1. Bõe la a Ãdem ne a Awa bõn-yã, la waa ne bõe?

SÃ N yaa ne foo, ãnd n segd n lugl noy n wilg sẽn yaa sõma la wẽng n bake? A Ãdem ne a Awa sẽn dɩ sõma la wẽng bãngr tɩɩgã bilã, wilga vẽeneg tɩ b pa kɩs a Zeova ne a noyã sɩd ye. B yãka yam n na n bakd sẽn yaa sõmã bɩ wẽngã b toore. (Sɩng. 3:22) La ges b sẽn bõn bũmb ninsã. B sãama bãmb ne a Zeova zoodã. B bõna vɩɩm sẽn kõn sa wã me. B kɩtame tɩ b kambã la b yagensã lebg yel-wẽn-maandb la kiidba. (Rom. 5:12) A Ãdem ne a Awa yam-yãkrã waa ne namsg wʋsgo.

2-3. a) A Filip sẽn taas Etiopi ligd-gũudã koɛɛgã, a manesem yɩɩ wãna? b) D sã n deeg lisgu, bark-bʋs la d paamda? Sogs-bʋs la d na n leok sõs-kãnga pʋgẽ?

² Etiopi ligd-gũudã a Filip sẽn taas koɛɛgã manesem yɩɩ toor fasɩ ne a Ãdem la a Awa. A sũur yɩɩ noog wʋsg ne bũmb nins a Zeova ne a Zeezi sẽn maan n kõ-a wã, hal t’a reeg lisg zĩig pʋgẽ. (Tʋʋ. 8:34-38) Wa ligd-gũudã, d sã n dɩk d meng n kõ a Zeova n deeg lisgu, wilgda vẽeneg tɩ d sũur nooma ne bũmb nins yẽ ne a Zeezi sẽn maan n kõ-dã. Wilgdame me tɩ d kɩsa a Zeova sɩda, la tɩ d sakame tɩ yẽ bal n tar sor n na n lugl noy n wilg sẽn yaa sõma la wẽngã n bake.

³ Tags n ges bark nins d sẽn paamde, d sẽn tũud a Zeova wã. Wala makre, d tõe n wa paama vɩɩm sẽn kõn sa wã, la bũmb a taabã fãa a Ãdem ne a Awa sẽn bõnã. D sẽn tẽed a Zeezi wã, a Zeova kõta tõnd d yel-wẽnã sugri, la a sõngd-d  tɩ d tar sũur-kaset sẽn pa ningd-d taale. (Mat. 20:28; Tʋʋ. 10:43) D paamame me n naag a Zeova zakã rãmb sẽn tar a lohormã, n saagdẽ tɩ beoog na n yɩɩ neere. (Zã 10:14-16; Rom. 8:20, 21) Baa ne bark-kãensã sẽn yaa vẽenesã, neb kẽer sẽn bãng a Zeova yɛɛsdame n pa rat n dɩk ligd-gũudã togs-n-taar ye. Tõe tɩ yaa bõe n gɩdgd-b tɩ b pa rat n deeg lisgu? Bõe la b tõe n maane, n tõog bũmb nins sẽn gɩdgd-bã?

4-5. Zu-loe-bʋg la a Averi ne a Ana ra tara?

⁴ B pa kɩs b meng sɩd ye. A Averi roagdbã yaa a Zeova Kaset rãmba. A ba wã yaa ned sẽn get a zakã rãmb yell sõma, la kãsem-soab sẽn tʋmd sõma tɩ nebã pẽgda. La baa ne rẽ, a Averi ra yɛɛsdame n pa rat n deeg lisg ye. Bõe yĩnga? Ad a sẽn yeele: “Mam da tagsdame tɩ m pa na n tol n tõog n maan wa m ba wã ye.” A ra pa kɩs sɩd me tɩ b sã n wa kõ-a tʋʋmd tigingã pʋgẽ, a na n tõogame ye. A yeelame yaa: “M da yɛɛsda b na n wa kos-m tɩ m lʋɩ nebã taoor n pʋʋse, n wɛgs sõsga, wall n lʋɩ taoor koe-moonegã tigsg sasa.”

