D yɩ koe-moondb sẽn moond koɛɛgã tɩ zemsd ne nebã yɛla

“Mam lebga bũmb fãa neba yĩnga tɩ mam sẽn sakd bũmb fãa wã yĩnga, mam tõe n fãaga kẽere.”—1 KORẼNT DÃMBA 9:22.

1, 2. a) Bõe n wilgd tɩ tʋm-tʋmd a Poll koe-moonegã tʋʋmd ra womda biisi? b) Wãn to la a Poll bilg yẽ mengã sẽn da get a tʋʋmdã to-to?

A RA mii a sẽn na n maan to-to, n gom ne nin-tals wa fu-rot sẽtba, la a gom ne bãng-bɛd rãmb me. A ra leb n mii a sẽn na n gom to-to tɩ Rom nin-bɛd la Firzi nin-talsã me sak n deeg a sẽn yetã. A sɛbã ra kɩtdame tɩ Gɛrk rãmb sẽn sakd yam-paalse, la Zʋɩf rãmb me sẽn gãd rog-n-mikã dem-demã sakd n deegd a sẽn yetã. A tagsa wã ra yaa tɩrs tɩ kɩɩsg kaẽ, t’a goamã me ra be yamleoog wʋsg ne nebã. A ra modgdame n yãkd gom-zug sẽn noom ned ning fãa a sẽn da sõsd ne wã, sẽn na yɩl n tõog n kɩt tɩ neb kẽer tẽ Kiristã.—Tʋʋma 20:21.

² Rao ning yell d sẽn gomdã yaa tʋm-tʋmd a Polle. Sãmbg sẽn ka be, a ra yaa koe-moond sẽn moond koɛɛgã tɩ womd biisi, la a koɛɛgã me ra zemsa ne nebã yɛla. (1 Tɩmote 1:12) A Zezi Kirist kõ-a-la tʋʋmd n yeel-a: “Wilg neb sẽn ka Zʋɩf buudu la rĩm dãmb la Israɛll yagens mam yʋʋre.” (Tʋʋma 9:15) Wãn to la a ra get a tʋʋmdã? A meng togsame: “Mam lebga bũmb fãa neba yĩnga tɩ mam sẽn sakd bũmb fãa wã yĩnga, mam tõe n fãaga kẽere. Mam maanda bũmb fãa Koe-nooga yĩnga tɩ mam tõe n paam pʋɩɩr ne Koe-noogo.” (1 Korẽnt dãmba 9:19-23) Bõe la a Poll makrã tõe n zãms tõndo, tɩ tõe n sõng-d tɩ d koe-moonegã la d karen-biisã maaneg wom biis n paase?

Rao sẽn toeem a zʋg n tõog tʋʋmd sẽn da pa nana

3. Nand t’a Poll lebg kiris-neda, a manesem ne kiris-nebã ra yaa wãn to?

³ Rẽ yĩnga a Poll ra sɩng n yaa sũ-mar soab la nin-sõngo, n da zems ne tʋʋmd ning b sẽn bobl-a wã bɩ? Ayo. Bãng-y t’a Soll b sẽn wa n boondẽ t’a Poll kaoosg zugẽ wã ra yaa ned sẽn da pa tar sugr ne tũudum a to neba, tɩ kɩt t’a ra namsd Kirist karen-biisã wʋsgo. B sẽn da wa n na n kʋ a Etɩɛnnã t’a Soll da yaa bi-bɩɩga, la a sũur yɩɩ noog ne nin-kãngã kʋʋbã. Rẽ poore, a Poll namsa kiris-nebã hal wʋsgo. (Tʋʋma 7:58; 8:1, 3; 1 Tɩmote 1:13) La a ra ket n ‘dat n namsame la a kʋ Zusoaba karen-biisi.’ A sẽn da yõgd tẽedbã sẽn be Zerizalɛmmã n namsdẽ wã pa sek-a ye, t’a sɩng n namsd kiris-nebã sẽn da be hal Damas soolmẽ wã fãa me.—Tʋʋma 9:1, 2.

