1. Bõe n wilgd tɩ ned yaa nimbãan-zoɛta, la yel-bũn-bʋg n gomd ned sẽn zoe a to nimbãaneg yelle?

B SÃ N gomd nimbãan-zoɛt yelle, d tõe n tagsa ned sẽn yaa nin-sõngo, ned sẽn wilgd t’a nonga a taaba, ned sẽn kʋmd a taaba, la ned sẽn yaa kõat bɩ maan-neer soab yelle. Tõe tɩ d na n tẽega a Zeezi yel-bũnd ning sẽn gomd Samari nedã me yelle. Ra-kãngã sẽn da yaa buud a to nedã yãa Zʋɩf bɩ-bees sẽn pãb la b fã-a, t’a ‘zoe a nimbãanega.’ Zʋɩfã sẽn da poglã ‘nimbãaneg yõka’ Samari nedã, t’a maan a sẽn tõe fãa n ges t’a paam tɩbsgo, a sẽn nong-a wã yĩnga. (Luk 10:29-37) Yel-bũn-kãngã sõngda tõnd tɩ d bãng a Zeova zʋg-sõng a yembre. A nimbãan-zoeerã. Wẽnnaam yaa nimbãan-zoɛta, bala a nonga tõndo. Daar ne a to fãa, a wilgda tõnd a nimbãan-zoeerã ne manesem toor-toore.

2. Bõe me la ned tõe n maan n wilg t’a yaa nimbãan-zoɛta?

² Bũmb a to me la ned tõe n maan n wilg t’a yaa nimbãan-zoɛta. Nimbãan-zoɛt tõe n yãka yam n bas n pa sɩbg ned sẽn segd ne sɩbgr ye. Rẽ wɛɛngẽ, d tõe n yeelame t’a Zeova zoeta tõnd nimbãaneg wakat fãa. Sɩd me, wa yɩɩn-gʋlsdã sẽn yeelã, Wẽnnaam “ka sɩbg tõnd wa sẽn zems tõnd yel-wẽnã ye.” (Yɩɩn. 103:10) La wakat ninga, a Zeova sɩbgda ned sẽn maan yel-wẽnde.

3. Sogs-bʋs la d na n leok sõs-kãngã pʋgẽ?

³ Sõs-kãngã pʋgẽ, d na n paama sogsg a tãab leoore. Bõe yĩng t’a Zeova wilgd t’a yaa nimbãan-zoɛta? B tõe n kibla ned tɩ wilgdẽ me tɩ b zoee a nimbãaneg bɩ? Bõe la d tõe n maan tɩ wilg tɩ d yaa nimbãan-zoɛta? Bɩ d ges Wẽnnaam Gomdã sẽn leokd sogs-kãensã to-to.

4. Bõe yĩng t’a Zeova wilgd t’a yaa nimbãan-zoɛta?

⁴ A Zeova yaa nimbãan-zoɛta, a sẽn nong-dã yĩnga: Tẽn-tʋmd a Poll yeelame tɩ Wẽnnaam ‘nimbãan-zoeerã yaa kãsenga.’ A ra rat n wilgame tɩ Wẽnnaam yaa nimbãan-zoɛta, bala a kɩtame tɩ neb sẽn pa zems zãng saagdẽ n na n tɩ vɩɩmd saasẽ. (Efɛ. 2:4-7) La pa sẽn na n tɩ vɩɩmd-b saasẽ wã bal la a wilgd a nimbãan-zoeer ye. Yɩɩn-gʋlsd a Davɩɩd yeelame: “Sẽn-Ka-Saab yaa sõmblem soab nebã fãa yĩnga, la b nimbãan-zoeerã yãagda bãmb tʋʋmã fãa.” (Yɩɩn. 145:9) A Zeova sẽn nong a nin-buiidã yĩnga, a zoeta b nimbãanega, sã n mik tɩ segdame.

