1. Wãn to la saam-biig a Russell ne a tũud-n-taasã ra maand n zãmsd Biiblã? Bõe yĩng tɩ b sẽn da maand to-to wã yaa sõma?

SẼN yɩɩd yʋʋm koabg masã, saam-biig a Charles Russell ne a tũud-n-taas n da naag taab sul-bila, n tigimd taab n zãmsd Biiblã. B ra rat n bao n bãnga Biiblã sẽn sɩd yet bũmb ning Wẽnnaam a Zeova zugu, a Zeezi Kirist zugu, sẽn ki-bã wɛɛngẽ, la a Zeezi kũumã sẽn rond tõnd yel-wẽnã wɛɛngẽ. B sẽn da maand to-to n zãmsd Biiblã yaa nana. Sullã nin-yend n sokd sokre, tɩ b fãa naag taab n bao vɛrse-rãmb sẽn gomd rẽ yelle, n sõs b zugu. Rẽ poore, b gʋlsda b sẽn bãng bũmb ningã n bĩngi. Ne a Zeova sõngre, kiris-nin-kãensã sẽn da yaa pʋ-peelem dãmbã bãnga bũmb wʋsg Biiblã sẽn yet tɩ tar yõod wʋsgo, tɩ nafd tõnd hal ne rũndã.

2. Wakat ninga, bõe n tõe n kɩt tɩ d pa wʋm Biiblã bãngr-gomd võor sõma?

² Pa kaoos la Biiblã Zãmsdbã bãng tɩ yɩl n tõog n wʋm Biiblã bãngr-goam võor yaa toog wʋsgo, n yɩɩd Biiblã goam a taabã. Bõe yĩng tɩ d yet woto? Bala naoor wʋsgo, yaa bãngr-gomd sã n wa sɩng pidsgu, bɩ a pidsgã poor la d tõe n wʋm a võor sõma. La pa rẽ bal ye. Yɩl n wʋm Biiblã bãngr-gomd võor sõma, d segd n tagsa bũmb nins fãa b sẽn togs bãngr-gomdã pʋgẽ wã yelle. D sã n yãk bãngr-gomdã zĩig a ye bal n tags a zug la d bas sẽn ketã, d tõeeme n pa wʋm a võor sõma ye. Wõnda yaa woto ne bãngr-gomd sẽn be Zowɛll sebrã pʋgẽ. D na n goma bãngr-gom-kãng yelle, la d ges bũmb ning sẽn kɩt tɩ d segd n toeem d sẽn wʋmd a võorã to-to wã.

3-4. Hal n tãag masã, wãn to la d ra wʋmd Zowɛll 2:7-9 wã võore?

³ Karm-y Zowɛll 2:7-9. A Zowɛll pĩnd n togsame tɩ sʋy n na n sũ taab n wa Israyɛlle, tɩ b yẽnã ne b yɛyã yaa wa gɩgmã rẽnda, la tɩ b na n wãba tɩɩsã la moodã fãa sẽn be tẽngã pʋgẽ wã. (Zow. 1:4, 6) Na maan yʋʋm wʋsgo, d wilgame tɩ bãngr-gom-kãngã bilgda a Zeova nin-buiidã sẽn moond koɛɛgã ne yẽesem to-to wã, n yaa wa sʋy sẽn sũ taab tɩ bũmb pa tõe n gɩdg-b ye. D ra tagsdame tɩ ne koɛɛgã mooneg maasem, b sãamda “tẽngã,” rat n yeel tɩ neb nins sẽn sakd tũudmã taoor dãmbã. *

⁴ Sã n yaa Zowɛll 2:7-9 wã bal la d karm-yã, tõe n wõnda gomdã võor yaa woto. La d sã n yaool n karem bãngr-gomdã gill n tags a zug sõma, d bãngdame tɩ d segd n toeema d sẽn wʋmd a võorã to-to wã. D ges bũmb a naas sẽn kɩt tɩ d yet woto wã.

5-6. Bõe la d sokd d mense, d sã n karem a) Zowɛll 2:20 wã? b) Zowɛll 2:25 wã?

