‘A Zeova noorã’ pa tõe n pa pids ye
‘A Zeova noorã’ pa tõe n pa pids ye
“Mam na n togsa [a Zeova] noore. Bãmb yeela maam yaa: ‘Fo yaa mam biribla. . . . Kos maam, la mam na kõ foom dũniyã soolem fãa tɩ f sooge.’ ”—YƖƖL SÕAMYÃ 2:7, 8.
1. Welg-bʋg n be Wẽnnaam daabã la tẽns toɛy-toɛyã raab sʋka?
WẼNNAAM A ZEOVA tara raab ãdem-biisã la tẽngã yĩnga. Tẽnsã toɛy-toɛy me tara b raabo. La b raabã ne Wẽnnaam dẽndã yaa toor wʋsgo! Rẽ pa lingd tõnd ye, bala Wẽnnaam yeelame: “Wa yĩngr zãntlem sẽn yɩɩd dũniyã, woto me, mam soɛya yɩɩda yãmb soɛyã la mam tagsa yɩɩda yãmb tagsgã.” Wẽnnaam daabã pidsg yaa waaziba, bala a paasda woto: “Wa saag sẽn niid la sapɩlem sẽn yit yĩngr n sigd n ka lebd be t’a ka zãgs tẽnga ne koom n kɩt t’a bõn-biis bul n yi, la a kõt koaadb bõn-buud la rɩɩb tɩ b rɩ wã, woto me, gomd ninga sẽn yit mam noorẽ wã ka na n le wa mam nengẽ zaalem ye. A na n maana bũmb ninga mam sẽn datã. La a na n tõoga bũmb ninga mam sẽn tʋm-a t’a tɩ maanã.”—Ezai 55:9-11.
2, 3. Bõe la b wilg vẽeneg yɩɩll a yiib-n-soabã pʋgẽ, la rẽ wata ne sogs-bʋse?
2 Yɩɩl Sõamyã a yiib-n-soabã wilga vẽeneg tɩ Wẽnnaam daabã sẽn tɩ loe ne Rĩmã sẽn yaa Mesi wã na n pidsame. Wẽnnaam vẽnega pĩnd wẽndẽ Israɛll rĩm a Davɩɩd sẽn gʋls yɩɩn-kãngã wã t’a reng n togs tɩ wakat kãseng n da na n wa tɩ tẽnsã fãa sũy na n puugi. B nanambsã na n kɩɩsa Wẽnnaam a Zeova la ned ning a sẽn yãkã. La yɩɩl-gʋlsdã yɩɩla woto me: “Mam na n togsa Zusoaba noore. Bãmb yeela maam yaa: ‘Fo yaa mam biribla. . . . Kos maam, la mam na kõ foom dũniyã soolem fãa tɩ f sooge. La fo soolem na n taa dũniyã tɛk fãa.’ ”—Yɩɩl Sõamyã 2:7, 8.
3 ‘Noor’ ning a Zeova sẽn kõ wã rat n yeelame tɩ bõe ne tẽnsã? Wãn to la no-kãng pak ãdem-biisã? No-kãng sẽn na n wa ne bũmb nins tẽnsã zutã na n waa ne bõe wẽn-zoɛtb nins fãa sẽn karemd yɩɩll a yiib-n-soabã zutu?
Tẽnsã sũy puudame
4. Y sã n na n kʋms Yɩɩl Sõamyã 2:1, 2 tags-kãsemse, b yeta be tɩ bõe?
4 Yɩɩl-gʋlsdã goma dũniyã tẽns ne b nanambsã tʋʋm yelle, n sɩng a yɩɩllã woto: “Yaa bõe tɩ dũniyã buud toɛy-toɛyã sũy puudẽ, la tɩ neba tagsd tags-yaalse? Dũniyã rĩm dãmba zẽkda b mense la nanambs yẽsda ne taaba n kɩɩsd Zusoabã la bãmb nin-tũusdgã.”—Yɩɩl Sõamyã 2:1, 2. *
5, 6. Dũniyã tẽns toɛy-toɛyã “tagsda tags-yaals” bʋse?
