1. Wilg-y bũmb a ye sẽn kɩt tɩ d sũyã noomẽ.

D SÃ N get a Zeova nin-buiidã sõor sẽn tar paasgã, d sũur nooma hal wʋsgo! Rɩẽ, yaa sẽn yɩɩd neb milyõ 10 la d ra zãmsd Biiblã kiuug fãa. Woto wilgdame tɩ d kɩtdame tɩ d vẽenemã yãgda. Neb milyõ-rãmb n wa Kiristã kũumã tẽegr me. Sõng-b lame tɩ b bãng tɩ yaa a Zeova sẽn nong ninsaalbã yĩng la a sẽn kɩt t’a Biigã ki tɩ yɩ maoongã.—1 Zã 4:9.

2, 3. a) A Zeova nin-buiidã vẽenem yãgda baa ne bõe? b) Bõe yell la d na n gom sõs-kãnga pʋgẽ?

² A Zeova Kaset rãmbã yaa buud toɛy-toɛy neba, n gomd buud-goam toor-toore. La ne rẽ fãa, d tõog n zemsda taab yam a ye, n pẽgd a Zeova. (Vẽn. 7:9) Baa sẽn yaa tẽng ning la d be, la sẽn yaa buud-gomd ning la d gomda, d tõeeme n yãg wa “vẽenem dũniyã pʋga.”—Fili. 2:15.

³ A Zeova nin-buiidã sẽn tar fɩɩgre, b sẽn tũud-a yam a yembre, la b sẽn pa yĩmd tɩ dũniyã sɛɛb ta n saame wã fãa kɩtame t’a Zeova paamd waoogre. Wãn to? Sõs-kãnga pʋgẽ, d na n goma rẽ yelle.—Karm-y Matye 5:14-16.

4, 5. a) Koɛɛgã taasg sẽn yãk a toogo, bõe me la d tõe n maan koe-moonegã sasa n kɩt tɩ d vẽenemã yãge? b) D sã n yõgemd d noor ne nebã, la d pʋʋs-b noog-noogo, a nafa wã yaa bõe? (Ges-y sõsgã sɩngrẽ fotã.)

⁴ Yʋʋmd 1925 sigr kiuug pipi daar Gũusg Gasgã pʋgẽ, b yeelame yaa: “Yaoolem wakatã, ned pa tõe n maan sɩd ne Zu-soabã ne pʋ-peelem, . . . sã n pa a maoodame t’a sẽn paam segb fãa bɩ a kɩt t’a vẽenemã yãg ye.” Sõsgã gom-zug ra yaa: “Vẽenem sẽn yãgd lik pʋgẽ.” B paasame yaa: “Sẽn na yɩl t’a vẽenemã yãge, a tog n taasda nebã buud fãa koe-noogã, la yẽ mengã tũud vẽenemã sore.” Woto wilgda vẽeneg tɩ ne koe-noogã mooneg la karen-biisã maaneg maasem, kiris-ned kɩtdame t’a vẽenem yãge. (Mat. 28:19, 20) Sẽn paase, d sã n wa moond koɛɛgã, d yel-manesmã tõe n kɩtame t’a Zeova paam waoogre. Zagsã rãmb ne so-loaadbã geta tõndo. D sẽn yõgemded d noor ne nebã, la d pʋʋsd-b noog-noogã, sõngdame tɩ b ra tall tags-kɛg d zugu, la b bãng Wẽnnaam ning d sẽn tũudã sẽn yaa Wẽnnaam ning buudã.