⁵ Pipi, yaa a Zeova sẽn yeel t’a na n maana sʋyã sẽn sũ taabã bũmb ningã. A yeelame: ‘Mam na n diga yãmb nug-rɩtg bɛɛbã [sʋyã] tɩ b zãag ne-yã.’ (Zow. 2:20) Sã n mikame tɩ sʋyã sɩd makda a Zeova Kaset rãmbã sẽn sakd a Zeezi noorã n moond koɛɛgã, la b sõngd nebã tɩ b lebgd a karen-biisã, bõe yĩng t’a Zeova na n yeel t’a na n dig-b lame n zãage? (Eze. 33:7-9; Mat. 28:19, 20) Dẽnd a Zeova sẽn na n dig a soab n zãagã pa a nin-buiidã sẽn sakd-a wã ye. A sẽn na n digã yaa bũmb bɩ ned sẽn dat n maan a nin-buiidã wẽnga.

⁶ Yiib-n-soaba, yaa b sẽn yeel bũmb ning Zowɛll 2:25 pʋgẽ wã. Ad a Zeova sẽn yeele: ‘Mam na n lebsa yãmb y koodã, sʋ-kitrzĩgnisã ne nesneedã la kalwaarã ne zũnzũyã sẽn dɩ wã. Bãmb yaa mam tãb-bi-kʋʋng m sẽn tʋm tɩ b zab ne yãmba.’ A Zeova yeelame t’a “na n lebsa” koodã sʋyã sẽn dɩ wã. Sã n mikame tɩ sʋyã makda Rĩungã koe-moondbã, dẽnd rat n yeelame tɩ koɛɛgã b sẽn moondã kɩtdame tɩ nebã namsdẽ. Koe-kãng yaool n fãagda yõyã, n tõe n kɩt tɩ nin-wẽng tek yam. (Eze. 33:8, 19) Woto sɩd nafd-b-la wʋsgo.

7. Zowɛll 3:1, 2 pʋgẽ, gomd ning sẽn yaa “rẽ zugẽ” wã sõngda tõnd tɩ d bãng bõe?

⁷ Karm-y Zowɛll 3:1, 2. Bũmb a tãab-n-soabã yaa b sẽn togs yɛlã pʋgdg-pʋgdg to-to bãngr-gomdã pʋgẽ wã. Yãmb sã n gũus n gesame, a Zeova yeelame: ‘Rẽ zugẽ, mam na n sika m Sɩɩgã.’ Woto rat n yeelame tɩ yaa sʋyã sã n wa tʋm b tʋʋmdã n sa. Sʋyã sã n da makda Rĩungã koe-moondbã, bõe yĩng tɩ yaa b sã n wa moon koɛɛgã n sa la a Zeova na n yaool n sik a sɩɩgã bɩ a vʋʋsem sõngã b zugu? Sɩd-sɩdã, sã n da pa ne vʋʋsem sõngã sõngre, koe-moondbã ra pa na n tõog n ket n moond koɛɛgã na maan yʋʋm wʋsgo, bala nebã namsd-b lame la b mi n pʋd n gɩdg b tʋʋmdã.

8. Sʋy nins yell b sẽn gomd Vẽnegr 9:1-11 pʋgẽ wã makda ãnd dãmba? (Ges-y sebrã pipi neng fotã.)

⁸ Karm-y Vẽnegr 9:1-11. D gom bũmb a naas-n-soabã yell masã. Pĩndã, d ra yetame tɩ sʋy nins yell a Zowɛll sẽn gomã sẽn maand bũmb ninsã makda koɛɛgã moonego, bala bãngr-gomd sẽn wõnd rẽ n be Vẽnegr sebrã pʋgẽ. Bãngr-gom-kãng pʋgẽ, b gomda sʋy sẽn sũ taab yelle, tɩ b nensã wõnd ninsaalb nense, tɩ ‘bũmb sẽn wõnd sãnem maanf-rãmb fõg b zutã.’ B namsda “neb nins sẽn pa tar Wẽnnaam bãndã b rĩyẽ wã [Wẽnnaam bɛɛbã]” n na n kaoos kiis a nu, sẽn zems sʋʋr sẽn tõe n vɩɩmd n kaoos to-to wã. (Vẽn. 9:4, 5) Yaa vẽeneg tɩ woto makda neb nins a Zeova sẽn zae ne a vʋʋsem sõngã. B moonda ne raood n wilgd nebã t’a Zeova na n sãama dũni-kãngã. Rẽ kɩtame tɩ neb nins sẽn teend dũni-kãngã wã yam pa gãe ye.