⁵ A Ana tara yʋʋm 18. A ra pa kɩs a meng sɩd baa bilfu. Yẽ me roagdbã yaa a Zeova Kaset rãmba. La ne rẽ fãa, a ra pa bas a yam t’a na n tõog n tũ a Zeova noyã sõma ye. Bõe yĩnga? Yaa a sẽn da pa nand a meng baa bilfã. Wakat ninga, a sũur sãamda ne a mengã hal t’a mi n wẽneg n pogend a yĩngã, tɩ rẽ maneg n kengd yellã. Ad a sẽn yeele: “M zɩ n togs ned baa a ye m sẽn maand m mengã bũmb ningã ye. Baa m roagdbã. M sẽn da maand m meng woto wã kɩtame tɩ m da getẽ t’a Zeova pa na n tol n sak tɩ m yɩ a Kaset soab ye.”

6. Bõe n da gɩdg a Vanesa t’a pa reegd lisgu?

⁶ B tũud-n-taas yĩnga. A Vanesa tara yʋʋm 22. A yeelame: “M da tara m tũud-n-taag m sẽn nong wʋsgo. D sẽn mi taab rat n taa yʋʋm piiga.”La a Vanesa zoa wã ra pa kengd a Vanesa raood lisgã reegr wɛɛngẽ ye. Yellã ra namsda a Vanesa. Ad a sẽn yeele: “Zood yõgb pa nana ne maam ye. Kɩtame tɩ m da yɛɛsdẽ tɩ d zoodã sã n sãame, m pa na n tol n le paam zoa ye.”

7. Bõe la a Makayla ra yɛɛsda, la bõe yĩnga?

⁷ B zoeta b na n wa maan yel-wẽnde. A Makayla tara yʋʋm 21. A sẽn wa n tar yʋʋm a nu, b yiisa a kẽem-bi-ribl tigingã pʋgẽ. A sẽn wa n bɩtẽ wã, a yãa a kẽemã yellã sẽn da namsd a roagdbã to-to wã. A yeelame: “M da yɛɛsdame tɩ m sã n deeg lisgu, m na n wa maana yel-wẽnd tɩ b yiis-m tigingã pʋgẽ, tɩ maneg n paas m roagdbã sũ-sãangã.”

8. Bõe la a Mayils ra yɛɛsda?

 ⁸ B zoeta b na n wa nams-ba. A Mayils tara yʋʋm 22. A ma wã pa a Zeova Kaset soab ye. Yaa a ba wã ne pag ning a sẽn lebg n kẽ kãadem ne wã n tũud a Zeova. Ad a sẽn yeele: “M zĩnda ne m ma n tãag m yʋʋm 18. Kɩtame tɩ m da yɛɛsd n pa rat n togs-a tɩ m dat n deega lisg ye. M yãa m baaba sẽn wa n lebg a Zeova Kaset soab t’a tall manesem ningã. M da yɛɛsdame tɩ na n wa waa ne yɛl n kõ-ma.”