5 Rũndã-rũndã dũniyã tẽns toɛy-toɛya “tagsda tags-yaals” bʋse? Wall tɩ b sak Wẽnnaam sẽn yãk-a soabã sẽn yaa Mesi wã bɩ Kiristã, tẽnsã ket n ‘tagsda’ b sẽn na n maan to-to n kell n tall b naamã. Yɩɩl sõamyã a yiib-n-soabã gom-kãensã leb n paama pidsg pipi kiris-nebã wakatẽ wã, Zʋɩf rãmbã ne Rom dãmbã nanambs sẽn wa n lagem taab n kʋ Rĩm ning Wẽnnaam sẽn yãkã, sẽn dat n yeel t’a Zezi Kiristã. La pids-kãsengã sɩnga yʋʋmd 1914, Wẽnnaam sẽn wa n kɩt t’a Zezi lebg Rĩm saasẽ wã. Rẽ tɛka, tẽng zug guvɛrnema ba a yembr pa sak Rĩm ning Wẽnnaam sẽn yãkã ye.
6 Yɩɩl-gʋlsdã ra rat n yeelame tɩ bõe, a sẽn sok tɩ ‘yaa bõe tɩ dũniyã buud toɛy-toɛyã tagsd tags-yaalsã’? A rat n yeelame tɩ bãmb magbã sẽn yaa faoor la zaalmã pa na n pids ye. B pa tõe n wa ne laafɩ la zemsg dũni kãngã zug ye. La b zãagda zĩig n kɩɩsd Wẽnnaam naamã. Sɩda, b sũu taab wa nin-yend n na n zab ne sẽn ka to Soabã la ne a Nin-tũusdgã. Yalemd tek woto!
A Zeova yãka Rĩm sẽn yaa tõogda
7. Pʋʋsg pʋgẽ, wãn to la a Zezi pipi karen-biisã wilg Yɩɩl Sõamyã 2:1, 2 pidsgu?
7 A Zezi karen-biisã wilgame tɩ goam nins sẽn be Yɩɩl Sõamyã 2:1, 2 pʋgẽ wã pidsa a Zezi zugu. B sẽn paam namsg b tẽebã yĩngã, b pʋʋsa woto: “Zusoaba [a Zeova], yãmb n naan yĩngr la tẽnga la ko-kãsenga ne bũmb nins fãa sẽn be b pʋsẽ. Yãmb n kɩt tɩ y tʋm-tʋmda sẽn yaa tõnd ba a Davɩɩda gom ne Sɩɩg Sõng pãng n yeele: Yaa bõe tɩ dũniyã buud toɛy-toɛya sũyã puudẽ, la tɩ neba tagsd tags yaalse? Dũniyã rĩm dãmba zẽkda b mense la nanambs lagma taaba n na n zab ne Zusoabã la ne bãmb Kirist. Woto yĩnga, Herood [Ãntipas] ne a Põns Pɩlat lagma taab tẽn-kãngã pʋgẽ ne bu-zẽmse la Israɛll neba n zab ne a Zezi, yãmb tʋm-tʋmd sõnga yãmb sẽn yãkã.” (Tʋʋma 4:24-27; Luk 23:1-12) * N-ye, b zãmba a Zezi sẽn yaa Wẽnnaam sõgen a sẽn zaeyã. La yɩɩn-kãngã ra segd n paama pidsg a to yʋʋm kobs poore.
8. Wãn to la Yɩɩl Sõamyã 2:3 pidsd rũndã-rũndã tẽnsã zutu?
8 Pĩnd wẽndẽ Israɛllã neb sẽn da wa n tar rĩm sẽn yaa ninsaal wala a Davɩɩdã, tẽns la nanambs sẽn da yaa bõn-naands pʋʋsdbã ra sũuda taab n zabd ne Wẽnnaam la rĩm ning fãa a sẽn yãkã. La yaa wãn to tõnd wakatã? Masã tẽnsã pa rat n sak a Zeova la Mesi wã noy ye. Yaa woto yĩng la b sẽn bilgd-b tɩ b yetẽ tɩ: “Bɩ d kao bãmb balgrã n fãag d mens ne bãmb bãensã.” (Yɩɩl Sõamyã 2:3) Nanambsã la tẽnsã na n kɩɩsa noy buud fãa Wẽnnaam la Ned ning a sẽn yãkã sẽn lugli. La vẽenega modgr nins fãa b sẽn na n maan sẽn na yɩl n kao balgr kãensa wã na n yɩɩ zaalem.
A Zeova laada bãmba
9, 10. Bõe yĩng t’a Zeova laad tẽnsã?