9. Welgr bʋg n be sʋy nins a Zowɛll sẽn yã wã ne b rãmb nins yell a Zã sẽn gomã sʋka?

⁹ Yaa sɩd tɩ Vẽnegr sebrã bãngr-gomdã ne a Zowɛll bãngr-gomdã wõnda taaba, la pa tolg n yaa yembr ye. Wala makre, a Zowɛll bãngr-gomdã pʋgẽ, sʋyã wãbda tɩɩsã ne moodã fãa. (Zow. 1:4, 6, 7) A Zã bãngr-gomdã pʋgẽ, b yeela sʋyã tɩ b “ra maan mo-maasã sẽn be tẽngã zugã wall tɩɩg baa a yembr wẽng” ye. (Vẽn. 9:4) Sʋy nins a Zowɛll sẽn yã wã yii nug-rɩtgo. (Zow. 2:20) A Zã sẽn yã b rãmbã yii bog-zulung pʋgẽ. (Vẽn. 9:2, 3) B riga sʋy nins yell a Zowɛll sẽn gomã tɩ b zãage. La Vẽnegr sebrã pʋgẽ, b pa rig-b n zãag ye. B pʋd n kõ-b-la sor tɩ b na n baas b tʋʋmdã. Biiblã zĩig baa a ye pa wilgd t’a Zeova sũur pa noom ne-b ye.—Ges-y zĩ-gũbrã: “ Bãngr-goam sẽn gomd sʋy yelle: Wõnda taaba, la pa yembr ye.”

10. Togs-y vɛrse a taab sẽn wilgd tɩ sʋy nins yell a Zowɛll ne a Zã sẽn gomã tõe n makda bũmb toor-toore.

¹⁰ Welgr ning sẽn be bãngr-gom-kãensã a yiibã sʋkã kɩtame tɩ d bãng tɩ b pa yembr ye. Woto rat n yeelame tɩ sʋy nins yell a Zowɛll sẽn gomã yaa toor fasɩ ne sʋy nins yell b sẽn gom Vẽnegr sebrã pʋgẽ wã. Naoor wʋsgo, Biiblã tõe n gomda bõn-yɛng yell zĩis wʋsgo, tɩ yaool n makd bũmb toor-toore. Wala makre, Vẽnegr 5:5 wã pʋgẽ, b boola a Zeezi tɩ “Zida buudã Gɩgemdã,” n bool a Sʋɩtãan me 1 Pɩyɛɛr 5:8 wã pʋgẽ tɩ “gɩgemd sẽn kelemde.” Bũmb a naasã d sẽn yã wã, la rẽ sẽn kɩt tɩ d sokd d mens sogsg ninsã wilgdame tɩ d segd n toeema d sẽn wʋmd a Zowɛll bãngr-gomdã võor to-to wã. Bãngr-gomdã võor tõe n yɩɩ bõe?

11. Wãn to la Zowɛll 1:6, la 2:1, 8, 11 wã sõngd tõnd tɩ d bãng sʋyã sẽn makd bũmb ningã?

¹¹ D sã n maag d yĩng n tags a Zowɛll bãngr-gomdã gill zug neere, d mikdame tɩ no-rɛɛsã ra gomda sodaas sẽn na n tɩ zab ne tẽng yelle. (Zow. 1:6; 2:1, 8, 11) A Zeova yeelame t’a na n tũnuga ne a ‘tãb-bi-kʋʋngã,’ (rat n yeel tɩ Babilon sodaasã) n sɩbg Israyɛll neb nins sẽn yaa tõatbã. (Zow. 2:25) B boola Babilon sodaasã tɩ “nug-rɩtg bɛɛba,” bala b ra na n yii rɩtg sẽnes n wa zab ne Israyɛlle. (Zow. 2:20) Soda-kãens sigla sõma, hal tɩ b mak-b ne sʋy sẽn sũ taaba. A Zowɛll goma b yell n yeele: “Ned kam fãa [sodaag fãa] rɩka a sore. . . Bãmb kẽe tẽngã ne pãnga, n zoet lals zut n tũud peem-leesẽ wã n kẽed rotã pʋs wa wagda.” (Zow. 2:8, 9) Tags-y n ges-y sodaasã sẽn pid zĩigã fãa, tɩ soondg zĩig kae ye. Ned pa tõe n põs Babilon sodaasã nugẽ ye!