5. A Zeezi maana wãn n bãng t’a Zeova yaa nimbãan-zoɛta?

⁵ A Zeezi n mi a Zeova nimbãan-zoeerã sẽn ta zĩig ningã n yɩɩda. A Zeova ne a Zeezi zĩnda ne taab n kaoos yʋʋm ka teka, nand t’a Zeezi wa tẽngã zugu. (Yel. 8:30, 31) A Zeezi yãa a Zeova sẽn wilg a nimbãan-zoeerã naoor wʋsg ne ninsaalbã sẽn yaa koangdbã. (Yɩɩn. 78:37-42) A Zeezi sã n da wa zãmsd neba, a ra nong n gomda a Ba wã nimbãan-zoeerã yelle.

6. Wãn to la a Zeezi sõng tõnd sẽn na yɩl tɩ d bãng a Ba wã nimbãan-zoeerã sẽn ta zĩig ninga?

⁶ Wa d sẽn yã sõsg ning sẽn loogã pʋgẽ wã, a Zeezi wẽe yel-bũnd n gom biig sẽn menem yelle, n na n wilg a Zeova nimbãan-zoeerã sẽn ta zĩig ninga. Biigã wʋka a teed n yi a ba wã zakẽ, n tɩ tʋm “tʋʋm-dẽgd n sãam a paoongã.” (Luk 15:13) A wa n teka yam n bas tʋʋm-dẽgdã maanego, n sik a meng n lebg n wa a ba wã zakẽ. A ba wã manesem yɩɩ wãna? Nand meng t’a ta zakẽ, a bãnga a ba wã manesem sẽn yaa to-to. Sɩd me, a Zeezi yeelame: “La a sẽn wa n ket n be yɩɩga, a ba wã yã-a lame t’a nimbãaneg yõk-a. A ba wã wudgame n tɩ mobg-a, la a mok-a sõma.” Ba wã pa ning a biigã yãnd ye. A pʋd n zoee a nimbãaneg n kõ-a sugri, n lebg n deeg-a ne sũ-noogo. Biig ning sẽn da menemã maana yel-wẽn-kãsenga. La a sẽn tek yam n kos sugrã yĩnga, a ba wã kõ-a-la sugri. A Zeezi yel-bũndã pʋgẽ, ba wã sẽn yaa nimbãan-zoɛtã makda a Zeova. A Zeezi wilgame t’a Zeova tʋllame n kõ neb nins sẽn maan yel-wẽnd n sɩd tek yam n kot sugrã sugri.—Luk 15:17-24.

7. Wãn to la a Zeova nimbãan-zoeerã wilgd t’a yamã ka koaka?

⁷ A Zeova yaa nimbãan-zoɛta, a yamã sẽn  ka koakã yĩnga: A Zeova sẽn yãkd yam n maand bũmb ninsã yaa a bõn-naandsã neer yĩnga. Biiblã wilgdame tɩ “yam ning sẽn yit yĩngrã” ‘pida ne nimbãan-zoeere, n womd bi-sõma.’ (Zak 3:17) Wa ba sẽn nong a kamba, a Zeova me miime t’a nimbãan-zoeerã nafda a nebã. (Yɩɩn. 103:13; Eza. 49:15) A Zeova sẽn zoet a nebã nimbãanegã yĩnga, a kɩtame tɩ b saagdẽ tɩ manegr n wate, baa ne b sẽn pa zems zãngã. Dẽnd a Zeova yamã sẽn ka koakã yĩnga, a zoeta d nimbãaneg wakat fãa, sã n mikame tɩ bʋʋm beeme. La a mii wakat ning me a sẽn pa segd n zoe d nimbãanega. A yamã sẽn yaa kãsengã yĩnga, a pa na n zoe yel-wẽn-maand nimbãanega, sã n mikame tɩ na n yɩɩ wa a soabã sẽn maanã pa wẽng ye.

8. Wakat ninga bõe la b segd n maan tɩlɛ tigingã pʋgẽ, la bõe yĩnga?

⁸ D rɩk makr wa ned sẽn tũud a Zeova sẽn na n yãk yam n maand yel-wẽna. Sã n wa yaa woto, bõe la d segd n maane? A Zeova togsa a Poll t’a yeel tigingã neb tɩ b “ra le maan tũud-n-taar” ne ned a woto ye. (1 Kor. 5:11) B yiisda yel-wẽn-maandb nins sẽn pa rat n tek yam n kos sugrã tigingã pʋgẽ. Woto tara yõod wʋsgo, bala yaa sẽn na yɩl n kogl tigingã neba, la wilg me t’a Zeova yaa sõngo. La neb kẽer tõe n tagsdame tɩ b sã n yiis ned tigingã pʋgẽ, a sẽn maan yel-wẽn-kãseng yĩnga, wilgdame tɩ Wẽnnaam pa zoe a nimbãaneg ye. Rẽ yĩnga, yaa sɩd bɩ? D gom rẽ yell masã.