⁵ A Zeezi ra yeela a karen-biisã yaa: “Y sã n wa kẽed zakẽ wã, bɩ y yeel tɩ laafɩ zĩnd ne zakã rãmba.” (Mat. 10:12) Zĩis nins a Zeezi ne a karen-biisã sẽn da moond koɛɛgã, nebã sã n da yã sãan b rignoorẽ, b ra wae n deegd-a-la b zakẽ wã. Rũndã-rũndã, nebã pa maand woto zĩis wʋsg ye. Naoor wʋsgo, nebã sã n yã sãan b zak noore, b yɛɛsdame, wall b pʋd n yik b sũuri. La d sã n yõgemd d noor ne-ba, la d gom noog-noogo, tõe n sõngame tɩ b bas b yam. Yãmb pa gũus n ges tɩ y sã n wa moond koɛɛgã ne perzãntoaar-dãmbã, y sã n yõgemd y noor ne nebã, la y pʋʋs-b noog-noogo, sõngdame tɩ b bas b yam n kolg n deeg sɛbã sɩda? Tõe n sõngame meng tɩ b sak n sõse!

6. Bõe n sõng saam-biig a ye ne a pag tɩ b ket n moond koɛɛgã baa ne b sẽn kʋʋlã?

⁶ Ãngeletɛɛre, saam-biig a ye ne a pag n kʋʋl wʋsgo, tɩ bãas me tar-b n namsdẽ, hal tɩ koɛɛgã mooneg zak-zakã lebg toogo. Lekoll n pẽ b zakã. Rẽ n so tɩ wakat ning roagdbã sẽn wat n na n dɩk b kambã sã n ta, saam-biigã ne a pagã yãkda sɛb b sẽn mi tɩ na n yɩɩ roagdbã noog n dʋʋg taabl zugu. Sɛbã yamleoog kẽe roagdb wʋsgo, tɩ b sak n deeg Les jeunes s’interrogent. Réponses pratiques volim a 1 ne a 2 wã la sɛb a taaba. B tigingã saam-bi-poak a ye sẽn yaa so-pakd n mi n wat n naagd-ba. Kambã roagdb gũus n gesame t’a gomda ne nebã noog-noogo, la tɩ nin-kẽemã ne pʋg-yãangã rata ne b sũy fãa n sõng nebã. Woto kɩtame tɩ roagd a ye sak meng n na n sɩng Biiblã zãmsgo.

7. Bõe la y tõe n maan n sõng sẽn nan wa-b yãmb tẽngẽ wã paalmã?

⁷ Yʋʋma noorã, yɩɩ tɩlɛ ne neb wʋsg tɩ b zoe n bas b ba-yiri. Bõe la y tõe n maan n sõng sẽn zoe-b n wa yãmb tẽngẽ wã tɩ b bãng a Zeova la a raabã? Y tõe n deng n bao n bãnga y sẽn tõe n pʋʋs-b to-to b buud-gomdã pʋgẽ. Zĩ-kãng wɛɛngẽ, JW Language aplikasiyõ wã tõe n sõng-y lame. Y tõeeme meng n zãms bũmb a wãn y sẽn tõe n yeel tɩ kɩt tɩ b tʋlg n kelg-yã. Woto, y tõogd n wilg-b-la video-rãmb la sɛb sẽn be jw.org pʋgẽ ne b buud-gomdã.—Tõo. 10:19.

8, 9. a) Kiris-nebã vɩɩm la b tʋʋma tigsgã sõngda tõnd tɩ d tõe n maan bõe? b) Bõe la roagdbã tõe n maane, n sõng b kambã tɩ b bãng n leok tigissã sasa?

⁸ A Zeova sõngda tõnd tɩ d paamd saglse, n tõe n bãng n taas nebã koɛɛgã tɩ kẽ-ba. Wala makre, sagls nins d sẽn paamd Kiris-nebã vɩɩm la b tʋʋma tigsgã  sasa wã. Yaa sagls sẽn sõngd tɩ d tõe n gom ne bas-m-yam, n tõe n lebg n tɩ sõs ne nebã n paase, la d tõog n sɩng Biiblã zãmsg ne-ba.

⁹ Ned sã n wa d tigsgã a pipi, naoor wʋsgo, a yetame tɩ kom-kɩdsã sẽn naagd n leokdẽ wã noom-a lame. Roagdba, sõng-y y kambã tɩ b tõe n leok ne b mens gom-biisi, tɩ rẽ, bãmb me vẽenemã yãgdame. Neb n lebg a Zeova Kaset rãmba, b sẽn wʋm kom-bõoneg sẽn gom n wilg b tẽebo, tɩ b neẽ tɩ yaa sẽn be b sũyẽ la b sẽn yetã.—1 Kor. 14:25.

