1. Neb wʋsg monga b mens ne bõe, la bõe yĩng tɩ b maan woto?

A ZEOVA nin-buiidã sʋka, neb milyõ-rãmb sak n monga b mens bũmb wʋsgo. Saam-biis la saam-bi-pogs wʋsg yãka yam n pa na n kẽ kãadem ye. Sẽn kẽ-b kãadmã wʋsg yãka yam n pa na n dog kamb masã ye. Zags wʋsg me neb n yãk yam n pa na n gĩd b vɩɩmã ne bũmb wʋsg ye. Nin-kãensã fãa sẽn yãk yam n na n vɩɩmd woto wã yaa b sẽn dat n tũ a Zeova wa b sẽn tõe tɛkã yĩnga. B sũy nooma ne b vɩɩmã sẽn yaa to-to wã, la b kɩsa sɩd me t’a Zeova na n kõ-b-la bũmb nins fãa sẽn yaa tɩlɛ wã. A Zeova pa na n yĩm b yell ye! Bõe yĩng tɩ d yet woto? Bala, a Zeova ninga a Abrahaam sẽn da yaa sẽn tẽed-bã fãa ba wã barka.—Rom. 4:11.

2. a) Wa Ebre-rãmb 11:8-10, 16 sẽn wilgdã, bõe yĩng t’a Abrahaam yãk yam n yi Uur tẽngã? b) Bõe yell la d na n gom sõs-kãngã pʋgẽ?

² Baa ne a Abrahaam sẽn da tar nuura vɩɩm Uur tẽngẽ wã, a wa n yãka yam n yi n bas tẽngã. Bõe yĩnga? Bala a ra gũuda “galʋ-tẽng sẽn tar yẽbgr meng-mengã.” (Karm-y Ebre-rãmb 11:8-10, 16.) ‘Galʋ-tẽngã’ yaa bõe? Zu-loe-bʋs la a Abrahaam paam-yã, a sẽn da wa n gũudẽ tɩ b me galʋ-tẽngã? Wãn to la d tõe n maan wa a Abrahaam la neb nins sẽn tũud a mak-sõngã rũndã-rũndã wã?

3. A Abrahaam sẽn da gũud galʋ-tẽng ningã yaa bõe?

³ Galʋ-tẽngã a Abrahaam sẽn da gũudã yaa Wẽnnaam Rĩungã. Yaa a Zeezi Kirist n paas kiris-neb 144 000 sẽn paam vʋʋsem sõng zaeebã n naag taab n yaa Rĩungã. A Poll yeelame tɩ Rĩungã yaa “Wẽnnaam ning sẽn vɩ wã galʋ-tẽnga, rat n yeel tɩ saasẽ Zerizalɛmmã.” (Ebre. 12:22;  Vẽn. 5:8-10; 14:1;) A Zeezi yeela a karen-biisã tɩ b pʋʋs n kos tɩ Wẽnnaam Rĩungã wa, sẽn na yɩl tɩ Wẽnnaam raabã maan tẽngã zugu, wa sẽn maand saasẽ wã.—Mat. 6:10.

4. Wa Sɩngr 17:1, 2, 6 sẽn wilgdã, bõe la a Abrahaam ra mi galʋ-tẽngã wɛɛngẽ, rat n yeel tɩ Rĩungã Wẽnnaam sẽn pʋlmã?

⁴ Rẽ yĩnga, a Abrahaam ra mii b sẽn da na n wa sigl Wẽnnaam Rĩungã to-to wã bɩ? Ayo! Kaoosa yʋʋm wʋsg tɩ Rĩungã yɛl ra ket n yaa ‘yel-soalgdg sẽn yaa sõngo.’ (Efɛ. 1:8-10; Kol. 1:26, 27) La a Abrahaam ra mii vẽeneg t’a yagensã kẽer na n wa yɩɩ rĩm-dãmba. Bala a Zeova mengã n pʋlm-a tɩ na n yɩɩ woto. (Karm-y Sɩngr 17:1, 2, 6.) A Abrahaam ra kɩsa sɩd ne a Zeova pʋlemsã, hal tɩ ra yaa wa a nee ned ning b sẽn da na n wa zae wã, rat n yeel tɩ Mesi wã sẽn na n wa yɩ Wẽnnaam Rĩungã Rĩmã. Woto n kɩt t’a Zeezi yeel zʋɩf-rãmbã yaa: “A Abrahaam ra saagd n na n yãa mam daarã, tɩ rẽ kõ-a sũ-no-kãsenga. La a yãa ra-kãng t’a sũurã yɩ noogo.” (Zã 8:56) Yaa vẽeneg t’a Abrahaam ra miime t’a yagens n na n naag Rĩungã a Zeova sẽn da na n wa luglã. A sakame n na n gũ t’a Zeova wa pids pʋlengã.

