1-2. Bõe yĩng tɩ d tõe n wa tagsdẽ t’a Zeova pa leokd d pʋʋsgo?

 “MAAN sũ-noog wʋsg a Zeova yĩnga, t’a na n kõo foo f sũurã sẽn date.” (Yɩɩn. 37:4) Ad yaa pʋleng sẽn be yamleoogo! La d segd n gũudame t’a Zeova kõ-d bũmb ning fãa d sẽn kos zĩig pʋgẽ bɩ? Bõe yĩng tɩ sok-kãngã tar yõodo? D rɩk makre. Saam-bi-poak sẽn nan pa kẽ kãadem n pʋʋsd n dat n kẽng Rĩungã koe-moondb lekolle. La maana yʋʋm a wãn tɩ b ket n nan pa bool-a ye. Saam-biig sẽn yaa bi-bɩɩg n bẽed bãag sẽn namsd-a, n kot a Zeova t’a kõ-a laafɩ t’a tõog n tʋm tʋʋm wʋsg tigingã pʋgẽ. La a bãagã ket n namsd-a lame. Pag ne a sɩd sẽn yaa kiris-neb n pʋʋsd a Zeova n kotẽ t’a sõng b biigã t’a kell n pa sɩdã pʋgẽ. La biigã wa n yãka yam n bas a Zeova tũubu.

² Tõe tɩ yãmb me kosa a Zeova bũmbu, la y pa paam ye. Rẽ tõe n kɩtame tɩ y tags t’a Zeova leokda neb kẽer pʋʋsg n basd yãmb dẽndã, wall kɩt tɩ y tagsdẽ tɩ y maana bũmb sẽn pa sõma. Saam-bi-poak a ye yʋʋr sẽn boond t’a Zanis b ra tagsda woto. Yẽ ne a sɩdã ra pʋʋsdame n dat n tɩ tʋm Betɛllẽ wã. Ad a sẽn yeele: “M da kɩsa sɩd tɩ pa na n kaoos la b bool-d Betɛllẽ wã ye.” La maana yʋʋma, tɩ b ket n nan pa bool yẽ ne a sɩdã ye. A Zanis yeelame: “M sũurã sãama wʋsgo, hal tɩ m pa mi m sẽn maandg ye. M da sokda m meng m sã n pa maana bũmb n sãam a Zeova sũuri. M pʋʋsa naoor wʋsg n kos tɩ b bool-d Betɛllẽ wã. Bõe yĩng t’a Zeova pa leok m pʋʋsgã?”

3. Bõe yell la d na n gom sõs-kãngã pʋgẽ?

 ³ Wakat ninga d tõe n sokda d meng a Zeova sã n kelgda d pʋʋsgã. Baa pĩnd wẽndẽ wẽn-sakdb soka b mens woto. (Zoob 30:20; Yɩɩn. 22:2; Hab. 1:2) Bõe n tõe n kɩt tɩ y kɩs sɩd t’a Zeova na n kelga y pʋʋsgã? (Yɩɩn. 65:2) Sẽn na yɩl n leok sok-kãngã, d na n deng n goma bũmb a tãab yelle: 1) Bõe la a Zeova na n maan n leok d pʋʋsgã? 2) Bõe la a Zeova rat tɩ d maane? La 3) bõe yĩng tɩ tõe n yɩ tɩlɛ tɩ d toeem bũmb ning d sẽn kotã?

4. Sã n yaa ne Zeremi 29:12, bõe la a Zeova pʋlem-yã?

⁴ A Zeova pʋlmame t’a na n kelga d pʋʋsgã. (Karm-y Zeremi 29:12.) Tõnd Wẽnnaamã nonga tõnd d sẽn maand sɩd ne-a wã yĩnga. Rẽ n so t’a kelgd d pʋʋsgã wakat fãa. (Yɩɩn. 10:17; 37:28) La woto pa rat n yeel t’a na n kõ-d-la bũmb ning fãa d sẽn kos ye. Tõe tɩ na n yɩɩ tɩlɛ tɩ d gũ dũni-paalgã, n yaool n paam bũmb kẽer d sẽn kote.

