Teeg-y Wẽnnaam vʋʋsem sõngã, y sã n wa maood ne vɩɩmã yɛl sẽn toeemdã

“Nang pãng n ta Wẽnnaam yam.”—2 TƖMOTE 2:15.

1. Toeen-bʋs n yaa makr n kõ tõnd tẽebã?

DŨNIYÃ sẽn gũbg tõndã tara toeeng wakat fãa. Tõnd nee bãngrã sẽn kẽngd taoore, te-paal sẽn yit n paasdẽ, la nebã me sẽn kɩɩsd no-tɩrsã wʋsg n paasdẽ. Wa tõnd sẽn yã sõsg ning sẽn loogã pʋgẽ wã, kiris-nebã segd n zãgsa dũni kãngã wẽn-kɩɩsg yamã. La dũniyã sẽn toeemdã, tõnd me toeemda ne manesem wʋsgo. Tõnd sẽn da yaa kambã d lebgda kãsemba. D tõe n paamame bɩ d kong arzɛka, yĩns laafɩ la nin-nongdse. Toeen-kãens wʋsg yɩɩda tõnd pãnga, la b tõe n waa ne mak-toos n kõ tõnd tẽebã.

2. A Davɩɩd vɩɩmã pʋgẽ, wãn to la yɛlã tall toeengo?

² Ned-ned vɩɩm n toeem wʋsg wa a Zese biribl a Davɩɩd vɩɩmã. A Davɩɩd sẽn da yaa talg la pe-kɩɩmã, tao-tao a lebga a buudã gãndaoog yʋʋr sẽn yi. Rẽ poore, a yɩɩ ned sẽn da zoet n baood a menga, tɩ rĩm sẽn yaa sũ-ki-ned ra rigd-a wa rũng n dat n kʋ. Rẽ poore, a Davɩɩd lebga rĩma, n zab n deeg tẽnse. A namsa a yel-wẽn-kãsengã sẽn wa ne tood ninsã yĩnga. Yel-beed la welgr n wa a zakã pʋgẽ. A paama arzɛka, n kʋʋle, n nams kʋʋlmã tood yĩnga. La baa ne a Davɩɩd vɩɩmã sẽn toeem naoor wʋsgã, a vɩɩmã tõre a wilga kɩs-sɩd la bas-yard ne a Zeova la ne a vʋʋsem sõngã. A maana a sẽn tõe fãa n yɩ ned sẽn ‘tat Wẽnnaam yam,’ la Wẽnnaam ning-a-la barka. (2 Tɩmote 2:15) Baa ne tõnd yɛlã sẽn yaa toor ne a Davɩɩd rẽndã, d tõe n paama zãmsg ne a sẽn mao ne a vɩɩmã zu-loeesã to-to wã. A makrã tõe n sõnga tõnd tɩ d bãng d sẽn tõe n ket n paamd Wẽnnaam vʋʋsem sõngã sõngr to-to, d sã n wa segd zu-loees d vɩɩmã pʋgẽ.

A Davɩɩd sik-m-mengã yaa mak-sõngo

3, 4. Wãn to la a Davɩɩd sẽn da yaa pe-kɩɩm balã yʋʋr wa n yi Israɛll fãa?

³ A Davɩɩd sẽn da yaa biigã t’a yʋʋrã ra pa yi a zakẽ wã meng ye. No-rɛɛs a Sãmwɛll sẽn wa n wa Betlehɛmã, a Davɩɩd ba wã wilg-a-la a komdibli a yopoe bala, n bas a nii soab a Davɩɩd sẽn yaa yao zʋʋgã t’a gũud piisi. Ne rẽ fãa, a Zeova ra yãka a Davɩɩd t’a yɩ Israɛll beoog-daar dĩma. B boola a Davɩɩd t’a yi weoogẽ n wa. Rẽ poore, Biiblã yetame: “A Sãmwɛll dɩka yɩɩll ninga sẽn tar rĩung kaama n ning kaama a zug a ba-biisa sʋka. La sẽn sɩng ne baraare, Zusoaba sɩɩga kẽe a Davɩɩd.” (1 Sãmwɛll 16:12, 13) A Davɩɩd ra teega sɩɩg bɩ vʋʋsem sõng kãng a vɩɩmã tõre.

