D tõog toog n gũ a Zeova raarã
D tõog toog n gũ a Zeova raarã
“Maan-y y pãng sẽn tõe fãa tɩ y tẽebã naag ne . . . sũ-tõogo.”—2 PƖƐƐR 1:5, 6, Kãab-paalgã Koe-noogo.
1, 2. Bõe yĩng tɩ kiris-nebã segd n tõog toogo?
A ZEOVA ra kãsengã kolga wʋsgo. (Zoɛll 1:15; Sofoni 1:14) Tõnd sẽn yaa kiris-neb sẽn tʋll n kell n sak Wẽnnaamã, yaa ne d sũur fãa la d gũud sasa ning a Zeova sẽn na n wilg t’a naamã sẽn ka a to wã zemsame wã. La nanda, d paamda namsgo, kisgri, taale, la d tõe n ki d tẽebã yĩng menga. (Matɩe 5:10-12; 10:22; Wilgri 2:10) D segd n tõoga toogo, d sã n wa be yel-kãensã fãa pʋgẽ. Tʋm-tʋmd a Pɩɛɛr sagl-d-la woto: “Maan-y y pãng sẽn tõe fãa tɩ y tẽebã naag ne . . . sũ-tõogo.” (2 Pɩɛɛr 1:5, 6, Kãab paalgã Koe-noogo) D segd n tõoga toogo, bala a Zezi yeelame tɩ “ned ningã sẽn na n tall a tẽeb hal tɩ wakat ta, a na n paama fãagre.”—Matɩe 24:13.
2 Bãase, d ned kaalem la tood a taab me namsda tõndo. La d sã n bas d tẽebã tɩ sãame, a Sʋɩtãan sũur n na n yɩ noogo! (Luk 22:31, 32) Ne a Zeova sõngre, d tõe n tõoga toog zu-loees buud fãa sasa. (1 Pɩɛɛr 5:6-11) D ges yɛl kẽer neb a taab sẽn yã b vɩɩmã pʋgẽ tɩ wilgd vẽeneg tɩ d tõe n tõoga toog n gũ a Zeova raarã tɩ d tẽebã me ket n tar pãnga.
Bãasã pa kɩt tɩ b bas Wẽnnaam tũub ye
3, 4. Rɩk-y makr sẽn wilgd tɩ baa ne bãasã, d tõe n kell n maana a Zeova raabã.
3 Wẽnnaam pa maand yel-soalem n sõogd tõnd bãasã rũndã-rũndã ye, la a kõta tõnd pãng tɩ d tõe n tõog toog baa ne bãasã sẽn namsd tõndã. (Yɩɩl Sõamyã 41:2-4) Pag a ye yʋʋr sẽn boond t’a Sharon yeela woto: “Mam bee m põor weefã pʋgẽ wakat fãa. Mam roga ne bãag sẽn kɩt tɩ m pa tõe n kẽn la m gom sõma ye. Rẽ kɩtame tɩ mam pa tol n bãng m yãadmã noom ye.” A Sharon sẽn wa n bãng a Zeova la a kãabsã sẽn wilgd tɩ ãdem-biisã na n wa paama laafɩ wakat fãa wã kɩtame t’a paam saagre. Baa ne a sẽn pa tõe n kẽn la a gom sõma wã, a paamda sũ-noog koe-noogã mooneg pʋgẽ. Yʋʋmd 1993 sasa, a yeela woto: “Baa mam laafɩ wã sã n boogdẽ, mam sẽn teeg Wẽnnaam la m tar zood ne-a wã sõngd-m-la wʋsg tɩ m ket n vɩ. Mam sẽn paam n be a Zeova nin-buiidã sʋkã, la m sẽn paam t’a sõngd-m wakat fãa wã kɩtame tɩ m sũur yaa noog wʋsgo!”
