1. Bõe yĩng tɩ d segd n sak n tũ a Zeezi sẽn keoog-d ne bũmb ningã?

A ZEEZI bãngr-goam nins pʋgẽ a sẽn gomd yaoolem wakatã yellã, a yeelame yaa: ‘Gũus-y y mens tɩ . . . yɩɩr ne vɩɩmã yɛlã ra wa pak yãmb tɩ loog noor’ ye. (Luk 21:34) Yaa keoogr d sẽn segd n tũ ne d sũur fãa. Bõe yĩnga? Bala, wa nebã fãa, tõnd me maooda ne zu-loees buud toor-toor sẽn wat ne yɩɩre.

2. Zu-loe-bʋs la d tẽed-n-taas tar hal tɩ yaa yɩɩre?

² Wakat ning menga, zu-loeesã yaa ka tɛk n yek taaba, tɩ yaa yɩɩr wʋsgo. Ad neb a wãn kibar sẽn wilgd rẽ. D tẽed-n-taag a ye yʋʋr sẽn boond t’a Zã * ra bẽeda bã-toaag b sẽn boond tɩ ɛskelerooz hal tɩ pa nana ye. La sẽn maneg n sãam a sũurã, yaa a pagã sẽn wa n loog n bas-a wã. B zĩnda ne taab yʋʋm 19. Rẽ poore, yaa a kom-pugli a yiibã n bas a Zeova tũubu. A Boob ne a Linda yaa rao ne a paga. Bãmb zu-loeesã yɩɩ toor ne a Zã nengẽ wã. B yiibã fãa tʋʋm tiig n sãamame, tɩ yɩ tɩlɛ tɩ b yi n bas b roogã. Rẽ sẽn yãk a toogo, logtor n bãng t’a Linda bẽeda sũur bãaga. Logtorã yeelame meng tɩ tõe n tũu ne a yõore. Bãag a to me n da sɩng a yĩngã komsgo, hal t’a yĩngã pa le tõe n zab ne bãag ye.

3. Wa Filip rãmb 4:6, 7 wã sẽn yetã, d tõe n kɩsa sɩd ne bõe?

³ D tõe n kɩsa sɩd tɩ yell sã n wa namsd tõndo, a Zeova sẽn yaa d Naand la d Ba sẽn nong-dã mii d toogã sẽn ta zĩig ningã. A ratame n sõng-d tɩ d mao ne yellã. (Karm-y Filip rãmb 4:6, 7.) Pĩnd wẽn-sakdb wʋsg kibay n be Biiblã pʋgẽ, n wilgd zu-loees b sẽn paam hal tɩ ra yaa yɩɩr wʋsg ne-ba. Yaa kibay sẽn wilgd a Zeova sẽn kell n sõng-b to-to me tɩ b mao. Bɩ d lebg n tẽeg kibay a wãna.

4. Zu-loe-bʋs la a Eli paam-yã, la bõe la yẽ mengã yã?

⁴ A Eli wakatẽ wã tɩ yɛlã ra pa nana, la a Eli kell n tũu a Zeova. A paama zu-loe-kɛgemse. Wakat kãng tɩ Israyɛll rĩm ra yaa a Akaabe. A ra pa tũud a Zeova ye. A kẽe kãadem ne a Zezabɛll sẽn da yaa wẽnem soab meng-menga, la a ra pʋʋsd a Baallã. Bãmb b yiibã kɩtame t’a Baall tũudmã paam pãng tẽngã pʋgẽ. B kʋʋ a Zeova no-rɛɛsdb wʋsg me. La a Eli paam n põsame. Kom-toaag me n wa n kẽ tẽngã, t’a Eli teeg a Zeova n paam n põse. (1 Rĩm. 17:2-4, 14-16) A Eli ne a Baall no-rɛɛsdbã la neb nins sẽn da pʋʋsd a Baallã sẽn na n yek taabã me, a Eli kell n teega a Zeova. A pʋd n sagla Israyɛll nebã, n yeel-b tɩ b tũ a Zeova. (1 Rĩm. 18:21-24, 36-38) Zu-loe-kãensã fãa sasa, a mengã yãa kaset buud toor-toor sẽn wilgd t’a Zeova bee ne-a, n teend-a.

5-6. Wa 1 Rĩm-dãmb 19:1-4 sẽn wilgdã, a Eli sũ-sãangã ra taa zĩ-bʋgo? Bõe la a Zeova maan-yã, tɩ wilg t’a nonga a Eli?