⁴ Pa kaoos la pe-kɩɩm kãngã yʋʋr yi Israɛll tẽngã fãa ye. B bool-a lame t’a wa yɩ rĩmã sõgen la a wẽed pɛndg t’a kelgdẽ. A kʋʋ sodaag a Goliat sẽn da yaa nin-wobg sẽn yaa nin-toaag tɩ Israɛll sodaas sẽn tar zabr minim meng ra zoet-a wã. B sẽn yãk a Davɩɩd t’a yɩ sodaasã taoor soabã, a zaba ne Filisti nebã n tõoge. Nin-buiidã ra nong-a lame. B maana yɩɩl n pẽg-a. Sẽn deng rẽ, rĩm a Sayull sagend a ye n bilg bi-bɩɩg a Davɩɩd wa ned sẽn “mi kʋnd wẽeb sõama,” la wa “gãndaoog n tar pãng zabr pʋgẽ. Yẽ mii goama la a yaa rasãnga.”—1 Sãmwɛll 16:18; 17:23, 24, 45-51; 18:5-7.

5. Bõe n da tõe n kɩt t’a Davɩɩd yɩ tɩtaam soaba, la wãn to la d mi t’a pa yɩ woto?

⁵ Yʋʋre, rasãnde, bi-bɩɩlem, gom-minim, mizik minim, zabr minim, Wẽnnaam lohorem. Ra wõnda a Davɩɩd ra tara wã fãa. Bõn-kãensã a ye meng ra tõe n kɩtame t’a Davɩɩd lebg tɩtaam soaba. La b ba a ye pa kɩt t’a yɩ tɩtaam soab ye. Ges-y a Davɩɩd leokr sẽn yɩ to-to, rĩm a Sayull sẽn pʋlem-a a bipuglã. A Davɩɩd leoka woto ne sik-m-meng hakɩka: “Maam ne m buuda la m ba-yir dãmba bee yɛ Israɛll neba sʋka n lebgd rĩm dɛɛmba?” (1 Sãmwɛll 18:18) Mit a yembr wilga verse kãngã võor n gʋlse: “A Davɩɩd da rat n yeelame tɩ yẽ mengã tõodo, a tarmã la a sẽn yit roog ningã ra pa tõe n kɩt t’a paam n yɩ rĩmã rɛɛmb ye.”

6. Bõe yĩng tɩ d segd n bao sik-m-menga?

⁶ A Davɩɩd sẽn da tar sik-m-mengã ya a sẽn da sak n deeg t’a Zeova yɩɩda ninsaalbã sẽn pa zems zãngã, bũmb fãa pʋgẽ hal wʋsgã yĩnga. Linga a Davɩɩd wʋsgo, Wẽnnaam sẽn tags ninsaal yell mengã. (Yɩɩl Sõamyã 144:3) A Davɩɩd ra leb n miime t’a sẽn da yaa kãseng to-to fãa, ra ya a Zeova sẽn sik a meng n sak n na n sõng-a, n kogl-a la a ges a yellã yĩnga. (Yɩɩl Sõamyã 18:36) Ad sɩd yaa zãmsg meng n kõ tõndo! Tõnd tõodã, yel-bɛd nins d sẽn tõog n maanã, la tʋʋm nins b sẽn bobl-d Wẽnnaam tʋʋmdã pʋgẽ wã pa segd abada n kɩt tɩ d yɩ wuk-m-mens rãmb ye. Tʋm-tʋmd a Poll gʋlsa woto: “La yãmb tara bõe yãmb sẽn ka reege? La a sã n yaa tɩ yãmb deegame, bõe tɩ yãmb wukd yãmb mens wa yãmb sẽn ka reege?” (1 Korẽnt dãmba 4:7) Sẽn na yɩl n paam Wẽnnaam vʋʋsem sõngã la d ta a yam, d segdame n bao sik-m-meng la d kell n tall-a.—Zak 4:6.

“Da tug-y beem ye”

7. So-bʋg la a Davɩɩd ra paam n tõe n kʋ rĩm a Sayulli?

⁷ A Davɩɩd yʋʋrã sẽn yi wã pa kɩt t’a tall wuk-m-meng ye, la rẽ kɩtame tɩ rĩm a Sayull Wẽnnaam vʋʋsem sõngã sẽn yi n basã da tar sũ-kiir ne a Davɩɩd hali n dat n kʋ-a. Baa ne a Davɩɩd sẽn pa maan wẽngã, a zoe n baoa a yõor n tɩ be weoogẽ wã. Vugri, rĩm a Sayull da rigda a Davɩɩd n pa basdẽ n wa kẽ tãng bokẽ n pa miẽ t’a Davɩɩd ne a tũud-n-taasã ra solga be ye. A Davɩɩd sodaasã tagsame tɩ yaa Wẽnnaam n pak sor n kõ-a t’a kʋ a Sayulli, la b sagl-a lame t’a kʋ-a. D mams n ges b sẽn be tãng bokã likẽ n walemd a Davɩɩde: “Gese, Zusoaba ra yeelame tɩ b na n kõo yãmb y bɛ  wã rũnda tɩ y maan y sẽn data.”—1 Sãmwɛll 24:3-7.

