Gom-biis võor wilgr sebr a ye yeelame tɩ b sã n gomd “ziir yelle, b gomda sẽn zems ne pẽgr la waoogr yelle.” Ned kae n zems ne waoogr la pẽgr n ta a Zeova ye. Rẽnd tõnd sẽn yaa a nin-buiidã yĩnga, d no-goamã la d tʋʋmã pʋsẽ, d segd n waoogd-a lame. La bõe n pʋd n kɩt tɩ ninsaalbã mi waoogre? Bõe n kɩt tɩ d mi vẽeneg t’a Zeova tara naam la ziiri? Rẽ segd n kɩtame tɩ d maan bõe? Mak-sõng bʋg la a Zezi Kirist kõ tõnd waoogrã wɛɛngẽ? Wãn to la d tõe n wilg tɩ d mii waoogre?
Ãdem-biisã sẽn mi waoogrã võore
3, 4. a) Wẽnnaam sẽn waoogd tõnd to-to wã segd n kɩtame tɩ d maan bõe? b) Yaa ãnd yell la Yɩɩl Sõamyã 8:6-10 sẽn da pĩnd n gomã? (Ges-y tẽngr notã.) d) Sõdg-y neb a Zeova sẽn waoog pĩnd wẽndẽ.
3 Wẽnnaam sẽn naan ninsaalbã a meng wõnegã yĩnga, b fãa tõe n zãa b mens ne waoogre. A Zeova sẽn naan pipi ninsaalã poore, a waoog-a lame n kõ-a noor t’a ges tẽngã yelle. (Sɩng. 1:26, 27) Baa ninsaal sẽn wa n lebg yel-wẽn-maandã zugẽ, a Zeova kell n yeel-a lame t’a ges tẽngã yelle. Woto wilgdame tɩ baa kongrã poore, Wẽnnaam ket n waoogda ninsaalbã. (Karm-y Yɩɩl Sõamyã 8:6-10.) * A Zeova sẽn waoogd tõnd to-to wã yĩng kɩtame tɩ tõnd me segd n pẽgd a yʋ-kãsengã la d waoogd-a.
4 Wẽnnaam a Zeova waoogda neb nins sẽn maand a raabã n yɩɩd b taabã. Wala makre, a ra waooga a Abɛll n deeg a maoongã, la a tõdg a kẽem a Kayẽ rẽndã. (Sɩng. 4:4, 5) A Zozue sẽn da wa n segd n ledg a Moiiz n yɩ Israɛll nin-buiidã taoor lʋɩtã, Wẽnnaam yeela a Moiiz woto: “Kɩt t’a paam naam ninga fo sẽn da tarã.” (Sõd. 27:20) Biiblã goma a Davɩɩd biig a Salomo yell n yeel woto: “[A Zeova] kɩtame t’a Salomo yʋʋr yɩ kãseng Israɛlle. La bãmb kɩtame t’a naamã yɩɩg Israɛll rĩm dãmb fãa sẽn deng yẽ wã.” (1 Kib. 29:25) Kiris-neb nins sẽn paam vʋʋsem sõngã zaeebã vʋʋgr poore, Wẽnnaam na n waoog-b lame n yɩɩg neb a taabã, bala b vɩɩmã tõre, ‘b wilga nebã Wẽnnaam pãngã la a naamã ziiri.’ (Yɩɩl 145:11-13) A Zeova waoogda a Zezi “piis a taabã” sõor sẽn tar paasgã me, bala bãmb me sõngd n pẽgd-a lame.—Zã 10:16.
A Zeova ziirã la a naamã yaa vẽenega
5. Wilg-y-yã a Zeova ziirã sẽn ta zĩig ninga?
5 Yɩɩl-gʋlsd a Davɩɩd da goma Wẽnnaam sẽn yaa kãseng wʋsgã yelle, la ninsaal sẽn paood wʋsgã yell a yɩɩll pʋgẽ n yeele: “[Zeova], tõnd Soaala, yãmb yʋʋrã yaa kãseng dũniyã tɛk fãa. Dẽ yĩng n kɩt tɩ yãmb kɩt tɩ y waoogr loog saase.” (Yɩɩl 8:2) Hal ne zãmaan la zãmaanã, yaa Wẽnnaam a Zeova n so naam la waoogr yĩngr la tẽng zugu. Sɩng n yaa woto sẽn deng t’a naan “saasã la tẽngã,” la na n kell n yɩɩ woto n tãag a raabã sẽn na n wa pids tɩ tẽngã lebg arzãna, tɩ ãdem-biisã ye lebs n zems zãngã.—Sɩng. 1:1; 1 Kor. 15:24-28; Wil. 21:1-5.
