“Gʋlsa tõnd zãmsg yĩnga”

“SƐB gʋlsg yaa wʋsgo, la a ka tar tɛk ye.” (Koɛɛg Soaba 12:12) Rũndã-rũndã sɛbã sõor sẽn sɩd ka tɛkã kɩtame tɩ gom-kãngã yaa sɩd wa a sẽn da yɩ sɩd a gʋlsgã wakatã. La wãn to la ned sẽn ka rat n karem sɛb yaar tõe n bãng n tũus sɛb nins sẽn yaa sõma wã.

Neb wʋsg rengd n bao n banga yɛl kẽer sebrã gʋlsd zugu, baa sebrã sã n taa b yam. Sɛb-yiisdbã nong n baoa zĩig sebrã pʋgẽ n wilg a gʋlsdã sẽn yit tẽng ninga, a sẽn karem n ta zĩig ninga, la sɛb kẽer a sẽn zoe n gʋlse. Kaset sẽn wilgd tɩ nebã sã n bãng sẽn yaa ned ning n gʋls sebrã, tõe n kɩtame tɩ b karm-a wall b pa karm-a, yaa tɩ pĩnd wẽndẽ, pagb n gʋls sɛba, la b sẽn da pa rat tɩ nebã paoog b sɛbã sẽn yaa pagb n gʋls-bã yĩngã, b baoa rap yʋy n pʋd b mense, n yiis-b ne yʋ-kãense.

Bʋko, wa d sẽn zoe n wilg sõsg ning sẽn loogã pʋgẽ wã, neb kẽer pa rat n karem Biiblã babg ning b sẽn gʋls ne hebre wã, bala b yetame tɩ Wẽnnaam ning yell b sẽn gomd be wã yaa wẽnem soaba, sẽn sãam a bɛɛb n pa zoe b nimbãaneg ye. * Bɩ d ges Biiblã babs a yiibã b sẽn gʋls ne hebre la ne gɛrkã fãa sẽn yet bũmb ning Biiblã soaad zugu.

A sẽn yet bũmb ning a soaadã zugu

Biiblã babg ning b sẽn gʋls ne hebre wã pʋgẽ, Wẽnnaam da yeela Israɛll nin-buiidã woto: “Mam yaa Zusoaba, mam ka tek ye.” (Malaki 3:6) Sẽn na maan yʋʋm 500 poore, a Zak sẽn yaa Biiblã gʋlsdb nin-yendã goma Wẽnnaam yell n yeel tɩ “bãmb ya a yembr daar fãa n ka tedgd baa bilf ye.” (Zak 1:17) Dẽnd bõe yĩng tɩ neb kẽer tagsdẽ tɩ Wẽnnaam ning yell b sẽn gomd Biiblã babg ning b sẽn gʋls ne hebre wã pʋgẽ wã yaa toor ne Wẽnnaam ning yell b sẽn gomd a babg ning b sẽn gʋls ne gɛrkã pʋgẽ wã?

Bũmb ning sẽn kɩt tɩ yaa woto wã yaa tɩ Biiblã zĩis toor-toorã gomda Wẽnnaam zʋgd toɛy-toɛyã sẽn yaa sõma wã yelle. Wala makre, Sɩngr sebrã pʋgẽ, b wilgame t’a ‘sũur sãamdame,’ t’a yaa “yĩngr la dũniyã naanda,” la t’a yaa “dũniyã fãa bʋ-kaooda.” (Sɩngre 6:6; 14:22; 18:25) La yaa vẽeneg tɩ yaa Wẽnnaam yɛngã yell la b sẽn gomdã.

Sẽn na yɩl n wʋm dẽ võore, d rɩk makr ne bʋ-kaooda. B sã n sok neb sẽn zoe kẽng a taoor t’a kao b bʋʋdo, b na n yeelame t’a yaa ned neng sẽn kɛgme, sẽn tũud laloa wã tɩ sugr kaẽ ye. La b sã n sok a kambã yẽ, b na n leokame t’a yaa ba-sõngo, sẽn nong bãmb la a  get-b yell sõma. Sã n yaa ne a zo-rãmbã, tõe tɩ b yeel t’a yaa nin-sõng la ned sẽn nong laado. Bʋ-kaoodã, ba wã, la zoa wã fãa ket n yaa nin-yɛngã. La zĩig ne a to fãa a manesmã yaa toore.