8. Bõe yĩng t’a Davɩɩd yõk a meng n pa rok a sũuri?

⁸ A Davɩɩd zãgsame t’a kõn maan a Sayull wẽng ye. A sẽn da tar tẽeb la sũ-marã, a basa yɛlã a Zeova nugẽ. Rĩmã sẽn yi tãngã bokẽ wã poore, a Davɩɩd bool-a lame n yeele: “Bɩ Zusoaba bʋ tõnd bʋʋdo. Yaa Zusoabã n na n dol yãmb n kõ-ma, mam yẽ kõn sɩɩs yãmb ye.” (1 Sãmwɛll 24:13) Baa ne a Davɩɩd sẽn da mi t’a Sayull da ka bʋʋmã, a pa rok a sũur ye. A leb n pa gom a Sayull wẽng bɩ n tʋʋs-a ye. Yɛl a taab pʋsẽ, a Davɩɩd yõka a meng n pa bao n dok a sũur ye. La a basame t’a Zeova wa rems yɛlã.—1 Sãmwɛll 25:32-34; 26:10, 11.

9. Bõe yĩng tɩ d pa segd n dok d sũuri, d sã n segd kɩɩsg bɩ namsg d tẽebã yĩnga?

⁹ Wala a Davɩɩde, y tõe n wa bee zu-loees pʋgẽ. Tõe tɩ yaa y karen-bi-taase, y tʋmd-n-taase, y zakã neb bɩ neb a taab sẽn pa nong yãmb tẽebã n kɩɩsd-y bɩ b namsd-y rẽ yĩnga. Ra rok-y y sũur ye. Gũ-y a Zeova, n kos-a a vʋʋsem sõngã t’a sõng-yã. Yãmb yel-manesmã sẽn yaa sõma wã tõe n toeema nin-kãensã sẽn pa tẽedã tɩ b wa lebg tẽedba. (1 Pɩɛɛr 3:1) Sẽn yaa to-to fãa, kɩs-y sɩd t’a Zeova nee y zu-loɛɛgã, la a na n maana bũmb wakat sẽn zems sasa. Tʋm-tʋmd a Poll gʋlsa woto: “Mam zo-nongdse, da tug-y beem ye. Bas-y taale; tɩ bõe, a gʋlsame: ‘Zusoaba yetame yaa: Sũ-dokr yaa maam n so, la mam na keo.’ ”—Rom dãmba 12:19.

“Sak-y kiblgu”

10. Wãn to la a Davɩɩd lʋɩ yel-wẽnd pʋgẽ, la wãn to la a mak n na n lud-a?

¹⁰ Yʋʋm loogame. A Davɩɩd lebga rĩm nebã sẽn nonge, t’a yʋʋr yi wʋsgo. A sẽn yɩ Wẽnnaam sõgen-kãsenga, n gʋls yɩɩl sẽn be yamleoog n pẽg a Zeova wã yĩnga, tõe n kɩtame tɩ d tags nana-nana t’a yaa ned sẽn pa tol n tõe n maan yel-wẽn-kãseng ye. La a yaool n konga wʋsgo. Vugri, rĩmã ra bee gasg zug n get pʋg-neer sẽn sood koom. T’a sok n bãng a sẽn ya a soaba. A sẽn bãng tɩ pagã ra ya a Batseba la t’a sɩd a Uri ra bee zabrẽ, a Davɩɩd tʋmame tɩ b tɩ tall-a n wa, la a gãand-a lame. Kaoosg poore, a mikame tɩ pagã rɩka pʋga. Ad b sã n da bãng yellã, ra na n yɩɩ yãnd menga! A Moiiz Tõogã tũub sasa, yoob sɩbgr da yaa kũum. Rĩmã tagsame t’a ra tõe n luda yel-wẽndã. Woto, a toola tãb-biisã zĩigẽ n kɩt tɩ b kõ a Uri noor t’a lebg n wa Zerizalɛm. A Davɩɩd ra tẽedame t’a Uri ra na n kẽnga yʋng n tɩ gãand ne a Batseba, la yɛlã pa yɩ woto ye. A Davɩɩd mak n kongame n tʋm a Uri zabrẽ wã ne lɛtr t’a tɩ kõ a Zoaab sẽn da yaa sodaasã naabã. Lɛtrã ra wilgdame tɩ b ning a Uri zabrã zĩig ning sẽn na n tũ ne a yõore. A Zoaab sakame, la b sɩd kʋʋ a Uri. A Batseba sẽn kʋm a sɩdã kũum wa minungã sẽn da baoodã n sa, a Davɩɩd peeg-a lame n maan a paga.—2 Sãmwɛll 11:1-27.

