1. Bõe la a Zeova yet neb nins sẽn tũud-a wã tɩ b maane? (Ges-y fotã me.)

 D SÃ n wa rat n bãng d sẽn na n maaneg yell taoore, la belsgo, ãnd n tõe n sõng-do? D mii sẽn tõe n sõng-a tõndã. D tõe n pʋʋsa Wẽnnaam a Zeova. A Zeova mengã yetame tɩ d maan woto. A ratame tɩ d ‘pʋʋsd-a wakat fãa.’ (1 Tes. 5:17) D tõe n basa d yam n pʋʋs-a n kos sõngre, d vɩɩmã nens fãa pʋgẽ. (Yel. 3:5, 6) Wẽnnaam a Zeova sẽn yaa kõatã, a pa yãk sõor takɩ d sẽn tog n pʋʋs-a ye.

2. Bõe yell la d na n gom sõs-kãngã pʋgẽ?

² D sũur nooma ne d sẽn paam n tõe n pʋʋs a Zeova wã. La d sẽn tar bũmb wʋsg n maandẽ wã, tõe n yɩɩ toog tɩ d paam sẽk n pʋʋse. D tõe n getame me tɩ d segd n paasa d pʋʋsgã sõmblem. Zu-noogo, d tõe n paama raood kẽngr la sagls wʋsg Biiblã pʋgẽ. Sõs-kãngã pʋgẽ, d na n goma mak-sõng ning a Zeezi sẽn kõ pʋʋsgã wɛɛngẽ wã yelle, tɩ sõng-d tɩ d bãng d sẽn tõe n maan to-to, n paamd sẽk n pʋʋsdẽ. D leb n na n yãa bũmb a nu sẽn tar yõod d sẽn tõe n maan d pʋʋsgã sasa, tɩ sõng-d tɩ d paas d pʋʋsgã sõmblem.

3. Bõe la a Zeezi ra mi pʋʋsgã wɛɛngẽ?

³ A Zeezi ra miime tɩ pʋʋsgã tara yõod wʋsg a Zeova nifẽ. Yʋʋm wʋsg nand t’a wa tẽngã zugu, a yãa a Ba wã sẽn leok pagb la rap sẽn yaa wẽn-zoɛtb pʋʋsgo. Wala makre, a Zeezi ra bee ne a Ba wã, a sẽn wa n leok a Anne, a Davɩɩde, a Eli la neb a taab sẽn pelg b pʋg n pʋʋs-a wã. (1 Sãm. 1:10,  11, 20; 1 Rĩm. 19:4-6; Yɩɩn. 32:5) Yaa rẽ yĩng la a Zeezi sẽn yeel a karen-biisã tɩ b pʋʋsd wakat fãa, la ne bas-m-yamã.—Mat. 7:7-11.

4. Mak-sõng bʋg la a Zeezi kõ pʋʋsgã wɛɛngẽ?

⁴ A Zeezi mengã pʋʋsa a Zeova, n kõ a karen-biisã mak-sõngo. A Zeezi sẽn wa n be tẽngã zugã, a ra wae n pʋʋsdame. Ra yaa tɩlɛ t’a bao sẽk sẽn na yɩl n pʋʋse, bala a ra tʋmda wʋsgo, tɩ neb wʋsg me ra mi n be ne-a. (Mark 6:31, 45, 46) A ra sãta yibeoog pĩnda, sẽn na yɩl n paam wakat yẽ a yembre, n pʋʋse. (Mark 1:35) Vugri, a pʋʋsa yʋng tõre, n yaool n yãk yam bũmb sẽn tar yõod wʋsg wɛɛngẽ. (Luk 6:12, 13) Yʋng ning b sẽn yõk a Zeezi wã, a pʋʋsame n yɩlme, sẽn na yɩl n tõog n baas tʋʋmd ning a sẽn da segd n tʋm tẽngã zugã.—Mat. 26:39, 42, 44.

