1. Wẽn-sakdbã tõe n boola a Zeova tɩ bõe?

A ZEEZI sẽn yaa “bõn-naandsã fãa pipi soabã,” n paas malɛgs tus ka tɛkã naaga a Zeova zakã neba. (Kol. 1:15; Yɩɩn. 103:20) A Zeezi sẽn wa n be tẽngã zugã, a wilgame tɩ wẽn-sakdbã tõe n boola a Zeova tɩ b Ba. Daar a ye, a Zeezi ra wa n gomda a Zeova yell ne a karen-biisã, n yeel tɩ “m Ba sẽn yaa yãmb me Ba wã.” (Zã 20:17) D sã n wa rɩk d meng n kõ a Zeova n deeg lisgu, d naaga d tẽed-n-taasã n yaa wa zak a ye neba, n nong taaba.—Mark 10:29, 30.

2. Bõe yell la d na n gom sõs-kãngã pʋgẽ?

² Yaa toog ne neb kẽer tɩ b ges a Zeova wa Ba sẽn nong a kamba. Neb kẽer pa mi b sẽn na n maan to-to n wilg tɩ b nonga b saam-biisã la b saam-bi-pogsã ye. Sõs-kãngã pʋgẽ, d na n yãa a Zeezi sẽn sõngd tõnd to-to tɩ d tõe n ges a Zeova wa Ba sẽn nong a kamba, n paam n lebg a zoa. Sẽn paase, d manesmã sẽn segd n yɩ to-to ne d tẽed-n-taasã wɛɛngẽ, d na n yãa d sẽn tõe n dɩk a Zeova togs-n-taar to-to.

3. Wãn to la pʋʋsg ning a Zeezi sẽn zãms a karen-biisã tõe sõng-d tɩ d maneg n pẽneg a Zeova?

³ A Zeova yaa Ba sẽn nong a kamba. A Zeezi ratame tɩ d ges a Zeova wa yẽ me sẽn get-a to-to wã, rat n yeel tɩ wa Ba sẽn nong a kamba, t’a pẽnegr me yaa nana, la pa wa ned sẽn yaa dem-deme, tɩ yaa yẽ sẽn yeel bal n be ye. A Zeezi sẽn zãms a karen-biisã b sẽn segd n pʋʋs to-to wã wilgda rẽ vẽenega. A sɩnga pʋʋsgã n yeel yaa: “Tõnd Ba.” (Mat. 6:9) A Zeezi ra tõe n yeelame tɩ d bool a Zeova tɩ “Sẽn-Tõe-Fãa wã,” ‘Naandã,’ bɩ “wakat sẽn ka sɛt Rĩmã.” (Sɩng. 49:25; Eza. 40:28; 1 Tɩm. 1:17) Woto fãa yaa naam yʋy sẽn zemse,  la sẽn be Biiblã pʋgẽ. Baa ne rẽ, a Zeezi yeela tõnd tɩ d bool a Zeova tɩ d “Ba.”

4. Bõe n kɩt tɩ d miẽ t’a Zeova ratame tɩ d lebg a zoa?

⁴ Yaa toog ne yãmb tɩ y ges a Zeova wa Ba sẽn nong a kamb bɩ? Yaa toog ne tõnd sʋkã neb kẽere. D ba wã sã n da yaa nin-toaaga, tõe n yɩɩ toog ne-d tɩ d tags t’a Zeova yaa wa Ba sẽn nong a kamba. La d tõe n basa d yam t’a Zeova mii d sẽn tagsd to-to, la bũmb ning sẽn kɩt tɩ d tagsd woto wã. A ratame tɩ d yɩ a zoa. Yaa rẽ n so t’a yet tõnd a Gomdã pʋgẽ yaa: “Bɩ y kolg Wẽnnaam, la bãmb me na kolg yãmba.” (Zak 4:8) A Zeova nonga tõndo, la a wilgame me t’a na n yɩɩ d Ba. Ba sẽn ka to.

