Wãn to la a Zezi kũumã tõe n fãag-yã?

SẼN kolg yʋʋm 2 000 la woto masã, rao a ye sẽn pa tar yell n ki sẽn na yɩl n fãag neb a taaba. Yɩɩ yʋʋmd 33 Zʋɩf rãmbã pakã sasa. Nin-kãnga yaa ãnda? Yaa Nazarɛt rao a Zezi. A kii ãnd dãmb yĩnga? Yaa nebã fãa yĩnga. Biiblã verse a ye nebã sẽn mi sõma gomda rẽ yell woto: “Wẽnnaam nonga dũniyã hal tɩ b kõ b Biigã sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.”—Zã 3:16.

Yaa sɩd tɩ neb wʋsg mii verse kãnga sõma, la neb nins sẽn sɩd wʋmd a võorã pa waoog ye. B sokda b mens woto: ‘Bõe yĩng tɩ Kiristã ra segd n ki tõnd yĩnga? Wãn to la nin-yend kũum tõe n wa kɩt tɩ neb pa le kiidẽ?’ Biiblã leokda sogs-kãensã tɩ yaa vẽenega.

Maana wãn tɩ kũumã wa be n namsd ninsaalbã?

Neb kẽer tẽedame tɩ Wẽnnaam naana ninsaalbã tɩ b vɩɩmd tẽngã zug wakat bilf pʋgẽ bala, n namse, n paam sũ-noog bilfu, tɩ rẽ poor bɩ b ki n tɩ vɩɩmd zĩig sẽn yaa sõma pʋgẽ. Sã n yaa ne bãmb sẽn tagsd to-to wã, Wẽnnaam da naana ninsaalbã tɩ b kiidẽ. La Biiblã yaool n wilgda bũmb ning sẽn kɩt tɩ nebã kiidẽ wã, tɩ yaa toor ne nin-kãensã sẽn tagsd to-to wã. A yeta woto: “Rao a yembr n wa ne yel-wẽnã dũniyã tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.” (Rom dãmba 5:12) Verse kãngã wilgdame tɩ yaa yel-wẽndã n kɩt tɩ nebã kiidẽ wã. La “rao a yembr” ning sẽn wa ne yel-wẽndã tɩ kɩt tɩ nebã bẽedẽ, n kʋʋndẽ la b kiidẽ wã yaa ãnda?

Sebr a ye wilgame tɩ bãngdb wʋsg sak n deegame tɩ nebã fãa yaa nin-yend kamba. Biiblã wilgda vẽeneg tɩ yaa “rao a yembre.” Sɩngr 1:27 yeta woto: “Wẽnnaam naana ninsaal wa b meng wẽnego, Wẽnnaam naana yẽ wa bãmb wẽnego. Bãmb naana bãmb daowa la paga.” Dẽnd Biiblã wilgdame tɩ bũmb nins Wẽnnaam sẽn tõeyã fãa wã sẽn naanã sʋka, yaa pipi raoã ne a pagã naanegã n da kõt Wẽnnaam ziir n yɩɩda.

Sɩngr sebrã bilgda ninsaalbã vɩɩm sẽn da yaa to-to, Wẽnnaam sẽn naan pipi raoã ne a pagã poore. Wẽnnaam ra pa tol n gom kũum meng yelle, sã n pa a sẽn yeel-b tɩ b sã n kɩɩs-a b na n kiime wã ye. (Sɩngre 2:16, 17) Wẽnnaam ra ratame tɩ ninsaalbã zĩnd tẽngã zugu, zĩ-neer pʋgẽ, la b vɩɩmd sũ-noog pʋgẽ n tall keelem wakat sẽn ka sate. A ra pa rat tɩ b kʋʋle, la b wa baas n ki ye. La maana wãn tɩ nebã fãa wa kiidẽ?

Sɩngr sebrã sak a 3 wilgdame tɩ pipi raoã ne a pagã yãka yam n kɩɩs Wẽnnaam a Zeova sẽn yaa b vɩɩmã kõtã. Woto yĩnga, yell ning Wẽnnaam sẽn da yeel tɩ na n paam-b lame wã sɩd paam-b lame. Wẽnnaam yeela raoã woto: “Fo yaa tẽng tom, la fo na n le lebga tẽng tom yɛsa.” (Sɩngre 3:19) Sɩd me, tarẽ-n-tarẽ, kɩɩsdb a yɩɩbã wa n kiime.

La yellã pa tek a Ãdem ne a Hawa zug bal ye. Sãag n mada b kambã ne b yagensã fãa.  B kɩɩgã kɩtame tɩ bãmb me kong vɩɩm sẽn ka sɛtã. A Zeova yaool n da zoe n tagsda kamb nins a Ãdem ne Hawa sẽn da na n wa rogã yelle, a sẽn wa n yet-b tɩ “b rog kamb n pid dũniyã la b tõog-a. La b soog zĩmã sẽn be koomã pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” (Sɩngre 1:28) Bilf-bilfã, ãdem-biisã ra na n pida tẽngã, n paam sũ-noog wʋsgo, la b vɩ bal n pa kiidẽ ye. La b yaab a Ãdem yĩnga, b lebga yel-wẽn-maandba, tɩ kɩt tɩ b baa a ye pa tõe n põs kũum ye. Tʋm-tʋmd a Poll me sẽn yaa a Ãdem yagengã yeela woto: “Mam yaa yĩnga, yel-wẽn sẽn so n maand a sẽn dat ne.”—Rom dãmba 7:14, Kãab-paalgã Koe-noogo.