5. Wãn to la d tõe n dɩk a Zeezi togs-n-taar pʋʋsgã wɛɛngẽ?

⁵ A Zeezi mak-sõngã wilgdame tɩ baa d tʋʋmã sẽn yaa wʋsg to-to, d segd n modgdame n baood sẽk n pʋʋsdẽ. Wa a Zeezi, tõnd me segd n yãka wakat pʋʋsgã yĩnga. Wala makre, d tõe n yikda yibeoog pĩnda, wall d pʋʋsd yʋngo. D sã n maand woto, d wilgda a Zeova tɩ d nanda pʋʋsgã sẽn yaa kũun sẽn tar yõod wʋsgã. Saam-bi-poak a ye yʋʋr sẽn boond t’a Lin tẽra a sũur sẽn yɩ noog to-to, a sẽn wa n bãng t’a tõe n paam n pʋʋsa a Zeova wã. A yeelame: “Mam sẽn wa n bãng tɩ m tõe n goma ne a Zeova sẽn yaa wakat ning fãa m sẽn datã, sõnga maam tɩ m getẽ t’a yaa m zoa hakɩɩka, tɩ m dat me n paas m pʋʋsgã sõmblem.” Yaa vẽeneg tɩ tõnd wʋsg me sũur yɩɩ noog woto. Bɩ d ges bũmb a nu sẽn tar yõod d sẽn tõe n maan d pʋʋsgã sasa.

6. Sã n yaa ne Vẽnegr 4:10, 11 wã, a Zeova zemsa ne bõe?

⁶ D pẽg a Zeova. A Zeova vẽnega tẽn-tʋmd a Zã t’a yã kãsem-dãmb 24 sẽn be saasẽ, n waoogd a Zeova. B ra pẽgda Wẽnnaam, n yetẽ tɩ yẽ n zems tɩ reeg “ziir la waoogr la pãnga.” (Karm-y Vẽnegr 4:10, 11.) Malɛg-sakdbã me tara bʋʋm ka tɛk n na n pẽg a Zeova la b waoog-a. B bee saasẽ ne-a, la b mi-a sõma me. B sã n get bũmb nins a sẽn maandã, b nee a sẽn yaa  Wẽnnaam ning buudã. B sẽn ne a Zeova sẽn tʋmdã, kɩtdame tɩ b pẽgd-a.—Zoob 38:4-7.

7. Bõe ne bõe yĩng la d tõe n pẽg a Zeova?

⁷ Tõnd me sã n wa pʋʋsd a Zeova, d segd n pẽgd-a lame, n togsd-a bũmb nins sẽn noom tõnd a zugu, la bũmb ning sẽn kɩt tɩ d sũur noom ne-a wã. Y sã n wa karemd Biiblã, la y sã n wa zãmsd-a, bɩ y bao n bãng a Zeova zʋg-sõma sẽn noom yãmb n tɩ yɩɩda. (Zoob 37:23; Rom. 11:33) Rẽ poor bɩ y togs a Zeova y sũur sẽn noom to-to ne zʋg-kãense. D leb n tõe n pẽga a Zeova a sẽn sõngd tõnd ne d tẽed-n-taasã sẽn be dũniyã gill zugã yĩnga. A geta d yell la a kogend-d wakat fãa.—1 Sãm. 1:27; 2:1, 2.

8. Bõe ne bõe yĩng la d tõe n pʋʋs a Zeova barka? (1 Tesalonik rãmbã 5:18)

⁸ D pʋʋsd a Zeova barka. D tara bʋʋm wʋsg n na n pʋʋs a Zeova bark d pʋʋsg sasa. (Karm-y 1 Tesalonik rãmb 5:18.) D tõe n pʋʋs-a-la bark bõn-sõng ning fãa d sẽn tar yĩnga, bala kũun sẽn yaa sõma buud fãa yita yẽ nengẽ. (Zak 1:17) Wala makre, d tõe n pʋʋs-a-la bark tẽngã a sẽn naan tɩ be rasandã yĩnga, la bõn-neeb nins fãa a sẽn naanã yĩnga. Sẽn paase, d tõe n pʋʋs-a-la bark vɩɩmã a sẽn kõ-dã yĩnga, d zakã rãmbã, d zo-rãmbã, la a sẽn kɩt tɩ d tẽed manegrã yĩnga. D leb n tõe n pʋʋsa a Zeova bark d sẽn paam n tõe n yɩ a zo-rãmbã yĩnga.

9. Bõe yĩng tɩ d segd n wilgd a Zeova tɩ d sũur nooma ne bũmb nins a sẽn maand n kõt tõndã?

⁹ Tõe tɩ d segd n maana modgr wʋsgo, n tags n ges bʋʋm nins tõnd mengã sẽn tare, n na n pʋʋs a Zeova barkã. Rũndã-rũndã, neb wʋsg pa mi b zaamẽ ye. Nebã wae n tagsda bũmb ning b sẽn na n maan n paam b sẽn datã yelle, n yɩɩd bũmb ning b sẽn tõe n maan n wilg tɩ b sũur nooma ne b sẽn tarã. Tõnd me sã n dɩk nin-kãensã togs-n-taare, d pʋʋsgã tõe n wa lebga kosg bala. Sẽn na yɩl tɩ ra wa yɩ woto, d segd n modgda wakat fãa, n wilgd a Zeova tɩ d sũur nooma ne bũmb nins fãa a sẽn maand n kõt tõndã.—Luk 6:45.