11. Kɩba-bʋg la a Natã togs a Davɩɩde, la a manesem yɩɩ wãn to?

¹¹ Yaa wa zãmbã tõogame, baa ne a Davɩɩd sẽn da segd n mi tɩ yellã fãa ra yaa vẽeneg a Zeova taoorã. (Hebre dãmba 4:13) Kiis n looge, tɩ biigã roge. Rẽ poore, ne Wẽnnaam sor-wilgri, no-rɛɛs a Natã kẽnga a Davɩɩd nengẽ. No-rɛɛsã togs-a-la kɩbar sẽn gomd arzɛk soab sẽn tar piis wʋsgo, sẽn deeg rao sẽn yaa naong soab pe-yɛng a sẽn nong wʋsg n kʋ yelle. Kɩbarã kɩtame t’a Davɩɩd wilg t’a nonga sẽn yaa tɩrga, la rẽ pa kɩt t’a tags kɩbarã võor meng-meng zug ye. A Davɩɩd yɩɩ tao-tao n kao arzɛk soabã bʋʋdo. A sũurã yikame t’a yeel a Natã: “Ned ninga sẽn maan woto wã tog n kiimi.”—2 Sãmwɛll 12:1-6.

12. A Zeova kaoa a Davɩɩd bʋʋd wãn to?

¹² No-rɛɛsã yeelame: “Yaa yãmb la rao-kãnga.” A Davɩɩd da kaoa a meng bʋʋdo. Sãmbg sẽn ka be, a Davɩɩd sũ-yikrã toeem n lebga yãnd la sũ-sãang wʋsgo. Ne yɛɛsg wʋsgo, a kelga a Natã sẽn da wa n togsd a Zeova bʋ-kaoorã b sẽn pa tõe n kɩɩsã. Pa yɩ belsg goam ye. A Davɩɩd paooga a Zeova goama n maan sẽn da yaa wẽnga. A ra pa  kɩtame tɩ bɛɛbã sʋʋg kʋ a Uri la? Sʋʋg kõn zãag ne a Davɩɩd zakã ye. A pa solg n dɩka a Uri pagã la? Wẽng sẽn wõnd woto n na n paam-a, la pa na n yɩ ne solgr ye, yaa neba fãa nifẽ.—2 Sãmwɛll 12:7-12.

13. A Davɩɩd manesem yɩɩ wãn to a Zeova kiblgã taoore?

¹³ Zu-noogo, a Davɩɩd pa kɩɩs t’a pa tar taal ye. A pa yik a sũur ne no-rɛɛs a Natã ye. A pa ning neb a taab taale, a pa bao bʋʋm me n na n kõ a meng ne wẽng ning a sẽn maanã ye. A Davɩɩd pa kɩɩs a yel-wẽndã ye, a sak n deegame tɩ yaa yẽ meng yelle, n yeele: “Mam beega Zusoabã.” (2 Sãmwɛll 12:13) Yɩɩl Sõamyã 51 wã wilgda a sũ-sãang kãseng a kongrã yĩnga la a sẽn sɩd tek yam n kos sugrã. A bõosa a Zeova woto: “Da rig-y maam tɩ m yi yãmb nengẽ ye, la y ra yiis yãmb sɩɩga sẽn yaa sõnga mam pʋgẽ ye.” A ra tẽedame t’a Zeova nimbãan-zoeerã yĩnga a ra pa na n paoog “sik-m-meng yam ne sũ-sãoong” yel-wẽnd yĩng ye. (Yɩɩl Sõamyã 51:13, 19) A Davɩɩd kell n teega Wẽnnaam vʋʋsem sõngã. Baa ne a Zeova sẽn pa kogla Davɩɩd ne a yel-wẽndã biis sẽn yɩ toog wʋsgã, a kõ-a-la sugri.

