1, 2. Bõe la neb nins sẽn tũud a Zeova wã segd n maane, tɩ yaa maoore?

SẼN sɩng ne a Abɛll n tãag rũndã, yaa tɩlɛ ne neb nins fãa sẽn tũud Wẽnnaamã tɩ b mao n kell n tall b tẽebã. Tʋm-tʋmd a Poll ra yeela kiris-neb nins sẽn yaa ebre-rãmbã tɩ b ‘paama namsg wʋsg tɩ yɩ maoor meng-menga,’ b sẽn da rat n ta a Zeova yam n paam a barkã yĩnga. (Ebre. 10:32-34) A Poll maka kiris-nebã sẽn segd n mao to-to wã ne zoeese, bõgs bɩ nug-gil pãbre, la maoore. Woto fãa yaa gɛrk-rãmbã ɛspoor toor-toor b sẽn da maand n wagsd taaba, tɩ tõogdbã paamd keoore. (Ebre. 12:1, 4) Rũndã-rũndã, zoees buud la kiris-nebã fãa zoeta, tɩ keoor ning b sẽn na n paamã yaa vɩɩm sẽn kõn sa. La d tara bɛɛb sẽn dat n tiis-du, sẽn dat tɩ sũ-noog ning d sẽn tar Wẽnnaam tũudmã pʋgẽ wã sa fasɩ, la b kɩt tɩ d ra tõog n wa paam keoorã ye.

² Tõnd sẽn segd n mao ne n tɩ yɩɩd yaa a Sʋɩtãan la a dũniyã. (Efɛ. 6:12) D segd n maoome n da sak dũniyã bãngdb sagls la b tagsa, la d ra rɩk a nebã minim-wẽnsã, wala makre, b tʋʋm-dẽgdã, sɩgaarã la dorgã yũubu, la  rã-tɩgrã. D segdame me n mao wakat fãa ne pãn-komsem buud toor-toore, la d mao n da wa koms raood ye.—2 Kor. 10:3-6; Kol. 3:5-9.

3. Bõe la Wẽnnaam maand n sõngd tõnd tɩ d maood ne d bɛɛbã?

³ Bɛɛb nins yell d sẽn gomã tara pãng wʋsgo. La rẽ yĩnga d tõe n maoa ne-b n tõog bɩ? N-ye. La pa na n yɩ nana ye. Tʋm-tʋmd a Poll maka a meng ne bõgsɛɛr n yeele: “Mam lobda nug-gila, la ka tɩ pãb pemsem ye.” (1 Kor. 9:26) Wa bõgsɛɛr sẽn segd n mao n tõog a to wã, tõnd me segd n mao n tõoga d bɛɛbã. A Zeova wilgda tõnd d sẽn segd n mao to-to, la a sõngd tõnd maoorã pʋgẽ. A maanda rẽ ne Biiblã maasem. A leb n tũnugda ne siglgã sɛbã, tigissã la tigis-kãsemsã. Yãmb tũuda bũmb ning fãa a Zeova sẽn wilgd tõndã bɩ? Y sã n pa tũudẽ, na n yɩɩ wa y sẽn ‘pãbd pemsem.’ Y pa na n tõog y bɛɛbã ye.

4. Bõe la d tõe n maan tɩ d bɛɛbã ra tõog-do?

⁴ D segd n gũusda wakat fãa. Bõe yĩnga? Bala, d bɛɛbã tõe n yika zabr ne-d wakat ning d sẽn pa tẽede, wall d sẽn wat n ka pãnga. Biiblã kõo tõnd saglg sẽn kengd raoodo. A yeela woto: “Da sak tɩ wẽng tõog foom ye. Maan neer n tõog wẽnga.” (Rom. 12:21) Biiblã sẽn yeel tɩ d ra ‘sak tɩ wẽng tõog-dã’ wilgdame tɩ d tõe n tõoga d bɛɛbã. La yaa d sã n kell n wɩng ne maoorã. D sã n pa le gũusd sõma, la d pʋd n pa le maoodẽ, a Sʋɩtãan ne a dũniyã la d pãn-komsem toor-toorã na n tõog-d lame. Woto yĩnga, bɩ d ra koms raoodo, n tags tɩ d pa na n tõog ye.—1 Pɩy. 5:9.