A Ãdem sẽn maan yel-wẽndã, a sãama ninsaal Wẽnnaam sẽn naan tɩ be rasãndã. A Ãdem kambã wa n doga kamba, la b paam yagense. Kom-kãens me bɩɩme n paam kamba, la b ki. Bõe yĩng tɩ b fãa ki? Bala b fãa yaa a Ãdem kamb la a yagense. Biiblã yeta woto: “Ned a yembr beegr yĩng kɩtame tɩ neb wʋsg ki.” (Rom dãmba 5:15) Bãasã, kʋʋlmã, wẽngã maaneg tʋlsem la kũumã naaga yɛl nins a Ãdem beegrã sẽn kɩt tɩ paamd a zakã rãmb fãa wã. La tõnd fãa me yaa a Ãdem zakã neba.

Tʋm-tʋmd a Poll lɛtr ning a sẽn tool Rom kiris-nebã pʋgẽ, a goma ninsaalbã sẽn pa zems zãngã sẽn namsd to-to wã yelle, baa ne yẽ mengã. A leb n goma b sẽn maood to-to ne yɛl nins yel-wẽndã sẽn wa ne wã yelle. A yeela woto: “Mam yaa nimbãan-ned bala. Ãnda n na n fãag maam ne kũum sẽn be yĩn-kãngã pʋgẽ wã?” A sokrã leoor bãngr tara yõod wʋsgo. Bala sɩd-sɩda ãnd soab n da na n fãag a Poll la neb nins sẽn dat fãagrã ne yel-wẽnã la kũumã? A Poll meng leokame n yeel woto: “Bark Wẽnnaam tõnd Zusoab a Zezi Kirist maasem yĩnga.” (Rom dãmba 7:14-25) Vẽenega, d naandã maana bũmb n na n fãag tõnd ne a bi-ribl a Zezi Kirist maasem yĩnga.

A Zezi sẽn maan bũmb ning tɩ kɩt tɩ Wẽnnaam na n fãag ãdem-biisã

A Zezi wilga a sẽn da na n maan bũmb ning n fãag ãdem-biisã ne yel-wẽndã la  kũumã. A yeela woto: ‘Ninsaal Biigã waame n na n kõ b vɩɩm tɩ yao neb wʋsg yĩnga.’ (Matɩe 20:28) Wãn to la a Zezi vɩɩmã yɩ rondo? Wãn to la a kũumã nafd tõndo?

Biiblã wilgdame t’a Zezi meng ka maan yel-wẽna, la t’a ‘baka ne yel-wẽnã rãmba.’ A Zezi vɩɩmã tõre, a tũu Wẽnnaam noyã hal sõma. (Hebre dãmba 4:15; 7:26) Dẽnd pa yel-wẽndã la kɩɩsgã yĩng n kɩt t’a Zezi ki ye. La yaool n yaa rẽ n kɩt t’a Ãdem ki. (Ezekɩɛll 18:4) Baa ne a Zezi sẽn da pa segd ne kũumã, a sakame n ki sẽn na yɩl n maan a Ba wã raabo, rat n yeel t’a fãag ãdem-biisã ne yel-wẽndã la kũumã. Wala d sẽn zoe n togs tɩ loogã, a Zezi sak n waa tẽngã zugu, sẽn na yɩl n “kõ a vɩɩmã tɩ yao neb wʋsg yĩnga.” Ne nonglem sẽn ka to, a Zezi sak n “kii nebã fãa yĩnga.”—Hebre dãmba 2:9.

Vɩɩm ning a Zezi sẽn sak n kõ wã ne a Ãdem sẽn da tar vɩɩm ning nand t’a maan yel-wẽndã ra zema taaba. A Zezi kũumã poore, bõe n maane? A Zeova sak n deegame t’a Zezi maoongã sɩd “raa nebã fãa.” (1 Tɩmote 2:6) Dẽnd yaa ne a Zezi vɩɩmã la Wẽnnaam yao n fãag ãdem-biisã ne yel-wẽndã la kũumã.

Naandã sẽn maan woto wã, a wilgame t’a nonglmã buud pa tar to ye. Biiblã gomda rẽ yell naoor wʋsgo. A Poll tẽega kiris-nebã tɩ b ‘raa bãmb toogo.’ (1 Korẽnt dãmba 6:20; 7:23, Kãab-paalgã Koe-noogo) A Pɩɛɛr yeelame tɩ Wẽnnaam pa tũnug ne sãnem bɩ wanzuri n fãag kiris-nebã ne kũumã ye. Yaa ne a bi-riblã zɩɩm. (1 Pɩɛɛr 1:18, 19) Yaa ne a Zezi Kirist maoongã maasem yĩng la a Zeova na n fãag ãdem-biisã ne kũumã wakat sẽn kõn sa yĩnga.