10. Saam-bi-poak a ye sẽn da pʋʋsd a Zeova bark bũmb nins a sẽn maan n kõ-a wã yĩnga, wãn to la sõng-a t’a tõog toogo? (Ges-y fotã me.)

¹⁰ D sã n wilgdẽ tɩ d sũur nooma ne bũmb nins a Zeova sẽn maand n kõt tõndã, tõe n sõng-d lame tɩ d tõog toog zu-loees sasa. D gom saam-bi-poak a Kyung-sook yelle. A kibarã bee yʋʋmd 2015 yʋʋm-vẽkr kiuug pipi daar Gũusg Gasgã pʋgẽ. A wa n lʋɩɩ bãaga, tɩ logtoɛɛmbã yeel tɩ fulfuud kãsɛɛr sẽn tar pãng n tar-a. A yeelame t’a sẽn wa n bãng tɩ kãsɛɛr n tar-a wã, a sũur sãama wʋsgo. A ra tagsdame t’a magbã fãa lebga zaalem, n maand rabeem wʋsgo. Bõe n sõng-a t’a tõog n mao ne a zu-loɛɛgã? A yeelame tɩ yʋng fãa nand t’a tɩ gãande, a rʋʋda a roogã zug n zẽk a  koɛɛg n pʋʋs a Zeova, n gom bõn-sõma a nu a sẽn paam daarã pʋgẽ tɩ noom-a yelle. Rẽ poore, a yam gãandeda bãane, t’a maneg n dat n wilg a Zeova t’a nong-a lame. A bãnga a Zeova sẽn teend a nin-buiidã to-to zu-loees sasa. A bãngame me tɩ bõn-sõma nins d sẽn paamdã yɩɩda d zu-loeesã. Tõnd me tara bʋʋm wʋsg wa a Kyung-sook n na n pʋʋs a Zeova barka, baa d sã n wa maood ne zu-loɛɛga. D sã n pʋʋsd-a n wilgdẽ tɩ d sũur nooma ne bũmb nins a sẽn maan n kõ tõndã, tõe n sõng-d lame tɩ d tõog toogo, la d kell n tall sũ-noogo.

11. A Zeezi sẽn wa n leb saasẽ wã poore, bõe yĩng tɩ ra yaa tɩlɛ t’a karen-biisã paam raoodo?

¹¹ D kos a Zeova t’a kõ-d raood koɛɛgã mooneg sasa. Bilf nand t’a Zeezi leb saasẽ, a tẽega a karen-biisã tɩ b segd n moona koɛɛgã n gom yẽ yell “Zerizalɛm ne Zide soolmã fãa pʋgẽ la Samari, la hal n tãag dũniyã zĩig ning sẽn zãr n yɩɩdã.” (Tʋʋ. 1:8; Luk 24:46-48) Rẽ poor bilfu, Zʋɩf-rãmbã taoor dãmb yõka tẽn-tʋmdb a Pɩyɛɛr ne a Zã, n tall-b n kẽng Sãnedrẽ wã taoore. B yeela nin-kãensã sẽn maand sɩd ne Wẽnnaamã tɩ b bas koɛɛgã moonego, la b sõog-b nug menga. (Tʋʋ. 4:18, 21) A Pɩyɛɛr ne a Zã manesem yɩɩ wãna?

12. Sã n yaa ne Tʋʋm 4:29, 31 wã, bõe la karen-biisã maan-yã?

¹² Zʋɩf-rãmbã tũudmã taoor dãmb sẽn sõog a Pɩyɛɛr ne a Zã nugã, b leok-b lame n yeel yaa: “Bɩ yãmb mens tags n ges sã n sakda Wẽnnaam nifẽ tɩ tõnd kelg yãmb n bas Wẽnnaam. La sã n yaa ne tõndo, tõnd pa tõe n bas n pa gom bũmb nins tõnd sẽn yã la d wʋmã yell ye.” (Tʋʋ. 4:19, 20) B sẽn wa n bas a Pɩyɛɛr ne a Zã wã, karen-biisã zẽka b koees n pʋʋs a Zeova, a raabã maaneg wɛɛngẽ. B yeelame: ‘Sõng-y y yembsã tɩ b kell n moon yãmb gomdã ne raood wʋsgo.’ A Zeova leoka b sẽn pelg b pʋg n pʋʋs-a wã.—Karm-y Tʋʋm 4:29, 31.

