Tagsd-y-yã a Zeova siglgã bõn-sõmã zug n yɩɩda
Tagsd-y-yã a Zeova siglgã bõn-sõmã zug n yɩɩda
“Yãmb dooga noom sekda tõndo.”—YƖƖL SÕAMYÃ 65:5.
1, 2. a) Tʋʋm nins sẽn da maand wẽn-doogã pʋgẽ wã kõo Wẽnnaam nin-buiidã bõe? b) Bõe la a Davɩɩd maan n sõng tɩ b me wẽn-doogã?
A DAVƖƖD yɩɩ pĩnd wẽndẽ Israɛll neb nins yell b sẽn gom n yɩɩd Hebre Gʋlsg Sõamyã pʋgẽ wã nin-yende. Nin-kãngã sẽn yɩ pe-kɩɩma, yɩɩl-gʋlsda, no-rɛɛs la rĩmã ra teega Wẽnnaam a Zeova ne a sũur fãa. Zood ning a Davɩɩd sẽn da tar ne Wẽnnaam a Zeova wã yĩng kɩtame t’a ra tʋll n me roog n kõ-a. Roog bɩ wẽn-do-kãng n da na n yɩ baleng hakɩkã zĩ-kãseng Israɛlle. A Davɩɩd da miime tɩ wẽn-doogã la tʋʋmd ning b sẽn da na n maan a pʋgẽ wã ra na n kõo Wẽnnaam nin-buiidã sũ-noog la barka. Rẽ n so t’a yɩɩl woto: “Ned ninga yãmb [a Zeova] sẽn yãk n kɩt t’a kolg yãmb nengẽ wã na n paama sũ-noogo. Yẽ paada yãmb zak pʋgẽ. Yãmb dooga noom sekda tõndo, yãmb do-sõng kãsengã.”—Yɩɩl Sõamyã 65:5.
2 La a Zeova pa kõ a Davɩɩd sor t’a me a roogã ye. Yaa a biribl a Salomo n paam zu-no-kãngã. Baa ne a Davɩɩd sẽn da rat zu-no-kãngã ne a sũur fãa wã, b sẽn dɩk-a n kõ ned a to wã pa kɩt t’a yẽgem ye. Sẽn da tar yõod n yɩɩd ne-a yaa wẽn-doogã yee n me bala. A teela tʋʋmdã ne a sũur fãa n kõ a Salomo wẽn-doogã mamsg bɩ a pãlã rãmb a Zeova sẽn da kõ-a wã. Sẽn paase, a Davɩɩd tigma Levi rãmbã neb tusa n pʋɩ-b tʋʋmdã yĩnga, la a kõ sãnem la wanzuri wʋsg wẽn-doogã meeb yĩnga.—1 Kibaya 17:1, 4, 11, 12; 23:3-6; 28:11, 12; 29:1-5.
3. Manesem bʋg la Wẽnnaam sõgen dãmbã tar ne segls nins b sẽn dɩk baleng hakɩkã wɛɛngẽ wã?
3 Israɛll neb nins sẽn da yaa wẽn-sakdbã saka segls nins b sẽn da rɩk baleng hakɩkã sẽn da maand Wẽnnaam doogẽ wã yĩngã. D sẽn yaa a Zeova rũndã-rũndã sõgen dãmbã, tõnd me sakda segls nins a Zeova tẽng zug siglgã sẽn dɩk a balengã wɛɛngẽ wã. Yaa woto la d wilgd tɩ d tara yam sõng wa a Davɩɩde, n pa yẽgemdẽ ye. Sɩda, d tagsda a Zeova siglgã bõn-sõma zug n yɩɩda. Rẽ yĩnga yãmb zoe n tagsa bõn-sõma nins fãa yĩng d sẽn tõe n tall mi-beoogã zug bɩ? Bɩ d ges bãmb kẽere.
D tall mi-beoog ne taoor-lʋɩtbã
4, 5. a) Wãn to la ‘tʋm-tʋmd sẽn tũud sɩd la sẽn tar yamã’ tʋmd a tʋʋmdã? b) Tags-bʋg la a Zeova Kaset rãmb sãnda tall tẽebã rɩɩb b sẽn paamdã wɛɛngẽ?