5. Bõe n wilgd t’a Abrahaam ra gũuda galʋ-tẽngã, rat n yeel tɩ Rĩungã Wẽnnaam sẽn segl tɩ ra na n wa wã?

⁵ Bõe la a Abrahaam maan tɩ wilgdẽ t’a ra gũuda ‘galʋ-tẽngã,’ rat n yeel tɩ Rĩungã Wẽnnaam sẽn segl tɩ ra na n wa wã? Pipi, a Abrahaam pa tol n yɩ soolem baa a ye tẽng-n-biig ye. A ra yikd n toeemda tẽnga, la a yãk yam n pa na n teel ninsaalb naam ye. A leb n pa bao n na n lugl a toorẽ rĩung ye. A kell n saka a Zeova, la a ra gũud a sẽn na n wa pids a pʋlemsã. A Abrahaam sẽn maan woto wã, a wilgame t’a tẽeda a Zeova ne a sũur fãa. D gom zu-loees a wãn a sẽn paam yelle, la d ges d sẽn tõe n dɩk yam a mak-sõngã pʋgẽ to-to.

6. Uur galʋ-tẽngã ra yaa wãn to?

⁶ A Abrahaam sẽn yi n bas tẽng ningã ra yaa tẽng sẽn tar bãane, n me sõma, tɩ vɩɩmã sakdẽ. Lal-bɛd ne ko-so-zulung n da gũbg tẽngã kɩrems a tãabo, tɩ ned pa tõe n kẽ-a nana ye. Tẽngã nebã ra mii gʋlsg la  gɛɛl sõma. Wõnda leb n da yaa leebg zĩiga. Leebg sɛb wʋsg la tẽn-vaeesdbã yã be. Rotã ra mee ne tãn-koɛɛma, tɩ lalsã ning pẽntiir-pɛɛlga. Zags kẽer ra tara ro-pʋs sẽn ta 13 bɩ 14, tɩ b gãneg paave-rãmb samandẽ wã.

7. Bõe yĩng t’a Abrahaam da kɩs sɩd t’a Zeova tõe n kogla yẽ ne a zakã rãmba?

⁷ A Abrahaam ra kɩsa sɩd t’a Zeova na n kogla yẽ ne a zakã rãmba. Bõe yĩnga? Tẽeg-y t’a Abrahaam ne Saara basa Uur galʋ-tẽngã sẽn da yaa bãan la nuura zĩigã, n tɩ vɩ fu-rot pʋsẽ, Kanaã soolmã zĩ-vɩʋʋgẽ. Lal-bɛd la ko-soay sẽn na n kogl-b ra ka be ye. Rẽnd bɛɛb ra tõe n maan-b-la yell nana-nana.

8. Bõe n wa n paam a Abrahaam?

⁸ Yaa sɩd t’a Abrahaam ra maanda Wẽnnaam raabã, la wakat n wa n zĩnd tɩ yɩl n paam dɩɩb n kõ a zakã rãmb lebg maoore. Kom-kãseng n kẽ tẽng ning a Zeova sẽn kɩt t’a kẽngã. Komã wa n paama pãnga, hal t’a Abrahaam wa yãk yam n na n yik ne a zakã n kẽng n tɩ zĩnd Ezɩpt bilfu. La a sẽn wa n be Ezɩptã, a Farawõ sẽn yaa tẽngã naabã reega a pagã n dat n maan a paga. Nand t’a Zeova wa kɩt t’a Farawõ lebs a Abrahaam a pagã, mams-y n ges-y a Abrahaam yɩɩrã sẽn tog n da yaa to-to wã.—Sɩng. 12:10-19.