6. Bõe yĩng tɩ yɩɩl-gʋlsdã yeel t’a Zeova yeelga naam ne ziiri?
6 Yʋng a ye, yɩɩl-gʋlsdã sẽn yɩ wẽn-zoɛtã gesa saasã a Zeova sẽn naanã, n yã a sẽn pid ne ãds n yãgd to-to wã hal tɩ yɩ-a noogo. A tagsa ‘Wẽnnaam sẽn yadg saasã wa fu-roog’ to-to tɩ be rasãnd wʋsgã yell me. Yaa woto fãa n kɩt t’a yeel t’a Zeova yeelgda naam ne ziirã. (Karm-y Yɩɩl Sõamyã 104:1, 2.) Bũmb nins naandã sẽn yaa pãng sẽn ka to soab d sẽn pa tõe n yã wã sẽn naanã sɩd wilgda a naamã la a ziirã vẽenega.
7, 8. Wãn to la saasã wilgd a Zeova ziirã?
7 Wala makre, ges-y ãd-sull ning sẽn be yĩngrã tɩ b boond-a tɩ voa lakte wã sẽn yaa to-to wã. D sã n mak tẽngã ne ãdsã, wĩntoogã la teed a taabã sẽn be voa lakte wã pʋgã, tẽngã pa baa fʋɩ ye. Bala voa lakte wã tara sẽn yɩɩd ãds milyaar koabg sẽn sũ taaba! F sã n na n sõd ãdg a ye segõnd fãa pʋgẽ daar tõr n pa yalse, yaa sẽn yɩɩd yʋʋm tus a tã la f na n dɩk n tõog n sõd bãmb milyaar koabga.
8 Bãngdbã yaool n yeelame tɩ ãd-sul milyaar dãmb n be tɩ b pa mi b sõorã zãng ye. Sã n yaa woto, ãdsã fãa sẽn be yĩngrã segd n yaa b wãna? Yaa vẽeneg tɩ ninsaal pa tol n tõe n bãng ye. La a Zeova yaool n mii ãdsã sõor zãnga, la a boond ãdg fãa yʋʋre. (Yɩɩl 147:4) Woto sõngda tõnd tɩ d wʋm b sẽn yeel t’a Zeova yeelgda ziirã võore. Rẽ pa kɩtd tɩ d rat n pẽg a yʋ-kãsengã sɩda?
9, 10. Wãn to la Wẽnnaam sẽn dɩlgd ãdem-biisã to-to wã wilgd t’a yaa yam sẽn ka to soaba?
9 D bas saasã sẽn labsã gesg masã la d tags rɩɩbã a sẽn kõt ãdem-biisã yelle. A Zeova pa “naan yĩngr la tẽngã” bal ye, yaa yẽ n “kõt kom sẽn tar-b rãmbã rɩɩb” me. (Yɩɩl 146:6, 7) D sã n ges Wẽnnaam tʋʋm kãsemsã, wala makre, koodã buud toor-toor sẽn be wã, d mikdame t’a sɩd toga ne waoogre. (Karm-y Yɩɩl Sõamyã 111:1-5.) A Zezi wilga a karen-biisã tɩ b tõe n kosa b pʋʋsg pʋgẽ woto: “Bɩ y kõ tõnd dɩɩb rũndã.” (Mat. 6:11) Pĩnd wẽndẽ, Israɛll soolmã pʋgẽ la zĩis a taaba, rɩɩb ning nebã fãa sẽn da rɩt n yɩɩd yaa buri. Baa ne sẽn wõnd bur maaneg pa toogã, d sã n tags te-bõoneg nins sẽn kalemd taab n kɩt tɩ bur tõog n yɩ rɩɩbã yelle, d tõe n yeelame tɩ pa nana ye.