5. a) Bõe n tõe n sõng-d tɩ d kell n mao n paam Wẽnnaam barka? b) Ãnd dãmb yell la d na n gome?

⁵ Yɩl n tõog d bɛɛbã, rẽndame tɩ d tẽegd bũmb ning yĩng d sẽn maoodã. Yaa d sẽn dat n ta Wẽnnaam yam la d paam a barkã. Ebre-rãmb 11:6 yeta woto: “Ned ning sẽn wat Wẽnnaam nengẽ tog n tẽeme tɩ b beeme, la tɩ b ronda neb nins sẽn baood bãmbã.” Gɛrkã gom-bil ning b sẽn lebg ka tɩ “bao” wã rat n yeelame tɩ f bao ne f sũur fãa la ne f pãng fãa. (Tʋʋ. 15:17) Pĩnd wẽndẽ, rap la pagb n mao ne b sũur fãa n paam a Zeova barkã, tɩ Biiblã gomd b yelle. Wala makre, a Zakoobe, a Rasɛlle, a Zozɛfe, la a Polle. B ned kam fãa maoa ne zu-loees sẽn tõe n koms raoodo, la b kell n pẽdgame. B kibayã wilgdame tɩ tõnd me sã n kell n pẽdge, d na n paama a Zeova barka. Bɩ d ges wãn to la d tõe n dɩk b togs-n-taare?

6. Bõe n sõng a Zakoob t’a kell n pẽdge, la a keoorã yɩɩ bõe? (Ges-y sõsgã sɩngrẽ fotã.)

⁶ Wẽn-sakd a Zakoob maoa ne a sũur fãa la a tõog toogo, bala, a ra nonga a Zeova, la a getẽ t’a sẽn paam n yaa a zoa wã yaa bõn-sõng tɛkẽ. Sẽn paase, a ra kɩsa sɩd t’a Zeova na n ninga a yagensã bark wa a sẽn pʋlmã. (Sɩng. 28:3, 4) A maoa ne malɛk sẽn tedg n lebg ninsaala, sẽn na yɩl n paam Wẽnnaam barkã. Rẽ t’a kolga yʋʋm koabga. (Karm-y Sɩngr 32:25-29.) Rẽ yĩnga yaa ne a Zakoob meng pãng la a sẽn tõog n mao ne malɛkã bɩ? Ayo! La a sẽn da rat barkã ne a sũur fãa wã, a pẽdgame, n sak n maan a sẽn tõe fãa! A sẽn pẽdg woto wã, a Zeova ning-a-la barka, n pʋd a yʋʋr t’a Israyɛlle, sẽn dat n yeel tɩ sẽn “mao-a ne Wẽnnaam.” Yaa keoor ning a Zakoob sẽn paamã  buud la tõnd me sẽn baoodã. D ratame n ta Wẽnnaam yam, la d paam a barka.

7. a) A Rasɛll da tara zu-loe-bʋgo? b) Bõe n sõng-a t’a tõog n mao n wa paam barka?

⁷ A Zakoob pʋg-nongr a Rasɛll me ra rata ne a sũur fãa n yã a Zeova sẽn na n maan to-to n pids bũmb ning a sẽn pʋlem a sɩdã. La a Rasɛll ra tara zu-loɛɛg sẽn wõnd pa tar tɩɩm ye. A ra pa tar dogem ye. Bãmb wakatẽ wã, pag sã n da pa tõe n dog biiga, nebã geta rẽ wa yel-beedo. Bõe n sõng a Rasɛll t’a tõog n mao ne zu-loe-kãngã sẽn komsd raoodo, t’a yaool n da pa tar a tɩɩmã? A kell n tẽeme t’a yellã na n manegame. A wɩnga ne a Zeova pʋʋsgo. La a Zeova sɩd wa n deega a pʋʋsgã, t’a tõog n dog kamba. A wa n yeela ne sũ-noog yaa: “Mam zaba . . . Wẽnnaam zabre, la m paama tõogre.”—Sɩng. 30:8.