5. A Zeova sã n wa kelgd d pʋʋsgo, bõe yell la a tagsda? Wilg-y y leoorã võore.

⁵ A Zeova geta d sẽn kot bũmb ninsã sã n zemsa ne a raabã. (Eza. 55:8, 9) Bũmb a ye a sẽn dat yaa dũniyã sẽn na n pid ne neb sẽn sakd a naamã ne sũ-noogo. La a Sʋɩtãan yeelame tɩ ninsaalbã sã n so b mens la sõma n yɩɩda. (Sɩng. 3:1-5) Sẽn na yɩl n wilg t’a Sʋɩtãan sẽn yeelã yaa ziri, a Zeova basame tɩ ninsaalb rɩt naam b taab zutu. Yaool n yaa ninsaalbã naamã n wat ne zu-loees nins d sẽn maood ne rũndã-rũndã wã wʋsgo. (Koɛ. 8:9) D miime t’a Zeova pa na n welg zu-loe-kãens fãa mas-masã ye. A sã n maan woto, neb kẽer tõe n tagsame tɩ ninsaalbã naamã yaa sõma, la tɩ b tõe n welga b zu-loeesã b toore.

6. Bõe yĩng tɩ d segd n kɩs sɩd t’a Zeova maanda bũmb fãa ne nonglem la tɩrlem?

⁶ Neb tõe n pʋʋsd n kota bũmb sẽn wõnd taaba, t’a Zeova leok ne manesem toor-toore. Wala makre, rĩm a Ezekɩyaas sẽn wa n bẽed bã-kɛgenga, a pʋʋsa a Zeova n kos t’a kõ-a laafɩ. A Zeova leoka a pʋʋsgã, n kõ-a laafɩ. (2 Rĩm. 20:1-6) La tẽn-tʋmd a Poll sẽn wa n yõk a Zeova sɛɛg t’a yãk ‘gõaag a yĩngã pʋgẽ wã,’ a Zeova pa kɩt t’a zu-loɛɛgã sa ye. Tõe tɩ “gõaag yĩngã pʋgẽ” wã ra yaa bãag sẽn namsd-a. (2 Kor. 12:7-9) D gom tẽn-tʋmdb a Zak ne a Pɩyɛɛr me yelle. Rĩm a Erood ra baood n kʋʋ b yiibã fãa. Tigingã neb pʋʋsa a Pɩyɛɛr yĩnga, la yaa vẽeneg tɩ b pʋʋsa a Zak yĩng me. La b kʋʋ a Zake, tɩ Wẽnnaam yaool n maan yel-solemd n yiis a Pɩyɛɛr bãensã roogẽ. (Tʋʋ. 12:1-11) D tõe n soka d meng yaa: ‘Bõe yĩng t’a Zeova fãag a Pɩyɛɛre, n yaool n pa fãag a Zake?’ Biiblã pa wilg rẽ ye. c La d tõe n kɩsa sɩd t’a Zeova “pa tol n maand kɛgr ye.” (Tõo. 32:4) D miime me t’a Pɩyɛɛr ne a Zak fãa ra tata a Zeova yam. (Vẽn. 21:14) Wakat ninga a Zeova tõe n leoka d pʋʋsgã tɩ pa yɩ wa d sẽn da tẽedã ye. La d sẽn kɩs sɩd t’a Zeova leokda d pʋʋsgã wakat fãa ne nonglem la tɩrlmã, d sũur pa sãamd ne a sẽn leok d pʋʋsg to-to ye.—Zoob 33:13.