9 A Zeova toog kae ne tẽnsã nanambs sẽn modgd to-to fãa n na n soog b mensã ye. Yɩɩll a yiib-n-soabã paasda woto: “Sẽn zĩ-a saasẽ wã laadame, Zusoaba laada bãmba.” (Yɩɩl Sõamyã 2:4) Wẽnnaam pidsda a raabã la a get nanambs kãensã wa zaalem. A geta b tɩtaamã, n laad-b la a yaand-ba. B nong bɩ b wuk b mens ne b sẽn dat n maan bũmb ningã. Sã n yaa ne a Zeova, togame tɩ b la-ba. A laada b sẽn kɩɩsd-a tɩ pa na n yãk nengã yĩnga.
10 Zĩig a to, a yɩɩlã pʋsẽ, a Davɩɩd gomda bɛɛb sẽn yaa ninsaalb la tẽns yelle. A yɩɩnda woto: “La yãmba Zusoaba, Wẽnnaam sẽn yaa Saasẽ-pãng-soaba la Israɛll Wẽnnaam, yik-y n ges-y bu-zẽmsa fãa yelle. Da zoe-y zãmb dãmba sẽn yaa wẽnsa nimbãaneg ye. Bãmb leb n wata zaabr yɛsa, bãmb [wesda] wa baag n gilgd tẽngã. Gese, goam bunda bãmb noy pʋsẽ, sʋʋs bee bãmb no-bɩmsẽ, bãmb yeta woto: ‘Yaa ãnda n na n wʋm?’ La yãmba, Zusoaba, yãmb laada bãmba. Yãmb yaanda bu-zẽmsa fãa.” (Yɩɩl Sõamyã 59:6-9) A Zeova laada tẽnsã b wuk-m-mengã la b sẽn be zũnd-zãnd pʋgẽ n maand yalemd n kɩɩsd-a wã yĩnga.
11. Bõe n maande, tẽnsã sã n mak n na n gɩdg Wẽnnaam daabã?
11 Yɩɩl Sõamyã a yiib-n-soabã kengda tõnd tẽeb n wilgdẽ tɩ Wẽnnaam tõe n welga zu-loɛɛg fãa. D tõe n kɩsa sɩd t’a pidsda a raabã wakat fãa la t’a pa na n tol n bas a sõgen dãmb nins sẽn sakd-a wã ye. (Yɩɩl Sõamyã 94:14) La bõe n na n maane, tẽnsã sã n mak n na n gɩdg a Zeova raabã? Sã n yaa ne yɩɩn-kãngã, Wẽnnaam “na n goma ne bãmb ne sũ-puugri,” wala ne sa-kɛlengã. Sẽn paase, ‘a sũ-yikrã na n kẽesa bãmb dabeem’ wala sa-tãsga.—Yɩɩl Sõamyã 2:5.
Wẽnnaam zĩniga a rĩmã
12. Yɩɩl Sõamyã 2:6 tɩ loee ne rĩm-bʋg zĩnigri?
12 A Zeova sẽn tũnugd ne yɩɩl-gʋlsdã n yet bũmb ning sẽn pʋgdã rĩmsda tẽnsã tɩ sãmbg ka be ye. Wẽnnaam togsame: “Yaa maam n zĩndg m dĩma m Siõ tãn-sõng zugu.” (Yɩɩl Sõamyã 2:6) Siõ tãngã bee Zerizalɛm, zĩig ning a Davɩɩd sẽn zĩnd n dɩ naam Israɛll fãa zugã. La Rĩm ning sẽn yaa Mesi wã pa na n zĩnd geer zug Zerizalɛm pʋgẽ bɩ zĩig a to tẽngã zug ye. Sɩda, a Zeova zoe n zĩniga a Zezi Kirist t’a yaa Rĩm sẽn yaa Mesi, saasẽ Siõ Tãngã zugu.—Wilgri 14:1.