9. Fo sã n bãng a Zeova sũ-marã la a nonglmã sẽn waoog to-to wã, tõe n kɩtame tɩ f maan bõe?

⁹ Yaa a Ãdem ne a Awa sẽn pa tõog tɩ b nonglmã ne a Zeova tall pãngã la b sẽn yãk yam n pa na n tũ-a wã. Baasgo, a Zeova basame tɩ b vɩɩmd n kaoose, hal n dog kamba, la b yãk b toorẽ noy b kambã wubr wɛɛngẽ. A Ãdem ne a Awa sẽn yãk yam n na n bas a Zeova n soog b mensã, pa kaoos la b bãng tɩ yaa yalemd ye. B bi-kãsengã kʋʋ a yao zaalem. Tarẽ-n-tarẽ, ãdem-biisã wʋsg wa n tolg n lebga nen-kɛglem dãmba, la rat-m-ye rãmba. (Sɩng. 4:8; 6:11-13) Ne rẽ fãa, a Zeova ra zoe n yãka a sẽn na n maanega, n fãag a Ãdem ne a Awa kamb la b yagens nins sẽn dat n tũ yẽ wã. (Zã 6:38-40, 57, 58) Fo sã n wɩng ne Biiblã zãmsgo, n bãngd a Zeova n paasdẽ, n ne a sũ-marã la a nonglmã sẽn waoog to-to wã, f na n maneg n nong-a lame. Na n kɩtame tɩ f rat n dɩk f meng n kõ a Zeova, n da wa maan wa a Ãdem ne a Awa ye.

10. Fo sã n bʋgs Yɩɩn-sõamyã 19:8 wã goam zugu, wãn to la na n sõng-f tɩ f tũ a Zeova?

¹⁰ Modg n ket n bãngd a Zeova n paasdẽ. Fo sã n bãngd a Zeova n paasdẽ, f na n maneg n kɩsa sɩd tɩ f na n tõog n tũ-a lame. A Averi, bi-bɩɩg ning yell d sẽn da gomã yeelame: “M wa n karma Yɩɩn-sõamyã 19:8 wã, la m bʋgs a goamã zugu, tɩ sõng-m tɩ m kɩs m meng sɩd masã.” (Karm-y-yã.) A Averi sẽn wa n sɩd neẽ tɩ vɛrse wã goam yaa sɩdã, kɩtame t’a maneg n nong Wẽnnaam. D sã n nong a Zeova,  na n kɩtame tɩ d kɩs sɩd tɩ d na n tõog n tũ-a lame. La pa rẽ bal ye. Na n kɩtame me tɩ d rat ne d sũur fãa n maan a raabã, n da wa maan bũmb n sãam a sũur ye. Ad a Ana me sẽn yeele: “Ne Biiblã kareng la a zãmsgã maasem, m wa n bãngame tɩ m sẽn pogend m yĩngã tɩ toogã kẽed-mã reeg n sãamda a Zeova sũuri.” (1 Pɩy. 5:7) Rẽ tɛka, a Ana lebga ‘koe-sakda.’ (Zak 1:22) Baasa wãna? Ad a sẽn yeele: “M sẽn wa n bãng a Zeova sakrã sẽn nafd-m to-to wã, kɩtame tɩ m maneg n nong-a. M kɩsa sɩd masã tɩ m sã n wa rat sõngr fãa, a Zeova na n sõng-m lame.” A Ana tõogame n pa le pogend a yĩngã ye. A rɩka a meng n kõ a Zeova n deeg lisgu.

11. Bõe la a Vanesa maan n paam zo-sõma, la bõe la rẽ wilgd tõndo?

¹¹ Bãng n yãk f zo-rãmbã. A Vanesa me wa n bãngame tɩ yaa a zoa wã n kɩt t’a nan pa yãk yam n na n tũ a Zeova ne a sũur fãa wã. A basa zoodã tɩ sa. La pa tek be bal ye. A maoome n yõg zood ne a tigingã neba. A wilgame t’a Nowe ne a zakã rãmb kibarã sõnga yẽ wʋsgo. A yeelame yaa: “Bãmb wakatã tɩ dũniyã ra pida ne neb sẽn pa nong a Zeova, la b zakã rãmb da tara zood sõma ne taaba.” A lisgã poore, a lebga so-pakda. Ad a sẽn yeel masã: “So-pakrã sõnga maam tɩ m paam zo-sõma m tigingã pʋgẽ, la tigims a taab pʋsẽ.” Fo-me sã n kẽes f meng wa f sẽn tõe fãa tʋʋmd ning a Zeova sẽn kõ tõndã pʋgẽ, tõe n sõng-f lame tɩ f paam zo-sõma.—Mat. 24:14.