4 Tʋm-tʋmd a Poll sagla kiris-neb nins sẽn da be Tesalonikã tɩ b ‘bels sũ-sãams rãmbã.’ (1 Tesalonik rãmba 5:14) Sũ-sãang wʋsg woto buud tõe n kɩtame tɩ ned yam wa ka le be a meng ye. Yʋʋmd 1993 sasa, a Sharon gʋlsa woto: “Mam sẽn da tagsd tɩ m ka võorã yĩnga, maana yʋʋm a tãab tõr tɩ mam yamã ka tol n be m meng ye. . . . Tigingã pʋgẽ kãsem dãmbã belsa maan la b kõ maam sagls sẽn yaa sõma. . . . A Zeova tũnugda ne Gũusg Gasgã n sõngd tõnd tɩ d bãngd d sẽn na n maan to-to n tõog n mao ne yam-ka-m-mengã. A sɩd geta a nin-buiidã yell sõma la a wʋmd b namsgã võore.” (1 Pɩɛɛr 5:6, 7) A Sharon ket n maanda Wẽnnaam raabã n gũud a ra-kãsengã.
5. Bõe n wilgd tɩ kiris-nebã tõe n tõoga toog yɩɩr sasa?
5 Kiris-neb kẽer me tara yɩɩre, yɛl nins b sẽn paam b vɩɩmã pʋgẽ wã yĩnga. Rao a ye yʋʋr sẽn boond t’a Harley naagame n zab dũni gill zabr a yiib-n-soabã sasa. A sã n gãe yʋngo, a zãmsdame t’a bee zabrã pʋgẽ n zabdẽ, n kelemd n yet woto: “Gũus-y-yã! Gũus-y-yã!” La a sã n wa neke, a mikdame t’a tʋʋlgã kaoogame t’a yĩngã fãa madge. La a sẽn bãng Wẽnnaam n tũud a noyã tɛka, a pa le zãmsd zãms-kãens buud wʋsg ye.
6. Wãn to la kiris-ned a ye mao ne bãag sẽn sãamd a sũur wʋsgo?
6 Kiris-ned a ye n bẽed bãag ning sẽn kɩtd tɩ f sũur tõe n yaa noog mas-masã n tiig n sãam zĩig pʋgẽ wã. Yaa toog ne a t’a tõog n moon koɛɛgã zak-zaka. La a kell n modga ne koɛɛgã moonego, bala a miime tɩ koɛɛgã mooneg n na n kɩt tɩ yẽ la neb nins sẽn na n sak n kelgã paam vɩɩm. (1 Tɩmote 4:16) A yeelame tɩ koe-noogã mooneg wakate, a mi n tõe n tɩ yalsa zak a ye noor n pa tõog n wẽ kʋɩlengã meng ye. La a paasa woto: “Rẽ poor bilfu, mam yõkda m menga, n kẽng zak ning sẽn pʋgdã n le tɩ mak n gese. Mam sẽn ket n moond koɛɛgã kɩtame tɩ m tẽebã ket n yaa sõma.” Tigissã kẽnd me ra yaa toog ne sãam-bi-kãngã, la a sẽn mi tɩ rẽ tara yõod wʋsgã yĩnga, a maanda a sẽn tõe fãa n pa vaand tigissã ye.—Hebre dãmba 10:24, 25.
7. Baa ne neb kẽer sẽn yɛɛsd wʋsg n pa rat n gom zãma taoor bɩ n kẽnd tigissã, wãn to la b wilgd tɩ b tõogda toogo?
7 Kiris-neb kẽer yɛɛsda wʋsg b sã n wa segd n maan bũmbu. Wala makre, b tõe n yɛɛsda zãma taoor goama, pa rẽ bɩ tigissã kẽnde. Tags-y n ges-y sẽn yaa toog to-to ne nin-kãensã tɩ b tõog n kõ leoor tigissã sasa, bɩ n wɛgs sõss Wẽnnaam Tʋʋmdã lekoll sasa! La baa ne rẽ fãa, b ket n modgdame n kẽnd tigissã n kõt leoor la b wɛgsd sõssa, tɩ d pẽgd-b wʋsg rẽ yĩnga.
8. Bõe la ned sũur sẽn sãamd tao-tao la sẽn yɛɛsd wʋsg segd n maan tɩ sõng-a n yɩɩda?
8 Ned sũur sã n sãamd tao-tao, bɩ a yɛɛsd wʋsgo, a segd n vʋʋsdame la a gũsdẽ tɩ sekdẽ. Yɩta sõma me t’a tɩ yã logtore. La sẽn tõe n sõng-a n yɩɩd yaa a sẽn na n teeg Wẽnnaam la a pʋʋsd n kot a sõngre. Yɩɩl Sõamyã 55:23 yeta woto: “Bas f yell ne [a Zeova] la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.” Sẽn yaa yell ning fãa pʋgẽ bɩ d ‘teeg a Zeova ne d sũur fãa.’—Yelbũna 3:5, 6.
