B maoo ne yĩng gõose

“B kõo maam yĩng gõaag sẽn yaa Sʋɩtãana tʋm-tʋmd t’a nams maam.”—2 KORẼNT DÃMBA 12:7.

1. Zu-loees kẽer bʋs la nebã maood ne rũndã-rũndã?

YÃMB maooda ne makr sẽn be wakat fãa bɩ? Sã n yaa woto y pa y yembr ye. ‘Wakat tood’ kãensã sasa, kiris-neb nins sẽn yaa kɩs-sɩd dãmbã maooda ne kɩɩs toaag b tẽebã yĩnga, zak pʋgẽ zu-loeese, bãase, yɩɩr ning talemdã sẽn wat ne wã, sũ-sãamse, b nin-nongds kũum la zu-loees a taaba. (2 Tɩmote 3:1-5) Tẽns kẽer pʋsẽ, komã la zabã kɩtame tɩ neb wʋsg yõy rat n yãgse.

2, 3. Tags-bʋg sẽn pa sõma n tõe n wa, zu-loees nins sẽn wõnd yĩng pʋgẽ gõosã taoore, la wãn to la rẽ tõe n yɩ yelle?

² Zu-loe-kãensã tõe n kɩtame tɩ ned tags tɩ yɛlã loog-a lame, sẽn yɩɩd fãa, tood wʋsg sã n lagem n wa wakat yɛng pʋgẽ. Ges-y tɩ Yelbũna 24:10 (Sebr Sõngo) yetame: “Yɩɩr sã n tar-fo, bɩ f ra bas raood ye, ka rẽ f pãng na n lebga komslem.” N-ye, tõnd sã n koms raood d zu-loeesã yĩnga, a tõe n saa tõnd pãngã, n kɩt tɩ d pa rat n maan sũ-mar toogã pʋgẽ hal tɩ saabã ta ye. Wãn to?

³ Yaa tɩ d sã n koms raoodo tõe n kɩtame tɩ d pa tagsd tɩrg yɛs ye. Wala makre, yaa nana tɩ d tags tɩ d zu-loeesã looga noore, n sɩng n maand nimbãaneg d meng zugu. Kẽer tõe n kelem n yeela Wẽnnaam woto: “Yaa bõe tɩ f basdẽ tɩ yel-kãngã paamd maam?” Tagsg sẽn pa sõma woto sã n kɩ yẽg ned sũurẽ, tõe n sãama a sũ-noogã la a kɩs-sɩdã. Wẽnnaam sõgen tõe n komsa raood hali n bas ‘tẽeb zabrã.’—1 Tɩmote 6:12.

4, 5. Zĩis kẽer pʋsẽ, yaa wãn to la a Sʋɩtãan kẽed tõnd zu-loeesã pʋsẽ, la baasg zãnga, d tõe n kɩsa sɩd ne bõe?

⁴ Sɩd-sɩda, pa Wẽnnaam a Zeova n kɩtd tɩ tõnd paamd makr ye. (Zak 1:13) Makr kẽer wata tõnd zutu, tõnd sẽn maood n na n tall kɩs-sɩd yẽ taoorã yĩng bala. Sɩda, neb nins fãa sẽn balemd a Zeova wã lebgda Wẽnd bɛ-kãseng a Sʋɩtãan Munaafɩɩk bɛɛba. “Dũni kãnga wẽnnaam” sẽn yaa wẽng soabã wakat lebga bilfu, t’a makd n na n kɩt tɩ neb nins fãa sẽn nong a Zeova wã bas a raabã maanego. (2 Korẽnt dãmba 4:4) A Sʋɩtãan wata ne namsg wa a sẽn tõe tɛk tõnd saam-biisã fãa sẽn be dũniyã gill zugã zutu. (1 Pɩɛɛr 5:9) Sɩda, pa a Sʋɩtãan mengã n wat ne tõnd zu-loeesã fãa ye, la a tõe n tũnuga ne zu-loees nins tõnd sẽn segdã, n bao n boog tõnd pãngã.