13. Kaool bʋg la a Zeova maan ne a Biriblã?
13 Masã yaa Rĩm ning sẽn yaa Mesi wã n gomde. A yetame: “Mam na n togsa [a Zeova sẽn maan kaool ne a Biriblã Rĩung yĩngã] noore. Bãmb [Wẽnnaam a Zeova] yeela maam yaa: ‘Fo yaa mam biribla. Dũnda maam n dog foom.’ ” (Yɩɩl Sõamyã 2:7) Kirist goma Rĩungã kaool yelle, a sẽn wa n yeel a tʋm-tʋmdbã woto wã: “Yãmb yaa neb sẽn pa ne maam m makra pʋgẽ n ka bas ye. Yaa woto yĩng la mam kõt yãmb soolem wa m Ba sẽn kõ maam soolmã.”—Luk 22:28, 29.
14. Bõe yĩng tɩ b tõe n yeel t’a Zezi ra tara sor n na n yɩ rĩm tɩ kɩɩsg ka be?
14 Wa b sẽn deng n togs Yɩɩl Sõamyã 2:7 pʋgẽ wã, a Zezi lisgẽ wã a Zeova wilgame t’a ya a Biribla, la a leb n wilga rẽ a sẽn vʋʋg-a wala malɛkã. (Mark 1:9-11; Rom dãmba 1:4; Hebre dãmba 1:5; 5:5) N-ye, saasẽ Rĩungã Rĩm yaa Wẽnnaam Biribl yend a sẽn naanã. (Zã 3:16) A Zezi sẽn da yaa rĩm a Davɩɩd yagengã yĩngã, a ra tara sor n na n yɩ rĩm tɩ kɩɩsg kaẽ ye. (2 Sãmwɛll 7:4-17; Matɩe 1:6, 16) Sã n yaa ne yɩɩn-kãngã, Wẽnnaam yeela a Biriblã: “Kos maam, la mam na kõ foom dũniyã soolem fãa tɩ f sooge. La fo soolem na n taa dũniyã tɛk fãa.”—Yɩɩl Sõamyã 2:8.
15. Bõe yĩng t’a Zezi kot n na n soog tẽnsã?
15 Rĩmã sẽn yaa Wẽnnaam mengã Biriblã pʋgda a Zeova naamã wɛɛngẽ. A Zezi ya a Zeova sõgen sẽn paam makr n tar kɩs-sɩd la b sẽn tar bas-m-yam ne. Sẽn paase, a Zezi sẽn yaa Wẽnnaam pipi Biriblã yĩnga, a tara rogem pʋɩɩre. Sɩda, a Zezi Kirist yaa “Wẽnnaam sẽn ka tõe n yã wẽnego, la Bi-kãseng sẽn yɩɩd bõn-naandsa fãa.” (Kolos rãmba 1:15) Sẽn ket masã ya a kos Wẽnnaam bal t’a kõ-a ‘dũniyã soolem fãa t’a sooge, t’a soolem ta dũniyã tɛk fãa.’ A Zezi kota woto, ‘ninsaalbã sẽn kõt-a sũ-noogã’ yĩnga, la a sẽn tʋll wʋsg n pids a saasẽ Ba wã raab sẽn tɩ loe ne tẽngã la ãdem-biisã yĩnga.—Yelbũna 8:30, 31.
A Zeova noor tẽnsã yĩngã
16, 17. Sã n yaa ne Yɩɩl Sõamyã 2:9, bõe n gũud tẽnsã?
16 Yɩɩl sõamyã a yiib-n-soabã sẽn paamd pidsg masã wã yĩnga, sẽn yaa a Zezi belmã ninsaal nif sẽn pa ne wã sasa, yaa bõe n gũud tẽnsã? Ka la bilfu, Rĩmã na n pidsa Wẽnnaam togs-kãngã: “Fo na n sãama bãmb [tẽnsã] ne kut dasaare. Fo na n wãa bãmb wa yagd rʋko.”—Yɩɩl Sõamyã 2:9.
17 Pĩnd wẽndẽ rĩm dãmbã naam dasab ra makda b zu-sobendã. Naam dasab kẽer da maana ne kut wala a soab ning yell b sẽn gom yɩɩn-kãngã pʋgẽ wã. Mak-kãngã wilgdame tɩ Kirist sẽn yaa Rĩmã na n sãama tẽnsã nana-nana. Kut dasaar sã n wẽ tãnd rʋko a bõgsd-a-la zãnga.
18, 19. Sẽn na yɩl n ta Wẽnnaam yam, bõe la dũniyã rĩm dãmb segd n maane?
