1. Bõe n wilgd tɩ d sẽn sõngd nebã sẽn na yɩl tɩ b wa lebg a Zeezi karen-biisã yaa tʋʋmd sẽn fãagd yõyã?

D SẼN sõngd nebã sẽn na yɩl tɩ b wa lebg a Zeezi karen-biisã yaa tʋʋmd sẽn fãagd yõyã. Bõe yĩng tɩ d yet woto? A Zeezi sẽn kõ noor ning sẽn be Matiye 28:19, 20 wã, a yeelame: “Bɩ y kẽng n tɩ sõng buud fãa neb tɩ b lebg mam karen-biisi, n lis bãmb.” Lisgã yõod yaa bõe? Ned sã n dat n wa paam fãagre, yaa tɩlɛ t’a reeg lisgu. Sẽn dat n deeg-a lisga segd n sak n deegame tɩ yaa a Zeezi sẽn ki tɩ yɩ maoongã la a vʋʋgã, n kɩt tɩ d tõe n wa paam fãagrã. Rẽ n so tɩ tʋm-tʋmd a Pɩyɛɛr yeel kiris-nebã yaa: “Koomã lisg . . . fãagda yãmb masã a Zeezi Kirist vʋʋgrã maasem yĩnga.” (1 Pɩy. 3:21) Dẽnd Biibl karen-biig sã n deeg lisgu, a tõe n saagame n wa paam fãagre.

2. Wa 2 Tɩmote 4:1, 2 sẽn wilgdã, d segd n yɩɩ karen-saamb sẽn yaa wãn to?

² Sẽn na yɩl n sõng ned t’a wa lebg a Zeezi karen-biiga, d segd n paama “zãmsg minim.” (Karm-y 2 Tɩmote 4:1, 2.) Bõe yĩnga? Bala a Zeezi kõo noor n yeele: “Bɩ y kẽng n tɩ sõng buud fãa neb tɩ b lebg mam karen-biisi, n lis bãmb.” Tʋm-tʋmd a Poll yeelame tɩ d “wɩng” ne tʋʋmdã, tɩ woto la d na n ‘fãag d meng la d fãag neb nins sẽn kelgd tõndã.’ Rẽnd a Poll bee bʋʋm la a sẽn yeel tɩ d ‘gũus d meng ne koɛɛg ning d sẽn zãmsd nebã.’ (1 Tɩm. 4:16) Woto wã, d sẽn dat n sõng nebã tɩ b wa lebg a Zeezi karen-biisã yĩnga, d segd n modg n zãms-b-la Biiblã sõma.

3. Bõe yell la d na n gom sõs-kãngã pʋgẽ?

³ Dũniyã gill zugu, neb milyõ-rãmb la d zãmsd Biiblã. La wa d sẽn yã sõsg ning sẽn loogã pʋgẽ wã, d rat n bãnga d  sẽn tõe n sõng nin-kãensã to-to tɩ b wa reeg lisg n lebg a Zeezi Kirist karen-biisi. Sõs-kãngã pʋgẽ me, d na n yãa bũmb a nu koe-moond sẽn tõe n maane, n sõng a karen-biig t’a wa tõog n deeg lisgu.