12. Wãn to la a Zowɛll bãngr-gomd ning sẽn gomd sʋy yellã pids-yã?

¹² Yʋʋmd 607 sẽn deng a Zeezi rogmã, Babilon sodaasã [Kalde rãmbã] wa n kẽe Zerizalɛm wa sʋya, n sãam-a. Biiblã goma rẽ yelle, n yeele: ‘Sẽn-Ka-Saab kɩtame tɩ Kalde naabã wa zab ne bãmba, n kʋ b kom-bɩɩsã ne zabr sʋʋse. . . . Bãmb ka bas bi-ribl bɩ bi-pugla, wall nin-kẽem bɩ ned sẽn tar zoob peend ye. A bas-b-la fãa a nugẽ. La a yõoga Wẽnnaam doogã bugum n wã Zeruzalɛm lalgã, la b yõog na-yiyã fãa, la b sãam te-sõamy wã fãa.’ (2 Kib. 36:17, 19) Babilon sodaasã sẽn sãam tẽngã, nebã ra loogd n getame la b yetẽ: ‘Tẽn-kãngã yaa . . . zĩ-vɩʋʋg tɩ ned wall rũng ka leb n be beenẽ,’ la “t’a paa Kalde rãmbã nugẽ.”—Zer. 32:43.

13. Zeremi 16:16, 18 goamã võor yaa bõe?

¹³ Na maan yʋʋm 200 a Zowɛll bãngr-gomdã pidsg poore, a Zeova kɩtame tɩ no-rɛɛs a Zeremi pĩnd n togs bũmb a to zab-kãng wɛɛngẽ. A Zeova yeelame t’a na n maaga a yĩng n gẽes Israyɛll neb nins sẽn tʋmd tʋʋm-wẽnsã, n yõg-b fãa gilli. Ad a sẽn yeele: “Mam na n tʋma neb wʋsg tɩ b wa yõg-b wa ned sẽn yõgd zĩm. Dẽ poore, m na n kɩtame tɩ neb wʋsg rig bãmb n yiis tãmsã fãa ne kunkuba fãa zutu. . . Mam na n dola bãmb b kongrã ne b yel-wẽnã naoor a yiibu. Israyɛll neb nins sẽn pa tek yamã pa na n tõog n solg mogrã pʋgẽ wall weoogẽ wã tɩ Babilon sodaasã pa paam-b ye.—Zer. 16:16, 18.

14. Wakat bʋg la Zowɛll 3:1, 2 paam pidsgu?

¹⁴ A Zowɛll togsa koe-noogo. A wilgame tɩ tẽngã na n le sakda kood sõma. (Zow. 2:23-26) Kaoosg zugẽ me, neb wʋsg ra na n wa paama bãngr hakɩɩk Wẽnnaam zugu. Ad a Zeova sẽn yeele: “Mam na n sika m Sɩɩgã ninsaalbã buud fãa zugu: yãmb kom-dibli la y kom-pugli na n yɩɩ no-rɛɛsdba. . . . Mam na n sika m Sɩɩgã baa ne yem-daadã ne yem-pogsã zutu.” (Zow. 3:1, 2) Pa Israyɛll nebã sẽn yi Babilon n leb b tẽngẽ wã poor bilf bal la Wẽnnaam sik a sɩɩgã bɩ a vʋʋsem sõngã ye. Yɩɩ sẽn zems yʋʋm 600 poore, rat n yeel tɩ yʋʋmd 33 Pãntekotã sasa. Bõe n wilgd rẽ?