5. Wa Luk 10:22 sẽn wilgdã, wãn to la a Zeezi tõe n sõng tõnd tɩ d lebg a Zeova zoa?

⁵ A Zeezi tõe n sõnga tõnd tɩ d lebg a Zeova zoa hakɩɩka. A Zeezi mii a Zeova sõma, hal n dɩkd a togs-n-taar kɛpɩ. A pʋd n yeelame yaa: “Ned ning sẽn yã maam, a yãa Ba wã me.” (Zã 14:9) A Zeezi sẽn yaa wa d kẽemã, a wilgd-d-la d sẽn tõe n waoog d Ba wã to-to la d sak-a, d sẽn tõe n maan to-to n da sãam a sũuri, la d sẽn tõe n maan to-to t’a sũur yɩ noog ne-do. Sẽn yɩɩd fãa, a Zeezi vɩɩmã sẽn yɩ to-to tẽngã zugã wilga vẽeneg t’a Zeova yaa sõmblem la nonglem soaba. (Karm-y Luk 10:22.) Bɩ d ges bũmb a wãn sẽn wilgd rẽ.

6. Togs-y kibay sẽn wilgd t’a Zeova kelga a Zeezi.

⁶ A Zeova kelgda a kambã. D ges a Zeova sẽn kelg a pipi Bi-riblã to-to. A Zeezi sẽn wa n be tẽngã zugã, a pʋʋsa a Zeova naoor wʋsgo. (Luk 5:16) Sãmbg kae t’a Zeova kelg-a lame. A kelga a Zeezi a sẽn wa n pʋʋsd n dat n maan bũmb sẽn tar yõod wʋsgo, wala makre, a sẽn wa n dat n yãk a tʋm-tʋmdb 12 wã. (Luk 6:12, 13) A Zeezi sũur sẽn wa n sãam wʋsg t’a pʋʋs a Zeova wã, a kelg-a lame. Nand tɩ b zãmb a Zeezi wã, a pʋʋsa a Ba wã ne a sũur fãa yell ning sẽn da na n paam-a wã yĩnga. A Zeova pa kelg a Bi-ribl nongrã pʋʋsg bal ye. A pʋd n tʋma malɛk t’a wa keng a raoodo.—Luk 22:41-44.

7. Yãmb manesem yaa wãna, y sẽn mi t’a Zeova leokda a nin-buiidã pʋʋsgã?

 ⁷ Rũndã-rũndã, a Zeova ket n kelgda d pʋʋsgã, la a leokd tõnd tɩ zemsd a wakate, la zemsd ne a raabã me. (Yɩɩn. 116:1, 2) Saam-bi-poak a ye sẽn be Ẽnd yãa a Zeova sẽn leok a pʋʋsg to-to. A ra maooda ne sũ-sãams sẽn loog noore. La a pelga a pʋg n pʋʋs a Zeova rẽ yĩnga. Ad a sẽn yeele: Yʋʋmd 2019 JW Teledifiziyõ wã sẽn wilg d sẽn tõe n mao ne yɩɩrã la sũ-sãamsã to-to wã sõnga maam wʋsgo. Sɩd yɩɩ m pʋʋsgã leoore.”

8. Bõe ne bõe la a Zeova maan n wilg t’a nonga a Zeezi?

⁸ A Zeova nong-d lame la a get d yelle, wa a sẽn nong a Zeezi la a ges a yell to-to a sẽn wa n tʋm-a tẽngã zugã. (Zã 5:20) A sõnga a Zeezi t’a tẽebã paam pãnga, n keng a raood a sũur sẽn wa n sãame, la a sõng-a t’a paam bũmb nins sẽn yaa tɩlɛ ne a vɩɩmã. Sẽn paase, a Zeova togsa a Bi-riblã t’a nong-a lame, la t’a sũur nooma ne-a. (Mat. 3:16, 17) A Zeezi sẽn da tõe n teeg a saasẽ Ba wã sẽn nong-a wã yĩnga, kɩtame t’a ra pa get t’a yaa a yembr ye.—Zã 8:16.

9. Bõe n wilgd t’a Zeova nong-d lame?

⁹ Wa a Zeezi, tõnd me yãa bũmb wʋsg a Zeova sẽn maan n wilg t’a nong-d lame. Tags-y n ges-y. A Zeova sakame tɩ d lebg a zoa, la a kɩt tɩ d tar tẽed-n-taas sẽn nong-do, la b kengd d raood d sũy sã n wa sãame. (Zã 6:44) A Zeova kɩtame me tɩ d paamd bũmb nins sẽn yaa tɩlɛ d tẽebã kengr yĩngã, hal tɩ sekdẽ. Sẽn paase, a kɩtame tɩ d paamd bũmb nins sẽn yaa tɩlɛ ne d vɩɩmã. (Mat. 6:31, 32) D sã n tags a Zeova sẽn nong tõnd to-to wã yelle, d manegd n nong-a lame.