10 B sẽn da wa n nan ket n gʋlsd Biiblã sasa, Israɛll nebã ra maanda b burã ne orz wall ble zom. Wakat ninga, b ra ningda rabɩlle. Rabɩllã kɩtdame tɩ zomã wuki, la d pa tol n tõe n wʋm dẽ võor zãng ye. Sẽn paase, ninsaal sẽn wãbd bur t’a yãadã tɩ wer-a t’a lebg to-to n dɩlgd a yĩngã me võor wʋmb yaa toogo. Sɩd pa zaalem tɩ yɩɩl-gʋlsdã yeel woto ye: “[Zeova], yãmb tʋʋmã yaa wʋsgo. Yãmb maana bãmb fãa ne yam”! (Yɩɩl 104:24) Y sã n tags bũmb nins a Zeova sẽn naanã yelle, pa kɩtd tɩ yãmb me rat n pẽg-a sɩda?
Wẽnnaam naamã la a ziirã segd n kɩtame tɩ d maan bõe?
11, 12. D sã n bʋgsd bũmb nins Wẽnnaam sẽn naanã zugu, na n kɩtame tɩ d maan bõe?
11 Pa tɩlae tɩ d yɩ bãngd n yaool n bãng tɩ ãds gesg yʋng bee yamleoogo, bɩ tɩ bur yaa noog ye. La baasgo, sẽn na yɩl n bãng tɩ d naandã sɩd tara ziiri, rẽnda d rɩk sẽk n tags bũmb nins a sẽn naanã zugu. Bʋgsg a woto na n naf-d-la wãn-wãna? A yõodã yaa a ye ne f sẽn na n bʋgs a Zeova tʋʋm a taabã zugu.
12 A Davɩɩd ra goma tʋʋm-kãsems nins a Zeova sẽn tʋm a nin-buiidã yĩngã yell a yɩɩll pʋgẽ n yeel woto: “Mam na n goma yãmb naamã ziir ne y waoogrã la y bõn-bãnã” yelle. (Yɩɩl 145:5) D sã n zãmsd Biiblã la d rɩkd sẽk n bʋgsd d sẽn karemdã zugu, d wilgdame tɩ d nanda Wẽnnaam bõn-bãnã bɩ a tʋʋm-kãsemsã. Rẽ yõod yaa bõe? Na n kɩtame tɩ d pẽg a Zeova la d naag a Davɩɩd n yeele: “Mam na n togsa yãmb kaosengã.” (Yɩɩl 145:6) D sã n bʋgsd tʋʋm-kãsems nins Wẽnnaam a Zeova sẽn naan tɩ be yamleoogã zugu, na n paasa d zoodã ne-a, la kɩt tɩ d gomd a yell ne raood la yẽesem. Rẽ yĩnga y moonda koe-noogã ne yẽesem n sõngd nebã tɩ b bãngd Wẽnnaam a Zeova naamã, la a ziirã bɩ?
A Zezi wilg-d-la Wẽnnaam ziirã
13. a) Sẽn zems ne Daniɛll 7:13, 14 goamã, bõe la a Zeova kõ a bi-riblã? b) Rĩm a Zezi manesem ne a nin-buiidã yaa wãn-wãna?
13 Wẽnnaam bi-ribl a Zezi Kirist moona koe-noogã ne yẽesem n waoog a saasẽ Ba wã, a ziirã la a naamã yĩnga. A Zeova waooga a bi-ribl yendã ne waoogr sẽn ka to, n ‘kõ-a soolem la naam.’ (Karm-y Daniɛll 7:13, 14.) La ne rẽ fãa, a Zezi pa zẽk-m-meng soab wall nin-pa-nand ye. A yaa Rĩm sẽn yaa nimbãan-zoɛt la sẽn mi a nin-buiidã sẽn tõe n maan tɛka, la a waoogd-b ne rẽ fãa. Wala makre, ges-y-yã a Zezi Wẽnnaam sẽn yãk t’a na n wa yɩ rĩmã manesem sẽn da yaa to-to ne nebã, sẽn yɩɩd fãa, neb nins b sẽn da bak n kis la b pa nandẽ wã.