9-10. Sẽn zems ne Ebre-rãmb 12:5, 6, bõe yĩng tɩ d tõe n yeel tɩ b sã n yiis ned tigingã pʋgẽ, wilgdame tɩ b zoee a nimbãanega? Rɩk-y makre.

⁹ Tigissã sasa, b sã n togs tɩ ned d sẽn mi la d sẽn nong pa le yaa a Zeova Kaset soaba, d sũur sãamda wʋsgo. D tõe n sokda d meng n getẽ, rẽ yĩnga, ra yaa tɩlɛ tɩ b yiis-a tigingã pʋgẽ sɩda? B sã n yiis ned tigingã pʋgẽ, sɩd wilgdame tɩ b zoee a soab nimbãaneg bɩ? N-ye! Ned sã n segd ne kiblg tɩ b bas n pa kibl-a, pa yam tʋʋmde, pa nimbãan-zoeere, pa wilgd me tɩ b nong-a lame ye. (Yel. 13:24) B sã n yiis ned sẽn maan yel-wẽnd n pa rat n tek yam n kos sugr tigingã pʋgẽ, tõe n sõng-a lame t’a toeem bɩ? N-ye! Neb kẽer sẽn da maan yel-wẽn-kãseng pĩndã yãame tɩ b sẽn yiis-b tigingã pʋgẽ wã zemsame, bala sõng-b lame tɩ b tek yam, n bas b manesem-wẽngã la b lebg n wa a Zeova nengẽ.—Karm-y Ebre-rãmb 12:5, 6.

¹⁰ D rɩk makre. Pe-kɩɩm n bãng ta pesg a ye n ka laafɩ. A miime tɩ sẽn na yɩl n tɩp a bãagã, a segd n yiis-a-la piis a taabã sʋka. Piisã yaool n yaa rũms sẽn nong n be ne taaba, tɩ b sã n welg-b bɩ tõe n nams-ba. Rẽ yĩnga, pe-kɩɩmã sẽn welg pesgã ne a taabã rat n yeelame t’a yaa nin-toaaga, bɩ ned sẽn pa tar nimbãan-zoeer bɩ? Yaa vẽeneg tɩ ayo. A miime t’a sã n bas pesgã a taabã sʋka, a bãagã na n long-b lame. Dẽnd a sẽn welg-a wã yaa piis a taabã fãa koglg yĩnga.—Ges-y Maan-kʋʋr 13:3, 4.

11. a) Bõe yĩng tɩ d tõe n dɩk ned b sẽn yiis tigingã pʋgẽ n mak ne pesg sẽn ka laafɩ? b) Bõe la neb nins b sẽn yiis tigingã pʋgẽ wã tõe n maane, la bõe sõngr me la b tõe n paame?

¹¹ D tõe n dɩka kiris-ned b sẽn yiis tigingã pʋgẽ n mak ne pesg sẽn ka laafɩ. A yaa bãad tẽebã wɛɛngẽ. (Zak 5:14) Wa bãag sɩd-sɩd sẽn tõe n long nebã, ned sã n bẽed tẽebã wɛɛngẽ me, tõe n longa neb a taabã. Rẽ n so tɩ mi n yaa tɩlɛ tɩ b yiis ned a woto tigingã pʋgẽ. Woto wilgdame t’a Zeova nonga neb nins sẽn maand sɩd ne-a wã. Leb n tõe n sõnga sẽn maan-a yel-wẽndã t’a tek yam n kos sugri. B sã n yiis ned tigingã pʋgẽ, a ket n tõe n wata tigissã, bala tigissã sasa, a na n  paama sagls sẽn na n sõng-a t’a tẽebã le paam pãnga. Sẽn paase, a tõe n paama sɛb a sẽn dat n karme, la a tõe me n ges JW Teledifiziyõ wã. Kãsem-dãmbã sã n neẽ t’a sɩd maanda modgre, wakat-wakate b tõe n kõt-a-la saglse, la b wilgd-a a sẽn tõe n maan tɩ sõng-a t’a tẽebã le paam pãnga, sẽn na yɩl tɩ b wa tõog n lebs n deeg-a tigingã pʋgẽ. *

12. Bõe la kãsem-dãmbã segd n maan yel-wẽn-maand sẽn pa rat n tek yam n kos sugri, tɩ wilg tɩ b nong-a lame la b zoet a nimbãanega?

