D pa segd n tags tɩ karen-biis pis-yopoe wã sẽn da pa be ne a Zeezi a sẽn wa n na n lugl Zu-soabã zaabr dɩɩbã wilgdame tɩ b ra pa le tat a yam, wall tɩ b basa a pʋgb ye. A Zeezi ra ratame bal tɩ yɩ yẽ ne a tẽn-tʋmdbã.

Tẽn-tʋmdb piig la yiibã ne karen-biis pis-yopoe wã fãa ra tata a Zeezi yam. A Zeezi reng n yãka rap piig la a yiib a karen-biisã sẽn da yaa wʋsgã sʋka, n bool-b tɩ tẽn-tʋmdba. (Luk 6:12-16) A ra bee Galile a sẽn wa n “bool Piig la a yiibã,” n “tʋm-b tɩ b tɩ moon Wẽnnaam Rĩungã koɛɛgã, la b sãoog bãad-rãmbã.” (Luk 9:1-6) Rẽ poore, a Zeezi sẽn wa n be Zide, a “yãka neb a taab a karen-biisã sʋka, bãmb pis-yopoe n tʋm-b yiib-yiibu.” (Luk 9:51; 10:1) Rẽ kɩtame t’a Zeezi ra tar karen-biis zĩis toor-toor b sẽn moon n gom a yellã.

Zʋɩf-rãmb nins sẽn da lebg a Zeezi karen-biisã tog n da ket n maanda Pakã yʋʋmd fãa. Yaa vẽeneg tɩ b ra naagda b zagsã rãmb n maand Pakã. (Yik. 12:6-11, 17-20) A Zeezi kũumã sẽn wa n kolgdẽ wã, yẽ ne a tẽn-tʋmdbã kẽnga Zerizalɛm. La a pa bool a karen-biis nins sẽn da be Zide, Galile la Peere wã tɩ b wa naag taab n maan Pakã ye. Sãmbg sẽn kae, a Zeezi ra rat n zĩnda ne a tẽn-tʋmdbã bala. A yeel-b lame: “Mam tʋlga ne m sũur fãa n dɩ Pak-kãngã ne yãmb nand tɩ m namse.”—Luk 22:15.

A Zeezi ra bee bʋʋm la a sẽn da rat tɩ yɩ yẽ ne a tẽn-tʋmdbã balã. Ra pa na n kaoos la a Zeezi sẽn yaa “Wẽnnaam Pe-bilã sẽn yiisd dũniyã yel-wẽndã” ki ye. (Zã 1:29) Ra segd n yɩɩ Zerizalɛm, zĩig ning b sẽn da kʋʋd maand n kõt Wẽnnaamã. Israyɛll nebã sẽn da kʋʋd Pakã pe-bilã ra tẽegd-b lame t’a Zeova yiis-b-la Ezɩpti. La a Zeezi maoongã ra na n waa ne fãagr sẽn yɩɩd rẽ. Ra na n paka sor tɩ ninsaalbã fãa tõe n paam b mens ne yel-wẽndã la kũumã. (1 Kor. 5:7, 8) A Zeezi maoongã ra na n paka sor tɩ tẽn-tʋmdb piig la yiibã lebg kiris-neb tigingã yẽbgre. (Efɛɛ. 2:20-22) Sɩd me, Zerizalɛm sẽn yaa tẽn-sõngã tara “yẽbgr kug piig la a yiibu,” tɩ “Pe-bilã tẽn-tʋmdb piig la a yiibã yʋy piig la a yiibã gʋls b zutu.” (Vẽn. 21:10-14) Hakɩɩka, tẽn-tʋmdb nins sẽn kell n maan sɩdã ra tara tʋʋm-kãseng n na n tʋm Wẽnnaam daabã pidsg pʋgẽ. Rẽnd sɩd bee bʋʋm la a Zeezi sẽn da rat tɩ b zĩnd ne-a a yaoolem Pakã rɩɩb sasa, la bũmb ning a sẽn na n maan dẽ poor bilfu, rat n yeel tɩ Zu-soabã zaabr dɩɩbã luglg sasa wã.

Karen-biis pis-yopoe wã ne karen-biis a taabã ra pa be ne a Zeezi Zu-soabã zaabr dɩɩbã sasa ye. La a Zeezi karen-biis nins fãa sẽn kell n maan sɩdã ra na n dɩɩ rẽ yõodo. B sʋka, neb nins fãa sẽn wa n paam vʋʋsem sõng zaeebã naaga Rĩungã kaoolã pʋgẽ, kaool ning yell a Zeezi sẽn gom ne a tẽn-tʋmdbã baraar yʋngã.—Luk 22:29, 30.