D sẽn na n maan to-to n tõog toogo, d ned sã n maan kaalem
9-11. a) Ned d sẽn nong sã n maan kaalem, bõe n tõe n sõng tõnd tɩ d tõog toogo? b) Wãn to la a Ann kibarã tõe n sõng tõnd tɩ d tõog toogo, d ned sã n maan kaalem?
9 Tõnd zakã ned a ye sã n maan kaalem, tõe n kɩtame tɩ d sũy sãam wʋsgo. A Abrahaam yãba a pʋg-nongr a Saara kũumã yĩnga. (Sɩngre 23:2) Baa ne a Zezi sẽn zems zãngã, a ‘yãba’ a zoa a Lazaar kũumã yĩnga. (Zã 11:35) Dẽnd yaa vẽeneg tɩ ned d sẽn nong sã n ki, d sũur pa tõe n pa sãam ye. La kiris-nebã miime tɩ wakat n wat tɩ sẽn ki-bã na n vʋʋge. (Tʋʋma 24:15) Dẽnd b sũy pa sãamd wa neb nins sẽn pa tar saagrã sũy sẽn sãamd to-to wã ye.—1 Tesalonik rãmba 4:13.
10 Bõe n tõe n sõng tõnd tɩ d tõog toog d ned sã n maan kaalem? Wala makre tõnd zoa sã n tog sor n bas tõndo, d sũur mi n pa sãamd wʋsg ye, bala d miime t’a na n le waame. D sã n tall tags kãngã buud kiris-ned hakɩk sã n wa maan kaalem, d sũur pa na n sãam wʋsg ye, bala d miime tɩ Wẽnnaam na n wa vʋʋg-a lame.—Koɛɛg Soaba 7:1.
11 D sã n teeg “belsg fãa Wẽnnaamã” ne d sũur fãa, na n sõnga tõnd tɩ d tõog toogo. (2 Korẽnt dãmba 1:3, 4) Sẽn paase, d sã n bʋgsd bũmb ning pʋg-kõor a Ann sẽn maanã zugu, na n sõng-d lame. A kãadmã kõom yʋʋm a yopoe poor bal la a lebg pʋg-kõore. La a sẽn wa n tar yʋʋm 84, a ra ket n wata wẽnd-doogẽ wã n balemd a Zeova. (Luk 2:36-38) Yaa vẽeneg t’a sẽn maan woto wã sõng-a lame t’a tõog sũ-sãamsã, la a tõog toog a sẽn yaa a yembrã yĩngã. D sã n kẽesd d meng Wẽnnaam tʋʋmdã pʋgẽ wakat fãa, wala makre koe-noogã mooneg pʋgẽ, tõe n sõng-d lame tɩ d tõog toog d ned sã n wa maan kaalem.
D sẽn na n maan to-to n tõog zu-loees toɛy-toɛya
12. Zu-loe-bʋs buud la kiris-neb kẽer tar b zagsã pʋsẽ?
12 Kiris-neb kẽer tara zu-loees b zagsã pʋsẽ. Wala makre, pag bɩ a sɩd sã n yo, tõe n waa ne zu-loe-kãseng zakã pʋga. Toogã la sũ-sãamsã tõe n kɩtame tɩ sẽn pa yo-a wã makd gõeem n kongdẽ wall a yãbd n pa satẽ ye. Baa tʋʋm bõones maaneg tõe n lebga toog ne-a, pa rẽ bɩ a pogend a meng tʋʋm-kãens maanegẽ menga. Tõe n kɩtame me t’a pa le tõe n dɩ, t’a faage, la a pa le tall sũ-noog a vɩɩmã pʋgẽ ye. Tõe n wa lebga toog meng ne-a t’a kẽes a toog Wẽnnaam tʋʋmdã pʋgẽ. Kambã me tõe n namsa hal wʋsgo.
13, 14. a) Wãn to la a Salomo sẽn pʋʋs n yeel bũmb ning wẽnd-doogã pakr sasa wã kengd-d raoodo? b) Bõe yĩng tɩ d pʋʋsd n kot vʋʋsem sõngo?
