1. Bõe n tõe n kɩt tɩ rao sẽn tar manesem ning ne a pagã la a kambã pa zemse?

SÃ N yaa ne yãmba, zu-sobend võor yaa bõe? Rap kẽer sẽn tar manesem ning ne b pagbã la b kambã bee ne b rog-n-mikã, b buudã, la zak ning pʋgẽ b sẽn wub-bã. Ad a Yanita sẽn yaa saam-bi-poak sẽn be Eropã sẽn yeele: “Mam sẽn be zĩig ningã, nebã tagsda ne b sũy fãa tɩ rapã yõod yɩɩda pagbã, la tɩ b segd n geta pagbã wa tʋʋm-kamba.” Saam-biig sẽn be Etazĩni t’a yʋʋr boondẽ t’a Luk me yeelame: “Roagdb kẽer yeta b kom-dibli wã tɩ pagbã yaa sẽn na ges bala, b pa segd n kelg-ba, la tɩ b sẽn tagsd bũmb ningã ka yõod ye. La yel-manesem-kãensã pa zems ne a Zeova sẽn dat tɩ rapã tʋm ne b zu-sobendã to-to wã ye. (Ges-y Mark 7:13.) Dẽnd bõe n tõe n sõng rao t’a bãng n zã a zakã rãmb sõma?

2. Bõe la zak soab segd n bãnge, la bõe yĩnga?

² Rao sã n dat n tʋm a zak-sobendã tʋʋmd sõma, a segd n deng n bao n bãnga a Zeova sẽn dat t’a maanã. A leb n segd n bao n bãnga bũmb ning sẽn kɩt t’a Zeova lugl zu-sobendã, la sẽn yɩɩd fãa a sẽn tõe n dɩk a Zeova mengã la a Zeezi togs-n-taar to-to zu-sobendã wɛɛngẽ. Bõe yĩng tɩ zak soab segd n bao n bãng woto fãa? Bala a Zeova kõo zak soab fãa zu-sobendo, n gũudẽ t’a tʋm ne-a tɩ zemse.—Luk 12:48b.

3. Pipi Korẽnt rãmb 11:3 sẽn yet bũmb ningã sõngda tõnd tɩ d bãng bõe zu-sobendã wɛɛngẽ?

³ Karm-y 1 Korẽnt rãmb 11:3. Vɛrse-kãngã bilgda a Zeova sẽn sigl a zakã saasẽ la tẽng zug to-to. Sẽn mik tɩ yẽ n so bũmb fãa wã, yẽ zu-sobendã n ka to. Woto yĩnga, a kõo neb kẽer zu-sobendo, tɩ nin-kãensã sã n pa tʋm ne rẽ sõma, bɩ b tar taal a taoore. (Rom. 14:10; Efɛ. 3:14, 15) A Zeova  kɩtame t’a Zeezi yaa tigingã Zu-soaba. La a Zeezi segd n kolg n togsa a Zeova taoor a sẽn zãad tigingã to-to wã wɛɛngẽ. (1 Kor. 15:27) A Zeova kɩtame tɩ rao tar zu-sobend a pag ne a kamb zugu. La a sã n pa zã a zakã rãmb sõma, a tara taal a Zeova ne a Zeezi taoore.—1 Pɩy. 3:7.

4. A Zeova ne a Zeezi tara sor n na n maan bõe?

⁴ A Zeova n yaa a zakã sẽn be saasẽ la tẽngã zugã Zu-soaba. Rẽ wã, a tara sor n na n lugl noy sẽn wilgd a zakã rãmb sẽn segd n tall manesem ninga, la a tar sor me n na n ges tɩ b tũ no-kãense. (Eza. 33:22) A Zeezi sẽn yaa kiris-neb tigingã Zu-soabã me tara sor n na n lugl noy la a ges tɩ nebã tũ.—Gal. 6:2; Kol. 1:18-20.

5. Kiris-ned fãa tara sor n na n maan bõe a zakã rãmb yĩnga, la a zu-sobendã tekda yɛ?

⁵ Wa a Zeova ne a Zeezi, zak soab sẽn yaa kiris-ned tara sor n na n lugl noy a zakã rãmb yĩnga. (Rom. 7:2; Efɛ. 6:4) La a zu-sobendã tara koaka. Wala makre, a noyã segd n tika Wẽnnaam Gomdã sẽn yetã zugu. (Yel. 3:5, 6) La zak soab pa tar sore, n na n lugl noy n dat tɩ neb sẽn pa naag a zakã rãmb tũ ye. (Rom. 14:4) Sẽn paase, a kambã sã n wa lebg bɛd n yi n bas zakã, b na n ket n waoogd-a lame, la a pa le tar sor n na n yɩ b zu-soab ye.—Mat. 19:5.