10. Wãn to la zak pʋgẽ Biibl zãmsgã sõngd zak rãmb tɩ b zems-n-taarã paasdẽ?

¹⁰ D sã n maood d sẽn tõe fãa sẽn na yɩl tɩ d zakã pʋgẽ la tigingã pʋgẽ bɩ d zems-n-taarã paasdẽ, rẽ me yaa bũmb sẽn kɩtd t’a Zeova paamd waoogre. Rẽ wɛɛngẽ, bũmb sẽn tõe n sõng zak rãmb yaa roagdbã sẽn na n mao tɩ b fãa naagd taab n maand zak pʋgẽ Biibl zãmsgã n pa vaandẽ ye. Kẽer yãka yam n mi n ges JW Télédiffusion wã b zak pʋgẽ Biibl zãmsgã sasa, la b sõs rẽ zugu, n ges b sẽn tõe n tũ b sẽn wʋmã to-to. Y sã n wa maand zak pʋgẽ Biibl zãmsgã ne y kambã, bɩ y ra yĩm tɩ bi-kɩdg sẽn dat sõngr ningã ne bi-bɩɩg sẽn dat sõngr ningã pa yembr ye. Maan-y y sẽn tõe fãa tɩ bũmb nins y sẽn zãmsd zak pʋgẽ Biibl zãmsgã sasa wã nafd zakã ned kam fãa.—Yɩɩn. 148:12, 13.

11-13. Bõe la d fãa tõe n maan n paas zems-n-taarã d tigingã pʋgẽ?

¹¹ La bõe la kambã la kom-bɩɩsã tõe n maandẽ, n paam n sõng tɩ tigingã neb zems-n-taarã paasdẽ, tɩ ned fãa vẽenem yãgda? Ad bũmb a ye. Yaa b sẽn na n bao b tẽed-n-taas nins yʋʋm sẽn vẽsgã zoodo. Y tõe n sok-b lame n gese, bõe n sõng-b tɩ b tõog n kell n sak a Zeova yʋʋm wʋsg woto. B sẽn na n yeelã na n kenga y tẽebã hal sõma, la kɩt tɩ y fãa rat n mao tɩ y vẽenemã ket n yãgda. D yaa biig tɩ d yaa kãsma, d tõe n yãka yam n na n deegd nebã sõma d Rĩungã roogẽ. D sã n maand woto, na n paasa zems-n-taarã tigingã pʋgẽ. Tõe n kɩtame me tɩ sãambã sẽn wat d tigissã rat tɩ bãmb me vẽenemã yãge. D tõe n pʋʋs-b-la noog-noogo, n yõgemd d noor ne-ba, la d sõng meng tɩ b paam zĩig n zĩndi. Sõng-y-b tɩ b paam n bãng neb a taaba. Woto, b pa na n getẽ tɩ b yaa sãamb ye.

 ¹² Sẽn lʋɩt-b taoor koe-moonegã yiib tigsg sasa wã tõe n sõnga sẽn kʋʋl-bã tɩ b moon koɛɛgã sõma. Sõng-y tɩ b paam mooneg zĩig sẽn zems ne-ba. Y tõe n mi n kɩtame tɩ bi-bɩɩg naag ned sẽn kʋʋl n moone, sẽn na yɩl n teel-a. Y segd n wilgame me tɩ y kʋmda d tẽed-n-taas nins sẽn kʋʋl bɩ sẽn kẽnd ne bãase, n pa le tõe n moon koɛɛgã wa b sẽn datã. Y tẽed-n-taag kʋʋlame t’a pa kʋʋle, a tara minim wʋsg t’a pa tare, y sã n wilgdẽ t’a yell pak-y lame, na n kenga a raoodo, t’a rat n ket n moond koɛɛgã ne yẽesem.—Maan. 19:32.