8. A Zozɛf maoa ne zu-loe-bʋs hal n kaoos yʋʋma? La mak-sõng bʋg la a kõ tõndo?

⁸ Yaa vẽeneg t’a Zakoob ne a Rasɛll mak-sõngã nafa b biig a Zozɛf wʋsgo. Sõng-a lame t’a tõog n mao ne zu-loees sẽn da tõe n koms a tẽebã. A sẽn wa n tar yʋʋm 17, a vɩɩmã toeema fasɩ. Sũ-kiir yĩnga, a kẽem-dãmbã koos-a-la yembdo. A sẽn wa n be Ezɩptã, b rõd-a lame n kẽes-a bãens roogo, t’a zĩnd be n kaoos yʋʋma. (Sɩng. 37:23-28; 39:7-9, 20, 21) La a Zozɛf pa koms raoodo, a pa lebg sũ-to-ned me n bao n na n dok a sũur ye. Bõe yĩnga? Bala, a ra miime t’a sẽn paam n yaa a Zeova zoa wã yaa bark tɛkẽ, n da tagsd rẽ yell n yɩɩda. (Maan. 19:18; Rom. 12:17-21) Tõnd me segd n dɩka a Zozɛf togs-n-taare. Wala makre, d vɩɩmã sã n yɩɩ toog d yãadmẽ, wall d sã n tara yell ning tɩ wõnd tɩɩm kae, bɩ d ra koms raood ye. D kell n mao. D tõe n kɩsa sɩd tɩ d sã n kell n mao, a Zeova na n ning-d-la barka.—Karm-y Sɩngr 39:21-23.

9. Wãn-wãn la d tõe n dɩk a Zakoob ne a Rasɛll la a Zozɛf togs-n-taare?

⁹ Tõe tɩ tõnd me maooda ne zu-loe-kɛgenga. Tõe tɩ b maan-d-la sẽn pa segde, pa rẽ bɩ b wẽg-d lame, wall b yaand-d lame. Leb n tõe n yaa b sẽn dõd-d sũ-kiir yĩnga. Sẽn yaa a soab fãa bɩ d ra koms raood ye. D tẽeg a Zakoob ne a Rasɛll la a Zozɛf sẽn maan to-to n tõog n kell n tũ a Zeova ne sũ-noogã. B ned kam fãa ra tagsda a sẽn paam n yaa Wẽnnaam zoa wã yelle n yɩɩda, t’a sũur noom ne rẽ. Yaa rẽ yĩng la Wẽnnaam sẽn ning-b bark la a keng b raoodã. B kell n maoome, la b tʋm tɩ zems ne bũmb ning b sẽn da pʋʋsd n kotẽ wã. D sẽn vɩ dũni-kãngã yaoolem wakatã, d segd n modgame n kell n tall tẽeb tɩ beoog na n yɩɩ neere. Yãmb na n sak n maana y sẽn tõe fãa, n paam a Zeova barkã bɩ?

10, 11. a) Yel-bʋs n tõe n kɩt tɩ Wẽnnaam barkã paoong maneg n lebg toogo? b) Bõe n na n sõng-y tɩ y tõog n ket n maand sẽn yaa tɩrga?