6. Bõe yĩng t’a Zeova lugl zu-sobendo?

⁶ A Zeova lugla zu-sobendo, a sẽn nong a zakã rãmb yĩnga. Yaa kũun sẽn yit yẽ nengẽ. Zu-sobendã kɩtdame tɩ laafɩ la bãan be a zakã rãmb sʋka, tɩ zũnd-zãnd me kae ye. (1 Kor. 14:33, 40) Zu-sobend sã n da kaẽ, a Zeova zakã ra na n yɩɩ zũnd-zãnde, tɩ sũ-noog me kae ye. Wala makre, ned ra ka na n bãng ãnd n segd n lugl noy la a lʋɩ taoor n kɩt tɩ b tũ no-kãens ye.

7. Wa Efɛɛz rãmb 5:25, 28 sẽn yetã, a Zeova ratame tɩ rapã yel-manesem yɩ wãn to ne b pagbã?

⁷ Zu-sobendã Wẽnnaam sẽn luglã sã n yaa bõn-sõngo, bõe yĩng tɩ rũndã-rũndã, pagb wʋsg getẽ tɩ b sɩdbã weoogd-b lame, la b so-b ne pãnga? Yaa woto, bala rap wʋsg pa tũud noy nins a Zeova sẽn gãneg zak pʋgẽ vɩɩmã wɛɛngẽ wã ye. B pʋd n yãka yam n na n tũud b buudã minung bɩ a rog-n-miki. Sẽn paase, b leb n wõrda b pagbã sẽn na yɩl n pids bãmb mensã tʋlsem. Wala makre, rao tõe n wõrda a paga, a sẽn dat t’a waoogd-a, bɩ a sẽn dat tɩ neb a taabã tags t’a yaa rao meng-mengã. A tõe n tagsame tɩ yaa sɩd t’a pa tõe n modg a pagã t’a nong-a, la t’a yaool n tõe n kɩtame t’a zoe-a. A sã n paam tɩ pagã zoet-a, a tõe n tũnuga ne rẽ n tar-a n lengdẽ. * Tagsa la yel-manesem a woto pa waoogd pagbã wa sẽn segdã ye. Leb n kɩɩsda a Zeova sẽn datã vẽenega.—Karm-y Efɛɛz rãmb 5:25, 28.

8. Bõe la rao tõe n maane, n bãng n zã a zakã rãmb sõma?

⁸ Rao sã n dɩk a Zeova la a Zeezi togs-n-taar zu-sobendã wɛɛngẽ, a bãngd n zãa a zakã tɩ zemse. D ges zʋg-sõma a yiib a Zeova ne a Zeezi sẽn tare, la zak soab sẽn tõe n bɩɩs zʋg-kãensã to-to, a sẽn zãad a pagã ne a kambã to-to wã wɛɛngẽ.

9. Wãn to la a Zeova wilgd t’a yaa sik-m-meng soaba?

⁹ Sik-m-mengã: A Zeova yamã ka to ye. La baa ne rẽ, a sakd n kelgda neb nins sẽn tũud-a wã tagsgo. (Sɩng. 18:23, 24, 32) A  sakd n basda a sẽn so b rãmbã tɩ b togs sẽn be b sũurẽ. (1 Rĩm. 22:19-22) A Zeova zemsa zãnga, la rũndã-rũndã, a nan pa baood tɩ d maand yɛlã tɩ zemsd kɛpɩ ye. A pʋd n sõngda neb nins sẽn tũud-a wã sẽn yaa ninsaalb sẽn pa zems zãngã, tɩ b sɩd tõogd n maand a raabã. (Yɩɩn. 113:6, 7) Sɩd me, Biiblã wilgdame t’a Zeova yaa “sõangda.” (Yɩɩn. 27:9; Ebre. 13:6) Rĩm a Davɩɩd sak n deegame tɩ yẽ sẽn tõog n tʋm tʋʋm-kãsem nins fãa wã yaa a Zeova sik-m-mengã yĩnga.—2 Sãm. 22:36, MN.