4. Bõe la a Poll ra segd n dems sẽn na yɩl n tʋm tʋʋmd ning b sẽn bobl-a wã?

⁴ Bʋʋm kãseng n kɩt t’a Poll da kis kiris-nebã wʋsg woto. Tõe t’a ra tẽeda ne a sũur fãa tɩ kiris-nedemdã ra na n sãama Zʋɩf rãmbã rok-n-mik tũudmã, n gẽdg-a ne bu-zẽmsã tags-wẽnsã. Sẽn paas me, a Poll da yaa “Fariziẽ.” Fariziẽ rat n yeelame tɩ “sẽn welg toore.” (Tʋʋma 23:6) A Poll sẽn wa n bãng tɩ Wẽnnaam da yãk-a lame t’a moon neba fãa Kirist koɛɛgã, baa ne Buzẽmsã, ra tog n yɩɩ lingr wʋsg ne-a. (Tʋʋma 22:14, 15; 26:16-18) Bãng-y tɩ Fariziẽ rãmbã ra zãgsdame meng tɩ b kõn dɩ ne neb kẽer b sẽn da get wa yel-wẽn-maandb ye. (Luk 7:36-39) Sãmbg sẽn ka be, woto ra baoodame t’a Poll maan modgr wʋsgo, n dems a tagsgã tɩ zems ne Wẽnnaam daabã, sẽn yaa tɩ neb buud fãa paam fãagrã.—Galat dãmba 1:13-17.

5. Wãn to la d tõe n dɩk a Poll togs-n-taar d koe-moonegã pʋgẽ?

⁵ Tõe tɩ yaa woto la tõnd me segd n maane. Tõnd sẽn moond koe-noogã dũniyã gill zugã, n segd neb sẽn gomd buud-goam toor-toorã yĩnga, d segd n modga neer n dems d tagsgã n da yãg n sãbs neb a taabã ye. (Efɛɛz rãmba 4:22-24)  Tõnd mi tɩ d pa mi me, tõnd yel-manesmã bee ne tõnd buudã sẽn yaa a soab la b sẽn wub tõnd to-to wã. Rẽ tõeeme n kɩt tɩ d tall tagsa la yel-manesem sẽn pa zems ne nebã, tɩ kɩt tɩ d yaa dem-dem ne-ba. Tõnd sã n dat n yã neb nins sẽn wõnd piisã la d sõng-ba, rẽnda d toeeme. (Rom dãmba 15:7) Yaa woto la a Poll maan-yã. A saka tʋʋm-toog ning b sẽn kõ-a sẽn yaa a moon neb wʋsg koe-noogã. Nonglem tus-a lame t’a bao n yɩ karen-saamb sẽn tar tõogo, tɩ d segd n dɩk a togs-n-taare. Sɩda, d sã n maag d yĩns n ges a Poll sẽn yaa “bu-zẽms tʋm-tʋmdã,” d mikdame t’a ra nonga nebã, la a ra kɩtdame t’a moonegã gom-zut zemsd ne nebã, la sẽn paase, a ra yaa ned sẽn moond koɛɛgã sõma la a ra mi neb zãmsg me. *—Rom dãmba 11:13.

A Poll yɩɩ koe-moond sẽn kɩt t’a koɛɛgã zems ne nebã

6. Bõe n wilgd t’a Poll ra ningda a kɛlgdbã sẽn da zoe n mi bũmb nins tũudmã zugã a yamẽ, la rẽ woma bi-bʋse?

⁶ A Poll da ningda a kɛlgdbã tũudum, la b sẽn yit buud ning pʋgẽ wã a yamẽ. A Poll sẽn da wa n gomd ne rĩm a Agirpa 2 soabã, a wilgame t’a ra miime tɩ rĩmã “mii [Zʋɩf rãmbã] minunga ne b no-koɛɛma zãnga.” Rẽ, a Poll tũnuga ne a Agirpa sẽn da tẽed bũmb nins tũudmã zugã n sõs yɛl rĩmã sẽn da wʋmd sõma zutu. A Poll tagsgã sẽn da yaa vẽeneg tɩ kɩɩsg kaẽ wã kɩtame t’a Agirpa yeel woto: “A ketẽ-la bilf bal tɩ fo tõog tɩ mam yɩ Kirist neda.”—Tʋʋma 26:2, 3, 27, 28.