14. Wãn to la pĩnd wẽndẽ Israɛllã neb ra get wãoore?
14 Pĩnd wẽndẽ, naoor wʋsgo, wãood sã n da yõk-fo, f miime tɩ tɩɩm kae tɩ f pa ki ye. Bãagã rɩta f yĩngã wil fãa n debda. Nebã nifẽ, tɩp wãood tɩ sa ra yaa bũmb sẽn pa tol n tõe wa kũum vʋʋgre. (Sõd. 12:12; 2 Rĩm 5:7, 14) B ra geta wãoobã wa neb sẽn yaa rẽgdo, n kis-b la b welg-ba, tɩ b pa segd n zĩnd nebã sʋk ye. B sã n wa kolgd neba, b segd n kaasame tɩ: “Rẽgdo! Rẽgdo!” sẽn na yɩl tɩ b pĩnd n lake. (Maan. 13:43-46) Wãoor ne kũum da yaa ye. Zʋɩf rãmbã tũudum karen-sãam dãmb sɛb wilgame tɩ wãoor sã n da rat n kolg neda, a segd n teka sẽn na ta metr a yiib zĩigẽ. B wilgame tɩ zʋɩf rãmbã tũudum taoor soab a ye n da yã wãoor yɩɩga, n lob-a ne kug sẽn na yɩl t’a kell n da kolg-a ye.
15. A Zezi manesem yɩɩ wãn to ne wãoore?
15 La daar a ye, wãoor n kolg a Zezi n bõos-a t’a maag a wãoodã. D ges a Zezi manesem sẽn yɩ to-to ne-a wã. (Karm-y Mark 1:40-42.) Wall t’a rig wãoorã, a zoeya a nimbãaneg la a waoog-a. A Zezi nifẽ, ned ninga sẽn da yas a taoorã yaa nimbãan-ned sẽn dat laafɩ bala. A sũur sãama wʋsg t’a tʋlg zĩig pʋgẽ n na n sõng-a. A Zezi tẽega a nug n sɩɩs-a t’a wãoodã sa.
16. A Zezi manesem sẽn da yaa to-to ne nebã kõt-d-la sagl-bʋgo?
16 Tõnd sẽn yaa a Zezi karen-biisã, wãn to la d tõe n dɩk a togs-n-taare, n wilg nebã a Ba wã ziirã? Bũmb a ye d sẽn tõe n maan yaa d sẽn na n sak n deeg tɩ ãdem-biig fãa segda ne waoogre, baa a sẽn yaa ned ninga, a komsem wall a yʋʋm sẽn yaa to-to fãa. (1 Pɩɛ. 2:17) Sẽn yɩɩd fãa, kiris-neb nins Wẽnnaam sẽn yãk tɩ b ges b taabã yellã segd n waoogd-b lame. Wala makre, pʋg-sɩdbã, roagdbã la kãsem dãmbã segd n waoogda neb nins yell b sẽn getã, la b ra kɩt tɩ b wa tagsdẽ tɩ b ka võor ye. Biiblã wilgame tɩ kiris-nebã fãa segd n waoogda taab woto. B yeelame: “Bɩ y nong taab wʋsg ne ba-biis nonglem. Bɩ y waoog taaba.”—Rom 12:10.
D wilg waoogr d tigissã buud fãa sasa
17. Biiblã kiba-bʋs n wilgd d sẽn segd n zã d mens to-to d tigissã buud fãa sasa?
17 Biiblã wilgdame tɩ sẽn yɩɩd fãa, d tigissã sasa, d segd n gũusame. Koɛɛg Soab 4:17 yeta woto: “Fo sã n dabd Wẽnnaam doogẽ, bɩ f gũus f naoore.” A Moiiz sẽn da wa n kolg zĩig sẽn yaa sõngã, b yeel-a lame t’a pidg a neooda wã. Yɩɩ woto me ne a Zozue. (Yik. 3:5; Zoz. 5:15) B ra segd n maana rẽ n wilg tɩ b nanda zĩigã. Ra yaa tɩlae ne Israɛll maan-kʋʋdbã me tɩ b tão põg-rãmba, n lud “sẽn sɩng ne b seesã tɩ ta b kɩgba.” (Yik. 28:42, 43) Woto ra yaa sẽn na yɩl tɩ b sã n wa tʋmd sɛk-zĩigã tʋʋm tẽn-kugrã sɛɛga, bɩ bũmb da wa maan tɩ b yã b yãndã ye. Maan-kʋʋd buudã fãa ra segd n tũu no-kãngã sẽn waoogd a Zeova wã.