13. Yam bʋg la d tõe n dɩk saam-biig a Jin-hyuk kibarã pʋgẽ?

¹³ Baa tẽngã taoor dãmb sã n wa yeel tɩ d bas koɛɛgã moonego, d tõe n dɩka a Zeezi karen-biisã togs-n-taar n kell n moon koɛɛgã. D gom saam-biig a Jin-hyuk. Yaa saam-biig b sẽn yõk n kẽes bãens roogo, a sẽn zãgs t’a pa na n kẽ sodaar yĩnga. B yãk-a lame t’a get neb a taab sẽn be bãensã roogẽ yelle. B ra yeel-a lame tɩ sã n pa a tʋʋmã wɛɛngẽ, a pa segd n gom ne nin-kãens ye. A ra pa segd n gom Biiblã yell meng ne-b ye. A pʋʋsa a Zeova n kos raood la yam, sẽn na yɩl n moon koɛɛgã segb a sẽn paam fãa. (Tʋʋ. 5:29) A yeelame: “A Zeova leoka m pʋʋsgã, n kõ-m raood la yam tɩ m sɩng Biiblã zãmsg ne neb wʋsg bãensã roogẽ, ned fãa rignoorẽ, tɩ kaoosd minit a nu. Rẽ poore, zĩigã sã n sobge m gʋlsda lɛta, tɩ beoogã sã n vẽeg bɩ m kõ neb nins sẽn be ro-yɛng ne maamã.” Tõnd me tõe n basa d yam t’a Zeova na n sõng-d lame tɩ d tõog n moon koɛɛgã. D tõe n pʋʋs n kosa raood la yam wa a Jin-hyuk me.

14. D sã n wa maood ne zu-loeese, bõe n tõe n sõng-do? (Yɩɩn-sõamyã 37:3, 5)

¹⁴ D tõe n kosa a Zeova t’a sõng-d tɩ d tõog toog zu-loɛɛg sasa. Tõe tɩ tõnd neb wʋsg maooda ne bãaga, b ned sẽn maan kaalem, zakã pʋgẽ zu-loeese, b sẽn namsd-b b tũudmã yĩnga, la yɛl a taaba. Bã-longdsã ne zabã kɩtame tɩ yɩl n tõog toog zu-loe-kãensã sasa yaa toog wʋsgo. Pelg-y y pʋg n togs a Zeova bũmb ning sẽn namsd yãmbã.  Togs-y-yã-a y zu-loeesã wa y sẽn gomd ne y zoa hakɩɩka. Bas-y y yam t’a Zeova ‘na n sõng-y lame.’—Karm-y Yɩɩn-sõamyã 37:3, 5.

15. Wãn to la pʋʋsgã tõe n sõng-do, tɩ d tõog toog “zu-loees buud fãa pʋgẽ”? Rɩk-y makre.

¹⁵ D sã n wɩngd ne pʋʋsgo, na n sõng-d lame tɩ d tõog toog “zu-loees buud fãa pʋgẽ.” (2 Kor. 1:4) A Zeova mii a nin-buiidã sẽn namsd to-to wã. “A wʋmda b sẽn kelemd n kot sõngrã.” (Yɩɩn. 145:18, 19) Saam-bi-poak a ye yʋʋr sẽn boond t’a Kristi sẽn yaa so-pakd sẽn tar yʋʋm 29 yãame tɩ gom-kãensã yaa sɩda. A wa n tiig n lʋɩɩ bã-kɛgenga. Rẽ kɩtame t’a yamã ra ka a meng baa bilf ye. Rẽ poore, a wa n bãngame t’a ma wã bẽeda bãag sẽn na n tũ ne a yõore. A Kristi yeelame: “Mam pʋʋsa a Zeova ne m sũur fãa, n kos-a t’a kõ-m pãng tɩ m tõog toog beoog sẽn vẽeg fãa. M modgame n kẽnd tigissã n pa vaandẽ, la m yãk wakat takɩ n zãmsd Biiblã, sẽn na yɩl n paas m tẽebã pãnga.” A paasame: “Pʋʋsgã sõng-m lame tɩ m tõog toog zu-loeesã sasa. M da miime t’a Zeova bee wakat fãa. Rẽ sõnga maam tɩ m yam gãande. M laafɩ wã zu-loees pa tiig n sa ye. La a Zeova leoka m pʋʋsgã, n sõng-m tɩ m paam sũur pʋgẽ bãane.” Bɩ d ra tol n yĩmi, t’a “Zeova mii a sẽn na n maan to-to n fãag wẽn-sakdbã yel-pakr pʋgẽ” ye.—2 Pɩy. 2:9.