7. Bõe la d pa maanda, la bõe yĩnga?

 ⁷ D modgdame n pa makd d yɛlã ne neb a taabã ye. Wala makre d tõe n pʋʋsa a Zeova n kos bũmbu, n pa paam bõn-kãng ye. La d wat n yãame tɩ ned a to n pʋʋs a Zeova n kos bõn-kãnga, tɩ yaa wa a leoka a pʋʋsgã. A buud paama saam-bi-poak yʋʋr sẽn boond t’a Ana. A sɩd a Matiye ra bẽeda kãnsɛɛrã bãaga, t’a pʋʋs a Zeova n kos t’a kõ-a laafɩ. Wakat kãng tɩ saam-bi-pogs a yiib sẽn kʋʋl me n da bẽed kãnsɛɛre. A Ana pʋʋsa a Matiye ne saam-bi-pogsã yĩng ne a sũur fãa. Saam-bi-pogsã paama laafɩ, la a Matiye maana kaalem. Sɩngrẽ wã, a Ana ra sokda a meng sã n yaa a Zeova n sõng saam-bi-pogsã tɩ b paam laafɩ. Sã n yaa a Zeova n sõng-ba, bõe yĩng t’a pa leok a pʋʋsgã n sõng a sɩdã me t’a paam laafɩ? Sɩd-sɩda, d pa mi bũmb ning sẽn kɩt tɩ saam-bi-pogs a yiibã paam laafɩ wã ye. D sẽn mi bal yaa t’a Zeova yãgdame n na n wa kɩt tɩ d zu-loeesã fãa sa wakat fãa yĩnga, la t’a yãgdame n na n wa vʋʋg d zo-rãmb nins sẽn ki wã.—Zoob 14:15.

8. a) Sã n yaa ne Ezayi 43:2, wãn to la a Zeova sõngd tõndo? b) D sã n wa maood ne zu-loɛɛga, wãn to la pʋʋsgã tõe n sõng-do? (Ges-y video wã: Pʋʋsgã sõngda tõnd tɩ d tõogd toogo.)

⁸ A Zeova na n teel-d-la wakat fãa. A Zeova sẽn yaa d Ba sẽn nong-dã, a pa rat n getẽ tɩ d namsdẽ ye. (Eza. 63:9) Baasgo, a pa kogend tõnd tɩ zu-loees d sẽn tõe n dɩk n mak ne kʋɩls wall bug-witim ra paam-d ye. (Karm-y Ezayi 43:2.) La a pʋlmame t’a na n sõng-d lame tɩ d tõog n mao ne-ba. Sẽn paase a pa na n bas tɩ zu-loeesã kɩt tɩ d bas a tũub ye. A Zeova kõta tõnd a vʋʋsem sõngã sẽn tar pãngã me tɩ sõngd-d tɩ d tõogd toogo. (Luk 11:13; Fili. 4:13) Woto kɩtame tɩ d tõe n bas d yam tɩ wakat fãa, a kõt-d-la bũmb ning fãa sẽn yaa tɩlɛ ne-d sẽn na yɩl tɩ d kell n maan sɩd ne-a wa. d

9. Sã n yaa ne Zak 1:6, 7 wã, bõe yĩng tɩ d segd n kɩs sɩd t’a Zeova na n sõng-d lame?

⁹ A Zeova ratame tɩ d teeg-a. (Ebre. 11:6) Wakat kẽere, d tõe n getame tɩ zu-loeesã looga d nugu. D tõe n wa maanda sãmbs meng ne a Zeova sã n na n sõng-d lame. La Biiblã wilgame tɩ ne Wẽnnaam pãngã, d “tõe n kala lalga.” (Yɩɩn. 18:29) Woto wã, d pa segd n maan sãmbs tɩ loog noor ye. D segd n talla tẽeb n pʋʋs a Zeova, la d kɩs sɩd t’a na n leoka d pʋʋsgã.—Karm-y Zak 1:6, 7.

10. Rɩk-y makr n wilg d sẽn tõe n tʋm tɩ zems d sẽn pʋʋs n kos bũmb to-to.

¹⁰ A Zeova ratame tɩ d tʋm tɩ zems d sẽn kosã. Wala makre, saam-biig tõe n kosa a Zeova t’a sõng-a t’a paam sor a tʋʋmã zĩigẽ n kẽng rasem a tãab tigis-kãsenga. Wãn to la a Zeova tõe n leok a pʋʋsgã? A tõe n sõnga saam-biigã t’a paam daoodo, n tɩ gom ne a tʋʋmdã taoor soaba. La yaa tɩlɛ tɩ saam-biigã kẽng tʋʋmdã taoor soab nengẽ n tɩ gom ne-a. Tõe tɩ na n yɩɩ tɩlɛ t’a kos n yɩlme. Tõe meng t’a na n kosa a tʋmd-n-taag t’a reeg a zĩig n tʋme, tɩ yẽ me wa reeg-a n tʋm daar a to. La sã n wa yaa tɩlɛ, a na n sakame tɩ b ra yao-d ye.