7. Wãn to la a Poll wilg t’a ra sakd n toeemda a zãmsgã manesem, a sẽn da wa n moond kʋʋngã Listr tẽngã?

⁷ A Poll da sakdame me n toeemd a sẽn da zãmsd nebã to-to wã. D sã n ges a sẽn da wa n dat  n kɩt tɩ Listr nebã ra balem yẽ ne a Barnabas wa wẽnnaam dãmbã, a toeema a manesmã wʋsgo. Kibarã yeelame tɩ nin-kãensã sẽn da gomd Likaoni goamã ra yaa neb sẽn pa paam zãmsg wʋsgo, la tɩ b ra leb n gãda tẽeb ziri wã dem-dem. Sã n yaa ne Tʋʋma 14:14-18, a Poll goma bũmb nins Wẽnnaam sẽn naanã la b sẽn nafd nebã yelle, n togs tɩ rẽ wilgdame tɩ sɩd Wẽnnaamã n yaa kãseng n yɩɩda. A Poll sẽn gãneg a goamã to-to wã kɩtame tɩ b wʋm a tagsgã võor nana-nana, la rẽ kɩtame tɩ ‘neba pa maan maoong n waoog’ yẽ ne a Barnabas ye.

8. Wãn to la a Poll wilg t’a ra sakd n toeemda a sẽn zãmsd nebã to-to wã, baa ne a sũur sẽn mi n yik ne yɛlã sẽn yaa to-to wã?

⁸ Yaa sɩd t’a Poll da pa zems zãng ye, tɩ rẽ kɩt tɩ wakat-wakate, a sũur mi n yika yɛl kẽer yĩnga. Wala makre, vugri, b sẽn wa n wẽ-a n paoog-a zaalmã, a leoka Zʋɩf yʋʋr sẽn boond t’a Ananias ne gom-kãse. La b sẽn wa n togs a Poll t’a bãng tɩ yaa maan-kʋʋdbã kãsem la a sẽn tʋʋsã, a kosa sugr tao-tao. (Tʋʋma 23:1-5) A sẽn ta Atɛnnã, pipi wã, a “sũurã sãama wʋsgo, yẽ sẽn yã tɩ tẽnga pida ne bõn-naands neb sẽn waoogd wa Wẽnnaama yĩnga.” La a sẽn da wa n sõsd ne kʋʋngã zĩig ning b sẽn boond t’a Mars Tãngã zugã, a pa yik a sũur woto ye. A goma ne Atɛn nebã b sẽn tigimdẽ taabã, n yãk gom-zug b fãa sẽn nonge, n gom b tẽn-kugr ning zug b sẽn gʋls tɩ “Wẽnnaam ning ned sen ka mi” wã yelle. A leb n tẽega b gʋlsd a yembr goam menga.—Tʋʋma 17:16-28.

9. Wãn to la a Poll kɩt t’a goamã zems ne a kɛlgdb toor-toorã?

⁹ A Poll da maandame t’a goamã kell n zems ne a kɛlgdbã sẽn da yaa neb buud toor-toorã sõma. A ra ningda a yamẽ t’a kɛlgdbã buudu, la b minungã tara pãng b sẽn tagsd to-to wã zugu. A sẽn da wa n gʋlsd Rom kiris-nebã, a ra miime tɩ Rom n da rɩt naam dũniyã gill zugu. A Poll lɛtrã pʋgẽ, a taas-b-la tagsg sẽn tar pãnga. A wilg-b lame tɩ fãagr tõog ning a Zezi sẽn tarã tõoga a Ãdem yel-wẽndã sẽn bẽeg tõnd fãa wã. A goma ne Rom kiris-nebã la neb a taab sẽn da be ne-ba, la ra yaa ne goam sẽn be yamleoog la sẽn da kẽed-b sõma.—Rom dãmba 1:4; 5:14, 15.

10, 11. Wãn to la a Poll dɩk makr sẽn zems ne a kɛlgdbã? (Ges-y seb-neng tẽngr vẽnegrã me.)