⁵ Karm-y 1 Rĩm-dãmb 19:1-4. La na-pag a Zezabɛll sẽn wa n wẽen t’a na n kʋʋ a Eli wã, rabeem yõka a Eli t’a zoe n kẽng Bɛɛr-Seba soolmẽ wã. A ra komsa raoodo, hal n ‘kos kũum.’ Bõe yĩng t’a koms raood woto? Bala, yẽ me ra yaa “ninsaal wa tõndo,” n pa zems zãng ye. (Zak 5:17) Tõe tɩ yaa yaamsã la yɩɩrã n da sãag-a. Wõnda a ra tagsdame tɩ modgr nins fãa a sẽn maan tũudum hakɩɩkã na kẽng taoor yĩngã yɩɩ zaalem, la tɩ baa fʋɩ pa toeem Israyɛll tẽngẽ wã, la tɩ yaa yẽ a ye bal n ket n tũud a Zeova. (1 Rĩm. 18:3, 4, 13; 19:10, 14) Tõe tɩ d ra pa tagsd tɩ no-rɛɛs a woto na koms raood ye. La a Zeova ra wʋmda a sũurã sẽn sãam woto fãa wã võore.

⁶ A Eli sẽn wilg a sũ-sãamsã, a Zeova pa zab-a ye. A pʋd n sõng-a lame t’a le paam raoodo. (1 Rĩm. 19:5-7) A Zeova wa n maana yel-soalem sẽn wilgd a pãn-kãsengã, tɩ sõng a Eli t’a toeem a tagsgã. Rẽ poore, a tolg n togsa a Eli tɩ Israyɛll neb tus a yopoe n pa sak n na n tũ a Baalle. (1 Rĩm. 19:11-18) A Zeova sẽn maan woto wã, sɩd wilga a Eli t’a nong-a lame.

7. A Zeova sẽn sõng a Eli to-to wã kɩtame tɩ d tõe n bas d yam ne bõe?

⁷ Yell n pak yãmb hal tɩ yaa yɩɩr bɩ? Sã n yaa rẽ, d sẽn bãng t’a Zeova ra wʋmda a Eli sũurã sẽn sãam woto fãa wã võorã, kengda d raood wʋsgo. Kɩtame tɩ d tõe n bas d yam, n miẽ t’a wʋmda d zu-loeesã sẽn kɩt tɩ d sũurã sãam wʋsgã võore. A mii d sẽn tõe, la d sẽn pa tõe. A pʋd n mii d tagsa wã, la d sũ-sãangã sẽn ta zĩig ningã. (Yɩɩn. 103:14; 139:3, 4) D sã n dɩk a Eli togs-n-taar n teeg a Zeova, a na n sõng-d lame tɩ d mao ne yɛl nins sẽn pak-d hal tɩ yaa yɩɩr wʋsgã.—Yɩɩn. 55:23.

8. Wãn to la a Zeova na n sõng-y tɩ yɩɩrã ra loog-yã?

⁸ Yɩɩrã tõe n kɩtame tɩ y wa tagsdẽ tɩ y yellã pa tar tɩɩm, n koms raoodo. Sã n wa yaa woto bɩ y tẽeg t’a Zeova na n sõng-y lame, tɩ yɩɩrã ra loog-y ye. Wãn to la a na n sõng-yã? A yet-y lame tɩ y togs yẽ yellã, la y togs sẽn namsd-y to-to wã. A na n wʋma y sẽn kelemd n baood a sõngrã, n sõng-yã. (Yɩɩn. 5:4; 1 Pɩy. 5:7) Rẽ wã, pʋʋsd-y-yã-a wakat fãa, n togsd-a y zu-loeesã. Yaa sɩd t’a pa na n gom ne-y vẽeneg-vẽeneg wa a sẽn gom ne a Eli wã ye. La a na n tũnuga ne a siglgã la Biiblã n gom ne-yã. Biiblã kibayã tõe n bels-y lame, la sõng-y tɩ y ra tẽ tɩ sẽn maand kae ye. Sẽn paase, y tẽed-n-taasã tõe n kenga y raoodo.—Rom. 15:4; Ebre. 10:24, 25.

9. Wãn to la y zoa y sẽn kɩs sɩd ne tõe n sõng-yã?

⁹ A Zeova wa n yeela a Eli t’a boog a tʋʋmã n kõ a Eliize. Kell n tũu ne rẽ t’a Eli paam tũud-n-taag sẽn na n teel-a. Yaa vẽeneg t’a Eliize sõnga a Eli a sũ-sãamsã wakate. Yel-pakr wakate, tõnd me sã n dɩk n gom ne d zoa d sẽn kɩs sɩd ne, a tõe n sõng-d lame tɩ d tõog tɩ yɩɩrã ra loog-d ye. (2 Rĩm. 2:2; Yel. 18:24) Y sã n getame tɩ ned kae y sẽn tõe n dɩk y yellã n togse, pʋʋs-y-yã a Zeova t’a sõng-y tɩ y paam kiris-ned y sẽn mi t’a tẽebã bɩɩme, la t’a tõe n bãng n kenga y raoodo.