¹⁰ Yel-bʋs n tõe n kɩt tɩ Wẽnnaam barkã paoong maneg n lebg toogo? D sẽn yaa pãn-komsem dãmbã, d tõe n wa tara tʋls-wẽnga, n segd n mao n tõog-a. Nina me segd n maoome n kell n tall tagsg sẽn yaa sõma koɛɛgã mooneg wɛɛngẽ. Kẽer nengẽ, yaa bãag n namsd-ba, pa rẽ bɩ b vɩɩ b yembr tɩ pa nana ye. Sãnda yaa b sẽn beeg-ba, tɩ b getẽ tɩ yaa toog ne-b tɩ b kõ sugri. D sẽn tũud Wẽnnaam a Zeova kaoosame tɩ pa kaoos me, d segd n ket n maooda ne yɛl sẽn tõe n kɩt tɩ yɩ toog tɩ d tõog n tũ  tõnd Wẽnnaamã sẽn keood neb nins sẽn pa basd-a wã.

¹¹ Hakɩɩka, yɩl n tõog n kell n yɩ kiris-neda, n ket n maand sẽn yaa tɩrga, tõe n yɩɩ toogo. Sẽn yɩɩd fãa, d sã n tara tʋls-wẽns d sũurẽ wã n segd n mao n tõog-ba. (Zer. 17:9) Sã n yaa rẽ bɩ y wɩng ne a Zeova pʋʋsgo, n kot a vʋʋsem sõngã. Pʋʋsgã la vʋʋsem sõngã na n kõ-y-la raood tɩ y maan sẽn segde, n tõog n paam Wẽnnaam barka. Mao-y tɩ y tʋʋm-tʋmdɩ wã zems ne y sẽn pʋʋsd n kotẽ wã. Modg-y n karemd-y Biiblã daar fãa, la y bao sẽk n zãmsd-a la y maand zak pʋgẽ Biibl zãmsgã.—Karm-y Yɩɩn-sõamyã 119:33.

12, 13. Bõe n sõng kiris-neb a yiib tɩ b tõog n mao ne tʋls-wẽnse?

¹² Kibay wʋsg n be n wilgdẽ tɩ Wẽnnaam Gomdã, a vʋʋsem sõngã n paas siglgã sɛb sõnga kiris-neb tɩ b tõog b tʋls-wẽnse. Wala makre, bi-bɩɩg a ye n karem sõsg yʋʋmd 2003 yʋʋm-sar kiuug rasem a 8 Réveillez-vous ! wã pʋgẽ, tɩ sõng-a. Sõsgã gom-zugã yaa: “Comment résister aux mauvais désirs ?” Karengã poore, ad a sẽn yeele: “Mam mi n tara tags-wẽnse, n maood n dat n base. B sẽn yeel sebrã pʋgẽ tɩ yaa toog ne neb wʋsg tɩ b tõog tʋls-wẽnsã, kɩtame tɩ m bãng tɩ maam ne m tẽed-n-taasã fãa yaa a yembre, la tɩ pa maam m ye n segd n mao  ne tʋls-wẽns ye.” Réveillez-vous ! a to me n sõng-a. Yaa yʋʋmd 2003 zĩ-likr kiuug rasem a 8 soabã. Yaa a sõs-kãngã: “Dieu approuve-t-il les mœurs ‘ différentes ?” Be, b yeelame tɩ neb kẽer zu-loɛɛg lebga wa gõaag sẽn be b yĩngã pʋgẽ. (2 Kor. 12:7) Nin-kãensã sẽn ket n maood n na n tõog b tʋls-wẽnsã, b tõe n tẽe ne b sũur fãa tɩ na n wa zemsame. Bi-bɩɩgã paasame: “Woto yĩnga, mam tẽegdame tɩ daar ne a to fãa, m tõe n maoome n tõoge. Mam pʋʋsda a Zeova barka, a sẽn sõngd tõnd beoog sẽn vẽeg fãa ne a siglgã maasem tɩ d maood ne dũni-kãngã zu-loeesã.”