10. Wãn to la a Zeezi wilg t’a yaa sik-m-meng soaba?

¹⁰ D gom a Zeezi mak-sõngã yelle. A Zeezi sakame n waas a karen-biisã naoã, baa ne a sẽn da yaa b Zu-soab la b Karen-saambã. Bõe yĩng la a Zeova sẽn kɩt tɩ b gʋls kiba-kãngã Biiblã pʋgẽ wã? Sãmbg sẽn kae, yaa sẽn na yɩl n kõ zak-soben-dãmbã mak-sõng b sẽn tõe n tũ. A Zeezi mengã yeelame: “Mam basa mamsg yãmb yĩnga, tɩ y segd n maan wa mam sẽn maan yãmbã kɛpɩ.” (Zã 13:12-17) Baa ne a Zeezi zu-sobendã sẽn da yaa kãsengã, a ra pa gũud tɩ nebã tʋm n kõ-a ye. Yẽ n da tʋmd n kõt nebã.—Mat. 20:28.

11. Sik-m-mengã wɛɛngẽ, yam-bʋg la zak soab tõe n dɩk a Zeova ne a Zeezi nengẽ?

¹¹ Yam ning d sẽn tõe n dɩke: Bũmb toor-toor la zak soab tõe n maane, n wilg t’a yaa sik-m-meng soaba. Wala makre, a pa na n gũudẽ t’a pagã ne a kambã maand bũmb fãa tɩ zemsd kɛpɩ ye. A kelgda a zakã neb tagsgo, baa sã n mikame tɩ b sẽn tagsd bũmb ningã yaa toor ne yẽ rẽndã. A Marle sẽn be Etazĩni wã yeelame: “Wakat ninga, maam ne m sɩdã tagsg pa yekd taab ye. La m neeme t’a nand-m lame, la a waoogd-ma, bala nand t’a yãk yam n maan bũmbu, a sokda maam n bãng m tagsgo, n tags rẽ zug neere, n yaool n maan a sẽn dat n maanã.” Sẽn paase, rao sẽn tar sik-m-meng sakdame n tʋmd zakã pʋgẽ tʋʋma, baa sakã rãmb sã n getame tɩ tʋʋm-kãensã yaa pagb tʋʋma. La woto tõeeme n pa yɩ nana ye. Bõe yĩnga? Ad saam-bi-poak a ye yʋʋr sẽn boond t’a Rasɛll sẽn yeele: “Mam sẽn yit zĩig ningã, rao sã n sõngd a pag n pɛgd laas bɩ n pɩɩgd zakã, a yagsã ne a buudã neb tõe n tagsdame t’a pa rao  meng-meng ye. B na n tagsdame tɩ yaa a pagã n so-a.” Yãmb sẽn be zĩig ningã nebã sã n tagsda woto, bɩ y tẽeg t’a Zeezi waasa a karen-biisã nao, baa ne nebã sẽn da get tɩ yaa yamb tʋʋmdã. Rao sẽn get a zak yell sõma pa baood tɩ nebã pẽg-a ye. A sẽn dat yaa a pagã ne a kambã sũur yɩ noogo. Sik-m-mengã sẽn yãk a toogo, bõe me n yaa tɩlɛ ne zak soaba, t’a bãng n zã a zakã sõma?

12. Nonglmã kɩtame t’a Zeova ne a Zeezi maand bõe tõnd yĩnga?

¹² Nonglmã: A Zeova maanda bũmba fãa ne nonglem. (1 Zã 4:7, 8) A sẽn nong-dã yĩnga, a tũnugda ne Biiblã la a siglgã, n kɩtdẽ tɩ d paamd bũmb nins fãa sẽn yaa tɩlɛ d tẽebã kengr yĩngã. A wilgdame t’a nong-d lame, tɩ rẽ kɩt tɩ d yam gãe bãane, tɩ d sũur me noomẽ. La yaa wãn to yẽ ne bũmb nins sẽn yaa tɩlɛ ne d vɩɩmã? A Zeova n yaa “soab ning sẽn kõt tõnd bũmb fãa wʋsg tɩ d maand sũ-noogã.” (1 Tɩm. 6:17) D sã n tudgi, a kibinda tõndo, la a pa raagd tõnd n bas n pa le nong-d ye. A Zeova sẽn nong tõndã yĩnga, a yaoo yaoodo, n na n fãag tõndo. A Zeezi me nonga tõnd hal wʋsgo, hal n sak n kõ a vɩɩmã tõnd yĩnga. (Zã 3:16; 15:13) Bũmb kae sẽn tõe n gɩdg a Zeova ne a Zeezi, tɩ b pa wilg tɩ b nonga neb nins sẽn maand sɩd ne-bã ye.—Zã 13:1; Rom. 8:35, 38, 39.