¹⁰ Bõe la a tʋm-tʋmd a Poll ra maanda, a sã n da rat n wilg a kɛlgdbã Biiblã yel-zulumsã? A ra mii a sẽn na n dɩk makr to-to tɩ yɩ sõma. A ra rɩkda makr võor wʋmb sẽn yaa nana sẽn na yɩl n wilg Biiblã zãms-tagdã võor tɩ yɩ vẽenega. Wala makre, a Poll da miime tɩ Rom nebã ra mii yembdã sẽn da yaa to-to Rom soolmã pʋgẽ. Tõe t’a sẽn da gʋls-b rãmbã sʋk menga, neb wʋsg ra yaa yembse. Yaa rẽ n so t’a rɩk makr ne yembdã, sẽn na yɩl n wilg ned sẽn yãkd yam n na n sak yel-wẽnã bɩ n sak tɩrlmã.—Rom dãmba 6:16-20.

¹¹ Sebr a yembr yeelame tɩ “Rom, zu-soab sã n da rata, a ra tõe n kõo a yamb paam-m-menga, la yamb me ra tõe n yaoa a zu-soabã ligd n paam a menga.” Sebrã paasame tɩ “yamb ra leb n tõe n paama lohorem, a sã n lebg wẽnd yamba.” Yamb b sẽn kõ paam-m-meng ra tõeeme me n ket n tʋmd a zu-soabã tʋʋm n dɩkd yaoodo. Yaa woto yell la a Poll da tagsda, a sẽn wa n gʋls n wilg tɩ ned fãa tõe n yãka yam n sak yel-wẽnã bɩ n sak tɩrlmã. Rom kiris-nebã ra paama b mens ne yel-wẽnã, tɩ Wẽnnaam da so-b masã. B ra paama b mens n na n maan Wẽnnaam daabã. La b sã n da rata, b ra tõe n leb n saka yel-wẽnã sẽn da yɩ bãmb zu-soabã. Bilg-kãngã võor wʋmb ra yaa nana ne a kɛlgdbã, b ra mi-a-la sõma me. Tõe tɩ rẽ kɩtame tɩ Rom kiris-nin-kãens sok b mense: ‘Yaa ãnda la m sakd wa m su-soaba?’ *

 D rɩk yam ne a Poll mak-sõngã

12, 13. a) Yaa bõe la d segd n modg n maan rũndã-rũndã sẽn na yɩl tɩ d goamã kẽ d kɛlgdb toor-toorã sũyã? b) Yel-bʋs la yãmb yã tɩ b zut sõsg womda biisi, y sã n wa moond neb buud toor-toore?

¹² Wala a Polle, d segd n yɩɩ neb sẽn gũusd n get nebã manesem, la d yɩ neb sẽn sakd n maan tɩ d zãmsgã zems ne nebã buud fãa, sẽn na yɩl n gom tɩ kẽ d kɛlgdbã sẽn yaa neb buud toor-toorã sũyã. Sẽn na yɩl n sõng d kɛlgdbã tɩ b wʋm koe-noogã võore, d pa segd bal n ta b nengẽ n taas-b koɛɛg d sẽn deng n segle, bɩ d kõ-b sɛb sẽn gomd Biiblã yell ye. D segd n modgame me n bãng b sẽn dat sõngr ninsi, n bãng yɛl nins sẽn pak-bã, n bãng b sẽn nong la b sẽn pa nonge, yɛl nins sẽn kõt-b rabeemã, la tags-kɛg nins b sẽn tar neb a taabã zutã. Baa ne rẽ sẽn baood tɩ d sɩd tags neer la d maan modgr wʋsgã, Rĩungã koe-moondb sẽn be dũniyã gill zugã sakame n na n maan woto ne yẽesem. Wala makre, a Zeova Kaset rãmbã biru ning sẽn be Hõngiri wã yeelame: “Saam-biisã tara waoogr wʋsg ne tẽn-zẽms nebã minung la b vɩɩm manesem, n pa baoodẽ tɩ nin-kãens tũ bãmb tẽngã minund ye.” A Zeova Kaset rãmbã sẽn be zĩis a taabã me modgdame n maand woto.