¹² Tara yõod tɩ d tẽeg tɩ yaa yel-wẽn-maandb nins sẽn pa tek yam n kos sugrã la b yiisd tigingã pʋgẽ. Kãsem-dãmbã miime tɩ nand tɩ b yãk yam n yiis ned tigingã pʋgẽ, b segd n deng n tagsa neere. B miime t’a Zeova pa kibind ned “tɩ loog noor ye.” (Zer. 30:11, MN) B nonga b tẽed-n-taasã, n pa rat n maan bũmb sẽn na n sãam zood ning b sẽn tar ne a Zeova wã ye. La wakat ninga, bũmb b sẽn tõe n maan n wilg tɩ b nonga yel-wẽn-maandã, la b zoet a nimbãaneg yaa b sẽn na n yiis-a tigingã pʋgẽ.

13. Bõe yĩng tɩ b ra segd n yiis kiris-ned a ye Korẽnt tigingã pʋgẽ?

¹³ D ges tẽn-tʋmd a Poll sẽn maan bũmb ninga, ned sẽn wa n maan yel-wẽnd n pa rat n tek yam n kos sugri. Kiris-ned n da be Korẽnt tigingã pʋgẽ, n yood ne a baaba paga. Sɩd yaa wɩɩbdo! Rẽ wɛɛngẽ, a Poll ra miime t’a Zeova ra yeela Israyɛll nebã yaa: “Rao sã n kẽ ne a ba paga, n ning a ba wã yãnde, bɩ b kʋ raoã ne pagã.” (Maan. 20:11) A Poll pa yeel tɩ b kʋ raoã ye. La a yeela Korẽnt kiris-nebã tɩ b yiis-a tigingã pʋgẽ. Raoã sẽn maan bũmb ningã kɩtame tɩ tigingã neb kẽer ra pa le tar yam-sõng ye. Bala, sãnda pʋd n da pa get tɩ yaa yel-wẽn-kãseng ye.—1 Kor. 5:1, 2, 13.

14. Wãn to la a Poll wilg t’a zoeta kiris-ned ning b sẽn yiis Korẽnt tigingã pʋgẽ wã nimbãanega, la bõe yĩnga? (2 Korẽnt rãmb 2:5-8, 11)

¹⁴ Kaoosg zugẽ, a Poll yãame tɩ ned ning b sẽn da yiis tigingã pʋgẽ wã manesem toeema wʋsgo. A sɩd teka yam n kos sugri. Baa ne raoã sẽn sãam tigingã neb yʋʋrã, a Poll yeela kãsem-dãmbã tɩ yẽ pa rat n “gom yel-kãngã yell tɩ loog noor ye.” A yeel-b lame: “Yãmb segd n kõ-a-la sugr ne yamleoogo, la y bels-a.” A Poll paasame tɩ yaa sẽn na yɩl “t’a sũurã ra sãam wʋsg t’a koms raood ye.” Dẽnd tẽn-tʋmd a Poll zoee ra-kãngã sẽn tek  yam n kos sugrã nimbãanega. A ra pa rat tɩ sũ-sãangã loog raoã t’a koms raood zãnga, hal tɩ kɩt t’a pa kos sugr ye.—2 Korẽnt rãmb 2:5-8, 11.