9. Zu-loe-bʋs n paam a Abrahaam zakã rãmb hal tɩ pa yɩ nana?

⁹ A Abrahaam zakã rãmb paama zu-loe-kɛgemse. A pag a Saara a sẽn da nong wʋsgã ra pa tar dogem ye. Rẽ yɩɩ sũ-sãang ne-b n kaoos yʋʋm wʋsgo. A Saara wa n baas n dɩka a yem-poak a Agaar n kõ a Abrahaam sẽn na yɩl tɩ b paam kamb ne yẽ maasem. La a Agaar sẽn wa n tar a Ismayɛll pʋgã, a sɩngame n paoogd a Saara. Yellã wa n tolg n zẽname, hal t’a Saara rig a Agaar t’a yi zakẽ wã.—Sɩng. 16:1-6.

10. Yel-bʋs n zĩnd a Ismaɛll la a Izaak wɛɛngẽ, tɩ ra tõe n kɩt tɩ yɩ toog ne a Abrahaam t’a kell n kɩs a Zeova sɩda?

¹⁰ A Saara wa n dɩka pʋga, t’a Abrahaam paam bi-ribl n pʋd a yʋʋr t’a Izaak. A Abrahaam ra nonga a kom-dibli a yiibã fãa, a Ismayɛll ne a Izaake. La a Ismayɛll sẽn da namsd a Izaakã yĩnga, yɩɩ tɩlɛ t’a Abrahaam rig a Ismayɛll ne a Agaar tɩ b looge. (Sɩng. 21:9-14) Kaoosg zugẽ, a Zeova wa n yeela a Abrahaam t’a rɩk a Izaak n maan maoongo. (Sɩng. 22:1, 2; Ebre. 11:17-19) Yel-kãensã a yiibã fãa pʋgẽ, ra yaa tɩlɛ t’a Abrahaam kɩs sɩd t’a Zeova na n pidsa bũmb nins a sẽn pʋlem a kom-dibli wã wɛɛngẽ wã.

11. Bõe yĩng t’a Abrahaam ra segd n tall sũ-mar n gũ a Zeova pʋlemsã pidsgu?

¹¹ Ra yaa tɩlɛ t’a Abrahaam tall sũ-mar n gũ t’a Zeova wa pids a pʋlemsã. Yẽ ne a zakã rãmb sẽn wa n yit Uurã t’a tog n da yɩɩda yʋʋm 70. (Sɩng. 11:31–12:4) A vɩɩmda fu-rotẽ na maan yʋʋm koabga, n da gilgd Kanaã soolmã pʋgẽ. A Abrahaam sẽn wa n na n maan kaalmã t’a tara yʋʋm 175. (Sɩng. 25:7) A Zeova ra pʋlma a Abrahaam t’a na n kɩtame t’a yagensã soog tẽng ning a sẽn gilg n gesã, la a pa paam n yã pʋlengã pidsg la a ki ye. A leb n pa paam n yã galʋ-tẽngã sẽn lugli, rat n yeel tɩ Wẽnnaam Rĩungã ye. Baa ne rẽ, b yeelame t’a Abrahaam ‘vɩɩmdame n kaoose, la a paama sũ-noogo.’ (Sɩng. 25:8) Baa ne a Abrahaam sẽn mao ne zu-loees wʋsgã, a kell n talla tẽeb sẽn yaa kãn-kãe, la a ra gũud a Zeova pʋlemsã pidsg ne sũ-noogo. Bõe n sõng-a t’a tõog toogo? Bala, a vɩɩmã tõre, a Zeova kogl-a lame, la a ges-a wa a zoa.—Sɩng. 15:1; Eza. 41:8; Zak 2:22, 23.

12. Bõe la d gũuda, la bõe yell la d na n gome?

 ¹² Wa a Abrahaam, tõnd me gũuda galʋ-tẽngã sẽn tar yẽbgr meng-mengã. La tõnd yẽ pa gũud a meebã ye. Bala Wẽnnaam Rĩungã lugla saasẽ yʋʋmd 1914, hal n zoe n dig a bɛɛbã fãa n yiis be. (Vẽn. 12:7-10) D gũudame masã t’a wa soog tẽngã gilli. La nananda, d segd n maoo ne zu-loees wʋsg sẽn wõnd a Abrahaam ne a Saara zu-loeesã. La rẽ yĩnga, a Zeova nin-buiidã tõogd n dɩkda a Abrahaam togs-n-taar rũndã-rũndã bɩ? Neb vɩɩm kibayã b sẽn togs Gũusg Gasgã pʋgẽ wã wilgdame tɩ rũndã-rũndã, wʋsg wilgame tɩ b tara tẽeb la sũ-mare wa a Abrahaam ne a Saara. Bɩ d gom neb a wãn yelle, la d ges yam ning d sẽn tõe n dɩk b kibayã pʋsẽ.