Woto me, Biiblã babg ning b sẽn gʋls ne hebre wã wilgdame t’a Zeova ‘yaa Wẽnnaam sẽn yaa nimbãan-zoet la bark kõata. A sũur ka yikd tao-tao ye, a nonglem yaa wʋsgo. La a yaa sɩd soaba.’ La b wilgame me tɩ ‘baasgo, a ka na n bas nebã taal b yel-wẽnã yĩng ye.’ (Yikri 34:6, 7) Woto fãa zemsa ne Wẽnnaam yʋʋrã sẽn yaa a “Zeova” wã võore. Zeova wã rat n yeelame “t’a kɩtdame tɩ yɩ.” Woto wilgdame tɩ Wẽnnaam tõe n yɩ a sẽn dat fãa n pids a raabã. (Yikri 3:13-15) La a pa toeemd ye. A Zezi yeela woto: “Zusoaba tõnd Wẽnnaam yaa Zusoab a ye.”—Mark 12:29

B ledga Biiblã babg ning b sẽn gʋls ne hebre wã bɩ?

Rũndã-rũndã, b wae n yiisda seb-paal n ledgd kʋdã, ãdem-biisã bãngr sẽn tar paasg tɩ nebã tagsg me toeemdẽ wã yĩnga. La rẽ yĩnga Biiblã babg ning b sẽn gʋls ne gɛrkã ledga b sẽn gʋls a soab ne hebre wã bɩ? Ayo.

A Zezi sã n da ratẽ lame t’a koe-moonegã kibay la bũmb ning a karen-biisã sẽn gʋlsã ledg Biiblã babg ning b sẽn gʋls ne hebre wã, yaa vẽeneg t’a ra na n wilga rẽ. A Luk pʋd n wilga bũmb a Zezi sẽn maan nand t’a rʋ saasẽ, tɩ wilgdẽ tɩ kãab-kʋdgã ket n tara yõodo. A yeela woto: “Bãmb sɩnga ne a Moiiz la Wẽnnaam no-rɛɛsdbã fãa [b sẽn gomd b yell Biiblã babg ning b sẽn gʋls ne hebre wã pʋgẽ wã] n bilg [a karen-biis a yiib] Gʋlsg Sõamyã fãa võyã sẽn wilgd bãmb yelle.” Rẽ poore a Zezi vẽnega a meng a tʋm-tʋmdbã la neb a taaba, n yeel-b woto: “Koe-kãngã yaa koɛɛg ninga mam sẽn da togs yãmb mam sẽn da be ne yãmbã, tɩ yaa tɩlae tɩ bũmb nins fãa sẽn gʋls a Moiiz tõogã ne Wẽnnaam no-rɛɛsdbã la Yɩɩl Sõamyã sɛbã pʋsẽ sẽn wilgd mam yellã paam pidsgã.” (Luk 24:27, 44) Bõe yĩng t’a Zezi ra ket n gomd Biiblã babg ning b sẽn gʋls  ne hebre wã yell a vʋʋgrã poore, sã n da mikame tɩ b ra pa le tar yõodo?

Kiris-neb tigingã luglug poore, a Zezi karen-biisã kell n talla Biiblã babg ning b sẽn gʋls ne hebre wã n wilg goam kẽer b sẽn da pĩnd n togs tɩ na n paam pidsgu, la b wilg a Moiiz Tõogã noy sẽn nafd nebã. B gesa Biiblã bab-kãng pʋgẽ me n gom pĩnd wẽndẽ wẽn-tũudb sẽn kõ mak-sõng yelle, tɩ keng kiris-nebã raood tɩ b tõog n kell n sak Wẽnnaam. (Tʋʋma 2:16-21; 1 Korẽnt dãmba 9:9, 10; Hebre dãmba 11:1–12:1) Tʋm-tʋmd a Poll gʋlsa woto: ‘Gʋlsg Sõamyã zãng yaa Wẽnnaam n kõ tõndo: la a bee barka.’ * (2 Tɩmote 3:16) Wãn to la Biiblã babg ning b sẽn gʋls ne hebre wã be bark bɩ a tar yõod rũndã-rũndã?