4. Koe-moond sã n wa zãmsd ned Biiblã, bõe yĩng t’a segd n tall yõk-m-menga? (Ges-y vẽnegrã me.)

⁴ D nonga d sẽn zãmsd nebã bũmb ning Wẽnnaam Gomdã pʋgẽ wã. La woto tõe n kɩtame tɩ d wa rat n gom rẽ yell wʋsgo. Ned sã n lʋɩ taoor Gũusg Gasgã zãmsg wall Tigingã Biibl zãmsg sasa, bɩ yaa ned la a zãmsd Biiblã, a pa segd n gomd wʋsg ye. Koe-moond sã n dat n tõog n tik Biiblã sẽn yetã n zãms neda, a segd n talla yõk-m-menga, n da bao n na n togs bũmb nins fãa a sẽn mi Biiblã vɛrse ning zugu, wall gomd ning wɛɛngẽ ye. * (Zã 16:12) Tags-y n ges-y bũmb nins yãmb sẽn da mi y lisgã wakatã, la bũmb nins y sẽn mi masã wã. Tõe tɩ y lisgã sasa, y ra pa mi bũmb wʋsg Biiblã zug ye. (Ebre. 6:1) Kaoosa yʋʋm wʋsg tɩ y yaool n wa bãng bũmb nins y sẽn mi masã wã. Woto wã, bɩ y ra bao n na n zãms y karen-biigã bũmb fãa zĩig pʋgẽ ye.

5. a) Wa 1 Tesalonik rãmb 2:13 sẽn wilgdã, d ratame tɩ d Biibl karen-biigã bãng bõe? b) Wãn to la d tõe n sõng karen-biigã t’a gom bũmb ning a sẽn zãmsdã yell ne-do?

⁵ D ratame tɩ d Biibl karen-biigã bãng tɩ d sẽn zãmsd-a bũmb ningã yita Biiblã pʋgẽ. (Karm-y 1 Tesalonik rãmb 2:13.) D na n maana wãn t’a bãng rẽ? Yeel-y karen-biigã t’a gom bũmb ning a sẽn zãmsdã yell ne yãmba. Ra bilgd-y-yã-a Biiblã vɛrse-rãmbã võor wakat fãa ye. Mi n kos-y-yã-a t’a bilg yãmb vɛrse kẽer võore. Sõng-y-yã-a t’a bãng yẽ mengã sẽn tõe n tũ Biiblã saglsã to-to. A sã n karem vɛrse, bɩ y sok-a sogsg sẽn na n kɩt t’a togs a sẽn tagsd bũmb ning vɛrse wã zugu. (Luk 10:25-28) Wala makre, y tõe n sok-a lame yaa: “Vɛrse-kãnga sõnga foo tɩ f bãng bõe a Zeova zugu?” “Wãn to la fo sẽn bãng bũmb ningã tõe n sõng foo?” “Fo tagsg yaa wãn ne f sẽn bãng bũmb ningã?” (Yel. 20:5) Sẽn tar yõod n yɩɩdã pa karen-biigã sẽn na n bãng bũmb wʋsg ye. Yaa a sẽn na n nong a sẽn zãmsd bũmb ningã, la a tũudẽ.

6. D sã n na n tɩ zãms ned Biiblã, bõe yĩng tɩ yaa sõma tɩ d mi n kos koe-moond sẽn tar minim wʋsg t’a yãag-do?

⁶ Yãmb sã n na n tɩ zãms ned Biiblã, y mi n kɩtdame tɩ koe-moond sẽn tar minim wʋsg yãag-y bɩ? Sã n yaa woto,  y tõe n sok-a lame n ges yãmb sẽn zãmsd karen-biigã to-to wã sã n yaa sõma, la y sã n tikda Biiblã zug sõma. Y sã n dat tɩ y zãmsgã minim paase, y segd n talla sik-m-menga. (Ges-y Tʋʋm 18:24-26.) Rẽ poore, bɩ y sok koe-moondã sẽn tar minimã n gese karen-biigã sã n wʋmda zãmsgã võor sõma. Yãmb sã n na n maana semen bɩ sẽn yɩɩd rẽ n pa tõog n tɩ zãms karen-biigã Biiblã, y tõe n kosa koe-moondã t’a led y zĩigẽ. Woto na n sõngame tɩ zãmsgã ra yals ye. Leb n na n kɩtame tɩ karen-biigã bãng tɩ zãmsgã tara yõod wʋsgo. D pa segd n tags tɩ yaa “tõnd” karen-biiga, la tɩ ned a to pa segd n tɩ zãms-a Biiblã ye. D sẽn dat n tɩ yɩɩd yaa karen-biigã neere. D rat n sõng-a lame t’a ket n kẽngd taoor ne Biiblã zãmsgo.