10. A Zeova manesem sẽn yaa to-to ne d tẽed-n-taasã wilgda tond bõe?

¹⁰ A Zeova nonga d tẽed-n-taasã. La wakat ninga, pa nana ne tond tɩ d wilg d tẽed-n-taasã tɩ d nong-b lame ye. Yaa d sẽn yit zĩis toor-toore, tɩ d wubrã me pa yembrã yĩnga. Sẽn paase, d ned kam fãa tudgdame, n mi n tõe n maan bũmb tɩ sãam d taabã sũuri. Baa ne rẽ, d faa tõe n modgame tɩ d sẽn nong taab to-to wã pãng paase. Wãn to? Yaa d sẽn na n dɩk a Zeova togs-n-taare, n nong d tẽed-n-taasã. (Ef. 5:1, 2; 1 Zã 4:19) Bɩ d ges yam ning d sẽn tõe n dɩk a Zeova mak-sõngã pʋgẽ.

11. Wãn to la a Zeezi wilg tɩ wa a Zeova, yẽ me nimbãan-zoeerã yaa kãsenga?

¹¹ A Zeova ‘nimbãan-zoeerã yaa kãsenga.’ (Luk 1:78) Ned sẽn yaa nimbãan-zoɛt sã n yã ned sẽn namsde, a baooda a sẽn na n maan to-to n sõng-a la a bels-a. A Zeezi manesem sẽn da yaa to-to ne nebã wilgdame t’a yaa nimbãan-zoɛt wa a Zeova. (Zã 5:19) Daar a ye, a Zeezi yãa neb kʋʋngo, la “b nimbãaneg yõka bãmba. Bala, b mikame tɩ b yaa wa piis sẽn pa tar kɩɩma, n namsdẽ la b pa tar ned sẽn get b yell ye.” (Mat. 9:36) B nimbãanegã pa yõk a Zeezi bal ye. A maana bũmb n na n sõng-ba. A saooga baad-dãmbã, la a sõng b sʋkã neb nins “fãa sẽn yɛ la sẽn tʋk zɩɩbã.”—Mat. 11:28-30; 14:14.

12. Bõe la d tõe n maan n wilg tɩ d yaa nimbãan-zoeta?

¹² D sã n tagsd d tẽed-n-taasã sẽn maood ne zu-loees ninsã yelle, d na n tõog n wilgame tɩ d zoeta b nimbãanega. Wala makre, saam-bi-poak tõe n maooda ne bã-kɛgenga, n pa gomd a bãagã yell ne nebã ye. La sãmbg kae t’a sa n paam tɩ b  sõng-a, a sũur na n yɩɩ noog wʋsgo. Tõe tɩ yaa toog ne-a t’a tõog n ges a zakã rãmb yelle. Rẽ yĩnga, a sã n paam tɩ b mi n sõng-a ne rɩɩb seglgo, bɩ ne a roogã yẽesgo, a sũur kõn yɩ noog sɩda? Tõe tɩ saam-biig tʋʋmd n sãame. Nand t’a paam tʋʋmd a to, d tõe n baoo ligd bilf n kõ-a t’a sembdẽ, la d da maan t’a bãng tɩ yaa tõnd mengã n kõ-a ye.

13-14. Bõe la d tõe n maan n wilg tɩ d yaa kõat la maan-neer soab wa a Zeova?

¹³ A Zeova yaa kõat la maan-neer soaba. (Mat. 5:45) D pa segd n gũ tɩ d tẽed-n-taasã wa kos sõngre, tɩ d yaool n na n wilg tɩ d kʋmda b nimbãaneg ye. Wa a Zeova d tõe n yaka yam n sõng-ba, nand meng tɩ b kos tõnd sõngre. A Zeova kɩtdame tɩ wĩntoogã zẽkd daar fãa, tɩ saagã me niida, n pa baood meng tɩ d kos-a rẽ ye. Saagã nafda neba fãa, baa nin-wẽnsã menga. A Zeova sẽn sõngd tõnd tɩ d paamd bũmb nins sẽn yaa tɩlɛ ne-dã wilgdame t’a sɩd nong-d lame. Hakɩɩka, d nonga a Zeova hal wʋsgo, a sẽn yaa kõat la maan-neer soabã yĩnga.