13. Bõe la saam-biig a Walden kibarã wilgd tõndo?

¹³ Sakd-y n mongd-y y meng bũmb kẽere. D sã n dat n lʋɩɩs Wẽnnaam galʋ-tẽngã taoor d vɩɩmã pʋgẽ, rat n yeel t’a Rĩungã, d segd n maana wa a Abrahaam sẽn sak n mong a meng bũmb wʋsg n na n ta Wẽnnaam yamã. (Mat. 6:33; Mark 10:28-30) D gom saam-biig a ye yʋʋr sẽn boond t’a Bill Walden * yelle. Yʋʋmd 1942 wã, ra keta bilf t’a Bill baas a karengã Etazĩni inivɛrsite a ye pʋgẽ, n paam dipolom n lebg arsitɛke. Yaa sasa kãng la a sɩng Biiblã zãmsg ne a Zeova Kaset rãmbã. A Bill porfesɛɛr a ye n bao tʋʋmd n bĩng-a, t’a sã n wa paam a dipolomã bal bɩ a sɩnge, la a Bill zãgsame. A wilga porfesɛɛrã t’a zãgsa tʋʋmdã, n na n paam n maan Wẽnnaam daabã ne a sũur fãa. Rẽ poor bilfu, goosneemã boola a Bill sodaarã. A zãgsame, tɩ b rogl-a yaood sẽn ta milyõ a yoobe, la b yeel t’a segd n kẽe bãens roog yʋʋm a nu. Yʋʋm a tãab poore, b yiis-a lame. B wa n bool-a-la Gileyaad lekollẽ wã. Rẽ poore, a lebga misioneer Afiriki. A wa n kẽe kãadem ne pag yʋʋr sẽn boond t’a Eva, tɩ b yiibã fãa ra yaa misioneer-dãmb Afiriki, tɩ ra yaa  tɩlɛ tɩ b sak n mong b mens bũmb kẽere. Yʋʋm a wãn poore, b leba Etazĩni n na n tɩ ges a Bill ma wã yelle. A Bill kʋmsa a vɩɩmã kibar n yeel yaa: “M sã n tags m sẽn paam n tʋm a Zeova tʋʋmdã yʋʋm 70 la zakã, m daagda sũ-noog nintãm. M nong n pʋʋsd-a-la barka, a sẽn sõng-m tɩ m dɩk a raabã maaneg n maan m tʋʋmdã.” Yãmb me tõe n dɩka Wẽnnaam daabã tɩ lebg y tʋʋmd bɩ?

14-15. Yam-bʋg la d tõe n dɩk saam-biig a Aristotelis ne a pagã kibar pʋgẽ?

¹⁴ Ra tẽ-y tɩ zu-loees pa na n zĩnd ye. A Abrahaam sẽn yã yɛl ninsã sõngda tõnd tɩ d bãng tɩ baa neb nins sẽn dɩk b vɩɩmã tõr n maand a Zeova raabã pa na n põs zu-loees ye. (Zak 1:2; 1 Pɩy. 5:9) Sɩd yɩɩ woto ne a Aristotelis Apostolidis. * A reega lisg yʋʋmd 1946, Gɛrɛs tẽngã. Yʋʋmd 1952, yẽ ne saam-bi-poak a Eleni yãka yam n na n kẽ kãadem ne taaba. B yiibã fãa bõn-daabã ra yaa tʋm Wẽnnaam tʋʋmdã ne b pãng fãa. La a Eleni wa n lʋɩɩ bãaga. Logtoɛɛmbã ges-a lame, n bãng tɩ yaa kalkõt kãnsɛɛr n tar-a. B maan-a-la wopeere. Rẽ poore, b kẽe kãadem, la yʋʋm a wãn poor bala, kãnsɛɛrã leb n waame. Logtoɛɛmbã le maana wopeere, la a Eleni lebga koamsa, n pa leb n tõe n gom sõma me ye. A kell n talla yẽesem baa ne a bãagã, la baa ne goosneemã sẽn da namsd d tẽed-n-taasã wakat kãng b tũudmã yĩngã.