11. Bõe yĩng tɩ d segd n pʋʋsd bũmb nins sẽn pak-dã wɛɛngẽ n yɩlemdẽ?

¹¹ A Zeova ratame tɩ d pʋʋs d zu-loɛɛgã yĩng n yɩlme. (1 Tes. 5:17) A Zeezi  wilgame tɩ pa d pʋʋsg fãa la a Zeova na n leok zĩig pʋgẽ ye. (Luk 11:9) Woto wã, ra koms-y raood n bas ye! Pelg-y y pʋg n pʋʋse, la y pʋʋs n yɩlme. (Luk 18:1-7) D sã n pʋʋsd n pa basdẽ, d wilgda a Zeova tɩ d sɩd rata bũmb ning d sẽn kotã. D wilgdame me tɩ d kɩsa sɩd t’a tõe n sõng-d lame.

12. a) Sok-bʋg la d segd n sok d meng bũmb nins d sẽn kotã wɛɛngẽ, la bõe yĩnga? b) Bõe la d tõe n maan tɩ d pʋʋsgã wilg tɩ d waoogda a Zeova? (Ges-y zĩ-gũbrã: “ Bũmb nins m sẽn kotã wilgdame tɩ m waoogda a Zeova bɩ?”)

¹² D sã n wa pa paamd bũmb ning d sẽn pʋʋsd n kotẽ wã, d tog n soka d meng sogs a tãabo. Pipi, ‘mam sẽn pʋʋsd bũmb ning yĩngã zemsame bɩ?’ D wae n tagsdame tɩ d mii sẽn yaa sõma ne-do. La bũmb ning d sẽn kotã tõeeme n pa na n naf tõnd n kaoos ye. D sã n wa pʋʋsd zu-loɛɛg ning yĩnga, tõe tɩ yellã tɩɩm a to n be n yaa sõma n yɩɩd bũmb ning d sẽn kotã. Sẽn paase, tõe tɩ bũmb ning d sẽn kotã pa zems ne a Zeova raabã zãng ye. (1 Zã 5:14) Wala makre, d tẽeg roagdb nins yell d sẽn gom tɩ loogã yelle. B kosa a Zeova t’a sõng b biigã t’a pa sɩdã pʋgẽ. Kosg a woto pa wẽng ye. La a Zeova pa na n modg ned baa a ye t’a tũ-a ye. A ratame tɩ d ned kam fãa yãk yam a toor n tũ-a, baa d kambã. (Tõo. 10:12, 13; 30:19, 20) Rẽnd ra yɩta sõma n yɩɩd tɩ roagdbã pʋʋs a Zeova, n kos t’a sõng-b tɩ b tõog tɩ b goamã kẽ b biigã t’a wa nong-a ne a sũur fãa, la a bao n yɩ a zoa.—Yel. 22:6; Efɛɛ. 6:4.

13. Sã n yaa ne 1 Pɩyɛɛr 5:6,7 wã, wakat-bʋg la a Zeova na n sõng-do? Wilg-y y leoorã võore.

¹³ Ad sokr a yiib-n-soab d sẽn tog n  sok d menga: ‘Yaa wakat a Zeova sẽn get tɩ zemsame t’a leok m pʋʋsgã bɩ?’ D tõe n wa ratame t’a leok d pʋʋsgã zĩig pʋgẽ. La a Zeova mii wakat ning sẽn zems t’a sõng-dã. (Karm-y 1 Pɩyɛɛr 5:6,7.) D sã n wa pa paamd bũmb ning d sẽn kotã tao-tao, d tõe n wa tagsdame t’a Zeova pa reeg d kosgã ye. La tõe t’a sẽn pa leokã, yaa sẽn na n wilg tɩ wakatã nan pa ta ye. Wala makre, d tẽeg saam-biig ning sẽn da pʋʋsd n kot laafɩ wã yelle. A Zeova sã n da maan yel-solemd n sãoog-a, a Sʋɩtãan tõe n yeelame tɩ saam-biigã sẽn ket n tũud a Zeova wã, yaa a sẽn kɩt t’a paam laafɩ wã yĩng bala. (Zoob 1:9-11; 2:4) Sẽn paase, a Zeova zoe n yãka wakat n na n kɩt tɩ bãag buudã fãa sa. (Eza. 33:24; Vẽn. 21:3, 4) Sã n pa wakat kãng n ta, a Zeova pa na n maan yel-solemd n sãoog d bãasã ye. Rẽnd saam-biigã ra tõe n kosa a Zeova t’a kõ-a pãng la sũur pʋgẽ bãan t’a tõog toogo, n kell n maan sɩd ne-a.—Yɩɩn. 29:11.