⁵ La ba a Sʋɩtãan bɩ a zab-teedã pãng sẽn yaa to-to fãa, d tõe n tõog-a lame! Wãn to la d tõe n kɩs sɩd ne rẽ? Yaa Wẽnnaam a Zeova sẽn sõngd tõndã yĩnga. Wẽnnaam kɩtame t’a sõgen dãmbã bãng a Sʋɩtãan sɩlma. (2 Korẽnt dãmba 2:11) Wẽnnaam Gomdã togsda tõnd yɛl wʋsg sẽn tɩ loe ne makr nins sẽn paamd kiris-neb hakɩkã. Sã n yaa ne tʋm-tʋmd a Poll wɛɛngẽ, Biiblã tũnugda ne gomd ning sẽn yaa: “yĩng gõaag[a].” Bõe yĩnga? Bɩ d ges Wẽnnaam Gomdã sẽn wilgd gom-kãngã võor to-to. Rẽ poore, d na n yãame tɩ d pa d yen-yen n dat a Zeova sõngr sẽn na yɩl n tõog makrã ye.

Bũmb ning sẽn kɩt tɩ d makrã yaa wa gõosã

6. A Poll sẽn gom “yĩng gõaag” yellã a da rat n yeelame tɩ bõe, la tõe tɩ gõaagã ra yaa bõe?

⁶ A Poll sẽn sɛg makr wʋsgã paama vʋʋsem sõngã vẽnegr n gʋls woto: “B kõo maam yĩng gõaag sẽn yaa Sʋɩtãana tʋm-tʋmd t’a nams  maam n gɩdg maam tɩ m da wuk m meng ye.” (2 Korẽnt dãmba 12:7) Gõaagã sẽn da be a Poll yĩngã pʋgẽ wã yaa bõe? Gõaag sã n kõs-f tɩ kẽ n pa pʋgẽ, sɩd zabdame. Woto, gom-kãensã sẽn yaa makrã wilgda bũmb sẽn nams a Polle, tõe tɩ ya a yĩngã wɛɛngẽ, a sũur tagsg pʋgẽ bɩ a yiibã fãa. Tõe tɩ yaa nin-zabr buud ninga, bɩ yĩng pãn-komslem a to n da namsd a Polle. Tõe me tɩ gõaagã ra makda neb nins sẽn da kɩɩsd t’a Poll pa tʋm-tʋmd hakɩkã, la sẽn kɩɩs a moonegã la a zãmsgã. (2 Korẽnt dãmba 10:10-12; 11:5, 6, 13) Sẽn ya a soab fãa, gõaagã paa ne-a, t’a ra pa tõe n feoog-a ye.

7, 8. a) Gomd ning sẽn yaa “ket n pãbda” (NW ) wilgda bõe? b) Bõe yĩng tɩ tar yõod hal kẽeng tɩ d ket n maood ne gõos nins fãa sẽn namsd tõnd masã wã?

⁷ Bãng-y tɩ gõaagã ra kell n namsa a Polle. Gerɛk gom-biig ning a Poll sẽn tũnug ne ka wã yita gom-biig ning sẽn yaa “pãba” pʋgẽ. B tũnuga ne gom-bi-kãngã sɩd-sɩd Matɩe 26:67 la ne makr wɛɛngẽ 1 Korẽnt dãmba 4:11 pʋgẽ. Verse kãensã pʋsẽ, a rat n yeelame tɩ pãb ne nus-gila. A Sʋɩtãan sẽn kis a Zeova ne a sõgen dãmbã ne kisgr meng-mengã yĩnga, d miime t’a Sʋɩtãan Munaafɩɩk sũur yɩɩ noogo, gõaagã sẽn da ket n namsd a Pollã. A Sʋɩtãan sũur nooma rũndã-rũndã me, “yĩng gõaag” sã n namsd tõndo.