18. D sã n dat n waoog Wẽnnaam, bõe la d segd n maane?
18 Woto wilgdame tɩ d sã n dat n waoog Wẽnnaam, rẽndame tɩ d wilg tɩ d mii waoogre. D sã n dat tɩ nebã waoogd-do, d segd n waoogd-b lame. Waoog-kãng pa segd n yɩ zugẽ-zugẽ bɩ sẽn na yɩl tɩ nebã yãtẽ bal ye. Tog n yɩɩ ne d sũur fãa, bala yaa sũurã la Wẽnnaam feesda. (1 Sãm. 16:7; Yel. 21:2) Wakat fãa la zĩig fãa, d no-goamã la d tʋʋmã fãa pʋsẽ, d tog n yɩɩ neb sẽn mi waoogre. D manesmã ne d taabã la d sẽn get d meng to-to wã segd n wilgda rẽ. D yel-manesmã, d fu-yerdi wã la d sẽn manegd d mensã to-to wã pʋgẽ, d segd n maanda wa tʋm-tʋmd a Poll sẽn yeelã. A yeela woto: “Tõnd maoodame n ka rat n lub ned baa sẽn yaa ne bũmb ninga ye, tɩ ned da gom Wẽnnaam tʋʋmdã wẽng ye. La ne bũmb fãa tõnd maanda sẽn zems Wẽnnaam tʋm-tʋmdba.” (2 Kor. 6:3, 4) D maanda d sẽn tõe fãa sẽn na yɩl tɩ “Wẽnnaam sẽn yaa tõnd Fãagdã kareng paam waoogr ne bũmb fãa.”—Tɩt 2:10.
Wilgd-y tɩ y yaa neb sẽn mi waoogre
19, 20. a) Wãn to la d tõe n sɩd waoog nebã? b) D mensã, d taabã la a Zeova waoogrã wɛɛngẽ, bõe la d segd n modg n maane?
19 Kiris-neb nins sẽn paam vʋʋsem sõngã zaeeb n “yaa Kirist tʋm-tʋmdbã” wilgdame tɩ b mii waoogre. (2 Kor. 5:20) Piis a taabã me sẽn sõngd-bã yaa neb sẽn mi waoogre, Wẽnnaam sẽn tʋm tɩ b moon Mesi Rĩungã koɛɛga. Goosneema sã n tʋm neb tẽn-zẽnga, b sã n kẽnge, b gomda ne raood la ne waoogr b goosneema wã yʋʋr yĩnga. Woto yĩnga, segdame tɩ tõnd me gomd ne raood la ne waoogr n teend Wẽnnaam goosneema wã. (Ef. 6:19, 20) Rẽ yĩnga d sẽn tʋgd n taasd nebã “koe-noogã” pa bũmb sẽn wilgd tɩ d waoogd-b lame sɩda?—Ezai 52:7.
20 D segd n modga ne d sũur fãa n zãad d mens sõma tɩ waoogd Wẽnnaam. (1 Pɩɛ. 2:12) D maood wakat fãa n zãad d mens ne waoogr a Zeova ziir yĩngã, la d waoogd d tẽed-n-taasã me. Bɩ d fãa kɩt tɩ d sẽn maand bũmb nins a Zeova sẽn yeelg naam la ziirã yʋʋr yĩnga ket n tat a yam zãnga.
[Tẽngr note]
^ sull 3 A Davɩɩd goam nins sẽn be Yɩɩll a 8 soabã pʋgẽ wã pidsa a Zezi Kirist sẽn pa tall yel-wẽndã me zugu.—Heb. 2:5-9.
Wãn to la y na n leoke?
• D sã n bʋgs a Zeova naamã la a ziirã zugu, segd n kɩtame tɩ d maan bõe?
• A Zezi sẽn waoog wãoorã to-to wã kõta tõnd sagl-bʋgo?
• Wãn to la d tõe n wilg tɩ d waoogda a Zeova?
[Zãmsgã sogsgã]
[Foto, seb-neng 18]
Wãn to la a Zeova waoog a Abɛlle?
[Foto, seb-neng 20]
A Zezi sẽn waoog wãoorã to-to wã kõta yãmb sagl-bʋgo?