4 D sɩd tara bʋʋm wʋsg n na n tall mi-beoog ne “tʋm-tʋmd sẽn tũud sɩd la sẽn tar yamã” a Zezi Kirist sẽn yãk t’a ges a tẽng zug paoongã yellã. Kiris-neb nins sẽn paam vʋʋsem sõng zaeeb n yaa tʋm-tʋmdã sullã lʋɩta koe-moonegã taoore. B segenda tigissã balengã yĩnga, la b yiisd sɛb sẽn tik Biiblã zugu, sẽn yɩɩd buud-goam 400 pʋsẽ. Dũniyã gill zugu, neb milyõ rãmb n dɩt tẽebã rɩ-kãngã wakat sẽn zems sasa ne sũ-noogo. (Matɩe 24:45-47) D pa tar bʋʋm baa bilf n na n yẽgem tẽeb rɩ-kãng poorẽ ye.
5 Sẽn na maan yʋʋma, pag a yembr yʋʋm sẽn vẽsg t’a yʋʋr boondẽ t’a Elfi sẽn yaa a Zeova Kaset soab paama belsg la sõngre, a sẽn tũ Gʋlsg Sõamyã sagls sẽn be tʋm-tʋmdã sɛb pʋsẽ wã yĩnga. Mi-beoog wʋsg yĩng kɩtame t’a Elfi gʋls woto: “A Zeova siglgã sã n da pa beẽ, mam kẽeda yɛ?” A Peter ne a pag a Irmgard me yaa Wẽnnaam sõgen dãmb hal sẽn na maan yʋʋm wʋsgo. A Irmgard wilga a mi-beoogo, sɛb nins fãa “a Zeova siglgã sẽn get a nebã yell ne nonglmã” sẽn yiisdã yĩnga. Sɛb nins b sẽn yiis bãad dãmbã sõngr yĩngã, wala makre, neb nins nin sẽn pa ne sõma bɩ tʋb sẽn pa wʋmd sõma wã yĩngã bee seb-kãens sʋka.
6, 7. a) Wãn to la b get tigimsã sẽn be dũniyã gill zugã tʋʋm yelle? b) Yaa bõe la neb kẽer yeel a Zeova tẽng zug siglgã wɛɛngẽ?
6 Yaa Siglgã taoor lʋɩtb Sull sẽn yaa rap sõor bilf sẽn paam vʋʋsem sõng zaeebã n gomd ‘tʋm-tʋmd sẽn tũud sɩdã’ yʋʋr yĩnga. Sul-kãngã tʋmda a Zeova Kaset rãmbã biru kãsengẽ sẽn be Burkilin Niu Yorkã. Yaa bãmb n yãkd a Zeova sõgen dãmb nins tẽeb sẽn bɩ wã tɩ b tʋmd tʋʋmdã wilẽ. Tʋʋm-wil kãens geta sẽn yɩɩd tigims 98000 wã sẽn be dũniyã gill zugã tʋʋmã. B yãkda rap nins sẽn pidsd yɛl nins Biiblã sẽn baoodã tɩ b yɩ kãsem dãmb la kãsemb sõngdb tigims kãens pʋsẽ. (1 Tɩmote 3:1-9, 12, 13) Kãsem dãmbã lʋɩta taoore, la b kɩɩmd Wẽnnaam bãgrã b sẽn bobl-bã ne nonglem. Ad sɩd yaa bark bũmbu, d sẽn be bãg-kãng pʋgẽ, la d sẽn yãt nonglem la zems-n-taar ning sẽn be saam-biisã sʋk dũniyã gill zugã.—1 Pɩɛɛr 2:17; 5:2, 3.