15. Wãn to la kãsem-dãmbã tõe n kibl neda, tɩ wilg me tɩ b zoe a nimbãanega?

¹⁵ Kãsem-dãmbã rɩkda a Zeova togs-n-taare, n wilgd nimbãan-zoeere. B kibinda neda, sã n mikame tɩ yaa tɩlɛ, la bʋʋm sã n beeme tɩ b tõe n zoe a nimbãanega, b zoeta a nimbãanega. Sã n pa rẽ, woto pa wilgd nimbãan-zoeer ye. Na n yɩɩ wa a sẽn maan bũmb ningã pa wẽng ye. La rẽ yĩnga, yaa kãsem-dãmbã bal n segd n wilg nimbãan-zoeer bɩ?

16. Wa Yel-bũn 21:13 sẽn wilgdã, a Zeova manesem yaa wãn ne neb nins sẽn pa nimbãan-zoɛtbã?

¹⁶ Neb nins fãa sẽn tũud a Zeova wã modgdame n na n dɩk a togs-n-taar nimbãan-zoeerã wɛɛngẽ. Bõe yĩnga? Bʋʋm a ye yaa t’a Zeova pa kelgd neb nins sẽn pa zoet b taabã nimbãanegã pʋʋsg ye. (Karm-y Yel-bũn 21:13.) Tõnd ned baa a ye pa rat t’a Zeova zãgs n pa kelg d pʋʋsg ye. Rẽ n so tɩ d modgd n pa rat n yɩ neb sẽn pa mi nimbãan-zoeer ye. D pa rat n yẽd d tʋb n pa kelg d tẽed-n-taag sẽn namsd ye. Wakat fãa d segd n sakd n kelgda “nimbãan ned kɛlenga.” Sẽn paase, d maanda d sẽn tõe fãa n na n tũ Biiblã sagl-kãngã: “Ned ning sẽn pa tar nimbãan-zoeere, b na n kaoa a bʋʋd n pa zoe a nimbãaneg ye.” (Zak 2:13) D sã n sik d meng n sak n deeg tɩ d sɩd ratame tɩ b zoe d nimbãanega, na n sõng-d lame tɩ d me yɩ nimbãan-zoɛtba. B sã n lebs n deeg ned sẽn tek yam n kos sugr tigingã pʋgẽ, d segd n zoee a soabã nimbãaneg n tɩ yɩɩda.

17. Wãn to la rĩm a Davɩɩd wilg t’a sɩd yaa nimbãan-zoɛta?

¹⁷ Biiblã tara kibay sẽn tõe n sõng-d tɩ d bɩɩs nimbãan-zoeere, la d da wa yɩ nin-toos ye. Wala makre, rĩm a Davɩɩd kibarã. Naoor wʋsgo, a wilgame t’a sɩd yaa nimbãan-zoɛta. Baa ne a Sayull sẽn wa n baood a Davɩɩd n na n kʋ wã, a zoee a Sayull sẽn da yaa rĩm Wẽnnaam sẽn yãkã nimbãanega. A pa tol n bao n na n dok a sũuri, bɩ n maan a wẽng ye.—1 Sãm. 24:10-13, 19, 20.

18-19. Togs-y naoor a yiibã a Davɩɩd sẽn pa wilg t’a yaa nimbãan-zoɛtã.

¹⁸ La pa wakat fãa la a Davɩɩd tall nimbãan-zoeer ye. Wala makre, daar a ye, a Naball sẽn da yaa rao sẽn pa zoet ned nimbãanegã goma a Davɩɩd wẽnga, la a zãgs t’a pa na n kõ a Davɩɩd ne a nebã rɩɩb ye. A Davɩɩd sũurã puuga wʋsgo, t’a yãk yam n na n tɩ kʋ a Naball ne a zakã rap fãa. La a Naball pag a Abigayill ra yaa nin-sõngo, la sũ-mar soaba. Tao-tao bala, a bao rɩɩb n tɩ kõ a Davɩɩd ne a nebã, tɩ rẽ kɩt t’a Davɩɩd pa paam zɩɩm samd ye.—1 Sãm. 25:9-22, 32-35.

