Yãmb ra miime bɩ?
Bõe yĩng t’a Zeova sẽn sak tɩ Israyɛll nebã ra tõe n maan maoong ne wal bɩ marwalã ra sõngd-b wʋsgo?
A MOYIIZ tõogã pʋgẽ, b wilgame t’a Zeova sakame tɩ Israyɛll nebã ra tõe n maan maoong ne wal bɩ ne marwala. B sã n da wa gomd bõn-yɩgdɩ maoong yelle, b gomda liuun-kãensã a yiibã yelle, n wilg tɩ b tõe n ledga taaba. (Maan. 1:14; 12:8; 14:30) Bõe yĩng tɩ woto ra sõngd Israyɛll nebã? Bũmb a yembr yaa tɩ walã paoong mi n yaa toogo. Bõe yĩnga?
Walle
Bala yaa zĩigã sã n da wa tʋʋl la walã nong n be Israyɛlle. Zĩ-likr kiuugã sã n da ta, b yɩkdame n kẽng tẽns a taab zĩigã sẽn tʋʋle, tɩ waoodã sã n wa sa Israyɛll bɩ b lebg n wa. (Sal. yɩɩl. 2:11, 12; Zer. 8:7) Dẽnd d tõe n yeelame tɩ waoodã sasa, ra yaa toog tɩ Israyɛll nebã paam wal n maan maoongo.
Marwalle
La marwalã yẽ ra bee Israyɛll wakat fãa. Sẽn paase, nebã ra gʋʋnda marwalã b zagsẽ wã. (Ges-y Zã 2:14, 16.) Sebr a yembr yeelame tɩ Palɛstin, b ra gʋʋnda marwal tẽn-bɛdẽ la tẽn-bõonesã fãa pʋsẽ. Zak fãa pʋgẽ, marwal rot ra bee be, wall b ra tuuda bogd lalsẽ wã, tɩ marwalã kẽed be n gõe.—Ges-y Ezayi 60:8.
Marwall sẽn be a roogẽ
A Zeova sẽn sak tɩ Israyɛll nebã ra tõe n tall bõn-yɩgdɩ b sẽn tõe n paam wakat fãa yʋʋmdã pʋgẽ n maan maoongã, ra wilgdame t’a yaa Wẽnnaam sẽn nong a nin-buiidã, la t’a pa dem-dem ye.