7 Kãsem dãmbã sã n wa sagl neb ne nonglem, nin-kãens pa nong n yẽgemdẽ ye. B wilgda b mi-beoogo. Wala makre, ges-y kiris-nin-poak a Birzit yʋʋm sẽn wẽ 30 wã makre. A sẽn da wa n yaa pʋgsada, a talla tũud-n-ta-wẽns tɩ kɩt t’a ra na n maanẽ wẽnga. La kãsem dãmbã sagls sẽn tik Biiblã zugã, n paas a tẽed-n-taasã teelg sõng-a lame t’a põs yel-kãseng sẽn da na n paam-a. A Birzit tagsg yaa wãn to masã? A yeelame: “M tara mi-beoog wʋsgo, m sẽn ket n be a Zeova siglgã sẽn be yamleoog wʋsgã pʋgẽ wã yĩnga.” A Andreas sẽn tar yʋʋm 17 wã yeelame: “Sɩd yaa a Zeova siglg la woto. Dũniyã gill zugu, siglg kãngã ka to ye.” D pa segd n tall mi-beoog a Zeova tẽng zug siglgã bõn-sõma wã yĩng sɩda?
Taoor-lʋɩtbã me yaa pãn-komsem dãmba
8, 9. Bõe la a Davɩɩd zãmaanẽ nebã kẽer maan-yã, la a manesem yɩɩ wãn ne nin-kãense?
8 Yaa sɩd tɩ sẽn lʋɩt-b taoor baleng hakɩkã pʋgẽ wã yaa pãn-komsem dãmba. Bãmb fãa kongdame, la kẽer tara pãn-komsem toor-toor sẽn pukd wakat fãa, tɩ b maood wʋsg ne-ba. Rẽ segd n sãama tõnd sũur bɩ? Ayo. Baa neb b sẽn bobl taoor-sobend wʋsg pĩnd wẽndẽ Israɛllã pʋgẽ tudga tudg-kãsemse. Wala makre, a Davɩɩd sẽn wa n yaa bi-bɩɩga, b yeel-a lame t’a tɩ wẽ kʋnd n yols rĩm a Sayulli. La a Sayull wa n maka a Davɩɩd kʋʋbo, t’a Davɩɩd kong n zoe n bao a menga.—1 Sãmwɛll 16:14-23; 18:10-12; 19:18; 20:32, 33; 22:1-5.
9 Israɛll neb a taab me maana zãmbo. Wala makre, a Davɩɩd sodaas naab a Zoaab kʋʋ a Sayull roagd a Abneere. A Absalom zãmba a ba a Davɩɩd sẽn na yɩl n deeg naamã. Sẽn paase, a Davɩɩd sagend a Ahitofɛll a sẽn da kɩs sɩd ne wã zãmb-a lame. (2 Sãmwɛll 3:22-30; 15:1-17, 31; 16:15, 21) La rẽ pa kɩt t’a Davɩɩd yẽgem ne sũ-toog ye. Leb n pa kɩt t’a bas baleng hakɩkã ye. A manesmã yɩɩ toor fasɩ ne rẽ. Toogã kɩtame t’a Davɩɩd gãd a Zeova n kell n tall manesem sẽn yaa sõma, wala a sẽn da maan to-to, a Sayull sẽn da wa n digd-a t’a ra zoet n baood a yõorã. Sasa kãnga, a Davɩɩd yɩɩla woto: “Bɩ y zoe mam nimbãanega, mam Wẽnnaam, bɩ y zoe mam nimbãanega. Tɩ bõe, mam wata yãmb nengẽ n na n soonde. Mam baooda zĩig yãmb pɩgsa maasmẽ n na n lill tɩ sãoonga looge.”—Yɩɩl Sõamyã 57:2.
10, 11. Yaa zu-loe-bʋg la kiris-nin-poak yʋʋr sẽn boond t’a Gɛrtrud paam a sẽn da wa n yaa bi-bɩɩga, la bõe la a yeel a tẽed-n-taasã kongr wɛɛngẽ?
10 D pa tar bʋʋm baa a yembr n na n yẽgem tɩ zãmb n maand Wẽnnaam siglgã pʋgẽ rũndã-rũndã ye. A Zeova, a malɛgsã la tẽeb pe-kɩɩmbã pa sakd tɩ zãmb rãmb la nin-wẽns zĩnd kiris-neb tigingã pʋgẽ ye. Baasg zãnga, tõnd fãa segd n maoa ne d mengã pãn-komsem, la Wẽnnaam sõgen dãmb a taabã me pãn-komsem.