14. A Zeova sã n kibl tõndo, d manesem segd n yɩɩ wãn to?

¹⁴ Tõnd fãa pa zems zãng ye, la d fãa maanda yel-wẽna. (Rom dãmba 3:23) Wakat ninga, d tõe n maana yel-wẽn-kãseng wa a Davɩɩde. Wala ba sẽn tar nonglem sẽn kibind a kambã, a Zeova me remsda neb nins sẽn baood n na n maan a raabã. Yaa sɩd tɩ kiblgã bee nafre, la a sakr pa nana ye. Sɩda, wakat ninga a kõta ‘sũ-sãanga.’ (Hebre dãmba 12:6, 11) La tõnd sã n ‘kelg zãmsgã’ bɩ n sak kiblgã, d tõe n ye paama zems-n-taar ne a Zeova. (Yelbũna 8:33) Sẽn na yɩl n ket n paamd a Zeova vʋʋsem sõngã, d segd n saka remsgo, la d modg n paam n ta Wẽnnaam yam.

Ra teeg-y arzɛg-sɛtma ye

15. a) Neb kẽer rɩkda b arzɛkã n maand bõe? b) A Davɩɩd ra tʋllame n dɩk a arzɛkã n maan bõe?

¹⁵ Bũmb pa wilgd t’a Davɩɩd yita zak neb sẽn da tar ziiri, bɩ zak neb nus sẽn da zãad pʋgẽ ye. La a Davɩɩd naamã wakate, a paama arzɛk wʋsgo. Wa y sẽn mi wã, neb wʋsg bĩngda b arzɛkã, la ne yão-beedo b baoodame n dat t’a fɩɩg wʋsgo, bɩ b rɩt-a b yembre. Neb a taab rɩkda b ligdã n baood ziiri. (Matɩe 6:2) A Davɩɩd pa maan woto ne a arzɛkã ye. A ra tʋllame n waoog a Zeova. A togsa a Natã t’a tʋll n mee roog n kõ a Zeova, tɩ kaoolã koglg sẽn da be Zerizalɛm ‘zãnd tẽngr’ sasa kãnga wã zĩnd ro-kãng pʋgẽ. A Zeova sũur da yaa noog ne a Davɩɩd sẽn da tʋll n maan bũmb ningã, la a yeela a Natã t’a togs-a tɩ yaa yẽ biribl a Salomo n na n me wẽn-doogã.—2 Sãmwɛll 7:1, 2, 12, 13.

16. Segl-bʋs la a Davɩɩd maan wẽnd-doogã meeb yĩnga?

¹⁶ A Davɩɩd tigma tʋʋm teed sẽn na yɩl tɩ b wa rɩk n me ro-kãsengã. A yeela a Salomo tɩ: “Mam modgame n paam sãnem sẽn kolg tonn tus a naase la wanzuri sẽn kolg tonn tus  pis-naase. La zũud ne kut n yɩɩd b sẽn [pa] tõe n mak n bãng a zɩslem la raad ne kug me Zusoaba rooga yĩnga. Bɩ fo me bao n paase.” A mengã arzɛkã pʋgẽ, a yãka sãnem talã 3 000 la wanzũri talã 7 000 n kõ. * (1 Kɩbaya 22:14; 29:3, 4) A Davɩɩd pa kõ wʋsg woto tɩ neba ges-a ye, la ra ya a sẽn tẽed Wẽnnaam a Zeova la a wẽn-sakrã wilgri. A wilga a arzɛkã sẽn yitẽ wã, n yeel a Zeova tɩ: “Bũmba fãa yita yãmb nengẽ. La tõnd yãka bũmb nins yãmb sẽn kõ tõndã n lebs yãmba.” (1 Kɩbaya 29:14) A Davɩɩd sẽn da yaa kõtã, kɩtame t’a maan a sẽn da tõe fãa n kɩt tɩ baleng hakɩkã kẽng taoore.