⁸ Woto yĩnga, wala a Polle, d rat n bãnga d sẽn na n maan to-to n mao ne gõ-kãensã buudu. Tõnd vɩɩmã bee ne rẽ maanego! Tẽeg-y t’a Zeova ratame tɩ tõnd vɩɩmd wakat sẽn pa sat yĩng a dũni paalgã pʋgẽ. Dũni-kãng pʋgẽ, zu-loeesã sẽn wõnd gõosã pa na n leb n wa tõnd zut yɛs ye. Sẽn na yɩl n sõng tõnd tɩ d paam keoor kãngã sẽn be yamleoog wʋsgã, Wẽnnaam kõo tõnd makr wʋsg sẽn be a Sebr sõngã sẽn yaa Biiblã pʋgẽ. Be, b wilgdame tɩ Wẽnnaam sõgen dãmb nins sẽn yɩ kɩs-sɩd dãmbã tõogame n mao ne b yĩng gõosã. Bãmb me ra yaa neb sẽn pa zems zãng wa tõndo. D sã n vaees “kaset dãmb wʋsg” kãensã vɩɩmã, tõe n sõnga tõnd tɩ d “zoe zoees ninga sẽn be tõnd taoorã n da yɛ ye.” (Hebre dãmba 12:1) D sã n tags tood nins b sẽn deeg ne sũ-marã zugu, tõe n kɩtame tɩ d sɩd bãng tɩ tõnd me tõeeme n mao ne gõos nins fãa a Sʋɩtãan sẽn tũnugd ne n zabd ne tõndã.

Gõos nins sẽn nams a Mefibosɛtã

9, 10. a) Wãn to la a Mefibosɛt paam yĩng gõaaga? b) Sõmblem bʋg la rĩm a Davɩɩd tall ne a Mefibosɛte, la wãn to la d tõe n dɩk a Davɩɩd togs-n-taare?

⁹ Ges-y a Mefibosɛt sẽn ya a Davɩɩd zoa a Zonatã biriblã makre. A Mefibosɛt sẽn da wa n tar yʋʋm a nu, b waa ne kɩbar n wilg tɩ b kʋʋ a ba a Zonatã la a yaab raoog a Saull sẽn da yaa rĩma. Rabeem kẽe a ma-wubdgã, rẽ a “buk-a lame n zoe. La sẽn yaa yãgba yĩnga, biiga lʋɩɩme t’a nao wã kao [t’a lebg põore, NW ]. Biiga yʋʋr la a Mefibosɛt.” (2 Sãmwɛll 4:4) Komslem kãng ra segd n yɩɩ wa gõaag sẽn yaa toog wʋsg ne a Mefibosɛte, a sẽn wa n bɩtẽ wã.

¹⁰ Yʋʋm a wãn loogr poore, Rĩm a Davɩɩd sẽn tall nonglem kãseng ning ne a Zonatã wã yĩng kɩtame t’a tall nonglem ne a Mefibosɛte. A Davɩɩd dɩka a Saull paoongã fãa n kõ-a, la a yeel a Saull tʋm-tʋmd a Ziba t’a ges a pʋʋgã koob yelle. A Davɩɩd leb n yeela a Mefibosɛt woto: “Fo na n dɩɩ ne maam daar fãa.” (2 Sãmwɛll 9:6-10) Sãmbg sẽn ka be, a Davɩɩd nonglmã ra yaa belsg n kõ a Mefibosɛte, la sõngame n kɩt tɩ sũ-sãoong ning a komslmã sẽn wa ne wã boog zem-zem. Ad woto sɩd kõta tõnd zãmsgo! Tõnd me segd n talla sõmblem ne neb nins sẽn maood ne yĩng gõaagã.