¹⁴ D tẽed-n-taas wʋsg rɩkda d saasẽ Ba wã togs-n-taare, n yɩt pipi n maand b taabã neere. Wala makre, yʋʋmd 2013, sob-kãseng ning sẽn zĩnd Filipin t’a yʋʋr boondẽ t’a Haiyannã waa ne sãoong wʋsgo. D tẽed-n-taas wʋsg zags la b teed n sãame. La d tẽed-n-taasã sẽn be dũniyã gill zugã maana bũmb tao-tao n sõng-ba. Wʋsg kõo ligdi, wall b kẽes b toog n na n lebs n me rotã. Rẽ kɩtame tɩ b tõog n lebs n maneg bɩ n me rot sõor sẽn ta 750, tɩ pa ta yʋʋmd ye. Koronavirisã ba-longdgã sasa, a Zeova Kaset rãmbã tʋma wʋsg n sõng b tẽed-n-taasã. D sã n maand bũmb tao-tao n sõngd d tẽed-n-taasã, d wilgdame tɩ d sɩd nong-b lame.

15-16. Wa Kolos rãmb 3:13 sẽn yetã, bõe la d segd n maan n tõog n dɩk d saasẽ Ba wã togs-n-taare?

¹⁵ A Zeova yaa sug-kõata. (Karm-y Kolos rãmb 3:13.) Daar faa, d saasẽ Ba wã kõta tõnd d beegrã sugri. (Yɩɩn. 103:10-14) A Zeezi karen-biisã ra pa zems zãnga, n yaa koangdba. La baa ne rẽ, a ra kõt-b-la b kongrã sugri. A pʋd n yãka yam n sak n kõ  a vɩɩmã tɩ yɩ maoongo, tɩ d tõe n paam d yel-wẽnã sugri. (1 Zã 2:1, 2) A Zeova ne a Zeezi sẽn yaa nimbãan-zoɛtb la sug-kõatbã pa kɩt tɩ y nong-b hal wʋsg sɩda?

¹⁶ D sã n sakd n kõt d tẽed-n-taasã sugri, d na n maneg n nong-b lame. (Efɛ. 4:32) Wakat ninga, yɩl n kõ d taabã sugr tõeeme n pa yɩ nana ye. Woto baoodame tɩ d maan modgre. Saam-bi-poak a ye yeelame tɩ Gũusg Gasg a ye sõsg n sõng-a t’a tõog n maan woto. Sõsgã gom-zug ra yaa: “Kot-y taab sugri.” * Ad a sẽn yeele: “Sõs-kãng sõnga maam tɩ m bãng sugrã kũun sẽn nafd mam mengã to-to. B yeela be tɩ sak n kõ f to sugrã pa rat n yeel tɩ f mum f nin a manesem-wẽng taoore, wall f tags t’a sẽn maanã pa maneg n yaa wẽng ye. Rat n yeelame tɩ f segd n basa taale, n da tall sũ-kẽk ye.” D sã n sakd n kõt d tẽed-n-taasã sugri, d wilgdame tɩ d nong-b lame, la tɩ d rɩkda d saasẽ Ba a Zeova togs-n-taare.

17. Wa Matiye 5:16 sẽn wilgdã, bõe la d tõe n maan tɩ d saasẽ Ba wã yʋʋr paam waoogre?

¹⁷ D sũy mooma wʋsgo, d sẽn paam n naag a Zeova zakã neb sẽn be dũniyã gill zugu, n nong taabã. D ratame tɩ neb wʋsg wa naag tõnd n tũ d Wẽnnaamã. D sẽn mi rẽ wã, d segd n maana gũusg n da wa maan bũmb sẽn na n sãam a Zeova nin-buiidã yʋʋre, wall d saasẽ Ba wã yʋʋr ye. D modgdame n zãad d mens sõma, sẽn na yɩl n paam tɩ nebã sak koe-noogã.—Karm-y Matiye 5:16.