16. Bõe yĩng tɩ yaa tɩlɛ tɩ d paam a Zeova sõngre, n tõog n yals kãn-kãe makr sasa?

¹⁶ D kos a Zeova sõngre, n tõog n yals kãn-kãe makr sasa. D sẽn yaa neb sẽn pa zems zãngã, d maooda wakat fãa sẽn na yɩl n da maan wẽng ye. A Sʋɩtãan maanda a sẽn tõe fãa, sẽn na yɩl tɩ d modgrã ra yãk neng ye. Bũmb a ye a Sʋɩtãan sẽn maande, yaa t’a tũnugda ne reem buud toor-toor sẽn pa sõma sẽn na yɩl n dẽgem d tagsa wã. Reem a woto tõe n kɩtame tɩ d yamã pid ne tagsa sẽn pa sõma. Yaa tagsa sẽn tõe n kɩt tɩ d pa le yaa yɩlem a Zeova nifẽ, la sẽn tõe n kɩt tɩ  d maan yel-wẽn-kãsenga.—Mark 7:21-23; Zak 1:14, 15.

17. D sã n pʋʋs a Zeova n kos sõngre, bõe la tõnd mengã segd n maane, n da wa maan sẽn yaa wẽnga? (Ges-y fotã me.)

¹⁷ D yamã sã n wa be sẽn yaa wẽng maanego, yaa tɩlɛ tɩ d paam a Zeova sõngr n tõog yals kãn-kãe. Pʋʋsg ning a Zeezi sẽn zãms a karen-biisã pʋgẽ, a yeel-b lame tɩ b sã n wa pʋʋsdẽ bɩ b kos yaa: “Ra bas-y tõnd tɩ d maan yel-wẽnd makr sasa ye. Fãag-y tõnd wẽng soabã nugẽ.” (Mat. 6:13) A Zeova tʋll n sõnga tõndo, la d segd n kos-a lame t’a sõng-do. Sẽn paase, d segd n modgame tɩ d manesmã zems ne d sẽn pʋʋs n kos bũmb ningã. D tõe n maana d sẽn tõe fãa n da karem sɛb wall d kelgd goam sẽn pa sõma sẽn wae a Sʋɩtãan dũniyã pʋgẽ wã ye. (Yɩɩn. 97:10) D tõe n karemda Biiblã la d zãmsd-a, tɩ kɩt tɩ d yamã pid ne tagsa sẽn yaa sõma. Tigissã kẽnde, la koɛɛgã mooneg me tõe n sõng-d lame tɩ d kogl d tagsa wã. A Zeova pʋlmame t’a pa na n bas tɩ d paam makr sẽn yɩɩd d pãng ye.—1 Kor. 10:12, 13.

18. Bõe la tõnd ned kam fãa segd n maan pʋʋsgã wɛɛngẽ?

¹⁸ Tõnd ned kam fãa tog n pʋʋsda a Zeova masã meng n yɩɩd pĩndã, n tõog n kell n maan sɩd ne-a, yaoolem wakat kãngã sẽn yaa toogã. Baood-y sẽk daar fãa n pelgd y pʋg n pʋʋsd a Zeova. A Zeova ratame tɩ d ‘togs-a bũmb nins sẽn be d sũurẽ wã.’ (Yɩɩn. 62:8) Pẽgd-y-yã-a la y pʋʋsd-a bark bũmb nins fãa a sẽn maandã yĩnga. Kos-y-yã-a t’a sõng-y tɩ y paam raood n moond koɛɛgã. Yõk-y-yã-a sɛɛg t’a sõng-y tɩ y tõog toog zu-loɛɛg buud fãa sasa, la y tõog n yals kãn-kãe makr buud fãa taoore. Ra bas-y tɩ bũmb wall ned gɩdg-y tɩ y pa pʋʋsd a Zeova wakat fãa ye. La wãn to la a Zeova leokd d pʋʋsgo? D na n leoka sok-kãngã sõsg ning sẽn pʋgdã pʋgẽ.