11 A Gɛrtrud sẽn yaa a Zeova balemd hal sẽn kaoosã sẽn da wa n yaa pʋg-bɩɩga, b rõd-a lame t’a ra pa wẽn-tũud hakɩka, la t’a ra pa Rĩungã wakat fãa koe-moond ye. La a manesem yɩɩ wãna? Rẽ yĩnga, a Gɛrtrud yẽgma b sẽn maan-a woto wã yĩng bɩ? Ayo. Sẽn deng t’a ki yʋʋmd 2003 wã pʋgẽ a yʋʋm 91 yĩngã, a tagsa sẽn loogã yell n yeel woto: “Bõn-kãensã la yɛl a taab sẽn pʋgl rẽ zãmsa maam tɩ baa ne nebã kongre, yaa a Zeova n get a tʋʋmdã sẽn tar yõodã yelle, la yaa ninsaalb sẽn pa zems zãng la a yãkd tɩ b pidsd tʋʋm-kãngã.” A Gɛrtrud sẽn da wa n maood ne Wẽnnaam sõgen dãmb a taab pãn-komsmã, a ra pʋʋsda a Zeova ne a sũur fãa.
12. a) Mak-wẽng bʋg la pipi kiris-neb kẽer kõ-yã? b) Bõe zug la tõnd segd n tik d yamã?
12 Sẽn mik tɩ baa kiris-neb nins sẽn kɩs-b sɩd ne Wẽnd n yɩɩdã yaa pãn-komsem dãmbã, rao b sẽn kõ zu-noog tʋʋmd sã n konge, bɩ d kell n ‘maan bũmb fãa tɩ yẽgeng ra zĩnd ye.’ (Filip rãmba 2:14) Ad yaa kaeto, d sã n tũ pipi kiris-neb kẽer mak-wẽngã! Sã n yaa ne karen-biig a Ziidi, rẽ wẽndẽ ziri karen-saam dãmbã ‘ra kɩɩsda neb nins sẽn tar noorã la b ra gomd pãens rãmba wẽnga.’ Sẽn paase, wẽng maandb kãensã ‘ra yẽgemda wakat fãa ne bãmb yɛlã.’ (Ziid 8, 16) Bɩ d ra maan wa yẽgemdbã ye. D tik d yamã bõn-sõma nins “tʋm-tʋmd sẽn tũud sɩdã” sẽn kõt-dã zutu. Bɩ d wilg tɩ d nanda a Zeova siglgã bõn-sõma n ‘maan bũmb fãa tɩ yẽgeng ra zĩnd ye.’
‘Gom-kãngã sakr yaa toogo’
13. Neb kẽer manesem yɩɩ wãn to ne a Zezi Kirist zãmsg kẽere?
13 Pipi kiris-nebã wakatẽ, kẽer n yẽgem ne rap nins b sẽn yãkã, tɩ neb a taab yẽgem a Zezi zãmsgã poorẽ. Wala b sẽn togs Zã 6:48-69 pʋgẽ wã, a Zezi yeelame: “Ned ninga sẽn wãbd mam nemd la a yũud mam zɩɩm tara vɩɩm sẽn ka sɛta.” A karen-biis wʋsg sẽn wʋm gom-kãensa wã, “b yeelame: ‘Gom-kãngã [sakr] yaa toogo. Ãnd n tõe n deeg yõwã?’” A Zezi ra miime t’a ‘karen-biisa ra yẽgemda ne yel-kãnga.’ Sẽn paase, “sẽn sɩng ne wakat kãnga, bãmb karen-biisa wʋsg leba poorẽ n ka le tũ bãmb ye.” La pa karen-biisã fãa n yẽgem ye. Ges-y bũmb ning sẽn maane, a Zezi sẽn wa n sok tʋm-tʋmdb 12 wã woto wã: “La yãmba, yãmb me ka rat n bas maam la?” Tʋm-tʋmd a Pɩɛɛr leokame: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama. La tõnd tẽeme la d miime tɩ yãmb yaa Kirist sẽn yaa Wẽnnaam Sõng Soaba.”