10. Wãn to la a Eli kibarã sõngd tõndo? Wãn to la bũmb ning b sẽn yeel Ezayi 40:28, 29 wã sõngd tõndo?

¹⁰ A Zeova sõnga a Eli t’a tõog tɩ yɩɩrã pa loog-a, la a kell n tũ-a yʋʋm wʋsgo. A Eli kibarã sõngda tõnd tɩ d sã n wa be yel-pakr pʋgẽ bɩ d ra tẽed tɩ sẽn maand kae ye. Wakat ninga, yɩɩrã tõe n yaa wʋsgo, hal tɩ d pa le tar yĩns keelem, la pãng bɩ raood baa bilf ye. La d sã n kell n teeg a Zeova, a na n kõ-d-la pãng la raood tɩ d tõog n kell n tũ-a.—Karm-y Ezayi 40:28, 29.

11-13. Wãn to la yɩɩr nams a Ana, a Davɩɩde, la yɩɩn-gʋlsd a ye?

¹¹ Biiblã pʋgẽ, neb a taab me sẽn tall zu-loees hal n da maand yɩɩr wʋsg yell la b gomda. Wala makre, a Ana ra pa tar rogem tɩ ra namsd-a, t’a pʋg-to wã sẽn da tar kambã ra leb n tar-a n yaandẽ. (1 Sãm. 1:2, 6) Yel-kãngã ra sãamda a Ana sũurã wʋsgo, hal t’a yãbda, tɩ rɩɩb yamleoog pa tar-a ye.—1 Sãm. 1:7, 10.

¹² Wakat n zĩnd me tɩ rĩm a Davɩɩd ra maand yɩɩr wʋsgo. Tẽeg-y zu-loees nins a sẽn paamã. A tudga naoor ka tɛka, tɩ rẽ ra namsd-a wʋsgo. (Yɩɩn. 40:13) A biig a Absalom a sẽn da nong wʋsgã wa n yik n dat n deega naamã. Wa n baasa ne a Absalom kũum. (2 Sãm. 15:13, 14; 19:1) A Davɩɩd zoa meng-meng me n zãmb-a. (2 Sãm. 16:23–17:2; Yɩɩn. 55:13-15) Yɩɩn-sõamyã nins a Davɩɩd sẽn gʋlsã wʋsg bilgda yɛlã sẽn da koms a raood to-to wã, la a sẽn kell n teeg a Zeova bũmb fãa pʋgẽ wã.—Yɩɩn. 38:6-11; 94:17-19.

¹³ Yɩɩn-gʋlsd a ye me n wa n yik n maand sũ-kiir ne nin-wẽnsã, b vɩɩmã sẽn da yaa to-to wã yĩnga. Tõe tɩ yɩɩ Levi buudã ned a Azaf yagenga. A ra tʋmda “Wẽnnaam sɛk-zĩigẽ wã.” Yɩɩrã wa n namsd-a lame, hal t’a ra pa le maand sũ-noog ne a sẽn da tarã, tɩ ra lebg sũ-sãams wʋsg ne-a. A wa n pʋd n sokda a meng n get a sẽn tũud a Zeova wã sã n pa zaalem.—Yɩɩn. 73:2-5, 7, 12-14, 16, 17, 21.

14-15. Wãn to la wẽn-sakdb a tãabã kibay sõngd tõnd tɩ d bãng d sẽn tõe n maanega, n paam t’a Zeova sõng-d yel-pakr wakate?

¹⁴ Wẽn-sakdb a tãabã fãa teega a Zeova, t’a sõng-ba. B pʋʋs-a lame, n togs b yɩɩrã fãa. B pelga b pʋg n togs-a bũmb nins sẽn kɩt tɩ b maand yɩɩrã. Sẽn paase, b ra ket n kẽnda a Zeova pʋʋsgã zĩigẽ.—1 Sãm. 1:9, 10; Yɩɩn. 55:23; 73:17; 122:1.