13 D sã n wa be zu-loe-kãensã pʋsẽ, a Zeova sõngda tõndo. (Yɩɩl Sõamyã 94:19) A Salomo sẽn pʋʋs Wẽnnaam n yeel bũmb ning wẽnd-doogã pakr sasa wã kɩtdame tɩ d miẽ tɩ Wẽnnaam kelgda a nin-buiidã pʋʋsgo. A pʋʋsa Wẽnnaam woto: “Yãmb Israɛll nebã fãa bɩ b ned a ye sũur sã n sãam a kongr yĩng t’a tẽeg a nus n tees zĩ-kãnga n pʋʋs yãmb ne kosgo, bɩ y zĩnd y yir yĩngri n deeg a pʋʋsgã n kõ a sugri. La y maan ned kam fãa wa sẽn zems a tʋʋma. Tɩ bõe, yaa yãmb bal n mi ninsaal fãa sũur pʋgẽ yelle. La woto, bãmb na n zoee yãmb wakat fãa bãmb sẽn be tẽng ningã yãmb sẽn kõ tõnd yaab rãmbã pʋgẽ.”—1 Rĩm dãmba 8:38-40.
14 Sẽn tɩ yɩɩda, d sã n pʋʋsd n kot vʋʋsem sõngã na n sõng-d-la wʋsgo. (Matɩe 7:7-11) Biis nins vʋʋsem sõngã sẽn womdã sʋka, d tõe n sõdga sũ-noog la laafɩ. (Galat dãmba 5:22, 23) Tõnd saasẽ Ba wã sã n leok tõnd pʋʋsgã n kɩt tɩ d sũ-sãamsã sa tɩ d sũurã lebg noogo, a sɩd yols-d lame!
15. Biiblã verse bʋs n tõe n sõng tõnd tɩ d ra maan yɩɩr wʋsgo?
15 Tõnd sã n wa tar zu-loe-kãsenga, d pa tõe n pa maan yɩɩr ye. La d sã n tẽeg gomd ning a Zezi sẽn togsã, tõe n sõnga tõnd tɩ d ra maan yɩɩr wʋsg ye. A yeela woto: “Bɩ y ra maan yɩɩr ne y vɩɩma yelle, yãmb sẽn na n dɩ bũmb ninga la yãmb sẽn na n yũ bũmb ninga, la yãmb yĩnga yelle yãmb sẽn na n yeelg bũmb ninga ye. . . . Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.” (Matɩe 6:25, 33, 34) Tʋm-tʋmd a Pɩɛɛr sagenda tõnd tɩ d bas d yɩɩrã fãa ne Wẽnnaam, bala a geta tõnd yelle. (1 Pɩɛɛr 5:6, 7) D sã n tar zu-loɛɛga, zemsame tɩ d maan d sẽn tõe fãa sẽn na yɩl n welg-a. La d sã n maan tõnd sẽn tõeyã fãa n sa, pa le tar yõod tɩ d maan yɩɩre, bala pa rẽ n tõe n kɩt tɩ yellã maneg ye. La d sã n pʋʋs Wẽnnaam n togs-a yellã, tõe n sõng-d lame. Yɩɩl-gʋlsda yeela woto: ‘Bas-f yell ne a Zeova la f teeg-a, la a na manege.’—Yɩɩl Sõamyã 37:5.
16, 17. a) Bõe yĩng tɩ d pa tõe n pa maand yɩɩre? b) Nafa bʋs la d na n paame, d sã n tũud gomd ning sẽn be Filip rãmb 4:6, 7 pʋgẽ wã?
16 A Poll gʋlsa woto: “Da maan-y yɩɩr ne bũmb ba a yembr ye, la ne pʋʋsgo la ne bark pʋʋsgo bɩ y wilg Wẽnnaam yãmb sẽn dat bũmb ninsi. La Wẽnnaam laafɩ sẽn yɩɩd nebã bãngr fãa na gũ yãmb sũyã la yãmb tagsgo Kirist Zezi maasem yĩnga.” (Filip rãmba 4:6, 7) Tõnd sẽn yaa a Ãdem yagens sẽn pa zems zãngã yĩnga, yaa vẽeneg tɩ d pa tõe n vɩ bal n pa maand yɩɩr ye. (Rom dãmba 5:12) Pagb nins a Ezayu sẽn tɩ rɩk Hɛt buudã pʋgẽ wã kɩtame t’a Izaak ne a Rebeka sẽn yaa a Ezayu roagdb sẽn da yaa wẽn-zoɛtbã ‘paam sũ-toogo.’ (Sɩngre 26:34, 35) A Tɩmote la a Torfim ra segd n maanda yɩɩre, b sẽn da ka laafɩ wã yĩnga. (1 Tɩmote 5:23; 2 Tɩmote 4:20) A Poll me ra maand yɩɩr a tẽed-n-taasã yĩnga. (2 Korẽnt dãmba 11:28) La a soab ning sẽn ‘wʋmd-a pʋʋsgã’ bee sẽn nong-b yẽ wã yĩng wakat fãa.—Yɩɩl Sõamyã 65:3.