¹⁵ A Aristotelis gesa a pagã yell yʋʋm 30 tõre. Wakat kãng fãa, a ra yaa kãsem-soaba, n da tʋmd tigis-kãsems sul pʋsẽ, la a sõng n me tigis-kãseng roogo. Yʋʋmd 1987 wã, a Eleni wa n moonda koɛɛgã zak noore, tɩ kʋɩleng sẽn da zɩs wʋsg lebg n pag n fão-a hal t’a pogle. A sobgame n kaoos yʋʋm a tãabo, n yaool n na n maan kaalem. A Aristotelis kʋmsa a vɩɩmã kibar n yeel yaa: “Yʋʋm-kãensã fãa, yɩɩ tɩlɛ tɩ m tall raood la m nang pãnga, zu-loeesã, toodã ne yel-lingdmã taoore. La a Zeova kõo maam pãng tɩ m tõog n mao ne zu-loe-kãensã.” (Yɩɩn. 94:18, 19) Ad a Zeova sɩd nonga neb nins fãa sẽn maand b  sẽn tõe n na n tũ-a, baa ne b sẽn maood ne zu-loeesã!

16. Sagl-bʋg la saam-biig a Knorr kõ a pagã tɩ sõng-a wʋsgo?

¹⁶ Tagsd-y sẽn wat beoogã yell wakat fãa. A Abrahaam da tagsda a Zeova sẽn na n keo-a wã yell wakat fãa, tɩ sõngd-a t’a maood ne a zu-loeesã. Saam-bi-poak a Audrey Hyde pipi sɩd a Nathan Knorr bẽe kãnsɛɛr n maan kaalem, t’a Glenn Hyde, rao ning a sẽn lebg n kẽ kãadem ne wã wa n bẽeda bãag ning b sẽn boond tɩ alzaemeerã. * Ne rẽ fãa, a Audrey modgame n da tagsd manegrã sẽn watã yelle. A yeelame tɩ bũmb la a Nathan Knorr togs yẽ semen a wãn sẽn deng a kũumã, tɩ sõng-a wʋsgo. Ad a sẽn yeelã: “A Nathan tẽega maam tɩ ‘d kũum poore, d saagrã pa na n vaale, d pa na n le wa yã toog yɛs ye.’ Rẽ poore, a sagla maam yaa: ‘Ges taoor tɩ yaa be la f keoorã be.’ . . . A paasame: ‘Ra zĩnd zaalem ye. Rɩk f vɩɩmã n maan bũmb n sõng neb a taabã. Rẽ n na n sõng-f tɩ f paam sũ-noogo.’” Ad yaa saglg sẽn zemse! D segd n tʋmda wʋsg d taabã neer yĩnga, la d ‘maand sũ-noog ne bũmb ning d sẽn saagd n na n paam beoog-daarã.’—Rom. 12:12.

17. a) Bõe yĩng tɩ d tar bʋʋm n na n tagsd beoogã yell n yɩɩda? b) Wãn to la saglg ning sẽn be Miise 7:7 wã tũub na n sõng-d tɩ d wa paam bark nins sẽn watã?

¹⁷ Rũndã-rũndã, d tara bʋʋm wʋsg n na n tagsd beoogã yell n yɩɩda. Bala, yɛl nins sẽn maandã wilgda vẽeneg tɩ d bee dũni-kãngã yaoolem wakatã baasgẽ. Ka la bilfu, d sẽn gũud tɩ Wẽnnaam Rĩungã wa soog tẽngã gillã na n pidsame. Bũmb wʋsg n na n kõ-d sũ-noogo. Wala makre, d neb nins sẽn maan kaalmã sẽn na n vʋʋgã. Sasa kãnga, a Zeova na n keoo a Abrahaam, a tẽebã la a sũ-marã yĩnga, n vʋʋg yẽ ne a zakã rãmb tẽngã zugu. Yãmb na n zĩnda be n paam n deeg-b bɩ? Y tõe n zĩnda be, la yaa y sẽn na n maan wa a Abrahaam, n sak n mong y meng bũmb wʋsg Wẽnnaam Rĩungã yĩnga, la y kell n tall tẽeb baa ne zu-loeesã, la y gũ ne sũ-mar t’a Zeova wa pids a pʋlemsã.—Karm-y Miise 7:7.