¹³ Yɩɩn-gʋlsdã ra yeelame: “Ba-biis sã n be ne taaba, yaa sõama, la a bee yamleoogo!” (Karm-y Yɩɩn-sõamyã 133:1, 2.) Israyɛll nebã sẽn da be ne taabã, b paamame tɩ ra nafd-b hal sõma a Zeova tũudmã pʋgẽ. Yɩɩn-gʋlsdã maka rẽ ne kaam sẽn bʋkd yĩnga, la sẽn tar yũ-noogo. Woto me, d sã n yaa nin-bʋgsgo, la d maand d tẽed-n-taasã neere, na n kengda b raoodo, tɩ zems-n-taarã paasd tigingã pʋgẽ. Y sã n zoe n maanda woto, seka pẽgre. La rẽ yĩnga, y pa tõe n bao n bãng y tẽed-n-taasã n paas sɩda?—2 Kor. 6:11-13.

14. Bõe la y tõe n maan tɩ y vẽenemã yãg y sẽn vɩ zĩig ningã?

¹⁴ Bõe la y tõe n maan tɩ Wẽnnaam Gomdã vẽenemã yãg yãmb sẽn vɩẽ wã? Y sã n gomd ne y yagsã noog-noog la y maand-b neere, tõe n kɩtame tɩ kẽer wa rat n bao n bãng a Zeova. Bɩ d sok d meng yaa: ‘Bõe la yagsã yet mam zugu? M manegda m doogã, tɩ yaa yɩlemd wakat fãa bɩ? Yagsã pẽgdame bɩ? M mi n sõnga m yagsã bɩ?’ Y sã n wa sõsd ne y tẽed-n-taasã, y tõe n mi n sok-b-la b roagdba, b yagse, b tʋmd-n-taas wall b karen-bi-taas sẽn yeel bũmb ninga, b sẽn maand b taabã neer la b zãad b mens sõma wã yĩnga. Sãmbg kae tɩ b sẽn na n togsã na n yɩ-y-la noogo.—Efɛ. 5:9.

15. Bõe yĩng tɩ d segd n kell n gũ?

¹⁵ D sã n dat tɩ d vẽenemã ket n yãgda, yaa tɩlɛ tɩ d tẽegdẽ tɩ d bee dũniyã yaoolem wakate. A Zeezi yeela a karen-biisã naoor wʋsg tɩ b gũ. (Mat. 24:42; 25:13; 26:41) D sã n wa tẽed tɩ ‘to-kãsengã’ pa na n sɩng n mik-du, tõe n kɩtame tɩ d pa le getẽ tɩ koɛɛgã mooneg yaa tʋʋm-yãgdem ye. (Mat. 24:21) D vẽenemã na n tara boogre, hal n tõe n wa pa le yãgd ye.

16, 17. Bõe la y tõe n maane, n kell n wɩng ne gũubu?

¹⁶ Dũniyã yɛl sẽn tar kengrã, d segd n maneg n wɩnga ne gũubu. D kɩsa sɩd tɩ dũniyã sɛɛb na n yɩɩ wakat ning a Zeova sẽn yãkã. (Mat. 24:42-44) La nananda, d segd n maana sũ-mare, la d wɩng ne gũub n yɩɩd pĩndã. Karemd-y Wẽnnaam Gomdã daar fãa, la y yɩ gũus-m-meng rãmba, n wɩngd ne pʋʋsgo. (1 Pɩy. 4:7) D tẽed-n-taas nins sẽn tũud a Zeova na maan yʋʋm wʋsgã kibay tõe n naf-y lame. B vɩɩmã wilgdame tɩ yaa ne sũ-noog la b wɩngd ne gũubu, la b kɩtdẽ tɩ b vẽenemã yãgda. Wala makre, y tõe n karma saam-biig a Leonard Smith kibarã. Bee yʋʋmd 2012 tʋʋl-nif rasem 15 Gũusg Gasgã pʋgẽ, seb-neng 18-21.