12. Bõe rabeem n da pa tar a Ãdem ne a Awa, la waa ne bõe?

¹² Ra bas tɩ rabeemã loog nug ye. Rabeem buud n be n yaa sõma. Wala makre, segdame tɩ d zoet rabeem, n pa rat n wa maan bũmb n sãam a Zeova sũur ye. (Yɩɩn. 111:10) Rabeem a woto buudã sã n da tar a Ãdem ne a Awa, b ra pa na n kɩɩs a Zeova, n lebg tõatb ye. Bʋko, b kɩɩsame. B kɩɩsgã poore, b ninã pukame, rat n yeel tɩ b bãngame tɩ b lebga yel-wẽn-maandba. Yel-wẽnã la kũumã bal la b ra tar n na n kõ b kambã la b yagensã. B ninã sẽn puk tɩ b bãng tɩ b kɩɩsa Wẽnnaamã, rẽ masã la  yãndã yõk-ba, b sẽn yaa b zaala yĩnga, tɩ b bao vãad n sẽgne.—Sɩng. 3:7, 21.

13-14. a) Wa sẽn zems ne 1 Pɩyɛɛr 3:21 wã, bõe yĩng tɩ pa segd tɩ d zoe kũum tɩ loog noore? b) Bõe yĩng tɩ d segd n nong a Zeova?

¹³ D sã n zoet a Zeova, yaa sõma. La rabeem buud n be d sẽn pa segd n zoe. Wala makre, d pa segd n zoe kũum tɩ loog ye. Bala, a Zeova maana bũmb tɩ pak sor tɩ tõnd tõe n wa paam vɩɩm sẽn kõn sa. D sã n maan yel-wẽnde, n tek yam n kos sugr ne d sũur fãa, a Zeova na n kõ-d-la sugri. D sẽn tar tẽeb t’a Biigã sẽn ki wã ronda tõnd yel-wẽnã, a Zeova na n tika rẽ n sak n kõ-d sugri. Bũmb a ye sẽn wilgd vẽeneg tɩ d tara tẽebo, yaa d sẽn na n dɩk d meng n kõ Wẽnnaam n deeg lisgu.—Karm-y 1 Pɩyɛɛr 3:21.

¹⁴ Bʋʋm waoog sẽn segd n kɩt tɩ d nong a Zeova. Pa a sẽn kõt-d bõn-sõma wʋsg daar ne a to fãa wã yĩng bal ye. A sõngda tõnd tɩ d bãngd sɩdã yẽ mengã zugu, la d bãngd bũmb nins a sẽn dat n maanã me sõma. (Zã 8:31, 32) Ne kiris-neb tigingã maasem, a wilgda tõnd sore, la a sõngd tõndo. A sõngda tõnd d zu-loeesã pʋgẽ rũndã-rũndã menga, la a pʋlmame me tɩ beoog sẽn wate, a na n kɩtame tɩ d vɩɩmd wakat sẽn kõn sa, ne sũ-noog hakɩɩka. (Yɩɩn. 68:20; Vẽn. 21:3, 4) D sã n bʋgs bũmb nins fãa a Zeova sẽn zoe n maan tɩ wilgd t’a nonga tõndã, na n kɩtame tɩ tõnd me nong-a. D sã n nong a Zeova, d na n bɩɩsa wẽn-zoeere. Rẽ la rabeem ning sẽn yaa sõma wã. D na n zoetame n pa rat n sãam d sẽn nong a soab wʋsgã sũur ye.

15. Bõe n sõng a Makayla t’a tõog a rabeemã?

¹⁵ A Makayla sẽn wa n bãng a Zeova sugrã sẽn ta zĩig ningã, kɩtame t’a pa le yɛɛsdẽ t’a pa na n tõog n tũ-a sõma ye. Ad a sẽn yeele: “M bãngame tɩ d fãa yaa koangdba, n tudgdẽ. La m bãngame me t’a Zeova nonga tõndo, la t’a Biigã maoongã maasem yĩnga, a sakd n kõt-d-la sugri.” A sẽn nong a Zeova wã, a rɩka a meng n kõ-a n deeg lisgu.

