Biiblã pa logtoeemd sebr ye. La a tara sagls takɩ sẽn tõe n naf-do. Sagl-kãens tõe n sõnga ned sẽn bẽed bãag sẽn kɩt t’a sũur pa noom ne a menga. Ad sagls a wãna:

“Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa.”—MATIYE 9:12.

Biiblã wilgdame tɩ wakat ninga, yaa tɩlɛ tɩ d bao tɩbsg logtoɛɛmb nengẽ. Neb wʋsg sẽn bẽed bãag sẽn kɩt tɩ b sũur pa noom ne b meng bao n bãnga bũmb wʋsg b bãagã wɛɛngẽ, la logtoɛɛmb sõngr hal tɩ naf-ba.

“Yĩngã wɩsgr tara yõodo.”—1 TƖMOTE 4:8.

Y sã n minim n maand bũmb toor-toor sẽn paasd y yĩnsã keelem, tõe n sõng-y lame tɩ y bãagã kolg weoogo. Wala makre, nong-y n maand-y yĩn-wɩsgre, n dɩt rɩ-sõma, la y gũsdẽ tɩ sekdẽ.

“Sũ-noog yaa tɩɩm sẽn yaa sõma, la sũ-sãang boogda ned pãnga.”—YEL-BŨNÃ 17:22.

Y sã n karem Biiblã vɛrse-rãmb sẽn kengd raoodo, la y yãk bũmb y sẽn tõe n maan tɩ pa yɩ toog wʋsg ne-yã, tõe n sõng-y lame tɩ y tall sũ-noogo. Y sã n nong n tagsd bõn-sõma nins  y sẽn paamd y vɩɩmã pʋgẽ wã yelle, la y saagdẽ tɩ beoog na n yɩɩ neere, na n sõng-y lame tɩ y tõog n mao ne y bãagã.

“Yam bee ne sik-m-mens rãmba.”—YEL-BŨNÃ 11:2.

Y sã n wa getẽ tɩ y pa tõe n maan bũmb nins fãa y sẽn datã y toore, bɩ y sak tɩ neb a taab sõng-yã. Y zo-rãmbã la y zakã neb tõe n dat n sõng-y lame, n yaool n pa mi b sẽn tõe n maan ye. Togs-y-b bũmb takɩ b sẽn tõe n maan n sõng-yã. B sã n sõng-yã, bɩ y ra tags tɩ b ra tõe n maaname tɩ yɩɩg rẽ ye. Wilgd-y wakat fãa tɩ y sũur nooma ne b sõngrã.

“M wa n getame tɩ m yɛlã pa tũud taab ye. Kɩtame tɩ m tɩ yã logtore. A tõog n bãnga m zu-loɛɛgã. Rẽ sõnga maam tɩ m bãng m zu-loɛɛgã sẽn yaa a soaba, la m bãng tɩt m sẽn tõe n dɩk tɩ sõng-m tɩ m paam laafɩ.”—A Nicole. a A bẽeda bãag b sẽn boond tɩ trouble bipolaire.

“M yãame tɩ m sẽn karemd Biiblã daar fãa yibeoog ne m pagã, sõngd-m lame tɩ m tall tagsg sẽn zems daarã tõre. La m sã n yik daar ning tɩ m laafɩ wã pa sõma, m paamda vɛrse sẽn kengd m raoodo.”—A Pɩyɛɛre. A bẽeda bãag sẽn kɩt t’a yam ka a meng ye.

“Ra yaa toog tɩ m togs ned m zu-loɛɛgã, bala m da zoeta yãnde. La m zoa hakɩɩk n maag a yĩng n kelg-ma, n bao n na n wʋm m zu-loɛɛgã võore. A sõng-m lame tɩ m yɩɩrã booge, tɩ m neẽ tɩ m pa m yembr ye.”—A Ziyoo. A bẽeda bãag sẽn kɩt t’a yam ka rɩɩb ye.

“Biiblã sõnga maam tɩ m bãng tɩ m segd n baooda sẽk n vʋʋsdẽ, la m da tʋmd tɩ loog noor ye. Yam ning m sẽn paam ne Biiblã maasmã sõng-m lame tɩ m tõogd n maood ne sũ-sãamsã sẽn namsd-m wakat fãa wã.”—A Tɩmote. A bẽeda bãag b sẽn boond tɩ Trouble obsessionnel-compulsif.