7. Bõe n na n sõng Biibl karen-biig t’a maneg n nong bũmb ning a sẽn zãmsdã?

⁷ Karen-biigã segd n neeme tɩ yãmb tara yẽesem, la tɩ y kɩsa sɩd ne Biiblã sẽn yet bũmb ningã. (1 Tes. 1:5) Woto, a na n maneg n nonga bũmb ning a sẽn zãmsdã. Y tõe n wilg-a-la Biiblã saglsã tũub sẽn nafd yãmb mengã to-to. Rẽ wã, a na n bãngame tɩ Biiblã saglsã tõe n nafa yẽ me.

8. Bõe me la y tõe n maan n sõng y Biibl karen-biiga, la bõe yĩng tɩ y segd n maan rẽ?

⁸ Zãmsgã sasa, togs-y karen-biigã neb kẽer kibay, neb sẽn mao ne yẽ zu-loeesã buud n tõoge. Ned sã n bee tigingã pʋgẽ t’a kibarã tõe n sõng karen-biigã, y tõe n kos-a lame t’a yãag-y tɩ y tɩ zãms karen-biigã. Y tõeeme me n paam neb kibay sẽn kengd raood jw.org pʋgẽ, zĩig ning b sẽn gʋls tɩ “Biiblã toeemda neba.” * Kiba-kãensã, la video nins sẽn be be wã na n sõnga y karen-biigã t’a bãng tɩ Biiblã saglsã tũub nafda wʋsgo.

9. Wãn to la y tõe n sõng y karen-biigã t’a gomd bũmb nins a sẽn Zãmsd Biiblã pʋgẽ wã yell ne a zakã rãmb la a zo-rãmbã?

⁹ Yãmb karen-biigã sã n kẽe kãadem wall a bee ne neda, nin-kãng me zãmsda Biiblã bɩ? A sã n pa zãmsdẽ, bɩ y bool-a t’a wa naage. Yeel-y y karen-biigã t’a gomd ne a zakã rãmb la a zo-rãmbã bũmb nins a sẽn zãmsd Biiblã pʋgẽ wã. (Zã 1:40-45) Wãn to la y tõe n sõng-a rẽ wɛɛngẽ? Y tõe n sok-a lame yaa: “Wãn to la f tõe n bilg f zakã rãmb gom-kãngã tɩ b wʋm a võore?” wall “Biiblã vɛrse-bʋg la f tõe n tall n wilg f zoa tɩ gom-kãngã yaa sɩda?” Woto, y sõngda karen-biigã sẽn na yɩl t’a wa lebg karen-saamba. A sã n wa paam minim tɩ seke, a tõe n lebga koe-moond sẽn nan pa reeg lisgu. Y tõe n soka y karen-biigã n ges a sã n mii ned sẽn dat n zãms Biiblã. A sã n wilg yãmba, bɩ y bool a soabã zĩig pʋgẽ, n yeel-a tɩ y tõe n zãms-a-la Biiblã. Wilg-y-yã-a Wãn to la d zãmsd ned Biiblã? video wã. *

10. Wa 1 Tesalonik rãmb 2:7, 8 sẽn wilgdã, wãn to la koe-moond tõe n dɩk a Poll togs-n-taare?

¹⁰ Koe-moondbã segd n wilgame tɩ b karen-biisã yell sɩd pak-b lame. Ges-y-b wa neb sẽn na n wa lebg y tẽed-n-taase. (Karm-y 1 Tesalonik rãmb 2:7, 8.) Pa nana ne-b tɩ b bas zo-rãmb nins b sẽn da tar dũniyã pʋgẽ wã, n toeem bũmb wʋsg b vɩɩmã pʋgẽ n tũ a Zeova ye. Rẽnda y sõng-b tɩ b paam zo-rãmb hakɩɩk tigingã pʋgẽ. Yõg-y zood ne y Biibl karen-biigã, n baood weer n sõsd ne-a sasa a taaba, la pa Biiblã zãmsg wakat bal ye. Y sã n mi n bao wakat n bool-a ne telefõnne, bɩ n gʋls-a mesaaz tɩ pa zãmsgã yĩnga,  wall y tɩ kaag-a koɛɛg-koɛɛg bala, wilgdame t’a yell sɩd pak-y lame.