14, 15. a) Bõe yĩng tɩ neb a yẽeb sũy pa noom ne kiris-neb zãmsg kẽere? b) Rao ning yʋʋr sẽn boond t’a Emmanuel kibarã zãmsda tõnd bõe?
14 Rũndã-rũndã, Wẽnnaam nin-buiidã sʋka, neb sõor bilf sũy n sãam ne zãmsg kẽer b sẽn taas kiris-nebã, tɩ b yẽgem ne a Zeova tẽng zug siglgã. Bõe yĩng tɩ b maan woto? Nong n yaa nebã sẽn pa wʋmd Wẽnnaam sẽn maand yɛlã to-to wã võorã n kɩt tɩ b yẽgemdẽ. Naandã pukda sɩdã a nin-buiidã bilf-bilfu. Woto yĩnga, wakat-wakate, siglgã remsda tõnd sẽn wʋmd Gʋlsg Sõamyã zĩis kẽer võor to-to wã. A Zeova sõgen dãmbã wʋsg sũy nooma ne rems-kãense. Yaa neb a yẽeb bal n wilgd tɩ b ‘yaa tɩrs’ tɩ loog nugu, tɩ b sũy pa noom ne toeemsã ye. (Koɛɛg Soaba 7:16) Tõe n yɩɩ wuk-m-meng yĩnga, la neb kẽer nengẽ, yaa soog-m-meng yam yĩnga. La baa sẽn yaa bʋʋm ning yĩnga, yẽgeng yaa wẽnga, bala a tõe n kɩtame tɩ ned lebg n kẽ dũniyã la a tʋʋm wẽnsã pʋgẽ.
15 Wala makre, a Emmanuel sẽn da yaa a Zeova Kaset soab a ye wã sãbga yɛl kẽer a sẽn karem “tʋm-tʋmd sẽn tũud sɩd la sẽn tar yamã” sɛbẽ. (Matɩe 24:45) Rẽ kɩtame t’a bas tõnd sɛbã kareng n wa baas n yeel a tigingã kãsem dãmb t’a ye pa rat n yɩ a Zeova Kaset soab ye. La pa yã n kaoos la a Emmanuel wa bãng t’a Zeova siglgã zãmsg yaool n da yaa sɩd ye. A lebg n tɩ yãa a Zeova Kaset rãmbã n sak n deeg t’a tudgame, tɩ b lebs n deeg-a tigingã pʋgẽ t’a ye paam sũ-noogo.
16. Bõe n tõe n sõng tõnd tɩ d bas sãmbs nins d sẽn tar kiris-neb zãmsg kẽer wɛɛngẽ wã?
16 Yaa wãn to yẽ, tõnd sã n wa rat n yẽgme, d sẽn tar sãmbs a Zeova siglgã zãmsg kẽer zug yĩnga? Sã n yaa woto bɩ d yõk d menga. ‘Tʋm-tʋmd sẽn tũud sɩdã’ tõe n wa baas n yiisa zãmsg sẽn leokd tõnd sogsgã tɩ d sãmbsã sa. Leb n yaa yam tʋʋmd tɩ d bao kiris-neb kãsem dãmbã saglse. (Ziid 22, 23) Pʋʋsgã, meng zãmsgã, la d tẽed-n-taas sẽn nong tẽebã yɛl tũud-n-taar tõe n sõng-d lame tɩ d sãmbsã sa, la sõng-d tɩ d paas d mi-beoog ne sɩd nins sẽn be Biiblã pʋgẽ n kengd tẽebã, d sẽn bãng a Zeova siglgã maasem yĩngã.
Kell-y n tall-y yam-sõngo
17, 18. Wall tɩ d yẽgme, manesem bʋg la d segd n talle, la bõe yĩnga?
17 D sẽn yaa ninsaalb sẽn pa zems zãngã, d roga ne yel-wẽn tʋlsem, la neb kẽer tõe n nong n yẽgemda zaalem. (Sɩngre 8:21; Rom dãmba 5:12) D sã n yaool n wa lebg neb sẽn nong yẽgengo, tõe n sãama zems-n-taar ning d sẽn tar ne Wẽnnaam a Zeova wã. Yaa rẽ n so tɩ d segd n yõk d mens n da yɩ yẽgemdb ye.