11. Bõe la a Ziba yeel a Mefibosɛt zugu, la wãn to la d mi tɩ yaa ziri? (Ges-y tẽngr notã.)

¹¹ Kaoosg poore, a Mefibosɛt ra segd n maoo ne yĩng gõaag a to. A sõgen a Ziba kãneg-a-la ne rĩm a Davɩɩde. Rẽ t’a Davɩɩd ra zoetame n na n yi Zerizalɛm, a meng biribl a Absalom sẽn yik n kɩɩsd-a wã yĩnga. A Ziba yeelame t’a Mefibosɛt paa Zerizalɛm n dat n deeg naama n sooge. * T’a Davɩɩd tẽ a Ziba goamã n dɩk bũmb ning a sẽn da kõ a Mefibosɛtã n kõ a Ziba, zɩlem-be-kãng yĩnga!—2 Sãmwɛll 16:1-4.

12. A Mefibosɛt manesem yɩɩ wãn to ne a sẽn da be yɛl nins pʋsẽ wã, la wãn to la a yaa mak-sõng n kõ tõndo?

¹² Baasg zãnga, a Mefibosɛt sẽn wa n baas n seg a Davɩɩdã, a togsa rĩmã yɛlã sẽn sɩd ra yɩ to-to. A Mefibosɛt ra segendame n na n bʋʋg a Davɩɩde, t’a Ziba belg-a n yeel t’a na n ledg-a lame n kẽngã. A Davɩɩd remsa yɛlã bɩ? Wa n pa fãa me a maana bũmbu. A pʋɩya paoongã n kõ bãmb b yiibã. Ka me yaa bũmb a to sẽn da tõe n yɩ wa gõaag a Mefibosɛt yĩnsẽ wã. A sãama a sũur bɩ? A kɩɩsa a Davɩɩd sẽn pʋɩ paoongã to-to wã n yẽgemdẽ tɩ pa zems bɩ? Ayo, a saka rĩma sẽn datã ne sik-m-menga. A ra geta yɛlã neng ning sẽn yaa sõma wã. A sũur nooma wʋsgo, Israɛll rĩm ning sẽn zemsã sẽn lebg n wa ne laafɩ wã. Sɩd-sɩda, a Mefibosɛt kõo mak-sõng n kell n sak komslmã, kãnegrã la sũ-sãangã ne sũ-mare.—2 Sãmwɛll 19:24-30.

A Nehemi maoa ne zu-loeese

13, 14. Gõos bʋs la a Nehemi ra segd n deeg ne sũ-mare, a sẽn wa n na n tɩ lebs n me Zerizalɛm lalsã?

¹³ Tags-y makr wɛɛngẽ gõos nins a Nehemi sẽn deeg ne sũ-mare, a sẽn da wa n leb Zerizalɛm yʋʋm kob-gĩnd a nu soab S.D.T.W., tɩ galʋ-tẽngã ra pa tar lalsã. A tɩ mikame tɩ galʋ-tẽngã ra pa tar koglg zĩig baa bilfu, la tɩ Zʋɩf rãmbã sẽn lebg n wa b ba-yirã ra pa sigl sõma ye. B ra komsa raoodo, la b ra pa yɩlem a Zeova nifẽ me ye. Baa ne rĩm a Artazɛgzɛs sẽn da kõ-a sor t’ a lebs n me Zerizalɛm lalsã, a Nehemi bãnga tao-tao t’a tʋʋmdã ra pa noom tẽn-yagsã nanambs baa bilf ye. “Bãmb sũyã sãama wʋsgo, ned sẽn wa n na n sõng Israɛll neba yĩnga.”—Nehemi 2:10.

¹⁴ Bu-zẽms nin-kãensã sẽn yaa kɩɩsdbã maana b pãng sẽn tõe tɛk n na n yals a Nehemi tʋʋmdã. B sẽn dat n maan zabrã, b zɩlem-beedã, b tẽn-kãnebã, la b sẽn dat n yɛɛs-a wã ra yaa bũmb sẽn wõnd gõos sẽn be a yĩngẽ wã wakat fãa. A basame tɩ bɛɛbã sɩlem tõog-a bɩ? Ayo! A talla bas-yard zãng-zãng ne Wẽnnaam n pa koms raood ye. Woto, Zerizalɛm lalsã sẽn wa n baas n me wã, rẽ kõo kaset sẽn kaoosd sẽn wilgd a Zeova sẽn teel a Nehemi ne nonglem to-to ningã.—Nehemi 4:1-12; 6:1-19.