17 D sẽn ket n gũud “Wẽnnaam sẽn so laafɩ” wã daarã, a teenda tõnd la a belsd tõndo. (Filip rãmba 4:9) A Zeova yaa “nimbãan-zoeta la bark kõta,” a ‘yaa sõngo la a kõta sugri.’ A “tẽegdame tɩ tõnd yaa tẽng tom.” (Yikri 34:6; Yɩɩl Sõamyã 86:5; 103:13, 14) Woto yĩnga, bɩ d ‘wilg Wẽnnaam tõnd sẽn dat bũmb ninsã,’ bala rẽ na n kɩtame tɩ d paam “Wẽnnaam laafɩ” wã, sẽn dat n yeel tɩ bãan ning Wẽnnaam a ye bal sẽn tõe n kõ wã.
18. Wala b sẽn togs Zoob 42:5 pʋgẽ wã, wãn to la d tõe n ‘yã’ Wẽnnaam?
18 Wẽnnaam sã n kelgd d pʋʋsgã, d bãngdame t’a bee ne tõndo. A Zoob sẽn tõog toog a namsgã pʋgẽ wã poore, a yeela woto: “Mam da wʋma yãmb [a Zeova] kibare. La masã, mam nin yãa yãmba.” (Zoob 42:5) D sã n wʋmd yɛlã võore, n tar tẽeb la d tar mi-beoog ne Wẽnnaam, na n sõng-d lame tɩ d bʋgsd a sẽn maand bũmb nins tõnd yĩngã zugu, tɩ lebg walla d ne-a lame n yɩɩd pĩndã. Zems-n-taar a woto buud ne Wẽnnaam sɩd kɩtdame tɩ d yam gãe bãane, la kõt-d sũ-noogo!
19. D sã n ‘bas d yɩɩrã fãa ne a Zeova’ nafa bʋs la d paamda?
19 D sã n ‘bas d yɩɩrã fãa ne a Zeova,’ d yamã na n gãanda bãan tɩ rẽ sõng-d tɩ d tõog toog namsg sasa. D pa na n yɛɛs bɩ n maan yɩɩr ye.
20, 21. a) A Etɩɛn kibarã wilgdame tɩ b sã n namsd tõnd d tẽebã yĩnga, bãan bʋg buud la d tõe n paame? b) Togs-y kibar sẽn wilgd tɩ ned yam tõe n gãee bãan rũndã-rũndã, b sã n wa namsd-a a tẽebã yĩnga?
20 Karen-biig a Etɩɛn tõoga toogo, sasa ning b sẽn da namsd-a a tẽebã yĩngã. Nand t’a Etɩɛn togs a yaoolem kaseto, neb nins fãa sẽn da be Sãnedrẽ wã ‘yãame t’a nengã wõnda wa malɛk nenga.’ (Tʋʋma 6:15) A nengã ra bee laad wa malɛk sẽn yaa Wẽnnaam tʋm-tʋmd nenga. A Etɩɛn ninga bʋ-kaoodbã taal a Zezi kũumã yĩnga. A sẽn yeel gomd ningã “kẽe bãmb sũyã tɩ bãmb wãb b yẽn ne a Etɩɛne. La a Etɩɛn sẽn pid ne Sɩɩg Sõngo yẽ gesa yĩngr kuii. La yẽ yãa Wẽnnaam ziiri la a Zezi sẽn yɛs Wẽnnaam dɩtgo.” A Etɩɛn sẽn yã bũmb ningã kenga a raood t’a kell n sak Wẽnnaam hal n tãag a kũum. (Tʋʋma 7:52-60) Yaa sɩd tɩ d pa paamd vẽnegr wa a Etɩɛn ye, la Wẽnnaam tõe n sõnga tõnd tɩ d tõog toogo, b sã n wa namsd tõnd d tẽebã yĩnga.
