Sõma la wẽngã: D sã n tũ Biiblã sẽn yet rẽ wɛɛngẽ wã, naf-d-la wʋsgo
Biiblã saglsã tũub nafa neb milyõ-rãmba. D ges sẽn naf-b to-to wã zĩis a naas wɛɛngẽ.
1. Kãadmã wɛɛngẽ
Nebã tagsg sẽn yaa a soab kãadmã wɛɛngẽ wã, la bũmb nins d sẽn segd n maan tɩ d kãadem yɩ sõma wã yaa toor-toore.
BIIBLÃ SẼN YETE: “Baasgo, yãmb ned kam fãa segd n nonga a pag wa a sẽn nong a meng to-to wã. La pagã me segd n waoogda a sɩdã ne a sũur fãa.”—Efɛɛz rãmbã 5:33.
A VÕORÃ: Kãadmã yaa Wẽnnaam n lugli. Rẽnd a mii sẽn kẽ-b kãadmã sẽn segd n maan n paam sũ-noogo. (Mark 10:6-9) Neb sẽn kẽ kãadem sã n dat tɩ b zĩnd-n-taarã yɩ noogo, b ned kam fãa segd n baooda sẽn noom a to wã, la pa sẽn noom yẽ mengã bal ye. Rao sẽn nong a pag wilgda rẽ ne a sẽn get a yell to-to wã. Pag sẽn nong a sɩd me wilgda rẽ ne a no-goamã la a manesmã.
BIIBLÃ SAGLSÃ TŨUB NAFDAME: A Kãng ne a pag a Ti sẽn be Viɛtnammã ra kɩsa sɩd tɩ b zĩnd-n-taarã pa tol n tõe n yɩ noog ye. A Kãng ra wae n gomda a pagã gom-põaasa. A yeelame: “Mam toog ra ka be ne a Ti tagsg ye. M da wae n maanda bũmb toor-toor n paoogd-a.” A Ti ra ratame tɩ b kao kãadmã. A yeelame yaa: “Mam da getame tɩ m pa le tõe n kõ a Kãng sɩda, wall m waoog-a ye.”
A Kãng ne a Ti wa n zãmsa Biiblã, n bãng b sẽn tõe n tũ Efɛɛz rãmb 5:33 saglgã to-to. A Kãng yeelame: “Vɛrse wã sõng-m lame tɩ m bãng tɩ m segd n zãa a Ti sõma. M segd n modgdame t’a neẽ tɩ m nong-a lame, tɩ m geta a yell sõma, la m sõng t’a yam gãe bãane. M sẽn maan woto wã, m paamame t’a nong-m la a waoogd-ma.” A Ti me yeelame: “M sẽn sɩng Efɛɛz rãmb 5:33 saglgã tũub n waoogd m sɩdã, m yãame tɩ yẽ me ra modgdame sẽn na yɩl tɩ m neẽ t’a nong-m lame la t’a kogend-m lame, tɩ m yam gãe bãane.”
Y sã n dat sagls n paas kãadmã wɛɛngẽ bɩ y kẽ jw.org pʋgẽ, n karem yʋʋmd 2018 Réveillez-vous ! No a 2 soabã gom-zug sẽn yaa: “12 clés du bonheur familial.”
2. D manesem sẽn segd n yɩ to-to ne neb a taabã
Nebã wae n kisa b taabã b buudã, b sẽn yit tẽng ningã, b sẽn manegd b mens to-to wã, b tũudmã, wall b sẽn yaa pag n kẽed ne pagba, bɩ b sẽn yaa rao n kẽed ne rap yĩnga.
BIIBLÃ SẼN YETE: “Waoog-y nebã buud fãa.” —1 Pɩyɛɛr 2:17.
A VÕORÃ: Biiblã pa yeel tɩ d segd n kisga bu-zẽms neba, tẽns a taab neba, wall pagb sẽn kẽed ne pagb bɩ rap sẽn kẽed ne rap ye. A pʋd n sagend-d lame tɩ d waoog ned buud fãa n da ges a yĩngã kõbgo, a sẽn yit tẽng ninga, a yaa rakãagr bɩ naong soab ye. (Tʋʋma 10:34) Baa d sã n kɩs sɩd tɩ ned sẽn tẽed bũmb ninsã yaa ziri, la t’a sẽn vɩ to-to wã pa sõma, d segd n kell n talla manesem-sõng ne-a la d waoog-a.—Matiye 7:12.