15. Wa Tʋʋm 2:16, 17 sẽn wilgdã, a Pɩyɛɛr sẽn na n lebs n togs Zowɛll 3:1 goamã, bõe la a toeem-yã? La woto wilgda bõe?

¹⁵ Pãntekotã daare, yel-solemd n zĩnd tɩ Wẽnnaam vẽneg tʋm-tʋmd a Pɩyɛɛr t’a wilg tɩ Zowɛll 3:1, 2 goamã pidsame. Baraar yibeoog wakat a 9 wã sẽnese, Wẽnnaam pʋdga a vʋʋsem sõngã neb zutu, tɩ b sɩng n “gomd Wẽnnaam bõn-kãsemsã yelle.” (Tʋʋ. 2:11) A Pɩyɛɛr sẽn na n lebs n togs a Zowɛll bãngr-gomdã baraarã, a pa lebs n togs a goamã kɛpɩ ye. Bõe la a toeem-yã? (Karm-y Tʋʋm 2:16, 17.) A pa sɩng a goamã n yeel tɩ “rẽ zugẽ,” wa a Zowɛll ye. A yeelame: “Yaoolem wakatã,” rat n yeel tɩ nand tɩ b sãam Zerizalɛm la a wẽnd-doogã, Wẽnnaam na n pʋdga a vʋʋsem sõngã “neb buud fãa zutu.” Woto wilgdame tɩ kaoosa wʋsg tɩ bãngr-gomd ning sẽn be Zowɛll 3:1, 2 wã yaool n pidsi.

16. Wãn to la Wẽnnaam vʋʋsem sõngã sõng pipi kiris-nebã koɛɛgã mooneg wɛɛngẽ? Wãn to la a sõngd tõnd rũndã-rũndã?

¹⁶ Yaa Wẽnnaam sẽn pʋdg a vʋʋsem sõngã pipi kiris-nebã zugã poor la koɛɛgã mooneg sɩng n paamd pãnga, hal n zãag zĩiga. Tʋm-tʋmd a Poll sẽn gʋls a lɛtrã n tool Kolos kiris-nebã yʋʋmd 61 wã, a goma koɛɛgã mooneg yelle, n yeel tɩ “b moona koe-no-kãng dũniyã gill zugu.” (Kol. 1:23) A Poll sẽn yeel tɩ “dũniyã gillã,” a ra gomda tẽns nins fãa sẽn da be bãmb wakatẽ wã yelle. Ne a Zeova vʋʋsem sõngã sõngre, rũndã-rũndã, koɛɛgã mooneg zãagame n yɩɩd pĩndã, hal “n tãag dũniyã tɛk fãa.”—Tʋʋ. 13:47; ges-y zĩ-gũbrã: “ Mam na n pʋdga m vʋʋsem sõngã.”

17. A Zowɛll bãngr-gomd ning sẽn gomd sʋy yellã võor yaa bõe masã?

¹⁷ Bõe n toeeme? Masã wã, d wʋmda bãngr-gomd ning sẽn be Zowɛll 2:7-9 wã võor sõma. Yaa vẽeneg tɩ vɛrse-kãens pa gomd tõnd sẽn moond koɛɛgã ne yẽesmã yell ye. Gomda Babilon sodaasã sẽn tɩ sãam Zerizalɛm yʋʋmd 607 sẽn deng a Zeezi rogmã yelle.

18. Bõe n pa toeem a Zeova nin-buiidã nengẽ?

¹⁸ Bõe n pa toeeme? A Zeova nin-buiidã ket n moonda koe-noogã zĩig fãa. B tũnugda ne tʋʋm-teed la manesem buud toor-toor n moondẽ. (Mat. 24:14) Goosneema baa ye pa tõe n gɩdg tõnd tɩ d pa moon koɛɛgã ye. Ne a Zeova sõngre, d maneg moonda Rĩungã koe-noogã ne yẽesem la ne raoodo. D ket n teega a Zeova ne sik-m-menga, n na n wʋm Biiblã bãngr-goamã võor sõma, n kɩs sɩd tɩ wakatã sã n ta, a na n sõng-d lame tɩ d “wʋm sɩdã võor zãnga.”—Zã 16:13.