18 Yaa tɩlae tɩ tẽnsã nanambs paam sãoong woto bɩ? Ayo, bala yɩɩl-gʋlsdã yet-b lame tɩ b maan woto: “La masã, rĩm dãmba, bɩ y bãnge! Dũniyã bʋ-kaoodba, rɩk-y yam!” (Yɩɩl Sõamyã 2:10) B yeta rĩm dãmbã tɩ b kelg neer n tall yam yellã taoore. B segd n bãngame tɩ b gɛɛlã yaa faoore, b sã n mak rẽ ne Wẽnnaam Rĩungã sẽn na n maan bũmb ning ãdem-biisã yĩngã.
19 Sẽn na yɩl n ta Wẽnnaam yam, dũniyã rĩm dãmb segd n toeema b manesmã. B sagend-b lame tɩ b “sak [a Zeova] ne rabeem n lagem sũ-noog ne rigbu.” (Yɩɩl Sõamyã 2:11) La na n yɩɩ wãn to, b sã n maan dẽ? Wall tɩ b sũy puugã, b tõe n maana sũ-noogo, Rĩm sẽn yaa Mesi wã sẽn kõt-b saagr ninga yĩnga. Yaa tɩlae tɩ dũniyã nanambs bas b wuk-m-mengã la b tɩtaamã b sẽn wilgd b naamã pʋgẽ wã. Sẽn paase, yaa b ra kaoos la b toeem ye, la b tall yam a Zeova naamã sẽn ka mak-n-taar la a Rĩmã sẽn yaa Mesi wã pãng ned sẽn pa tõe n gɩdgã taoore.
“Bɩ y wõgemd n waoog” Biriblã
20, 21. B yeela tẽnsã nanambs tɩ b maan Biriblã bõe?
20 Yɩɩl Sõamyã a yiib-n-soabã taasda tẽnsã nanambs booll b sẽn maan ne nimbãan-zoeere. B pa segd n sũ taab n zab ne Wẽnnaam ye, b segd n saka sagl-kãngã: “Bɩ wõgemd n waoog [biriblã], tɩ [Wẽnnaam a Zeova] sũur da wa puug tɩ b sãam yãmb ye; tɩ bõe, bãmb sũur puugda tao-tao.” (Yɩɩl Sõamyã 2:12a) Naab sẽn ka to a Zeova sã n yiis noore, b segd n sak-a lame. Wẽnnaam sẽn wa n zĩnig a Biriblã naamã geer zugã, dũniyã nanambs ra pa segd n ‘tags tags-yaals’ ye. B ra segd n saka Rĩmã zãng-zãng la tao-tao.
21 Gom-bil ning b sẽn lebg Yɩɩl Sõamyã 2:12 pʋgẽ tɩ ‘wõgemd n waoogã,’ ne hebre ra yaa “moke.” B sẽn da wa n gʋlsd yɩɩn-kãngã wã, mokr da yaa zood wilgri, la ned ra mokda sãambã a sẽn deeg a yiri. Mokr da tõe n wilgame me tɩ f kɩsa sɩd ne neda. (1 Sãmwɛll 10:1) Yɩɩl Sõamyã a yiib-n-soab verse kãngã pʋgẽ, Wẽnnaam kõta tẽnsã noor tɩ b wõgemd n waoog bɩ b reeg a Biriblã sẽn yaa Rĩm a sẽn yãkã.
22. Tẽnsã nanambs segd n saka keoog-bʋgo?
22 Neb nins sẽn zãgsd Rĩm ning Wẽnnaam sẽn yãkã tʋʋsda a Zeova. B kɩɩsda Wẽnnaam a Zeova ãndũni naam sẽn ka to wã, la tõog ning a sẽn tar n na n yãk Rĩm ning sẽn ya a sõma n yɩɩd t’a rɩ naam ãdem-biisã zutã. Tẽnsã nanambs na n yãame tɩ Wẽnnaam sũ-yikrã na n waa b zut zĩig pʋgẽ, sasa ning b sẽn maood n na n pids b mensã raabã. ‘A sũur puugda tao-tao.’ Tẽnsã nanambs segd n saka keoog-kãngã ne mi-beoog la b tʋm tɩ zems ne rẽ. B sã n maan woto, b na n fãaga b yõyã.