BIIBLÃ SAGLSÃ TŨUB NAFDAME: Hal a Dãniyɛll yãadmẽ wã, b wilg-a lame tɩ neb nins sẽn yit Aazi wã na n sãama b tẽngã. Rẽ kɩtame t’a ra kis ned ning fãa sẽn yit Aazi, t’a sã n yã-b zama sʋk bɩ a ra wae n tʋʋd-ba. A Dãniyɛll yeelame: “M da tagsdame tɩ m sẽn maand woto wã yaa m sẽn nong m tẽngã yĩnga. M zɩ n ges meng tɩ m tagsgã wall m manesmã yaa wẽng ye.”
A Dãniyɛll wa n zãmsa Biiblã n bãng a sẽn yetã. A yeelame: “M da segd n toeema m tagsgã fasɩ. Mam da segd n gesa nebã wa Wẽnnaam sẽn get-b to-to wã, rat n yeel tɩ ninsaalbã fãa yaa yembre, baa b sẽn yitẽ.” A Dãniyɛll wilga yẽ tagsg sẽn yaa a soab masã, a sã n seg ned paalem. A yeelame: “Mam pa get a sẽn yitẽ wã meng ye. M nonga neb buud fãa masã, n tar zo-rãmb dũniyã gill zugu.”
Y sã n dat vẽenem n paas bɩ y kẽ jw.org n karem yʋʋmd 2020 Réveillez-vous ! No a 3 soabã gom-zug sẽn yaa: “Y a-t-il un remède contre les préjugés ?”
3. Ligdã wɛɛngẽ
Neb wʋsg maanda b sẽn tõe fãa n na n lebg rakãag-rãmba, n tagsdẽ tɩ rẽ la b na n paam sũ-noog rũndã-rũndã, la beoog sẽn wate.
BIIBLÃ SẼN YETE: “Yam kogenda ninsaal wa ligd me sẽn kogend ninsaalã. La yam ne bãngr yõodã yaa tɩ b fãagda ned ning sẽn tar-bã.”—Koɛɛg soaba 7:12.
A VÕORÃ: Ligd yaa tɩlɛ ne tõndo, la d pa tõe n kɩs sɩd tɩ rẽ n na n kõ-d sũ-noog masã la beoog sẽn wat ye. (Yel-bũnã 18:11; 23:4, 5) Yaa d sã n tũud Biiblã saglsã sẽn yit Wẽnnaam nengẽ wã la d na n paam sũ-noog hakɩɩk rũndã-rũndã, la vɩɩm sẽn tar bark beoog-daare.—1 Tɩmote 6:17-19.
BIIBLÃ SAGLSÃ TŨUB NAFDAME: A Kardo yaa rao sẽn be Ẽndonezi. Bũmb ning sẽn da pak-a n yɩɩd yaa arzɛkã baoobo. A yeelame: “Mam da tara bũmb nins neb wʋsg sẽn baood ne b sũur fãa wã. M da tõe n toga sor n kẽng m sẽn datẽ, m da raada te-bɛda, mobila la zagse.” La a Kardo wa n lʋɩɩme. A yeelame yaa: “Ɛskoro-rãmb n belg maam n dɩ m ligdã. Ligd ning mam sẽn tʋm wʋsg yʋʋm-kãensã fãa n paamã looga nif kamsg pʋgẽ. Mam tʋma yʋʋm wʋsg sẽn na yɩl n lebg rakãagre. La wa n baasa ne sũ-sãamse. Bala m pa le tar baa fʋɩ, n tagsdẽ tɩ m ka võor me ye.”
A Kardo wa n sɩnga sagls nins Biiblã sẽn kõt ligdã wɛɛngẽ wã tũubu. Masã a pa le maand a sẽn tõe fãa n dat n lebg arzɛk soab ye. A yãka yam n pa na n gĩd a vɩɩmã ne bũmb wʋsg ye. A yeelame: “M tagsdame tɩ masã la m tar arzɛk hakɩɩka, bala m tara zood sõma ne Wẽnnaam. Yʋng fãa m gõee sõma. M tara sũ-noog hakɩɩka.”