11. Bõe la d rat tɩ d karen-biisã paam tigingã pʋgẽ, la bõe yĩnga?

¹¹ Yɛl-bũnd a ye yetame tɩ “tẽng tõr n wubd biiga.” D tõe n yeelame me tɩ “tiging tõr n sõngd ned t’a wa reeg lisgu.” Rẽ n so tɩ koe-moondb nins sẽn tar minimã sõngd b karen-biisã, tɩ b yõgd zood ne tigingã neb nins sẽn tõe n sõng-b tɩ b paam zood sõma ne a Zeova wã. Rẽ masã, karen-biisã paamd n naaga Wẽnnaam nin-buiidã sẽn tõe n keng b raood la b paas b tẽebã pãngã, tɩ b sũy noomẽ. D ratame tɩ karen-biig fãa neẽ t’a yaa tigingã neda. D ratame me tɩ karen-biig fãa yã tɩ tõnd yaa wa zak a ye neb sẽn nong taaba, tɩ rẽ kɩt t’a rat n naag-do. Rẽ na n kɩtame tɩ yɩ nana ne-a t’a bas a zo-rãmb nins sẽn pa sõngd-a t’a nong a Zeova wã. (Yel. 13:20) A pĩnd zo-rãmbã sã n daag-a n base, a na n bãngame t’a tõe n paama zo-rãmb hakɩɩk a Zeova siglgã pʋgẽ.—Mark 10:29, 30; 1 Pɩy. 4:4.

12. Bõe yĩng tɩ d segd n gomd rɩk f meng n kõ a Zeova la lisgã reegr yell ne d karen-biigã?

¹² Gom-y ne y karen-biigã vẽenega, n  wilg-a tɩ kiris-ned fãa segd n dɩka a meng n kõ a Zeova n deeg lisgu. D sã n zãmsd ned Biiblã, d sẽn dat n tɩ yɩɩd yaa d sõng-a t’a wa reeg lisgu, n lebg a Zeezi karen-biiga. D sã n zãms ned Biiblã kiis a wãn n pa vaale, t’a sɩng tigissã waoongo, a segd n bãngame tɩ d sẽn zãmsd-a Biiblã yaa d sẽn dat n sõng-a t’a wa lebg a Zeova Kaset soabã yĩnga.

13. Bõe ne bõe la karen-biig segd n maan n wa tõog n deeg lisgu?

¹³ Bilf-bilfã, Biibl karen-biig sẽn yaa pʋ-peelem soab wat n tõog n deega lisgu. Pipi, a na n nonga a Zeova, la a tẽed-a. (Zã 3:16; 17:3) Karen-biigã na n paama zood sõma ne a Zeova la ne tigingã neb me. (Ebre. 10:24, 25; Zak 4:8) A wat n basa a minim-wẽnsã, n tek yam n kos sugri. (Tʋʋ. 3:19) A tẽebã na n wa kɩtame t’a gomd a sẽn tẽed bũmb ninsã yell ne nebã. (2 Kor. 4:13) Rẽ masã, a na n dɩka a meng n kõ a Zeova, la a reeg lisg n wilg rẽnda. (1 Pɩy. 3:21; 4:2) Ra-kãng yaa sũ-noog raar ne nebã fãa. Karen-biigã sã n modgdẽ n na n wa reeg lisgu, bɩ y pẽg-a sõma, la y keng a raood t’a kell n wɩng ne rẽ maanego.