23. Nebã yembr-yembr ket n tõe n maana bõe?
23 Yɩɩn-kãngã baasda woto: “Neb nins sẽn baood zĩ-lilldg [a Zeova] nengẽ wã na n paama sũ-noogo.” (Yɩɩl Sõamyã 2:12b) Nebã yembr-yembr ket n tõe n paama fãagre. Yaa woto me ne nanambsã menga, sẽn teend tẽnsã magbã. B tõe n zoe n kẽnga a Zeova nengẽ, sẽn kõt solgr zĩig a Rĩungã naam wakatã. La b segd n sakame tɩ Mesi Rĩungã nan pa sãam tẽns nins sẽn kɩɩsd-a wã ye.
24. Wãn to la d tõe n paam vɩɩm sẽn be sũ-noog n yɩɩda, baa dũni kãngã sẽn gudgã pʋgẽ?
24 Tõnd sã n zãms Gʋlsg Sõamyã neer la d tũ a saglsã d vɩɩmã pʋgẽ, d tõe n paama vɩɩm sẽn kõt sũ-noog n yɩɩda, baa masã dũniyã sẽn gudgã pʋgẽ. Gʋlsg Sõamyã tũub paasda zakã neb sũ-noogo, la kɩtdẽ tɩ d põsd dũni kãngã yɩɩr la a rabeem wʋsgo. Biiblã noy tũub kõta tõnd bas-m-yam tɩ d tata Naandã yam. Sã n dok ãndũniyã Naab sẽn ka to wã, ned a to pa tõe n kõ “vɩɩm ninga sẽn be masã wã, la vɩɩm ninga sẽn watã,” a sã n wa sãam neb nins sẽn kɩɩsd sẽn yaa tɩrg n zãgsd a Rĩungã naamã ye.—1 Tɩmote 4:8.
25. ‘A Zeova noorã’ sẽn pa tõe n pa pidsã yĩnga, bõe la d tõe n gũ tõnd wakatã?
25 ‘A Zeova noorã’ pa tõe n pa pids ye. Wẽnnaam sẽn yaa tõnd Naandã yĩnga, a mii sẽn yaa sõma n yɩɩd ne ãdem-biisã, la a na n pidsa a raabã n ning sakdbã bark n kõ-b laafɩ, sũ-noog la bãan sẽn kaoosd a Biribl nongrã Rĩung naam wakate. No-rɛɛs a Daniɛll gʋlsa woto tõnd wakatã wɛɛngẽ: “La rĩm dãmb kãens sẽn dɩt naam wakate, Wẽnnaam sẽn be yĩngra na n kɩtame tɩ soolem sẽn ka tõe n sãam . . . zĩndi. A na n wãa soolem kãens fãa tɩ b menem n bas-a t’a yaas wakat fãa.” (Daniɛll 2:44) Rẽnd sɩd-sɩda, yaa masã la d segd n ‘wõgemd n waoog Biriblã’ la d maan Naab sẽn ka to a Zeova raabã!
[Tẽngr not rãmbã]
^ sull 4 Sɩngrẽ wã, ra yaa rĩm a Davɩɩd n da yaa “nin-tũusdgã,” tɩ “dũniyã rĩm dãmba” ra yaa Filisti nanambsã sẽn da sũud b tãb-biisã n zabd ne-a wã.
^ sull 7 Kiris-neb gɛrk Gʋlsg Sõamyã verse rãmb a taab me n wilg t’a Zezi yaa Wẽnnaam sẽn yãk-a soabã b sẽn gom a soab ning yell yɩɩl sõamyã yiib-n-soab pʋgẽ wã. Rẽ yaa vẽenega, d sã n mak Yɩɩl Sõamyã 2:7 ne Tʋʋma 13:32, 33 la ne Hebre dãmba 1:5; 5:5. Ges-y Yɩɩl Sõamyã 2:9 la Wilgri 2:27 me.
Wãn to la y na n leoke?
• Tẽnsã ‘tagsda tags-yaals’ bʋse?
• Bõe yĩng t’a Zeova laad tẽnsã?
• Wẽnnaam noorã tẽnsã yĩng yaa bõe?
• B yeela tẽnsã nanambs tɩ b maan Biriblã bõe?
[Zãmsgã sogsgã]
[Foto, seb-neng 15]
Israɛll nanambsã ne a nin-buiidã zãmba a Zezi Kirist
[Foto, seb-neng 16]
B kõo Kirist naam t’a yaa Rĩm saasẽ Siõ Tãngã zugu