18 D pa segd n yẽgem yɛlã sẽn maand to-to tigingã pʋgẽ wã yĩng ye. D segd n kell n talla yam-sõngo, la d maand tʋʋm wʋsg sẽn kɩtd tɩ d tar sũ-noogo, wẽn-zoeere, n yaa maan-tɩ-zems rãmb la d tar tẽeb sõma. (1 Korẽnt dãmba 15:58; Tɩt 2:1-5) A Zeova geta yɛl nins fãa sẽn maand a siglgã pʋgẽ wã yell neere, la a Zezi mii bũmb nins fãa sẽn maand tiging fãa pʋgẽ wã wala a sẽn da mi pipi kiris-nebã wakatẽ tigims yɛlã. (Wilgri 1:10, 11) Maag-y y yĩng n gũ tɩ Wẽnnaam la Kirist sẽn yaa tigingã Zuraoogã wa rems yɛlã. B tõe n wa kɩtame tɩ pe-kɩɩmbã welg yɛl nins sẽn dat remsgã.—Yɩɩl Sõamyã 43:5; Kolos rãmba 1:18; Tɩt 1:5.
19. Nand tɩ wa lebg Rĩungã n get ãdem-biisã yɛl fãa yelle, yaa bõe la d segd n get neb a taabã nengẽ n yɩɩda?
19 Ka la bilfu, dũni wẽng kãngã na n menemame, tɩ Mesi Rĩungã ges ãdem-biisã yɛl fãa yelle. Nananda, ad sɩd tara yõod tɩ tõnd ned kam fãa tall yam-sõngo! Rẽ na n sõng-d lame tɩ d get d tẽed-n-taasã zʋg-sõma n yɩɩd b pãn-komsmã. D sã n ges b zʋg-sõma wã, na n kõ-d-la sũ-noogo. Rẽ, wall tɩ d yẽgem n koms raoodã, d raoodã la d tẽebã na n paama kengre.
20. Yam-sõng na n kɩtame tɩ d paam bark bʋse?
20 Yam-sõng na n leb n sõnga tõnd tɩ d da yĩm bark nins fãa d sẽn paamd d sẽn be a Zeova tẽng zug siglgã pʋgẽ wã yĩng ye. Dũniyã gill zugu, yaa siglg kãngã bal n sakd ãndũniyã fãa Naabã. Yãmb tagsg yaa wãn ne yel-sɩd kãngã, la ne zu-noog ning y sẽn tar n tõe n balem sɩd Wẽnnaam yɛng a Zeova wã? Bɩ d tall yam ning a Davɩɩd sẽn da tare, a sẽn yɩɩl woto wã: “Yãmb wʋmda pʋʋsgo. Neb buud fãa na n waa yãmb nengẽ b yel-wẽna yĩnga; ned ninga yãmb sẽn yãk n kɩt t’a kolg yãmb nengẽ wã na n paama sũ-noogo. Yẽ paada yãmb zak pʋgẽ. Yãmb dooga noom sekda tõndo, yãmb do-sõng kãsengã.”—Yɩɩl Sõamyã 65:3, 5.
Y tẽrame bɩ?
• Bõe yĩng tɩ d segd n tall mi-beoog ne tigingã taoor-lʋɩtba?
• Tigingã taoor-lʋɩtb sã n wa konge, d manesem segd n yɩɩ wãna?
• B sã n wa rems tõnd sẽn wʋmd Gʋlsg Sõamyã zĩis kẽer võor to-to wã, d manesem segd n yɩɩ wãna?
• Bõe n tõe n sõng kiris-ned t’a bas sãmbse?
[Zãmsgã sogsgã]
[Foto, seb-neng 14]
A Davɩɩd kõo a Salomo wẽn-doogã pãlã rãmba, la a teel baleng hakɩkã ne a sũur fãa
[Foto, seb-neng 17]
Kãsem dãmbã sõngda b tẽed-n-taasã tẽebã wɛɛngẽ ne sũ-noogo