18. Bõe n tõe n sõng-d tɩ d moon koɛɛgã n da yɛɛse?

¹⁸ Wakat ninga, neb kẽer tõe n sãbs-d lame, wall b pʋd n nams tõndo, d sẽn sakd d saasẽ Ba wã yĩnga. D sã n wa rat n gom d tẽebã yell ne ned n yɛɛsdẽ, bõe n tõe n sõng-do? D tõe n basa d yam t’a Zeova ne a Bi-riblã na n sõng-d lame. A Zeezi yeela a karen-biisã tɩ b ra maan yɩɩre, ne b sẽn na n gom to-to wall b sẽn na n maan bũmb ningã ye. Bõe yĩng tɩ d pa  segd n maan yɩɩre? A Zeezi yeelame: “Sẽn gomd-bã pa yãmb bal ye. Yaa yãmb Ba wã vʋʋsem sõngã n tũnugd ne yãmb n gomda.”—Mat. 10:19, 20.

19. Togs-y kibar sẽn wilgd ned sẽn moon koɛɛgã ne raoodo?

¹⁹ D gom saam-biig a ye yʋʋr sẽn boond t’a Robɛɛr yelle. A sẽn wa n zãmsd Biiblã paalem n da pa mi bũmb wʋsg Biiblã zugã, b wa n tall-a lame n kẽng bʋ-kaoodb taoor Afirikdisiidi, sẽn na yɩl t’a wilg bũmb ning sẽn kɩt t’a yãk yam n pa na n kẽ sodaarã. A talla raood n wilg bʋ-kaoodbã t’a sẽn pa rat n kẽ sodaarã yaa a sẽn nong a saam-biisã yĩnga. A sũur nooma ne a sẽn paam n naag a Zeova zakã neba. Zĩig pʋgẽ, bʋ-kaoodã sok-a lame yaa: “Ãnd dãmb la fo saam-biisã? A Robɛɛr ra zɩ n tags tɩ b na n sok-a-la sokr a woto buud ye. La zĩig pʋgẽ, a tẽega daar-n-kang daarã vɛrse wã yelle. Ra yaa Matiye sak 12 vɛrse 50 wã. B yeta be yaa: “Ned ning sẽn maand m Ba sẽn be saasẽ wã raab n yaa mam ma-bi-raoogo, m ma-bi-poaka, la m ma.” Baa ne a Robɛɛr sẽn da sɩng Biiblã zãmsg tɩ nan pa kaoosã, a Zeova vʋʋsem sõngã sõng-a lame t’a tõog n leok sokrã, la sogsg a taab b sẽn sok-a. Sãmbg kae t’a Zeova sũur yɩɩ noog ne a Robɛɛre. A Zeova sũur nooma ne tõnd me, d sã n teeg-a, sẽn na yɩl n tõog n moon koɛɛgã ne raoodo, baa sã n pa nana.

20. Bõe la d segd n yãk yam n maane? (Zã 17:11, 15)

²⁰ Bɩ d kell n wilg tɩ d sũur nooma ne d sẽn paam n naag a Zeova zakã nebã sẽn nong taabã. D tara Ba sẽn ka to, la saam-biis la saam-bi-pogs wʋsg sẽn nong tõndo. D segd n wilgda wakat fãa tɩ d sũur sɩd nooma ne rẽ. A Sʋɩtãan ne a poorẽ dãmbã sẽn kis tõndã modgame n na n kɩt tɩ d tags t’a Zeova pa nong-do, la b modgdẽ n na n sãam zems-n-taarã sẽn be tõnd ne d tẽed-n-taasã sʋkã. La a Zeezi pʋʋsa tõnd yĩng n kos a Ba wã t’a gũ tõndo, la a sõng-d tɩ zems-n-taar kell n zĩnd tõnd ne d tẽed-n-taasã sẽn yaa wa zak a ye nebã sʋka. (Karm-y Zã 17:11, 15.) A Zeova leokda a Zeezi pʋʋsgã. Wa a Zeezi, bɩ d da maan sãmb-sãmb tɩ d saasẽ Ba wã nong-d lame, la t’a na n sõng-d lame ye. Bɩ d kell n yãk yam n modg tɩ d sẽn nong a Zeova la d tẽed-n-taasã to-to wã pãng paase.