¹³ Saam-bi-poak sẽn be Etazĩni gʋlsa lɛtr n tool Betɛllã, n yeele: “Mam dat n pʋʋs-y-la barka, y sẽn kõt tõnd bũmb nins sẽn yaa tɩlɛ ne-do, tɩ zemsd ne b wakatã. Yʋʋm wʋsg la woto mam sẽn maood n dat n bas bũmb a Zeova sẽn kisi. Mam mi n komsa raood n pa le rat n mao ye. Mam miime t’a Zeova yaa nimbãan-zoɛta, la sugr kõta. La tʋls-wẽng a woto sẽn be ne maam, tɩ m miẽ me tɩ m sũurã pʋgẽ, m pa tolg n kis-a wã, mam da tagsdame tɩ m pa tol n tõe n paam a Zeova sõngr ye. Mam zu-loɛɛgã kɩtame tɩ m vɩɩmã yaa toogo. . . . La mam wa n karma bũmb sẽn sõng maam tɩ m bãng t’a Zeova sɩd rat n sõng-m lame. Yaa yʋʋmd 2013 tʋʋlg kiuug pipi raar Gũusg Gasgã sõsg a yembre. A gom-zugã yaa: “Yãmb mi a Zeova bɩ?”

14. a) A Poll da kɩsa sɩd ne bõe? b) Bõe n tõe n sõng-d tɩ d mao ne d pãn-komsem n tõoge?

¹⁴ Karm-y Rom-dãmb 7:21-25. A Poll meng ra miime tɩ yɩl n tõog n mao ne tʋls-wẽns wall f pãn-komsem, tõe n yɩɩ toog wʋsgo. La a ra kɩsa sɩd t’a sã n pʋʋsd a Zeova n kot a sõngre, la a tẽ a Zeezi kũumã sẽn yɩ maoongã, a tõe n maoa ne a pãn-komsmã n tõoge. La tõnd yẽ? D sã n maooda ne pãn-komsem ninga, d tõe n basa d yam tɩ d na n tõogame bɩ? N-ye. La yaa d sẽn na n dɩk a Poll naoore. Tõnd me teeg a Zeova ne d sũur fãa n da teeg d meng pãnga, la d tẽ a Zeezi kũumã sẽn yɩ maoongã.

15. Bõe la d tõe n maan t’a Zeova sõng-d tɩ d kell n tũ-a sõma la d tõog toogo?

¹⁵ Wẽnnaam mi n basame tɩ d wilg tɩ d yellã sɩd pak-d lame, t’a yaool n sõng-do. Wala makre, tõnd mengã wall d zakã ned sã n bẽeda bã-kɛgenga, pa rẽ bɩ b wẽga tõnd wall d neda, d maanda wãna? D sã n sɩd teega a Zeova, d na n kos-a-la ne d sũur fãa t’a kõ-d pãng la raood tɩ d kell n tũ-a sõma, n tall d sũ-noogã, la d ket n paasd tõnd ne yẽ zoodã pãnga. (Eza. 40:29) Pĩnd wẽndẽ la rũndã-rũndã kiris-neb kibay n wilgd tɩ pʋʋsgã tõe n kõ-d-la pãng la keng d raood tɩ d kell n mao n tõog toogo.

16, 17. Bõe la y rat ne y sũur fãa n maane?

¹⁶ A Sʋɩtãan sã n paam tɩ y koms raood zu-loeesã yĩnga, na n yɩ-a-la noogo. Rẽ wã, bɩ tõnd ned kam fãa kell n gãd sẽn yaa neerã kãn-kãe. (1 Tes. 5:21, Wẽnnaam Sebre, 1983) Kɩs-y sɩd tɩ y tõe n maoa ne a Sʋɩtãan la a dũniyã, la ne y tʋls-wẽnsã n tõoge. La yaa y sẽn na n bas y yam tɩ Wẽnnaam na n kõ-y-la pãng la raoodo.—2 Kor. 4:7-9; Gal. 6:9.

¹⁷ Woto yĩnga, ket-y n maood-y-yã. Nang-y pãnga. Ra n tol-y n koms-y raood ye. Rẽ, y tõe n kɩsa sɩd t’a Zeova na n kɩtame t’a “barkã sig yãmb zugu, hal tɩ seke.”—Mal. 3:10.