Ket-y n pʋʋsd-y Wẽnnaam n paam n ta a yam
Wẽnnaam maan-d-la lohorem meng-menga. Yaa a sẽn kɩt tɩ d tõe n gom ne-a pʋʋsg pʋgẽ, n togs-a bũmb ning fãa sẽn be d sũurẽ wã. No-rɛɛs a Davɩɩd pʋʋsame n yeel yaa: “Yãmb sẽn kelgd pʋʋsgã yĩnga, ninsaalbã fãa na n waa yãmb nengẽ!” (Yɩɩn-sõamyã 65:3) La wãn to la d tõe n pʋʋs Wẽnnaam t’a sɩd kelg-d la a leok-do?
PELGD-Y Y PƲG N PƲƲSDẼ, LA YƖ NE SIK-M-MENGA
Y sã n wa rat n pʋʋs Wẽnnaam, y tõe n pelga y pʋg ne-a, rat n yeel tɩ n togs-a sẽn be y sũurẽ wã fãa. (Yɩɩn-sõamyã 62:9) Wẽnnaam Sẽn-tõe-a-fãa wã nonga pʋʋsg sẽn yit sũurẽ.
PƲT-Y WẼNNAAM YƲ-PEELLÃ Y PƲƲSG PƲGẼ
Baa ne Wẽnnaam sẽn tar naam yʋy wʋsgã, a tara yʋ-peelle. Ad Wẽnnaam gomdã sẽn yete: “Mam yaa a Zeova. * Yaa mam yʋʋr la woto.” (Ezayi 42:8, MN) Wẽnnaam yʋ-peellã sẽn yaa Zeova wã bee Wẽnnaam sebrã pʋgẽ sẽn ta naoor 7000. No-rɛɛsdb wʋsg ra boonda Wẽnnaam ne-a yʋ-peellã. Wala makre, a Abrahaam yeelame: “Zeova, . . . Bas-y tɩ m gom [ne yãmb] n paase.” (Sɩngre 18:30, MN) Tõnd me sã n wa pʋʋsd Wẽnnaam, d segd n pʋta a yʋ-peellã.
PƲƲSD-Y NE BUUD-GOMD Y SẼN WƲMD SÕMA
Sẽn yaa buud-gomd ning fãa pʋgẽ la d pʋʋsd Wẽnnaam, a wʋmdame. A Gomdã yetame: “Wẽnnaam pa tũusd neda, la tɩ buud fãa pʋgẽ, ned ning sẽn zoet bãmb la a maand sẽn yaa tɩrg tata bãmb yam.”—Tʋʋma 10:34, 35.
Yɩl n paam Wẽnnaam barkã, pʋʋsgã bal pa sek ye. Sõss nins sẽn pʋgdã pʋgẽ, d na n yãa d sẽn segd n maane.
[Tẽngr note]
^ sull 6 Zeova wã yaa Wẽnnaam yʋ-peellã sẽn be Biiblã pʋgẽ.
Découvrez aussi…
SOGSG BIIBLÃ SẼN LEOKDE
Bõe la m tõe n pʋʋs n kose?
Y na n bãnga bũmb ning sẽn kɩt tɩ Wẽnnaam pa getẽ tɩ tõnd zu-loeesã yõod pa sek a na sõng tõndã.
SOGSG KOM-BƖƖSÃ SẼN SOKDE
Bõe yĩng tɩ m segd n pʋʋsdẽ?
Pʋʋsgã yaa bũmb sẽn sõngd maam tɩ m yamã gãe bãan bal bɩ, bɩ a yõodã yɩɩda rẽ?
SOGSG BIIBLÃ SẼN LEOKDE
Mam sã n pʋʋs Wẽnnaam, a na n sõng-m lame bɩ?
Wẽnnaam toog sɩd bee ne tõnd zu-loeesã bɩ?
KIBAY TÕND ZUGU
Kẽng-y tigsga
Bao-y n bãng-y bũmb kẽer tõnd tigissã wɛɛngẽ. Bao-y n bãng-y tigsg zĩig sẽn pẽ ne-yã.