14. Bõe la koe-moond tõe n maan n bãng a karen-biig sã n ket n modgdame?

¹⁴ D sã n wa sõngd karen-biig sẽn na yɩl t’a wa tõog n deeg lisgu, d segd n talla sũ-mare. La wakat ninga, d segd n bao n bãnga a sã n sɩd rat n tũu Wẽnnaam a Zeova. Yãmb nee bũmb karen-biigã sẽn maande, tɩ wilgdẽ t’a sakda a Zeezi noyã bɩ? Bɩ a ratame bal n paam bãngr Biiblã zugu?

15. Bõe n tõe n sõng koe-moond t’a bãng a karen-biig sã n seglame n sa n tõe n deeg lisgu?

¹⁵ Wakat fãa, bɩ y baood n bãngd y karen-biigã sã n ket n modgdame. Wala makre, a wilgdame t’a nonga a Zeova bɩ? A pʋʋsda a Zeova bɩ? (Yɩɩn. 116:1, 2) A nong n karemda Biiblã bɩ? (Yɩɩn. 119:97) A wata tigissã wakat fãa bɩ? (Yɩɩn. 22:23) A toeema bũmb wʋsg a vɩɩmã pʋgẽ tɩ wilgdẽ t’a tũuda a sẽn zãmsdã bɩ? (Yɩɩn. 119:112) A sɩngame n gomd bũmb nins a sẽn zãmsdã yell ne a zakã neb la a zo-rãmbã bɩ? (Yɩɩn. 9:2) Sẽn yɩɩd fãa, a rat n lebga a Zeova Kaset soab bɩ? (Yɩɩn. 40:9) Karen-biigã sã n pa maand bõn-kãensã baa a yembre, bɩ y maag y  yĩng n bao n bãng a võore, la y sõs ne-a rẽ zug vẽeneg-vẽenega. *

16. Bõe la d tõe n maan n bãng tɩ d segd n basa ned Biiblã zãmsgo?

¹⁶ Mi n sokd-y y meng n getẽ y sã n segd n ket n zãmsda karen-biigã Biiblã. Sok-y y meng yaa: ‘Karen-biigã vaanda zãmsgã seglg bɩ? Tigissã kẽnd yaa bũmb sẽn pa noom-a bɩ? A ket n tara minim-wẽns bɩ? A ket n bee ziri tũudmã pʋgẽ bɩ?’ Sã n yaa n-ye, tɩ y ket n zãmsd-a Biiblã, yaa wa f sẽn dat n zãms ned koom rugbu, t’a soab yaool n pa rat tɩ koom madg-a ye. Karen-biigã sã n sɩd pa nong a sẽn zãmsd bũmb ningã, la a pa rat me n toeem bũmb kẽer a vɩɩmã pʋgẽ, bõe yĩng tɩ y na n ket n zãmsd-a Biiblã?

17. Sẽn zems ne 1 Tɩmote 4:16, bõe la koe-​moondbã fãa segd n maane?

¹⁷ D sẽn segd n sõng nebã tɩ b lebg a Zeezi karen-biisã yaa tʋʋmd sẽn tar yõod wʋsg ne-do. La d ratame me n sõng d Biibl karen-biisã tɩ b wa tõog n deeg lisgu. Rẽ n so tɩ d segd n tikd d zãmsgã Biiblã zugu, n zãmsd nebã ne yẽesem, la d wilgdẽ tɩ d kɩsa sɩd ne d sẽn zãmsd-b bũmb ningã. D sõng d karen-biigã t’a bao zo-rãmb tigingã pʋgẽ. D segdame me n nong n gomd rɩk f meng n kõ a Zeova la lisgã reegr yell ne d karen-biisã. (Ges-y seb-neng 13 zĩ-gũbrã: “Koe-moond sẽn segd n maane, n sõng Biibl karen-biig t’a wa tõog n deeg lisgu”) D sũy nooma d sẽn paam n naag n tʋmd tʋʋmd sẽn fãagd yõyã. Bɩ d yãk yam n maan d sẽn tõe fãa n sõng d Biibl karen-biisã, tɩ b wa tõog n deeg lisgu.