¹⁹ Daar a to me, no-rɛɛs a Natã goma ne a Davɩɩd rakãagr sẽn maan naong soab pãng n deeg a pesg a sẽn nong wʋsg yelle. A Davɩɩd sũur yika wʋsgo, t’a yeel yaa: “M wẽen ne Wẽnnaam sẽn vɩ wã tɩ ned ning sẽn maan-a woto wã segda ne kʋʋbo.” (2 Sãm. 12:1-6) A  Davɩɩd yaool n da mii a Moyiiz tõogã sẽn yet bũmb ningã. B wilgame tɩ ned sã n da zuk a to pesgo, a segd n dola a soabã piis a naase. (Yik. 21:37) A Davɩɩd sẽn yeel tɩ rakãagrã segda ne kʋʋbã, a pa wilg nimbãan-zoeer baa bilfu. A Natã sẽn yeel a Davɩɩd bũmb ningã yaa makr a sẽn dɩk n na n sõng-a t’a bãng t’a maana yel-wẽn-kãsemse. A Zeova zoee a Davɩɩd nimbãaneg wʋsgo, la a Davɩɩd yẽ pa zoe a Natã kibarã pʋgẽ ned ning sẽn zuk pesgã nimbãaneg ye.—2 Sãm. 12:7-13.

20. Yam-bʋg la d tõe n dɩk a Davɩɩd kibarã pʋgẽ?

²⁰ Tẽeg-y t’a Davɩɩd sũur sẽn yik wʋsgã, a yeelame t’a Naball ne a zakã rap fãa segda ne kʋʋbo. Rẽ poore, a yeelame me tɩ rakãagr ning yell a Natã sẽn gomã segda ne kʋʋbo. A Davɩɩd yaool n da yaa nin-sõngo. Rẽ wã, bõe yĩng t’a yeel tɩ sẽn zuk-a pesgã segda ne kʋʋbo? Tẽeg-y yell ning a Davɩɩd sẽn maane, bilf nand t’a Natã wa a nengẽ wã. A Davɩɩd sũur-kasetã ra ningd-a-la taale. Ned sã n kaood a taabã bʋʋd ne wẽnem, wilgdame t’a pa tar zood sõma ne a Zeova ye. A Zeezi keooga a karen-biisã, n yeel-b yaa: “Da le kao-y y taabã bʋʋdo, tɩ Wẽnnaam me kõn kao yãmb bʋʋd ye. Bala yãmb sẽn kaood nebã bʋʋd to-to wã, b na n kaoo yãmb me bʋʋd woto.” (Mat. 7:1, 2) Rẽ wã, d segd n maana d sẽn tõe fãa n da yɩ neb sẽn yaa dem-dem ye. D modg n tall nimbãan-zoeer wʋsg wa tõnd Wẽnnaamã.

21-22. Bõe ne bõe la d tõe n maan n wilg tɩ d yaa nimbãan-zoɛtba?

²¹ Nimbãan-zoɛt pa kʋmd a taabã bal ye. A pʋd maanda bũmb n sõng-ba. Dẽnd d segd n gũusdame n getẽ ãnd-dãmb la d tõe n maan bũmb n sõng d zakã pʋgẽ, d tigingã pʋgẽ, la d sakã pʋgẽ. Yaa vẽeneg tɩ segb buud toor-toor n be d sẽn tõe n tũnug n wilg tɩ d yaa nimbãan-zoɛtba. Y mii ned sẽn dat belsg bɩ? Y tõe n maana bũmb takɩ n sõng-a, wala makre, n tɩ kõ-a rɩɩbo, bɩ n maan bũmb kẽer n sõng-a. Tõe me tɩ yaa kiris-ned b sẽn lebs n deeg tigingã pʋgẽ n baood zoa sẽn na n keng a raoodo. D leb n tõe n taasa neb a taabã Rĩungã koe-noogã sẽn kõt belsgã. Rẽ me naaga bõn-kãsems nins d sẽn tõe n maan n wilg ned kam fãa tɩ d zoeta a nimbãanegã.—Zoob 29:12, 13; Rom. 10:14, 15; Zak 1:27.

²² D sã n miẽ tɩ neb kẽer data sõngre, d na n yãa segb buud toor-toor d sẽn tõe n tũnug ne n wilg tɩ d zoeta b nimbãanega. D sã n wilgdẽ tɩ d yaa nimbãan-zoɛtba, d noogda Wẽnnaam sẽn yaa d saasẽ Ba wã sũuri, soab ning ‘nimbãan-zoeer sẽn yaa kãsengã.’