¹³ Tẽng a yembr sẽn be Azi soolmã pʋgẽ, sẽn pak nebã n tɩ yɩɩd yaa yĩnsã laafɩ, kambã wubr la lekollã. Rĩungã koe-moondb modgdame n na n sõs yel-kãensã zut n yɩɩd b sẽn sõsd vɩɩmã sẽn kengd dũniyã gill zugã yelle. Koe-moondb nins sẽn be Etazini galʋ-tẽn-bedr a yembrẽ me yãame tɩ b moonegã zĩig sak a yembr neb yel-pakr yaa wẽg-taabã, soayã sẽn pid ne mobila tɩ kẽnã yaa toogã, la bi-be-tʋʋmã. Kaset rãmbã tũnugda ne gom-zu-kãensã n tõogd n sɩngd sõsg ne nebã Biiblã zugu. Biiblã karen-saam dãmb nins sẽn mi b tʋʋmdã modgdame tɩ sẽn yaa gom-zug ning fãa la b yãk-yã, bɩ b kell n tall yam-sõngo, la b keng nebã pelse. B wilgda nebã me tɩ Biiblã noy tũub tara yõod masã menga, la b le sõngd-b tɩ b bãng beoog-daar saagr ning Wẽnnaam sẽn kãabdã.—Ezai 48:17, 18; 52:7.

14. Bilg-y d sẽn tõe n maan to-to n kɩt tɩ d sẽn zãmsd nebã to-to wã zems ne-ba.

¹⁴ Leb n yaa sõma tɩ d toeem d sẽn moond koɛɛgã to-to wã, bala nebã buud la b tũudmã yaa toor-toore, la b minimã me pa taab ye. Tõnd sẽn sõsd to-to ne ned sẽn tẽed tɩ Naand beeme la a pa tẽed Biiblã na n yɩɩ toor ne tõnd sẽn na n sõs to-to ne neb nins sẽn pa tẽed tɩ Wẽnnaam beeme wã. Tõnd sẽn na n sõs to-to ne ned sẽn tagsd tɩ tũudmã sɛb fãa yaa sẽn na yɩl n tuub nebã bala na n yɩɩ toor ne tõnd sẽn na n sõs to-to  ne ned ning sẽn tẽed Biiblã. D leb n segd n bãnga d sẽn na n sõs to-to tɩ zems ne d kɛlgdbã sẽn karem n ta zĩig ningã. Karen-saamb sẽn mi a tʋʋmd sõma tũnugda ne tagsg la bilsg sẽn zems ne neb nins a sẽn segdã.—1 Zã 5:20.

D sõng koe-moondb paalsã

15, 16. Bõe yĩng tɩ koe-moondb paalsã zãmsg raab beẽ?

¹⁵ A Poll da pa baood n na n maneg a mengã sẽn zãmsd nebã to-to wã sõmblem bal ye. A ra leb n yãame t’a segd n zãmsa koe-moondb paals wala a Tɩmote la a Tɩte, la a segl-b tɩ b yɩ koe-moondb sẽn tʋmd tɩ womd biisi. (2 Tɩmote 2:2; 3:10, 14; Tɩt 1:4) Rũndã-rũndã me, neb wʋsg n dat zãmsgo.

¹⁶ Yʋʋmd 1914, Rĩungã koe-moondb ra zemsa bãmb 5000 dũniyã gill zugu. Rũndã-rũndã, semen fãa, bãng-y tɩ yaa nin-paals 5000 n deegd lisgu! (Ezai 54:2, 3; Tʋʋma 11:21) Nin-paalsã sã n wa sɩng n naagd kiris-neb tigingã la b tʋll n naag n moon koe-noogã, b baooda zãmsg la sor-wilgri. (Galat dãmba 6:6) Tara yõod wʋsg tɩ d maan wa d Zusoab a Zezi, d sã n wa zãmsd karen-bi-paalsã. *

17, 18. Wãn to la d tõe n sõng nin-paalsã tɩ b tall bas-yard koe-moonegã sasa?