Kiristã maoongã na n nafa yãmb bɩ?

Tʋm-tʋmd a Zã goma a Zezi maoongã yõod yell n yeel woto: “[A Zezi Kirist] mengã yɩɩ maoong tõnd yel-wẽnã yĩnga, ka tõnd yel-wẽnã yĩng bal ye, la dũniyã nebã fãa yel-wẽnã yĩng me.” (1 Zã 2:2) Vẽenega, a Zezi maoongã yɩɩ nebã fãa nafr yĩnga. La rẽ yĩnga woto rat n yeelame tɩ d pa baood n maan bũmb n yaool n dɩ a nafa bɩ? Ayo. D tẽeg fãagr ning yell d sẽn gom sõsg ning sẽn loogã pʋgẽ wã. Neb nins sẽn wa n na n fãag neb a wɛ wã sika bũmb bokã pʋgẽ. La yaa sẽn pa-b bokã pʋgẽ wã ned kam fãa n da segd n kẽ bũmb ning b sẽn sik bokã pʋgẽ wã pʋgẽ, tɩ b yaool n yiis a soabã. Neb nins me sẽn dat n dɩ Kirist maoongã yõodã pa segd n gũ bal tɩ Wẽnnaam wa fãag-b ye. B segd n maana bũmbu.

Bõe la Wẽnnaam dat tɩ b maane? Zã 3:36 yeta woto: “Ned ninga sẽn tẽed Biigã tara vɩɩm sẽn ka sɛta. La ned ninga sẽn ka tẽed Biigã kõn paam vɩɩm ye, la Wẽnnaam sũur  na n yika ne yẽ.” Wẽnnaam ratame tɩ d tẽ Kirist maoongã. La pa woto tɛk ye. “Tõnd sã n sak [a Zezi] tõogã, tõnd miime tɩ tõnd bãnga bãmba.” (1 Zã 2:3) Dẽnd yaa vẽeneg tɩ d sã n dat tɩ Wẽnnaam fãag-d ne yel-wẽndã la kũumã, d segd n saka Kirist noyã la d tẽ a maoongã.

Bũmb a ye sẽn tar yõod d sẽn tõe n maan n wilg tɩ d tẽeda a Zezi maoongã yaa d sẽn na n tẽegd rẽ yell wa yẽ meng sẽn kõ noor tɩ d maanã, n wilgd d mi-beoogo. Nand t’a Zezi ki, a lugla bũmb sẽn tar võorã, la a yeel a tʋm-tʋmdbã woto: “Bɩ y maan bõn-kãnga n tẽegd mam yelle.” (Luk 22:19) A Zeova Kaset rãmbã nanda zood ning b sẽn tar ne Wẽnnaam bi-riblã hal wʋsgo. Sẽn paase, b sakd n tẽegda a Zezi kũumã yell wa a sẽn yeel tɩ b maanã. Rõanda, a Zezi Kirist kũumã tẽegr na n yɩɩ sibrã daar tʋʋlg kiuugã rasem 22, wĩntoogã kõom poore. D boond-y lame tɩ y wa, n wilg tɩ y saka noor ning a Zezi sẽn kõ wã. A Zeova Kaset rãmb nins sẽn be yãmb babgẽ wã tõe n sõng-y lame tɩ y bãng tẽegrã sẽn na n yɩ zĩig ninga, la lɛɛr ninga. Y sã n modg n wa, y na n bãnga bũmb ning y sẽn segd n maane, sẽn na yɩl n paam tɩ Kirist maoongã fãag-y ne yɛl nins a Ãdem kɩɩsgã sẽn wa ne wã.

Yaa neb bilf bal n wilgd b mi-beoog ne naandã la a bi-riblã, b sẽn maan bũmb ning n na n fãag nebã ne kũumã yĩnga. La neb nins sẽn tẽed Kirist maoongã tara sũ-noogo. Tʋm-tʋmd a Pɩɛɛr goma a tẽed-n-taasã yell n yeel woto: “Yãmb tẽeda [a Zezi] n maand sũ-noog noor sẽn ka tõe n togse la sẽn pid ne pẽgre. Tɩ bõe, yãmb na n paama y sɩɩs fãagr tɩ yɩ yãmb tẽebã keoore.” (1 Pɩɛɛr 1:8, 9) Y sã n nong a Zezi la y tẽed a maoongã sẽn yɩ rondã, y na n paama sũ-noog masã, la y wa paam tɩ Wẽnnaam fãag-y ne yel-wẽndã la kũumã.

[Foto, seb-neng a 6]

A Zezi kõo a vɩɩmã n na n menes a Ãdem yel-wẽndã sẽn wa ne yɛl ninsã

[Foto, seb-neng a 7]

A Zezi Kirist kũumã tẽegr na n yɩɩ yʋʋmd 2008, tʋʋlg kiuugã rasem 22 sibrã daare, wĩntoogã kõom poore