15. Yel-bʋs sẽn zĩnd Zʋɩf rãmbã sʋk n nams a Nehemi?

¹⁵ A sẽn da yaa guvɛrneerã, a Nehemi ra leb n segd n maoo ne zu-loees wʋsg sẽn zĩnd Wẽnnaam nin-buiidã sʋka. Zu-loe-kãensã ra yaa wala gõos sẽn nams-a wʋsgo, bala  rẽ booga nebã zems-n-taarã ne a Zeova. Rakãagbã ra kotame tɩ b yao b sama n dogl yõod wʋsgo, tɩ lebg tɩlae ne saam-biis a taabã sẽn da be naong pʋgẽ wã tɩ b rɩk b pʋtã n kõ sam dãmbã, la b rɩk b kambã meng n kẽesd yembdo, n tõog n yao b sama, la b yao Pɛrs rãmbã lampo wã. (Nehemi 5:1-10) Zʋɩf rãmb wʋsg ra pa tũud noyã Vʋʋsg raarã wɛɛngẽ wã ye, la b ra pa teend Levi nebã la wẽn-doogã ye. Sẽn paase, sãnda ra kẽe kãadem ne “Asdod ne Amon la Moaab kamb[a].” Ad woto sɩd sãama a Nehemi sũur wʋsgo! La gõos kãensã fãa pa kɩt t’a leb poorẽ ye. Naoor ka tɛka, a modgame n tũ Wẽnnaam no-tɩrsã ne yẽesem. Wala a Nehemi, bɩ d ra tol n bas tɩ neb a taabã kɩɩsg kɩt tɩ d pa tʋm a Zeova tʋʋmdã ne kɩs-sɩd ye.—Nehemi 13:10-13, 23-27.

Neb a taab sẽn yɩ kɩs-sɩd dãmb n mao ne yĩng gõose

16-18. Wãn to la zak pʋgẽ sũ-sãams paam a Izaak ne a Rebeka, a Ana, a Davɩɩd la a Oze?

¹⁶ Biiblã tara makr a taab wʋsg sẽn tɩ loe ne neb sẽn mao ne yel-tood sẽn da wõnd gõose. Yaa zak pʋgẽ zu-loeesã n wat ne gõ-kãense. A Ezayu pagb a yiibã yĩnga, a roagdb ‘a Izaak ne a Rebeka paama sũ-toog wʋsgo.’ Pʋg-kãensa yĩnga, a Rebeka yeelame meng t’a yam yii ne a vɩɩma. (Sɩngre 26:34, 35; 27:46) Tags-y a Ana me yelle. A Ana sẽn da yaa kirã yĩnga, a pʋg-to a Penina ra ‘namsd-a-la wʋsg n sãamd a sũuri.’ Tõe t’a Ana namsa rẽ yĩng naoor wʋsgo, b sẽn da be ne taabã sasa. Sẽn paase, a Penina leb n sãama a Ana sũur zãma sʋka. Sãmbg ka be tɩ rẽ yɩɩ roagdb la zo-rãmb taoore, zakã neb sã n da kẽng kibsẽ wã Silo. Woto ra yaa wa b sẽn na n tusd gõaagã n kẽesd a Ana yĩn-nemsẽ wã n paasdẽ.—1 Sãmwɛll 1:4-7.

¹⁷ Ges-y a Davɩɩd sẽn maan sũ-mar ning namsgã pʋgẽ, a rɛɛmb a Saull sẽn yaa rĩma sũ-ki-wẽngã yĩnga. Sẽn na yɩl n põse, yɩɩ tɩlae ne a Davɩɩd mengã t’a vɩɩmd bogdẽ En-gedi weoogẽ wã. Beenẽ a ra segd n dʋʋ pĩis sẽn zãnte, hal tɩ ra yaa toog la yelle. Kɛgr ning b sẽn maan-a wã ra segd n zabd-a-la sõma, bala a ra pa maan baa fʋɩ n beeg a Saull ye. Ne rẽ fãa, maana yʋʋm t’a Davɩɩd ra be zoees woo zoees zugu. Rẽ fãa ya a Saull sũ-kiirã yĩnga.—1 Sãmwɛll 24:15, 16; Yelbũna 27:4.