¹⁷ A Zezi pa yã kʋʋng bal n yeel a tʋm-tʋmdbã tɩ b sɩng b zãmsg ye. Pipi, a wilg-b lame tɩ koɛɛgã mooneg yaa tɩlae, la a yeel-b tɩ b pʋʋs rẽ yĩnga. Rẽ poore, a rɩka segl-kãsems a tãabo. A reng n kõo ned kam fãa tũud-n-taag koe-moonegã yĩnga. Rẽ poore a yãka mooneg zĩig n kõ-ba, la sẽn na n baase, a wilg-b-la koɛɛg ning b sẽn segd n tɩ taasã. (Matɩe 9:35-38; 10:5-7; Mark 6:7; Luk 9:2, 6) Tõnd me tõe n maana woto. Tõnd sõngda d meng biiga, d karen-bi-paalga, tɩ yaa ned sẽn kaoos n pa moon koe-noogã me, d segd n modgame n zãms nebã tɩ zems ne segl-kãensã b tãabã.

¹⁸ Nin-paalsã rata sõngr wʋsg sẽn na yɩl n paam bas-m-yam Rĩungã koɛɛg taasg sasa. Y tõe n sõng-b lame tɩ b segl koɛɛgã wilgr sẽn yaa nana la sẽn be yamleoogo, n deng n mak n wilgi. Koe-noogã mooneg wakate, bɩ y reng n moon t’a gese. Y tõe n dɩka a Zedeõ togs-n-taare. A yeela a soda-taasã tɩ: “Bɩ y ges maam n maan wa mam sẽn na n maanã.” (Bʋkaoodba 7:17) Rẽ poore, bɩ y bas tɩ koe-moond-paalgã me gome. Pẽg-y-yã-a, la sã n zemse, bɩ y kõ-a sagls a wãn t’a maneg a moonegã n paase.

19. Yãmb dɩka sard n na n maan bõe, y sẽn maood n na n ‘maan y tʋʋmdã neerã’?

¹⁹ Sẽn na yɩl n ‘maan d tʋʋmdã neere,’ d segd n baoome n toeem d sẽn moond to-to wã tɩ zems ne nebã, la d zãms koe-moondb paalsã me tɩ b maan woto. D sã n ges tõnd bõn-datlã yõod sẽn ta zĩig ningã, sẽn dat n yeel tɩ zãms nebã Wẽnnaam bãngrã sẽn kõt fãagrã, d kɩsa sɩd tɩ pa zaalem yĩng la d modgd n na n ‘lebg bũmb fãa neba yĩng sẽn na yɩl n fãag kẽer’ ye.—2 Tɩmote 4:5; 1 Korẽnt dãmba 9:22.

[Tẽngr not rãmbã]

Y tẽrame bɩ?

• Wãn to la d tõe n dɩk a Poll togs-n-taar d koe-moonegã pʋgẽ?

• Bõe la d tõe n wa segd n toeem d tagsgã pʋgẽ?

• Wãn to la d tõe n kɩt tɩ d koɛɛgã tall yamleoog ne nebã wakat fãa?

• Bõe la koe-moondb paalsã rat sẽn na yɩl n paam bas-m-yam b moonegã pʋgẽ?

[Zãmsgã sogsgã]

[Foto rãmba, seb-neng 29]

Tʋm-tʋmd a Poll da gũusd n geta nebã manesem, n kɩtdẽ t’a moonegã la a zãmsgã zemsd ne nebã yɛla

[Goam sẽn tar pãngã, seb-neng 28]

A Poll tõog n moona neb buud toor-toore, a sẽn kɩt t’a koɛɛgã zems ne ned kam fãa wã yĩnga

[Foto, seb-neng 30]

Koe-moondb nins tʋʋmd sẽn womd biisã ningda b kɛlgdbã buud sẽn ya a soabã b yamẽ

[Foto, seb-neng 31]

Koe-moondb sẽn kɩtd tɩ b koɛɛgã zemsd ne nebã sõngda nin-paalsã tɩ b segend b mens koe-moonegã yĩnga

[Goam sẽn tar pãngã, seb-neng 31]

A Zezi sõnga a karen-biisã ne segl-kãsems a tãabo: Yaa tũud-n-taaga, mooneg zĩiga, la koɛɛg ning b sẽn segd n taasã