13. Bõe yĩng tɩ tar yõod wʋsg tɩ zak soab wilg a zak rãmb t’a nong-b lame? (Ges-y zĩ-gũbrã: “ Bõe la rao sẽn kẽ kãadem paalem tõe n maan n paam t’a pagã waoogd-a?”)

¹³ Yam ning d sẽn tõe n dɩke: Sẽn yaa bũmb ning fãa la zak soab maanda, segd n yɩɩ ne nonglem. Bõe yĩng tɩ rẽ tar yõod wʋsgo? Tʋm-tʋmd a Zã yeelame: “Ned ning sẽn pa nong a saam-biig [bɩ a zakã rãmb] a sẽn ne wã pa tõe n nong Wẽnnaam a sẽn pa ne wã ye.” (1 Zã 4:11, 20) Sẽn yɩɩd fãa, rao sẽn nong a zak rãmb la a rat n dɩk a Zeova ne a Zeezi togs-n-taar na n sõngda a zakã rãmb tɩ b paamd bũmb nins sẽn yaa tɩlɛ b tẽebã kengr yĩngã, la a sõngd-b tɩ b paamd rɩɩb la futu, tɩ b yam gãe bãane, la  b tar sũ-noogo. (1 Tɩm. 5:8) A na n zãmsda a kambã a Zeova noyã, la a kibind-ba. Sẽn paase, a na n modgdame t’a yam-yãkr fãa waoogd a Zeova, la nafd a zakã rãmba. Bɩ d maneg n gom rẽ yell ball-balle, la d ges zak soab sẽn tõe n dɩk a Zeova la a Zeezi togs-n-taar to-to rẽ wɛɛngẽ.

14. Bõe la zak soab tõe n maane, n sõngd a zakã rãmb tɩ b tẽebã pãng paasdẽ?

¹⁴ A segd n gesame t’a zakã rãmb tẽeb paam pãnga: A Zeezi rɩka a Ba wã togs-n-taare, n da sõngd a karen-biisã tɩ b tẽebã pãng paasdẽ. (Mat. 5:3, 6; Mark 6:34) Woto me, bũmb ning sẽn segd n pak zak soab n tɩ yɩɩda, yaa a sõngd a zakã rãmb tɩ b tẽebã pãng paasdẽ. (Tõo. 6:6-9) A maanda rẽ, a sã n modgdẽ tɩ yẽ ne a zakã rãmb karemd Wẽnnaam Gomdã la b zãmsd-a, n kẽnd tigissã, n moond koe-noogã, la b ket n paasd bãmb ne a Zeova zoodã pãnga.

15. Bõe la zak soab tõe n maane, n wilg t’a nonga a zakã rãmba?

¹⁵ A segd n wilga a zakã rãmb t’a nong-b lame: A Zeova togsa a Zeezi vẽeneg t’a nong-a lame. (Mat. 3:17) A Zeezi wilga ne a no-goamã la a tʋʋm-tʋmdɩ wã t’a nonga a karen-biisã. Bãmb me wilga a Zeezi tɩ b nong-a lame. (Zã 15:9, 12, 13; 21:16) Zak soab tõe n wilga a pagã ne a kambã t’a nong-b lame, wala makre, a sã n zãmsd Biiblã ne-ba. A segdame me n togs-b vẽeneg t’a nong-b lame, la t’a nand-b lame, tɩ sã n zems me, bɩ a mi n pẽg-b neb a taabã taoore.—Yel. 31:28, 29.

16. Bõe me la zak soab segd n maane, la a segd n maana gũusg ne bõe?

¹⁶ A segd n sõng-b lame tɩ b paam bũmb nins sẽn yaa tɩlɛ ne b vɩɩmã: A Zeova gesame tɩ Israyɛll nebã paam bũmb nins sẽn yaa tɩlɛ ne b vɩɩmã, baa ne a sẽn da sɩbgd-b b wẽn-kɩɩsgã yĩngã. (Tõo. 2:7; 29:4) Rũndã-rũndã me, a getame tɩ d paamd bũmb nins sẽn yaa tɩlɛ ne-dã. (Mat. 6:31-33; 7:11) A Zeezi me rɩlga neb nins sẽn da tũud-a wã. (Mat. 14:17-20) Sẽn paase, a sãooga b bãasã. (Mat. 4:24) Zak soab sã n dat n ta a Zeova yam, a segd n sõngda a zakã rãmb tɩ b paamd bũmb nins sẽn yaa tɩlɛ ne b vɩɩmã. La a segdame n maand gũusgu. A pa segd n kẽes a sẽkã zãng a tʋʋmdã pʋgẽ n na n ges a zakã rãmb yelle, hal n pa le tõe n ges tɩ b tẽebã pãng paase, la a ges me tɩ b paam sũ-noog ye.