¹⁵ A Zeova zoee b tãabã fãa nimbãanega, n sɩd sõng-ba. A Ana paama sũur pʋgẽ bãane. (1 Sãm. 1:18) Ad a Davɩɩd me sẽn yeele: “Nin-tɩrg tõe n paama tood wʋsgo, la Sẽn-Ka-Saab n fãagd yẽnda to-kãens fãa pʋga.” (Yɩɩn. 34:20) Yɩɩn-gʋlsd a ye wã me wa n neeme tɩ yaa wa a Zeova ‘zãada yẽ nugu,’ n sagend-a ne nonglem, tɩ yaa wa a tɛt-a lame. Ad a sẽn yeel a yɩɩllã pʋgẽ: “Ne maam, tɩ pa Wẽnnaam sɛɛgẽ n tar yõodo. Mam yãka Zu-soab a Wẽnnaam tɩ b yaa mam soondg zĩiga.” (Yɩɩn. 73:23, 24, 28) Yam-bʋg la d tõe n dɩk kiba-kãensã pʋgẽ? Yel-pakr ning wakate, d tõe n wa maanda yɩɩr wʋsgo. La d sã n bʋgs a Zeova sẽn sõng neb a taab to-to wã, n pʋʋs-a n wilg-a tɩ d teeg-a lame, la d sak-a, n maan a sẽn yet tɩ d maanã, d tõogd n maoo ne d yellã.—Yɩɩn. 143:1, 4-8.

16-17. a) Yel-pakr sasa, bõe yĩng tɩ d pa segd n zãag d meng ne a Zeova la ne a nin-buiidã? b) Bõe n na n sõng-d tɩ d le paam pãng la raoodo?

¹⁶ Wẽn-sakdb a tãabã kibay wilgda tõnd bũmb a to me: Yel-pakr wakate, pa segd tɩ d zãag d meng ne a Zeova la ne a nin-buiidã ye. (Yel. 18:1) A Nansi sɩdã zoe n bas-a lame, hal tɩ ra namsd-a wʋsgo. Ad a sẽn yeele: “Naoor wʋsgo, m vẽegda beoogã n pa tol n dat n yã ned wall n gom ne ned ye. La m gũus n gesame tɩ m sã n da zãagd m meng ne nebã, m sũ-sãangã me manegd n paamda pãnga.” Yaa a Nansi sẽn wa n yãk yam n na n sõngd neb a taab me sẽn tar zu-loeesã, la a yɩɩrã boog-yã. A yeelame: “Ned sã n wa gomd a zu-loees yelle, m kelgda neere. M mikame tɩ m sã n tagsd neb a taabã la b zu-loeesã yell n yɩɩda, m pa sidgd mam mengã zu-loeesã yĩng ye.”

¹⁷ D sã n kẽnd d tigissã, d paamda pãng la raoodo. Tigissã yaa segb me a Zeova sẽn tũud ne, n sõngd tõnd la a belsd tõndo. (Yɩɩn. 86:17) Tigissã zĩigẽ, a kengda tõnd raood ne a Gomdã, a nin-buiidã la a vʋʋsem sõngã maasem. D sã n wa tigissã, d paamdame tɩ d ‘ned kam fãa tẽeb keng a to raoodo.’ (Rom. 1:11, 12) Saam-bi-poak yʋʋr sẽn boond t’a Sofɩa yeelame: “A Zeova ne m tẽed-n-taasã n sõng-m tɩ m ket n tõogd toogo. Sẽn da tar yõod ne maam n tɩ yɩɩd yaa tigissã. M wa n gũus n gesame tɩ m sã n wɩngd ne koɛɛgã mooneg la bũmb nins d sẽn maand tigissã zĩigẽ wã, yɩɩrã ne sũ-sãamsã tõogr lebgda nana n yɩɩda.”

18. D sũurã sã n wa sãam wʋsgo, bõe la a Zeova tõe n maan n sõng-do?

¹⁸ D sũurã sã n wa sãam wʋsgo, bɩ d tẽeg t’a Zeova pʋlmame t’a na n wa kɩtame tɩ d paam d mens fasɩ ne zu-loeesã sẽn wat ne yɩɩrã, la tɩ rũndã-rũndã menga, a rat n sõng-d lame tɩ d mao ne yɩɩrã. A na n kõo tõnd “raab la tõog” tɩ d mao ne tags-kɛg sẽn tõe n kɩt tɩ d koms raoodo, wall d tẽed tɩ sẽn maand kae wã.—Fili. 2:13.

19. Rom dãmb 8:37-39 wã wilgdame tɩ d tõe n basa d yam ne bõe?

¹⁹ Karm-y Rom dãmb 8:37-39. Tʋm-tʋmd a Poll yeelame tɩ d bas d yam tɩ bũmb pa tõe n welg tõnd ne Wẽnnaam nonglmã ye. La wãn to la d tõe n sõng d tẽed-n-taas nins sẽn maood ne zu-loees hal tɩ yaa yɩɩr wʋsgã? Sõsg ning sẽn pʋgdã pʋgẽ, d na n yãa d sẽn tõe n dɩk a Zeova togs-n-taar to-to, tɩ d tẽed-n-taas sã n wa maand yɩɩr b zu-loees yĩnga, bɩ d wilg tɩ d kʋmd-b lame, la d sõng-ba.