¹⁸ Tags-y n ges sũ-sãang ning a Oze sẽn yã a zakã pʋgẽ wã. A pagã lebga pʋg-yoodre. A pagã yoob ra segd n yɩɩ wa gõos sẽn kõsd-a a sũurã pʋgẽ. La ad a sɩd namsa wʋsg n paase, a pagã sẽn wa n dog yoob kambã!—Oze 1:2-9.

19. A Miise paama nams-bʋg a tẽebã yĩnga?

¹⁹ Yĩngã gõaag a to yaa namsgã reegr f tẽebã yĩngã. D ges no-rɛɛs a Miise makrã. A sẽn da ne tɩ rĩm wẽng a Akaab ra gũbga a meng ne ziri no-rɛɛsdbã, la t’a Akaab ra tẽeda b zɩlem-beedã sẽn yaa vẽenegã, ra yaa bũmb sẽn da segd n nams a Miise sẽn da yaa nin-tɩrgã. Sẽn paase, a Miise sẽn yeel a Akaab tɩ zãmb  no-rɛɛsdb kãensã fãa ra gomda ne ‘ziri sɩɩgã,’ bõe la b taoor soabã maan-yã? A ‘wẽe a Miise pɛka’! Sẽn yaa wẽng n yɩɩdã yaa manesem ning a Akaab sẽn talle, a Zeova sẽn wa n keoog-a tɩ zabr ning b sẽn da na n maan ne Ramot-Gileaadã pa na n tõogã. A Akaab kõo noor tɩ b ning a Miise bi-bees roogẽ n kõ-a rɩɩb bilf bala. (1 Rĩm dãmba 22:6, 9, 15-17, 23-28) Tẽeg-y a Zeremi makrã, n paas namsg ning a sẽn paam a namsdbã sẽn da rat n kʋ-a wã nugẽ wã yell me.—Zeremi 20:1-9.

20. Ne gõos bʋs la a Naomi ra segd n maan sũ-mare, la wãn to la a paam keoobo?

²⁰ Nin-nongds kũum me yaa yel-toog a to d sẽn tõe n dɩk n mak ne yĩng gõaaga. A Naomi ra segd n maana sũ-mar toog pʋgẽ ne a sɩdã la a komdibli a yiibã kũum sẽn nams-a wã. Baa ne yel-be-kãensã sẽn da ket n namsd-a hal wʋsgã, a leba Betleɛm. A yeela a zo-rãmbã tɩ b ra leb n bool-a t’a Naomi ye, la b bool-a t’a Mara, sẽn yaa yʋʋr sẽn wilgd sũ-tood nins sẽn paam-a wã. La baasgẽ wã, a Zeova keo-a-la a sẽn tall sũ-marã toogã pʋgẽ wã, n kɩt t’a lebg Mesi wã yaaba.—Rut 1:3-5, 19-21; 4:13-17; Matɩe 1:1, 5.

21, 22. Wãn to la a Zoob paam bõne, la wãn to la a maan-yã?

²¹ Tags-y a Zoob sũurã sẽn da sãam to-to ninga yelle, a sẽn wa n wʋm a kamb piigã a sẽn nongã sẽn ki zĩig pʋgẽ ne kũ-miuugã, n paas a arzɛkã fãa sẽn yɩ bõna, la a sõgen dãmbã kũumã. Zĩig pʋgẽ, yaa wa a vɩɩmã tõr da kell n sãamame! Yaa a Zoob sẽn da be yel-be-kãens pʋsẽ la a Sʋɩtãan lob-a bãag n paase. Tõe t’a Zoob sɩd ra tagsame tɩ bã-wẽng kãngã ra na n kʋ-a lame. A toogã wɩng-a-la wʋsg hali n kɩt t’a tags t’a sã n ki n são nams-kãngã.—Zoob 1:13-20; 2:7, 8.