Y sã n dat n bãng Biiblã sẽn yet bũmb ning ligdã wɛɛngẽ wã n paase, bɩ y kẽ jw.org n karem yʋʋmd 2021 Gũusg Gasgã No a 3 soabã sõsg ning gom-zug sẽn yaa: “Karengã la ligdã n tõe n kɩt tɩ ned beoog yɩ neer bɩ?”
4. Pag ne rao lagengã wɛɛngẽ
Nebã tagsg sẽn yaa a soab pag ne rao lagengã wɛɛngẽ wã yaa toor-toore.
BIIBLÃ SẼN YETE: “Lak-y y mens ne yoobo. Yãmb ned kam fãa segd n bãnga a sẽn na n tõog a meng yĩngã to-to, n zã-a t’a yɩ sõng la a tall waoogre. Da yɩ-y wa neb nins sẽn pa mi Wẽnnaamã ye. Bala b basame tɩ yoobã tʋlsem soog-ba, hal tɩ pa sekd-b ye.”—1 Tesalonik rãmbã 4:3-5.
A VÕORÃ: Biiblã lugla noy takɩ pag ne rao lageng tʋlsmã pidsg wɛɛngẽ. Biiblã pʋgẽ, gom-bil ning b sẽn lebg tɩ “yoobã” võor yalmame. A võorã yaa ned sẽn kẽed ne ned a to sẽn pa a pag bɩ a sɩda, ned sẽn lagemd ne rap wall pagb n deegd ligd wall bũmb a to, neb sẽn gãe taab n pa kẽ kãadem, rao ne rao wall pag ne pag sẽn kẽed ne taaba, la ned sẽn kẽed ne rũnga. (1 Korẽnt rãmbã 6:9, 10) Pag ne rao lagengã yaa Wẽnnaam kũuni, la a wilgame tɩ yaa pag ne rao sẽn kẽ kãadem bal n tar sor n tõe n kẽ ne taaba.—Yel-bũnã 5:18, 19.
BIIBLÃ SAGLSÃ TŨUB NAFDAME: Pag a ye sẽn be Ostrali t’a yʋʋr boondẽ t’a Keli yeelame: “Mam sẽn wa n nan pa kẽ kãadmã, m da tagsdame tɩ yaa m sã n kẽed ne rao la m na n neẽ t’a nong-m lame, tɩ m yamã gãe bãane. La pa yɩ woto baa bilf ye. M da maanda yɩɩr wakat fãa. B sãama m sũurã naoor wʋsgo.”
A Keli wa n zãmsa Biiblã n bãng a sẽn yet bũmb ning pag ne rao lagengã wɛɛngẽ wã n sɩng rẽ tũubu. A yeelame yaa: “M yãame tɩ Wẽnnaam kõo tõnd a noyã n na n sõng tõnd tɩ d gil tood la sũ-sãamse. M sẽn tũud a Zeova noyã m yamã gãee bãan masã, tɩ m neẽ tɩ b nand-m lame. M sẽn tũud Biiblã saglsã sõng-m lame tɩ m gil sũ-sãams wʋsgo.”
Y sã n dat kibay a taab n paas bɩ y kẽ jw.org n karem sõsg ning gom-zug sẽn yaa: “Pag ne rao sẽn vɩ ne taab n yaool n pa kẽ kãadem: Bõe la Biiblã yet rẽ wɛɛngẽ?”
Tõnd Naandã kõo tõnd sagls n na n sõng-d tɩ d bãng sẽn yaa sõma la sẽn yaa wẽng n bake. Baa a saglsã tũub sẽn mi n yaa toogã, d sã n modg n tũ d pa na n wa maand d bãngẽ ye. D tõe n kɩsa sɩd tɩ rẽ n na n naf tõnd n kaoose.
Découvrez aussi…
Sẽn tar yõod wʋsgo
Wẽnnaam tagsg yaa bõe kãadmã wɛɛngẽ?
Wẽnnaam ratame tɩ y kãadmã tall barka. Biiblã saglsã sõnga neb wʋsg sẽn kẽ kãadem.
Sẽn tar yõod wʋsgo
Vɩɩmã yõod yaa bõe?
Ges-y y sẽn tõe n maan n paam sũ-noog hakɩɩka, tɩ y vɩɩmã me tar barka.
KIBAY TÕND ZUGU
Kos-y t’a Zeova Kaset soab wa kaag-yã
Bao-y n bãng-y bũmb Biiblã zug wall a Zeova Kaset rãmbã zug n paase.