14. Yam-bʋg la y tõe n dɩk a Zanis kibarã pʋgẽ?

¹⁴ Tẽeg-y-yã a Zanis sẽn da pʋʋsd n dat n kẽng Betɛllẽ wã yelle. Yaa yʋʋm a nu poor la a bãng t’a Zeova leoka a pʋʋsgã tɩ yaa toor ne a sẽn da tẽedã. A yeelame: “A Zeova tũnuga ne wakat kãng n zãms maam bũmb toor-toor la a rems-ma. M da segd n maneg n kɩs-a-la sɩda. M da segd n maneg n zãmsda Biiblã sõma. M da tog n bãngame tɩ m tõe n tũu a Zeova ne sũ-noogo, baa sẽn yaa tʋʋmd ning fãa la b kõ-ma.” B wa n yãka a Zanis sɩdã t’a lebg tigims sull yel-gɛta. A Zanis sẽn tags yɛlã sẽn yɩ to-to wã zug poore, a yeelame yaa: “A Zeova leoka m pʋʋsgã, baa sẽn  pa yɩ wa m sẽn da ratã. Kaoosame tɩ m yaool n yã t’a Zeova sẽn leok-m to-to wã yaa sõma wʋsgo. M sũur nooma a sẽn kõ-m sor tɩ m tõe n yã a nonglmã la a maan-neerã.”

15. Bõe yĩng tɩ d pa tog n pʋʋsd bũmb takɩ yĩng wakat fãa? (Ges-y fot-rãmbã me.)

¹⁵ Sokr a tãab-n-soab d sẽn tog n sok d meng yaa: ‘M segd n toeema bũmb ning m sẽn pʋʋsd n kotẽ wã bɩ?’ D sã n pʋʋsd n kot bũmb takɩ, yaa sõma. La wakat ninga yɩta sõma tɩ d ra pʋʋs n kos bũmb takɩ ye. D tẽeg saam-bi-poak ning sẽn da pʋʋsd n dat n kẽng Rĩungã koe-moondb lekollã yelle. A rat n kẽnga lekollã sẽn na yɩl n wa tõog n tɩ sõng zĩig koe-moondb sẽn pa waooge. Woto wã, a tõe n ket n pʋʋsdame n kot n na n kẽng lekollã, la a pʋʋsd a Zeova n kotẽ me t’a sõng-a t’a bãng bũmb toor-toor a sẽn tõe n maan n paas a koe-moonegã pãnga. (Tʋʋ. 16:9, 10) Rẽ poore a tõe n maaname tɩ zems a sẽn pʋʋsd n kotẽ wã. A tõe n soka tigims sull yel-gɛtã n ges tiging sã n bee bãmb babgẽ wã n dat sõngre, wall a gʋls filyallã n sok zĩig koe-moondb sẽn pa waooge. e

16. D tõe n basa d yam ne bõe?

¹⁶ D yãame tɩ d tõe n basa d yam t’a Zeova na n leoka d pʋʋsgã ne nonglem la tɩrlem. (Yɩɩn. 4:3; Eza. 30:18) Wakat ninga a pa na n leok-d tɩ yɩ wa d sẽn da ratã ye. La a Zeova pa na n maan a toog kae ne d sẽn kot bũmb ningã a bada. A nong-d-la wʋsgo. A pa na n tol n daag-d n bas ye. (Yɩɩn. 9:10) Bɩ y kell n ‘teeg a Zeova wakat fãa,’ n pʋʋsd-a n togsd bũmb nins sẽn be y sũurẽ wã.—Yɩɩn. 62:8.