16. Wãn to la a Mayils paam sõngre, n wa tõog a rabeemã?

¹⁶ A Mayils sẽn da yɛɛsd t’a sã n togs a ma t’a na n deega lisgu, a ma pa na n sakã, a goma ne tigims sull yel-gɛtã, n kos-a sõngre. Yẽ me ma wã ra pa a Zeova Kaset soab ye. Ad a Mayils sẽn yeele: “A sõnga maam tɩ m tags n ges m sẽn na n tɩ yeel m ma bũmb ninga, t’a bãng tɩ yaa mam meng n yãk yam n na n deeg lisgu, la tɩ pa m baaba n pirsd-m ye.” A Mayils ma wã sũur pa yɩ noog ne a yam-yãkrã ye. Wa n yɩɩ tɩlɛ meng t’a yi a ma wã zakẽ. La a kell n maana a sẽn yãk yam n na n maanã. A yeelame yaa: “M wɩnga ne Biiblã zãmsgo, n da bãngd bõn-sõma nins a Zeova sẽn maan n kõ maamã, tɩ rẽ kẽ m sũur hal sõma. M  sẽn wa n bʋgs a Zeezi maoongã zugã, m yãame t’a Zeova sɩd nonga maam wʋsgo. Woto kɩtame tɩ m dɩk m meng n kõ a Zeova n deeg lisgu.”

17. Bõe la tõnd ned kam fãa tõe n maane?

¹⁷ A Awa sẽn dɩ tɩɩgã bilã, a kɩɩsa a Ba wã. A Ãdem me sẽn naag n kɩɩs a Zeova wã, a wilgame t’a pʋd n pa nand bõn-sõma nins fãa a Zeova sẽn maan n kõ-a wã ye. Tõnd ned kam fãa tõe n wilga a Zeova tɩ d pa rat n maan wa a Ãdem ne a Awa, la tɩ d nanda bõn-sõma nins a sẽn maan n kõ-dã. D sã n deeg lisgu, wilgda a Zeova tɩ d kɩsa sɩd tɩ yaa yẽ n tar sor n na n lugl noy n wilg sẽn yaa sõma ne wẽngã n bake. Wilgdame me tɩ d nonga d Ba wã, la tɩ d kɩs-a-la sɩda.

18. Bõe n na n sõng-f tɩ f tõog n tũ a Zeova sõma?

¹⁸ D lisgã poore, bũmb ning sẽn yaa toog yaa d tõog masã n tũud a Zeova noyã daar ne a to fãa, la d ra tũud d mengã raab ye. Neb milyõ-rãmb n tõogd n maand woto. Fo-me na n tõog n maana wa bãmba, f sã n ket n zãmsd Biiblã n paasd f bãngrã, la f kẽnd tigissã wakat fãa, la f togsd f taabã bũmb nins f sẽn bãng f Ba wã zugã. (Ebre. 10:24, 25) F sã n wa segd n yãk f sẽn na n maaneg bũmb ning pʋgẽ, bɩ f tũ sagls nins a Zeova sẽn tũnugd ne a Gomdã la a siglgã n kõt foo wã. (Eza. 30:21) Rẽ, f sẽn maand fãa na n talla barka.—Yel. 16:3, 20.

19. Bõe la f segd n tẽegd wakat fãa, la bõe yĩnga?

¹⁹ Wakat fãa, fo sã n tẽegd a Zeova noyã sẽn nafd foo to-to wã, na n kɩtame tɩ f maneg n nong a Zeova la a noyã. Rẽ, bũmb kae a Sʋɩtãan sẽn na n tũnug ne n kɩt tɩ f bas a Zeova tũub ye. Mams f yamẽ f sẽn na n vɩɩmd yʋʋm tusri, n lebg n tagsd f sẽn yãk yam n deeg lisgã yelle. Hakɩɩka, f na yeel tɩ yam-yãkr kae t’a yõod le ta rẽ ye!