17. Wãn to la a Zeova ne a Zeezi zãmsd tõnd la b kibind tõnd tɩ yaa mak-sõngo?

¹⁷ A segd n zãmsd-b-la Wẽnnaam noyã: A Zeova zãmsda tõnd a noyã la a kibind tõndo, d mensã neer yĩnga. (Ebre. 12:7-9) A Zeezi zãmsda a karen-biisã Wẽnnaam noyã ne nonglem, wa a Ba wã. (Zã 15:14, 15) A sagend-b lame, la yaa ne nonglem. (Mat.  20:24-28) A miime tɩ d yaa neb sẽn pa zems zãnga, n wae n tudgdẽ.—Mat. 26:41.

18. Bõe la zak soab sẽn zãad a zak sõma pa segd n yĩmi?

¹⁸ Zak soab sẽn dɩkd a Zeova ne a Zeezi togs-n-taar tẽegdame t’a pagã ne a kambã pa zems zãng ye. A pa ‘yikd a sũur wʋsg’ ne a pagã la a kambã ye. (Kol. 3:19) A pʋd n tũuda Biiblã noor ning sẽn be Galat rãmbã 6:1 wã, n modgd n na n dems-b ne bʋgsem, n tẽegdẽ tɩ yẽ mengã pa zems zãng ye. Wa a Zeezi, a miime tɩ yaa ne a mak-sõngã maasem la a tõe n zãms a zakã rãmb tɩ yɩ sõma n yɩɩda.—1 Pɩy. 2:21.

19-20. Zak soab sã n wa rat n yãk yam n maan bũmbu, wãn to la a tõe n dɩk a Zeova ne a Zeezi togs-n-taare?

¹⁹ A sã n wa yãkd yam n na n maan bũmbu, a pa baood a meng nafr bal ye: A Zeova sẽn yãkd yam n maand bũmb ninsã yaa neb a taabã nafr yĩnga. Wala makre, a sẽn yãk yam n naan bũmb fãa wã, pa a mengã nafr yĩng ye. Yaa a sẽn dat tɩ ninsaalbã paam sũ-noog b vɩɩmã pʋgẽ wã. Ned ra pa tõe n modg-a, t’a rɩk a Biigã n kõ n dol d yel-wẽnã ye. Yaa ne yamleoog la a maan dẽ. A Zeezi me sẽn da yãkd yam n maand bũmb ninsã yaa neb a taabã nafr yĩng n tɩ yɩɩda. (Rom. 15:3) Wala makre, a yãka yam n bas vʋʋsgo, sẽn na yɩl n zãms neb kʋʋngo.—Mark 6:31-34.

²⁰ Zak soab sẽn zãad a zak sõma miime tɩ bũmb a ye sẽn pa nana a sẽn segd n maandẽ, yaa bãngd n yãkd yam a zakã rãmb yĩnga. La a miime t’a pa segd n deem ne rẽ ye. A gũusdame t’a sã n na n yãk yam, bɩ ra tik bʋʋm-faad zugu, bɩ yẽ mengã tagsg zug ye. A pʋd n basdame t’a Zeova wilgd-a a sẽn segd n maane. * (Yel. 2:6, 7) Woto, a na n tagsda sẽn na n naf neb a taabã, la pa yẽ mengã ye.—Fili. 2:4.

21. Bõe yell la d na n gom sõsg ning sẽn pʋgdã pʋgẽ?

²¹ A Zeova bobla zak-soben-dãmbã tʋʋm-kãsenga, la a ratame tɩ b maan b sẽn tõe fãa n tʋm b tʋʋmdã ne b sũy fãa. Zak soab sã n modgd n dɩkd a Zeova ne a Zeezi togs-n-taare, a na n yɩɩ zak soab sẽn zãad a zak sõma. A pagã me sã n maand a sẽn segd n maan bũmb ninsã, b kãadmã na n yɩɩ noogo. Pagbã tagsg segd n yɩɩ wãn to ne b sɩdbã zu-sobendã? La zu-sobendã sakr wɛɛngẽ, bõe n tõe n yɩ toog ne pagbã? D na n goma rẽ yell sõsg ning sẽn pʋgdã pʋgẽ.