¹⁷ Wɩngd-y ne a Zeova tũudmã tʋʋma, la y taabã sõngre, la y naagd y tẽed-n-taasã n maand bũmb kẽere. Rẽ fãa na n kõ-y-la sũ-noog wʋsgo, la kɩt tɩ wõnd wakatã zoeta tao-tao. (Efɛ. 5:16) Yʋʋm koabgã sẽn loogã, d tẽed-n-taasã tʋma a Zeova tũudmã tʋʋm hal wʋsgo. Ne a Zeova sõngre, d sẽn tõogd n maand rũndã-rũndã wã yɩɩda wakat kãnga. D vẽenemã yãgdame n yɩɩd d sẽn da tõe n tagsã.

18, 19. Wãn to la kãsem-dãmbã tõe n sõng tõnd tɩ d ket n wɩngd ne a Zeova tũubu? Togs-y kibare.

 ¹⁸ D sẽn mi tɩ baa ne d sẽn yaa koangdbã, d tõe n tũu a Zeova tɩ ta a yamã kengda d raoodo. A Zeova kõo tõnd “kũun” sẽn yaa rapa, rat n yeel tɩ kãsem-dãmbã, tɩ b sõngd tõndo. (Karm-y Efɛɛs-rãmb 4:8, 11, 12.) Woto wã, kãsem-dãmbã sã n wa na n kaag-yã, rɩk-y yam b nengẽ, la y maan y sẽn tõe tɩ b saglsã naf-yã.

¹⁹ Ãngeletɛɛr saam-biig ne a pag n da tar zu-loees b kãadmã pʋgẽ, n kos kãsem-dãmb a yiib sõngre. Pagã ra getame t’a sɩdã pa lʋɩt taoor n sõngd a zakã rãmb tũudmã wɛɛngẽ ye. Raoã me sak n deegame t’a pa maand a sẽn tõe fãa sẽn na yɩl tɩ zak pʋgẽ Biibl zãmsgã ra vaandẽ, la tɩ yẽ pa mi neb zãmsg ye. Kãsem-dãmbã sõng-b lame tɩ b bʋgs a Zeezi mak-sõngã zugu. B goma a Zeezi sẽn da get a karen-biisã yell neerã, n sagl saam-biigã t’a rɩk a togs-n-taare. B sagla pagã me t’a rɩk a Zeezi togs-n-taare, n maan sũ-mar ne a sɩdã. Kãsem-dãmbã wilga b yiibã fãa sẽn tõe maan to-to me n tõog n maand zak pʋgẽ Biibl zãmsgã ne b kamb a yiibã. (Efɛ. 5:21-29) Saam-biigã modgame n tũ saglsã, hal tɩ kãsem-dãmbã pẽg-a. B yeel-a lame t’a ket n wɩngdẽ, la a teeg a Zeova n paam a vʋʋsem sõngã sõngre, n tõog n sõngd a zakã rãmb tũudmã wɛɛngẽ. Kãsem-dãmbã sẽn sõng saam-biigã ne a zakã rãmb ne nonglem woto wã, kɩtame tɩ b vẽenemã ket n yãgda.

20. Y sã n kɩtdẽ tɩ y vẽenemã yãgda, a nafa wã na n yɩɩ bõe?

²⁰ Yɩɩn-gʋlsdã ra yeelame: “Sẽn zoet-b Sẽn-Ka-Saab la b kẽnd bãmb soayã zutã tara sũ-noogo.” (Yɩɩn. 128:1) Y sã n sõngd y taabã sẽn na yɩl tɩ b wa tũ Wẽnnaam, la y maand y sẽn tõe tɩ zems-n-taarã paasd y zakã pʋgẽ la y tigingã pʋgẽ, la y wɩngd ne gũubu, y kɩtdame tɩ y vẽenemã yãgda. Rẽ na n paasa y sũ-noogã. Y taabã na n yãa y tʋʋm-sõma wã, n tʋlg n waoog d Ba wã.—Mat. 5:16.