A tara saglse

D gom bu-welsgã yelle. Etiopi rao a yembr sẽn tar yʋʋm 21, n vɩ Erop yaang tẽng a ye pʋgẽ yeela woto: “Maam ne m saam-biisã sã n na n yi, yaa tɩlae tɩ d yɩ wʋsgo. D sã n yaa wʋsgo, tõeeme tɩ nebã pa nams-d ye.” A paasa woto: “Zaabr wakat a 6 sã n looge, d pa le tõe n yi ye, sẽn yɩɩd fãa d pa tõe n kẽ tẽrã ye. Nebã sã n yã tõndo, yaa tõnd yĩn-gãongã sẽn yaa toorã bal la b bas n getẽ.” Rẽ yĩnga Biiblã babg ning b sẽn gʋls ne hebre wã gomda bu-welsgã yell bɩ?

Wẽnnaam da yeela pĩnd wẽndẽ Israɛll nebã woto: “Sãan sã n wa be ne yãmb y soolma pʋgẽ, bɩ y ra maan-a wẽng ye. Bɩ y maan sãan sẽn be yãmb sʋk wa tẽngã neda, la f nong yẽ wa f menga. Tɩ bõe, yãmb me rag n yaa sãamb Ezipt soolem pʋgẽ.” (Maankʋʋre 19:33, 34) Pĩnd wẽndẽ Israɛll nebã wakatẽ, tõodã ra wilgame tɩ b waoog ‘sãambã.’ No-kãng keta Biiblã babg ning b sẽn gʋls ne hebre wã pʋgẽ hal ne rũndã. Yãmb pa tẽed tɩ nebã sã n da tũudẽ no-kãngã, tõe n kɩtame tɩ bu-welsgã sɛ sɩda?

Yaa sɩd tɩ Biiblã babg ning b sẽn gʋls ne hebre wã pa tolg n kõt sagls vẽeneg-vẽeneg ligdã wɛɛngẽ ye, la a tara sagls sẽn tõe n sõng tõnd tɩ d gill ligd zu-loeese. Wala makre, Yelbũn 22:7 yeta woto: “Fo sã n peng bũmb ned nengẽ, fo lebga a yamba.” Neb wʋsg sẽn  kõt sagls ligdã wɛɛngẽ sak n deegame tɩ ned sã n nong sama, tõe n waa ne talemdo.

Sẽn paase, rũndã-rũndã, neb wʋsg nonga arzɛkã ne b sũur fãa. Rĩm a Salomo sẽn da yaa arzɛk soab pĩnd wẽndẽ wã goma rẽ yell n yeel woto: “Ned sã n nong ligdi, ligd ka sekd-a ye. La ned sã n nong arzegse, paoong paasg ka sekd-a ye. Yãoã me yaa zaalem.” (Koɛɛg Soaba 5:9) Ad woto sɩd yaa saglg sẽn nafd tõndo!

A wilgdame tɩ beoog daarã na n yɩɩ sõma

Biiblã tõrã fãa tara gom-zug a ye. Gom-zug-kãng la woto: Wẽnnaam na n wilga ne Rĩung ning a Zezi sẽn yaa a naabã maasem tɩ yaa yẽ bal n segd n yɩ ãndũni wã fãa naaba, la a kɩt t’a yʋʋrã paam waoogre.—Daniɛll 2:44; Wilgri 11:15.

Biiblã babg ning b sẽn gʋls ne hebre wã wilgd-d-la vɩɩmã sẽn na n yɩ to-to, Wẽnnaam Rĩungã sã n wa so dũniyã. Woto noogda d sũy la kɩtdẽ tɩ d paamd zems-n-taar ne Wẽnnaam a Zeova sẽn kõt-d belsgã. Wala makre, no-rɛɛs a Ezai pĩnd n togsame tɩ wakat kãnga, zems-n-taar na n zĩnda nebã ne rũmsã sʋka. A yeela woto: “Digd-n-yĩidg ne pe-bil na n tũu taaba. La ãbg na n maga ne bulli n gãande. La nag-bi ne gɩgem-poal na n maga taaba n wãb yamdo tɩ bi-bilf kɩɩm bãmba.” (Ezai 11:6-8) Woto sɩd yaa bõn-neer d sẽn gũudi!