17. Wãn to la saglg ning sẽn be 1 Tɩmote 6:17-19 pʋgẽ wã pak arzɛk rãmbã la naong rãmbã?

¹⁷ Bɩ tõnd me rɩk d laogã n maan neere. D ra yɩ neb sẽn nong laog ye, d bao n ta Wẽnnaam yam tɩ rẽ la sõma n yɩɩda, tɩ yaa woto la yam ne sũ-noog hakɩkã sore. A Poll gʋlsame: “Togs neb nins sẽn tar dũniyã arzɛgsa tɩ b ra zẽk b mens ye, la b ra teeg arzɛg-sɛtma ye, bɩ b teeg Wẽnnaam sẽn vɩya sẽn kõt tõnd bũmb fãa tɩ sek tõnd tɩ d paam ne sũ-noogo. Togs bãmb tɩ b maan neer tɩ tʋʋm sõama yɩ bãmb arzegse, la b yɩ kõatb sẽn kõt ne sũ-noogo. La woto, bãmb na n bĩnga arzɛgs beoog yĩnga yẽbgr ninga sẽn tar pãnga zugu, tɩ bãmb tõe n paam vɩɩm sẽn yaa sɩda.” (1 Tɩmote 6:17-19) Baa tõnd yɛlã sẽn yaa to-to laogã wɛɛngẽ, bɩ d teeg Wẽnnaam vʋʋsem sõngã la d tall vɩɩm manesem sẽn na n kɩt tɩ d paam ‘Wẽnnaam arzɛgse.’ (Luk 12:21) Bũmb kae sẽn tar yõod n yɩɩd d sẽn na n ta d saasẽ Ba wã sẽn tar nonglmã yam ye.

Yɩ ned sẽn tat Wẽnnaam yam

18. Wãn to la a Davɩɩd kõ kiris-nebã mak-sõngo?

¹⁸ A Davɩɩd vɩɩmã tõre, a baoome n na n ta a Zeova yam. A yeela woto yɩɩll pʋgẽ: “Bɩ y zoe mam nimbãanega, mam Wẽnnaam, bɩ y zoe mam nimbãanega. Tɩ bõe, mam wata yãmb nengẽ n na n soonde.” (Yɩɩl Sõamyã 57:2) A sẽn teeg a Zeova wã pa yɩ zaalem ye. A Davɩɩd lebga nin-kẽema, sẽn “kʋʋl sũ-noog kʋʋlem.” (1 Kɩbaya 23:1, Sebr Sõngo) Baa ne a Davɩɩd sẽn maan tudg-kãsemsã, b tẽra a yell wa ned sẽn zĩnd Wẽnnaam kaset rãmb wʋsgã sẽn wilg tẽeb sẽn yaa kãsengã sʋka.—Hebre dãmba 11:32.

19. Wãn to la d tõe n yɩ ned sẽn tat Wẽnnaam yam?

¹⁹ Yãmb vɩɩmã pʋgẽ, yɛlã sã n toeeme, tẽeg-y tɩ wala a Zeova sẽn sõng a Davɩɩd n kõ-a pãng la a rems-a wã, a tõe n maana woto me n kõ yãmba. Wala a Davɩɩde, tʋm-tʋmd a Poll yãa toeeng wʋsg a vɩɩmã pʋgẽ. Ne rẽ fãa, yẽ me kell n yɩɩ sɩd soab n teeg Wẽnnaam vʋʋsem sõngã. A gʋlsame: “Mam tõe n maana bũmb fãa ne [Wẽnnaam] pãnga bãmb sẽn kõt maama.” (Filip rãmba 4:12, 13) D sã n teeg a Zeova a na n sõnga tõnd tɩ d tõoge. A ratame tɩ d tõoge. D sã n kelg-a la d kolg-a, a na n kõo tõnd pãng tɩ d maan a raabã. La d sã n ket n teegd Wẽnnaam vʋʋsem sõngã, d na n tõog n ‘taa Wẽnnaam yam’ masã la wakat sẽn pa sate.—2 Tɩmote 2:15.

Wãn to la y na n leokẽ?

• Wãn to la d tõe n zãag d mens ne wuk-m-menga?

• Bõe yĩng tɩ d pa segd n dok d sũuri?

• Tags-bʋg la d segd n tall kiblgã zugu?

• Bõe yĩng tɩ d segd n teeg Wẽnnaam la d ra teeg arzɛkã?

[Tẽngr note]

[Zãmsgã sogsgã]

 [Foto, seb-neng 28]

A Davɩɩd teega Wẽnnaam vʋʋsem sõngã la a bao n ta a yam. Y maanda woto bɩ?

[Foto, seb-neng 30]

“Bũmba fãa yita yãmb nengẽ. La tõnd yãka bũmb nins yãmb sẽn kõ tõndã n lebs yãmba”