²² Yaa wa woto fãa ra pa sek ye, t’a pagã sẽn da be sũ-sãang la yɩɩr pʋgẽ wã kolg-a n zẽk a koɛɛg n yeel-a tɩ: “Tʋʋs-y Wẽnnaam n ki tɩ sɛ.” Ad woto sɩd yɩɩ gõaag meng a yĩngã sẽn da tar toogã pʋgẽ! Sẽn pʋgde, a Zoob zo-rãmb a tãabã pa bels-a ye, la b togsa goam sẽn pa sɩd a zugu, n yeel t’a solg n maana yel-wẽna, la tɩ yaa rẽ yĩng la yel-beedã sẽn paam-a wã. Gom-wẽns nins bãmb sẽn togsã yaa wala b kell n tusa gõosã tɩ sud n paas a yĩngã pʋgẽ. Tẽeg-y me t’a Zoob ra pa mi bũmb ning sẽn kɩt tɩ bõn-wẽns kãensã ra paamd-a wã ye. A ra leb n pa mi t’a na n põsame ye. Ne rẽ fãa, a “tooda fãa pʋgẽ, a Zoob ka tol n kong ye. La a ka yeel tɩ Wẽnnaam ka maan-a neer ye.” (Zoob 1:22; 2:9, 10; 3:3; 14:13; 30:17) Baa ne gõos wʋsg sẽn kõs-a wakat yɛng pʋgẽ wã, a pa bas a burkĩndlmã abada. Ad woto sɩd kengda tõnd raoodo!

23. Bõe n kɩt tɩ kɩs-sɩd dãmb nins yell tõnd sẽn goma tõog n deeg toog ne sũ-mar yĩngã gõos toor-toor pʋsẽ?

²³ Makr nins tõnd sẽn yã wã pa tɛk la woto ye. Biiblã tara makr a taab wʋsg woto. Wẽnnaam sõgen dãmb kãensã fãa sẽn yaa kɩs-sɩd dãmbã ra segd n maoo ne b mens gõos sã n yaa ne makr wɛɛngẽ. La ned fãa sẽn seg zu-loees ninsã ne a to rẽnd pa yembr ye. Baasg zãnga, nin-kãensa wõnda taab bũmb a yembr pʋgẽ. Bãmb sʋkã, ned ba a yembr pa bas a Zeova tʋʋmdã ye. Baa ne b mak-toosã fãa, b tõoga a Sʋɩtãana, pãng ning a Zeova sẽn kõ-bã maasem yĩnga. Wãn to? Sõsg ning sẽn pʋgdã na n leoka sʋk kãngã, la a wilg tõnd me sẽn tõe n mao to-to ne bũmb sẽn wõnd gõaag sẽn be tõnd yĩngã pʋgẽ.

[Tẽngr note]

Wãn to la y na n leoke?

• Bõe yĩng tɩ d tõe n dɩk zu-loees nins d sẽn segdã n mak ne gõos sẽn kõsd-do?

• Gõos nins a Mefibosɛt la a Nehemi sẽn da segd n mao ne wã kẽer yaa bʋse?

• Gʋlsg Sõamyã sẽn wilg makr nins sẽn tɩ loe ne rap la pagb sẽn maan sũ-mar ne kɩs-sɩd yĩngã gõos toɛy-toɛy pʋsẽ wã sʋka, bʋg la yãmb sɩd yã tɩ pa nana, la bõe yĩnga?

[Zãmsgã sogsgã]

[Foto rãmba, seb-neng a 9]

A Mefibosɛt tõogame n mao ne komslem, kãnegr la sũ-sãamse

[Foto, seb-neng 11]

Ne kɩɩsga fãa, a Nehemi kẽnga taoore