21 Nazi rãmbã kʋʋ kiris-neb wʋsg dũni gill zabr a yiib n soabã sasa. Ges-y kẽer sẽn togs bũmb ning nand tɩ b kʋ-bã. A yembr n yeel woto: “B kaoa bʋʋdã n yeel tɩ mam segda ne kũum. Mam sẽn wʋm dẽ wã, m yeela m meng yaa: ‘Fo we n kell n yɩ wẽn-sakd n tãag f kũum.’ Mam leb n goma goam a wãn tõnd Zusoabã sẽn da gome, la rẽ bal seka maam. . . . La da sãam-y y sũur ye, bala mam yamã sẽn gãe bãan to-to wã pa tõe n bãng n bilg ye!” Kiris-ned a ye sẽn yaa bi-bɩɩg b sẽn da segd n fiuug a zug gʋlsa a roagdbã woto: “Yʋng wakat piig la a yiibã zoe n loogame. Mam ket n tõe n toeema m tagsgã. La rẽ yĩnga mam sã n kɩɩs Soaala m na n le paama sũ-noog dũni-kãngã pʋgẽ sɩda? Yaa vẽeneg tɩ ayo! La masã mam datame tɩ yãmb bãng tɩ yaa ne bãan la sũ-noog la mam na n loog n bas dũni-kãngã.” Yaa vẽeneg t’a Zeova sõngda a sõgen dãmb nins sẽn kɩs sɩd ne-a wã.
Y tõe n tõoga toogo!
22, 23. D sã n tõog toog n gũ a Zeova daarã, bõe la d tõe n kɩs sɩd t’a na n maaname?
22 Tõe tɩ pa zu-loees nins d sẽn sõdg sõs-kãngã pʋgẽ wã fãa la y na n seg ye. La baa ne rẽ, wẽn-zoet a Zoob ra bee bʋʋm a sẽn yeel gom-kãensã wã: “Ninsaal pag sẽn dog vɩɩm yaa koɛɛg la toogo.” (Zoob 14:1) Tõe tɩ y yaa roagd sẽn modgd n na n kɩt tɩ y kambã tũ Wẽnnaam Gomdã sẽn yet bũmb ningã. Baa b sã n namsd y kambã lekollẽ wã, b sã n tõog n kell n yals kãn-kãe n wilg tɩ yaa a Zeova noyã bal la b tũuda, y sũur na n yɩɩ noogo! Tõe tɩ nebã namsda yãmb la b kʋɩɩbd yãmb y tʋʋmã zĩigẽ. Y tõe n tõoga toog zu-loe-kãensã la a taab pʋsẽ, bala a Zeova tʋkda d zɩɩbã wakat fãa.—Yɩɩl Sõamyã 68:20.
23 Tõe tɩ y tagsdame tɩ y yaa nin-zaalga, la da yĩm-y t’a Zeova kõn tol n yĩm y tʋʋmdã ne y nonglmã y sẽn wilg a yʋ-sõngã yĩngã ye. (Hebre dãmba 6:10) Ne a Zeova sõngre, y tõe n tõoga toog b sã n wa namsd yãmb y tẽebã yĩnga. Woto yĩnga, y pʋʋsgã pʋgẽ bɩ y togsd Wẽnnaam tɩ y rat n maana a raabã. Kɩt-y tɩ y sẽn magd n na n maan bũmb ninsã fãa me wilg tɩ y sɩd tʋlla woto. Dẽ, y tõe n basa yard t’a Zeova na n teel-y lame la a ning-y bark tɩ y kell n tõog toog n gũ a daarã.
Y na n leokame tɩ bõe?
• Bõe yĩng tɩ kiris-nebã segd n tõog toogo?
• Bãag sã n yõk-d wall d ned sã n maan kaalem, bõe n tõe n sõng tõnd tɩ d tõog toogo?
• Wãn to la pʋʋsgã sõngd tõnd tɩ d tõog toogo?
• Bõe n kɩt tɩ d tõe n tõog toog n gũ a Zeova daarã?
[Zãmsgã sogsgã]
[Foto, seb-neng 17]
Tõnd ned sã n wa maan kaalem, d sã n teeg a Zeova d na n tõoga toogo