La yaa wãn to ne neb nins bu-welsgã, bã-kɛgems wall talemdã sẽn namsdã? Biiblã babg ning b sẽn gʋls ne hebre wã pĩnd n wilga Kiristã sẽn na n maan bũmb ning a naamã sasa. B yeela woto: “Yẽ na n fãaga nimbãan-ned sẽn kelemda la naong soab sẽn ka tar sõangda. Far soab ne nimbãan-ned nimbãaneg tara yẽnda, la yẽ na n fãaga nimbãan dãmbã vɩɩm.” (Yɩɩl Sõamyã 72:12, 13) Kãab-kãensã sõngda tõndo, bala b kɩtdame tɩ neb nins sẽn kɩs sɩd tɩ b na n pidsame wã tar saagr la bas-yard ne beoog daarã.—Hebre dãmba 11:6.

Tʋm-tʋmd a Poll bee bʋʋm, a sẽn gʋls tɩ ‘bũmb fãa sẽn gʋls pĩndã gʋlsa tõnd zãmsg yĩnga, tɩ tõnd tõe n gũ tõnd tẽeb pidsg ne sũ-mare la ne Gʋlsg Sõamyã belsgã.’ (Rom dãmba 15:4) Vẽenega, Biiblã babg ning b sẽn gʋls ne hebre wã ket n tara yõod wʋsg rũndã-rũndã. Yaa Wẽnnaam n vẽneg neb tɩ b gʋls-a. Dẽnd a sɩd ket n tara yõod ne tõnd rũndã-rũndã. D nongẽ lame tɩ y modg n bao n bãng Biiblã tõrã fãa sẽn sɩd yet bũmb ninga. Rẽ na n kɩtame tɩ y paam zems-n-taar ne Wẽnnaam a Zeova sẽn yaa Biiblã soaadã.—Yɩɩl Sõamyã 119:111, 112.

[Tẽngr not rãmba]

[Zĩ-gũbri, seb-​neng a 6]

B SEGD N BOOLA BIIBLÃ BAB-KÃNGÃ TƖ BÕE?

Yaa 2 Korẽnt dãmb 3:14 pʋgẽ la d yãt gom-biig ning sẽn yaa “kãab-kʋdgã.” Zĩ-kãnga, gɛrk gomd ning b sẽn lebg tɩ ‘kãabgã’ yaa diatêkês. Bɩ d bao n bãng b sẽn yeel tɩ “kãab-kʋdgã” sẽn dat n yɛɛlga?

Diksioneer gʋlsd a Edward Robinson yeela woto: “Pĩnd wẽndẽ kaoolã sẽn be sɛb nins a Moiiz sẽn gʋlsã pʋsẽ wã yĩnga, [diatêkês] wã rat n yeelame tɩ kaoolã bɩ kãabgã sebre, sɛb nins a Moiiz sẽn gʋlsã. Yaa seb-kãens la b sẽn boond tɩ Tõodã.” Dẽnd 2 Korẽnt dãmb 3:14 pʋgẽ wã, tʋm-tʋmd a Poll ra gomda a Moiiz Tõodã sẽn be Biiblã sɛb nins b sẽn gʋls nand tɩ Kiristã wa wã sʋkã yelle.

Woto yĩnga, d segd n boola Biiblã babg ning sẽn tar sɛb-bõones 39 wã tɩ bõe tɩ zemse? A Zezi ne a karen-biisã pa yeel tɩ bab-kãng pa le tar yõod bɩ t’a yaa kʋdr ye. B bool-a lame tɩ “Gʋlsg Sõamyã.” (Matɩe 21:42; Rom dãmba 1:2) Woto yĩnga, a Zeova Kaset rãmbã boonda kãab-kʋdgã tɩ Biiblã babg b sẽn gʋls ne hebre, bala yɩɩ ne hebre buudã goam la b gʋls-a. La b boonda babg ning nebã sẽn boond tɩ Kãab-paalgã tɩ Biiblã babg b sẽn gʋls ne gɛrke, bala Wẽnnaam vẽnega rap tɩ b gʋls-a ne gɛrk buudã goama.

[Foto rãmba, seb-​neng a 4]

Nin-yɛng tõe n yaa bʋ-kaooda, ba sẽn nong a kamba, la neb zo-nongre

[Foto, seb-​neng a 5]

A Zezi tika Biiblã babg ning b sẽn gʋls ne hebre wã n moon koɛɛgã

[Foto rãmba, seb-​neng a 7]

Biiblã no-bʋs n tõe n sõng ned a yam-yãkr pʋgẽ tɩ zemse?